MAY kaparihoan ka ba ha mga propeta hadto? Sumala ha “Glossary of Bible Terms” han 2013 nga edisyon han New World Translation, an “propeta” nangangahulogan nga, “usa nga ha iya iginpapahayag an katuyoan han Dios. An mga propeta mga tagapagyakan han Dios, nagsusumat hira diri la han mga tagna kondi pati han mga katutdoan, sugo, ngan paghukom ni Jehova.” Bisan kon diri ka nananagna, nagyayakan ka para ha Dios pinaagi ha pagpahayag han iya Pulong.—Mat. 24:14.

Daku gud nga pribilehiyo nga sumatan an iba mahitungod han aton Dios nga hi Jehova, ngan tutdoan hira han iya kaburut-on para ha katawohan! Nakikigbahin kita hini nga buruhaton kaupod han “anghel nga nalupad ha kabutngaan han langit ngan tuna.” (Pah. 14:6) Pero bangin maibalewaray naton inin makalilipay nga pribilehiyo kon umatubang kita hin magkuri nga kahimtang. Ano an pipira hito? Bangin umabat kita hin kakapoy, panluya, ngan kawaray-pulos. Naeksperyensyahan liwat ito han mga propeta hadto, pero waray hira umundang. Ngan ginbuligan hira ni Jehova ha pagtuman han ira mga toka. Tagda an pipira nga ehemplo, ngan hibaroi kon paonan-o naton hira masusubad.

Usahay bangin kinakapoy kita tungod han mga buruhaton ha adlaw-adlaw salit waray na kita kusog ha pagministeryo. Oo, kinahanglan naton pumahuway; bisan hi Jesus ngan an iya mga apostol namahuway liwat. (Mar. 6:31) Pero hunahunaa hi Esekiel ngan an iya misyon. Nakadto hiya ha Babilonya upod han mga Israelita nga ginbihag tikang ha Jerusalem. Makausa, ginsugo hiya han Dios nga kumuha hin briks ngan iukit dida hito an syudad han Jerusalem. Ngan kinahanglan niya simboliko nga likosan an gutiay nga hinimo-himo nga syudad pinaagi ha paghigda hin pakilikid tipawala ha sulod hin 390 ka adlaw ngan tipatoo ha sulod hin 40 ka adlaw. Hi Jehova nagsiring kan Esekiel: “Kitaa, ako nagbutang hin mga gapos dida ha imo, ngan diri ka lumiso tikang ha usa nga kagiliran ngadto ha usa, ngada nga imo mahuman an mga adlaw han imo paglikos.” (Esek. 4:1-8) Sigurado nga nakuha hito an atensyon han bihag nga mga Israelita.  Ha sulod hin sobra usa ka tuig, kinahanglan buhaton ni Esekiel inin makapoy hinduro nga rutina. Paonan-o matutuman hini nga propeta an iya toka?

Nasabtan ni Esekiel kon kay ano nga ginpadara hiya sugad nga propeta. Han ginsugo hiya, an Dios nagsiring ha iya: “Kon mamati man [an mga Israelita], o kon di’ man magpakabungol-bungol la . . . mahibabaroan nira nga aada ha ira butnga in usa nga manaragna.” (Ezek. 2:5, Baraan nga Biblia) Gintigamnan gud niya an katuyoan han iya toka. Salit kinaburut-on nga ginbuhat niya an simboliko nga paglikos ha Jerusalem. Ginpamatud-an niya nga tinuod hiya nga propeta. May sumat nga nakaabot ha iya ngan ha iya mga igkasi-bihag: “An bungto hinampak”! Oo, nasantop han mga Israelita nga may kaupod hira nga propeta.—Esek. 33:21, 33.

Yana, ginpapahamangnoan naton an mga tawo mahitungod ha tiarabot nga kabungkagan han bug-os nga sistema ni Satanas. Bisan kon bangin kapoy kita ha pisikal, ginagamit naton an aton nabibilin nga kusog ha pagsangyaw han Pulong han Dios, pagbalik-bisita, ngan pagdumara hin mga pag-aram ha Biblia. Samtang natutuman an tagna may kalabotan ha kataposan hini nga sistema, nalilipay gud kita nga magin ‘usa nga nagpapahayag han katuyoan han Dios.’

Ginbubuhat naton an ngatanan ha bulig han espiritu ni Jehova; pero usahay bangin manluya kita tungod han negatibo nga reaksyon han mga tawo ha aton mensahe. Maopay nga hinumdoman naton an ehemplo ni propeta Jeremias. Gintamay hiya, gin-insulto, ngan ginpakaraot tungod han iya pagpasamwak han mensahe han Dios ha mga Israelita. Makausa, nagsiring pa ngani hi Jeremias: “Diri ko ngangaranan hiya, o diri na ako magyayakan ha iya ngaran.” Hi Jeremias may mga pagbati nga pariho ha aton. Bisan pa hito, padayon nga iginpasamwak niya an mensahe han Dios. Kay ano? Hiya nagdugang: ‘Ha akon kasingkasing sugad ito hin naglilinaga nga kalayo nga sinadhan dida ha akon mga tul-an, ngan ako ginugol-an ha pagpinugong, ngan diri ako nakakadara.’—Jer. 20:7-9.

Sugad man, kon nanluluya kita tungod han reaksyon han mga tawo ha aton mensahe, maaatohan naton ito nga pagbati pinaagi ha pagpamalandong ha mensahe nga aton iginpapasamwak. Maipapariho ito ha ‘naglilinaga nga kalayo nga sinadhan dida ha aton mga tul-an.’ An pagbasa ha Biblia kada adlaw mabulig nga padayon nga maglaga an kalayo dida ha aton.

An pipira nga Kristiano nababaraka kon nakakakarawat hira hin toka nga diri nira bug-os nga nasasabtan. Posible nga inabat ito ni propeta Hosea. Hi Jehova nagsugo ha iya: “Lakat, kuha para ha imo hin asawa nga bigaon ngan mga anak han pagkabigaon.” (Hos. 1:2) Hunahunaa an imo aabaton kon mag-aasawa ka pero ginsidngan ka han Dios nga an imo maarasawa magigin “bigaon” o puta! Gintuman ni Hosea ito nga toka. Nagin asawa niya hi Gomer, ngan nagkaanak hira hin lalaki. Katapos, nag-anak hi Gomer hin babaye ngan hin usa pa nga lalaki. Posible nga inin duha nga bata mga anak niya tungod han iya pag-adulteryo. Hi Jehova nagsiring kan Hosea nga an iya maarasawa “masunod han iya mga hinigugma.” Tigamni nga diri la usa kondi “mga hinigugma.” Katapos mabalik hiya kan Hosea. Kon ikaw an propeta, kakarawaton mo ba utro an imo asawa? Ito mismo an ginsugo ni Jehova nga buhaton ni Hosea! Ginpalit pa ngani han propeta an iya asawa ha daku nga kantidad basi maibalik ha iya.—Hos. 2:7; 3:1-5.

Posible nga naghunahuna hi Hosea kon ano an kapulsanan han pagtuman hini nga toka. Bisan pa hito, han gintuman niya an iya papel may kalabotan ha simboliko nga drama nga nahitabo mismo ha iya, ginbuligan kita ni Hosea nga masantop kon mationan-o kasakit para ha Makagarahum-ha-ngatanan an pagin diri maunungon han mga Israelita. Ngani, may pipira nga Israelita nga tangkod an kasingkasing nga binalik ha Dios.

Yana, diri na nagsusugo an Dios ha bisan hin-o nga mag-asawa hin puta. Pero may mahibabaroan ba kita ha pagin andam ni Hosea nga tumanon ito nga toka? Usa nga leksyon amo an aton pagin andam ha pagpasamwak han maopay nga sumat han Ginhadian ha “publiko ngan ha kada balay,” bisan kon para ha aton diri masayon an pagbuhat hito. (Buh. 20:20) Bangin  makuri para ha imo an pipira nga bahin han pagsangyaw han Ginhadian. Damu nga nag-aaram kaupod han mga Saksi ni Jehova an nasiring nga nalilipay hira pag-aram ha Biblia pero diri gud hira magsasangyaw ha balay-balay. Ha urhi, damu ha ira an nagtikang pagbuhat han ginhuhunahuna nira nga diri nira kaya buhaton. Hinbaroan mo ba an leksyon?

May iba pa nga leksyon nga aton hibabaroan ha pagkarawat ni Hosea hinin makuri nga toka. Puydi unta nga diri niya karawaton an iya papel ha simboliko nga drama. Mahibabaroan ba han iba nga tawo ini nga toka kon waray isurat ni Hosea ini nga asoy? Bangin magkaada liwat kita higayon nga isumat ha iba an mahitungod kan Jehova, ngan kita la an maaram hito. Naeksperyensyahan ini ni Anna, usa nga estudyante ha hayskul ha Estados Unidos. Ginsidngan hira han ira titser nga magsurat hin essay mahitungod ha pipira nga topiko o isyu nga diri nira gin-uuyonan o ira gud gintotoohan ngan kombinsihon an ira mga kaklase. Mahimo unta palabyon ni Anna ini nga higayon nga magsangyaw. Pero inabat niya nga gintagan hiya hin higayon han Dios. Tungod kay nahunahuna niya an posible nga reaksyon han iya mga kaklase, nag-ampo hiya kan Jehova, salit nagkaada hiya duro nga hingyap nga salingabuton ini nga higayon. An iya essay may tema nga “Ebolusyon: Usisaha an Ebidensya.”

Han iginpresentar ni Anna an iya essay ha klase, ginpauranan hiya hin pakiana han iya kaklase nga natoo ha ebolusyon. Malampuson nga nadepensahan ni Anna an iya gintotoohan. An iya titser binilib ha iya salit iginhatag ha iya an award para ha pinakamakakombinse nga essay. Tikang hadto, damu ka beses nga nakaistorya niya mahitungod ha paglarang an iya kaklase nga natoo ha ebolusyon. Sugad nga resulta han pagkarawat hini nga “toka” tikang kan Jehova, hi Anna nagsiring, “yana may kompyansa na ako pagsangyaw han maopay nga sumat ngan diri na ako nahahadlok.”

Bisan kon diri kita mga propeta, ha bug-os nga kahulogan hito, pinaagi ha pagsubad ha pagin andam magsakripisyo han mga propeta sugad kanda Esekiel, Jeremias, ngan Hosea, matutuman liwat naton yana an kaburut-on ni Jehova para ha aton! Durante han pagsingba han pamilya o personal nga pag-aram, mahimo ba niyo basahon an asoy mahitungod han iba pa nga propeta hadto ngan pamalandungon kon paonan-o niyo masusubad an ira ehemplo?