1-2. Paonan-o an ehemplo ni apostol Pablo makakabulig ha mga tigurang yana?

 HINIGUGMA ni apostol Pablo an iya kabugtoan. Nangalimbasog gud hiya nga mangnoan hira. (Buh. 20:31) Tungod hito, hinigugma gud hiya han kabugtoan. Makausa, ang mga tigurang tikang ha Efeso “nagpinanangis gud” han ira hinbaroan nga diri na nira hiya makikita utro. (Buh. 20:37) Ha pariho nga paagi, an aton maduruto nga mga tigurang nahigugma gud ha kabugtoan ngan ginhihimo an ngatanan basi buligan hira. (Fil. 2:16, 17) Pero usahay makuri para ha mga tigurang nga buhaton an tanan nga kinahanglan nira buhaton. Ano an makakabulig ha ira?

² Mahimo hunahunaon han aton maduruto nga mga tigurang an ehemplo ni Pablo. (1 Cor. 11:1) Tawo la hiya. Diri hiya perpekto ngan usahay nakukurian pagbuhat han tama. (Roma 7:18-20) Damu liwat an iya gin-atubang nga mga problema. Pero waray gud hiya umundang ngan waray mawara an iya kalipay. Kon susubaron han mga tigurang hi Pablo, malalamposan nira an ira mga problema ngan makakapabilin nga malipayon samtang nag-aalagad kan Jehova. Kitaon ta kon paonan-o.

3. Ano an aton uusisahon hini nga artikulo, ngan ano pa an aton mahibabaroan?

³ Hini nga artikulo, uusisahon naton an upat nga butang nga mahimo magin makuri para ha mga tigurang nga buhaton: (1) pagbalanse han ira pagsangyaw nga buruhaton ha iba pa nga responsabilidad, (2) pagin mahigugmaon nga mga paraataman, (3) pag-atubang ha kalugaringon nga mga kaluyahan, ngan (4) pag-ilob ha mga kaluyahan han iba. Hihisgotan naton kon ano an nakabulig kan Pablo ngan kon paonan-o masusubad han mga tigurang an iya ehemplo.

4. Kay ano nga bangin makuri para ha mga tigurang nga manguna ha pagsangyaw?

⁴ Kon kay ano nga mahimo ito magin makuri. Labot la han pagpanguna ha pagsangyaw, damu pa an responsabilidad han mga tigurang. Pananglitan, damu an nagsusurosaliwan ha pagin tsirman ha katirok ha midweek ngan ha pagdumara han Pag-aram ha Biblia han Kongregasyon. Bangin may iba pa hira nga toka ha pagpahayag. Damu an ira ginhihimo ha pag-train ha mga ministeryal nga surugoon ngan nalilipay hira pagdasig ha kabugtoan. (1 Ped. 5:2) May mga tigurang nga nabulig ha pagtukod ngan pagmintinar hin mga Kingdom Hall ngan hin iba nga teokratiko nga pasilidad. Bisan pa hito, pariho han tanan nga aada ha kongregasyon, an pinakaimportante nga buruhaton han tigurang amo an pagin ministro han maopay nga sumat.​—Mat. 28:19, 20.

5. Ano nga ehemplo an iginpakita ni Pablo sugad nga parasangyaw?

⁵ An ehemplo ni Pablo. Iginsumat ni Pablo kon kay nga ano nga malampuson hiya nga parasangyaw. Ha Filipos 1:10, gin-aghat kita niya: ‘Siguroha niyo an mas importante nga mga butang.’ Ginsunod ni Pablo an iya sagdon. Gintokahan hiya hin ministeryo, ngan ha sulod hin mga dekada, para ha iya ito nga ministeryo usa han mas importante nga mga butang. Nagsangyaw hiya “ha publiko ngan ha tagsa nga balay.” (Buh. 20:20) Nagsangyaw hiya diri la ha partikular nga oras han adlaw o ha usa la ka adlaw han semana. Ginsalingabot niya an tagsa nga higayon nga makasangyaw! Pananglitan, samtang naghuhulat ha iya mga kaupod ha Atenas, iginsangyaw niya an maopay nga sumat ha grupo han prominente nga mga tawo, ngan nagkaada ito mag-opay nga resulta. (Buh. 17:16, 17, 34) Bisan han priso hi Pablo, nagsangyaw hiya ha mga nakakaupod niya.​—Fil. 1:13, 14; Buh. 28:16-24.

6. Ano nga pagbansay an iginhatag ni Pablo?

⁶ Gin-gamit ni Pablo ha pinakamaopay nga paagi an iya panahon. Agsob niya paupdon an iba ha iya pagministeryo. Pananglitan, ha iya siyahan nga pagbiyahe sugad nga misyonero, igin-upod niya hi Juan Marcos, ngan ha ikaduha, hi Timoteo. (Buh. 12:25; 16:1-4) Sigurado nga nangalimbasog hi Pablo nga tutdoan ini nga kalalakin-an kon paonan-o mag-oorganisar hin kongregasyon, mag-aataman han panon, ngan magigin epektibo nga mga magturutdo.​—1 Cor. 4:17.

7. Paonan-o masusunod han mga tigurang an sagdon ni Pablo ha Efeso 6:14, 15?

⁷ Leksyon. Masusubad han mga tigurang hi Pablo diri la pinaagi ha pagsangyaw ha balay-balay kondi pinaagi liwat ha pagin andam nga magsangyaw ha tagsa nga higayon. (Basaha an  Efeso 6:14, 15.) Pananglitan, makakasangyaw hira kon namamalit o kon aadto ha ira trabaho. O kon nabulig hira ha pagtukod hin teokratiko nga mga pasilidad, makakasangyaw hira ha mga amyaw ngan parabaligya. Pariho kan Pablo, magagamit han mga tigurang an panahon nga ira igin-gagahin ha ministeryo basi i-train an iba, upod na an mga ministeryal nga surugoon.

8. Usahay, ano an bangin kinahanglan buhaton han usa nga tigurang?

⁸ An mga tigurang diri angay magin sobra ka-busy ha ira mga buruhaton ha kongregasyon o ha sirkito nga waray na hira panahon para ha pagsangyaw. Basi makapabilin nga balanse, may mga panahon nga kinahanglan magdumiri hira ha pipira nga toka. Katapos mamurubuot ngan mag-ampo, bangin mahunahuna nira nga kon kakarawaton nira an usa nga toka, mapapabay-an nira an mas importante nga mga butang. Upod hito an pagdumara hin pagsingba han pamilya kada semana, madasigon nga pakigbahin ha pagsangyaw, o pag-train ha ira mga anak hito nga buruhaton. An iba nakukurian pagdumiri ha usa nga pribilehiyo, pero makakasiguro hira nga nasasabtan ni Jehova an ira hingyap nga magin balanse ha ngatanan nga butang.

9. Ano an bangin makuri buhaton han busy nga mga tigurang?

⁹ Kon kay ano nga mahimo ito magin makuri. An katawohan ni Jehova nakakaeksperyensya hin damu nga problema. Hinin kataposan nga mga adlaw, kita ngatanan nagkikinahanglan hin pagdasig, suporta, ngan pagliaw. Ngan usahay, an iba nagkikinahanglan hin bulig basi malikyan an sayop nga panggawi. (1 Tes. 5:14) Syempre, diri kaya tanggalon han mga tigurang an ngatanan nga problema nga gin-aatubang han katawohan ni Jehova. Bisan pa hito, karuyag ni Jehova nga buhaton han mga tigurang an ira mahihimo basi dasigon ngan proteksyonan an iya mga karnero. Paonan-o an busy nga mga tigurang magkakaada panahon ha paghatag han ginkikinahanglan nga bulig?

10. Uyon ha 1 Tesalonica 2:7, paonan-o ginmangnoan ni Pablo an katawohan ni Jehova?

¹⁰ An ehemplo ni Pablo. Namiling hi Pablo hin mga paagi basi kumendasyonan ngan parig-unon an kabugtoan. Maopay nga subdon han mga tigurang an iya mahigugmaon nga ehemplo pinaagi ha pagin mapinalanggaon ngan buotan ha katawohan ni Jehova. (Basaha an 1 Tesalonica 2:7.) Ginpasarig ni Pablo an iya mga igkasi-magsiringba nga hinigugma niya hira ngan hinigugma hira ni Jehova. (2 Cor. 2:4; Efe. 2:4, 5) Gintratar ni Pablo an kabugtoan sugad nga kasangkayan ngan naghatag hin panahon ha ira. Iginpakita niya nga natapod hiya ha ira pinaagi ha pagsumat han iya ginkakabarak-an ngan mga kaluyahan. (2 Cor. 7:5; 1 Tim. 1:15) Pero waray hi Pablo magpokus ha iya mga problema. Lugod, karuyag niya buligan an kabugtoan.

11. Kay ano nga ginsagdonan ni Pablo an kabugtoan?

¹¹ May mga panahon nga kinahanglan sagdonan ni Pablo an kabugtoan. Pero waray gud niya  ito buhata tungod ha kaaringit. Nagsagdon hiya kay hinigugma niya hira ngan karuyag niya hira proteksyonan ha iba-iba nga peligro. Nangalimbasog hiya nga magin masayon masabtan an iya sagdon, ngan karuyag niya nga karawaton nira ito. Pananglitan, ha usa nga surat ha mga taga-Corinto, naghatag hi Pablo hin marig-on nga sagdon. Katapos himoon ito nga surat, ginpakadto niya ha ira hi Tito. Karuyag gud ni Pablo hibaroan an ira reaksyon ha iya surat. Nalipay gud hiya ha paghibaro nga ginkarawat nira ngan ginsunod an iya sagdon!​—2 Cor. 7:6, 7.

12. Paonan-o mapaparig-on han mga tigurang an ira mga igkasi-magsiringba?

¹² Leksyon. Masusubad han mga tigurang an ehemplo ni Pablo pinaagi ha paghatag hin panahon ha kabugtoan. Usa nga paagi ha pagbuhat hito amo an pag-abot hin temprano ha mga katirok basi magkaada makaparig-on nga pakig-istorya ha iba. Kasagaran nga pipira la ka minuto an magagamit basi maihatag an mahigugmaon nga pagdasig nga kinahanglan han usa nga bugto. (Roma 1:12; Efe. 5:16) An tigurang nga nasubad ha ehemplo ni Pablo magpaparig-on liwat ha iya mga igkasi-magsiringba pinaagi ha paggamit han Pulong han Dios basi parig-unon hira ngan pasarigon hira nga hinigugma hira han Dios. Dugang pa, iginpapahayag niya an iya gugma ha ira. Regular hiya nga nakikiistorya ha ira ngan namimiling hin mga oportunidad basi kumendasyonan hira. Kon kinahanglan niya magsagdon, iginbabase niya ito ha Pulong han Dios. Espisipiko hiya kondi buotan kay karuyag niya nga karawaton ngan sundon an iya sagdon.​—Gal. 6:1.

13. Ano an mahimo abaton han usa nga tigurang ha iya mga kaluyahan?

¹³ Kon kay ano nga mahimo ito magin makuri. An mga tigurang diri perpekto. Pariho han ngatanan, nagsasayop hira. (Roma 3:23) May mga panahon nga bangin makurian hira nga magkaada balanse nga panhunahuna ha ira mga kaluyahan. An pipira bangin magpokus hinduro ha ira pagkadiri-perpekto salit nanluluya hira. An iba naman bangin madagmit maghatag hin pasangil ha ira mga sayop, salit nagigin kampante hira ngan diri naghihimo han ginkikinahanglan nga mga pagbag-o.

14. Sumala ha Filipos 4:13, paonan-o an pagkamapainubsanon nakabulig kan Pablo nga maatubang an iya mga kaluyahan?

¹⁴ An ehemplo ni Pablo. Mapainubsanon nga ginkilala ni Pablo nga diri niya malalamposan an iya mga kaluyahan kon hiya la. Kinahanglan niya an kusog nga maihahatag han Dios. Hadto, hi Pablo pursigido ngan mabangis nga paratimaraot han mga Kristiano. Pero ha urhi, gin-amin niya an iya mga sayop ngan andam nga bag-uhon an iya disposisyon ngan personalidad. (1 Tim. 1:12-16) Ha bulig ni Jehova, hi Pablo  nagin mahigugmaon, mapinairon, ngan mapainubsanon nga paraataman. Maaram gud hiya han iya mga kaluyahan; pero ginpili niya nga sumarig ha pagpasaylo ni Jehova imbes nga magpokus ha iya mga sayop. (Roma 7:21-25) Waray hiya maglaom nga magin perpekto. Lugod, nangalimbasog gud hiya nga pauswagon an iya Kristiano nga personalidad ngan mapainubsanon nga sinarig ha bulig ni Jehova basi matuman an iya buruhaton.​—1 Cor. 9:27; basaha an Filipos 4:13.

15. Ano an angay magin balanse nga panhunahuna han mga tigurang ha ira mga kaluyahan?

¹⁵ Leksyon. Ginpili an mga tigurang diri tungod kay perpekto hira. Pero naglalaom hi Jehova nga kakarawaton nira an ira mga sayop ngan magkukultibar han Kristiano nga personalidad. (Efe. 4:23, 24) Kinahanglan usisahon han usa nga tigurang an iya kalugaringon ha bulig han Pulong han Dios ngan himoon an ginkikinahanglan nga mga pagbag-o. Kon bubuhaton niya ito, bubuligan hiya ni Jehova nga magin malipayon ngan malampuson.​—San. 1:25.

16. Ano an mahimo mahitabo kon magpokus an usa nga tigurang ha mga kaluyahan han iba?

¹⁶ Kon kay ano nga mahimo ito magin makuri. Masayon la makita han mga tigurang an kaluyahan han kabugtoan ha kongregasyon kay agsob nira hira igkaupod. Pero kon diri maghihirot an mga tigurang, mahimo hira maaringit ngan magin mapintas o kritiko. Ginpahamangnoan ni Pablo an mga Kristiano nga karuyag ni Satanas nga buhaton nira ito.​—2 Cor. 2:10, 11.

17. Ano an panhunahuna ni Pablo ha kabugtoan?

¹⁷ An ehemplo ni Pablo. Gintipigan niya an positibo nga panhunahuna ha kabugtoan. Maaram gud hiya han ira mga sayop, kay may mga panahon nga an ira mga ginbuhat nakaapekto ha iya mismo. Pero maaram hi Pablo nga diri karuyag sidngon nga tungod kay nagsayop an usa, maraot na hiya. Hinigugma niya an kabugtoan ngan nagpokus ha ira mag-opay nga kalidad. Kon nakukurian an kabugtoan ha pagbuhat han tama, ginhunahuna niya nga maopay an ira mga motibo ngan kinahanglan la nira hin bulig.

18. Ano an imo nahibaroan ha kon paonan-o ginbuligan ni Pablo hira Euodia ngan Sintike? (Filipos 4:1-3)

¹⁸ Pananglitan, hunahunaa kon paonan-o ginbuligan ni Pablo an duha nga sister ha kongregasyon ha Filipos. (Basaha an Filipos 4:1-3.) Baga hin nagkaada diri pagsinabtanay hira Euodia ngan Sintike ngan tungod hito nawara an ira pagkamagsangkay. Waray hi Pablo magin mapintas o kritiko; lugod nagpokus hiya ha ira mag-opay nga kalidad. Matinumanon hira nga mga sister nga nakahimo na hin maopay nga rekord han pag-alagad. Maaram hi Pablo nga hinigugma hira ni Jehova. An positibo nga panhunahuna ni Pablo hini nga mga sister nagpagios ha iya nga aghaton hira nga sulbaron an ira diri pagsinabtanay. Nakabulig liwat ito ha iya nga magpabilin nga malipayon ngan matipigan an marig-on nga pakigsangkay ha kabugtoan hito nga kongregasyon.

19. (a) Paonan-o matitipigan han mga tigurang an positibo nga panhunahuna ha ira mga igkasi-magsiringba? (b) Ano an imo mahibabaroan ha piktyur han tigurang nga naglilimpyo han Kingdom Hall?

 ¹⁹ Leksyon. Mga tigurang, kitaa an mag-opay nga kalidad han kabugtoan. An tagsa ha ira diri perpekto; pero an tagsa ha ira may mga kalidad nga maruruyagan naton. (Fil. 2:3) Oo, ha panapanahon bangin kinahanglan tadungon han mga tigurang an panhunahuna han usa nga bugto. Pero pariho kan Pablo, kinahanglan mangalimbasog hira nga diri magpokus ha nakakaaringit nga mga pulong ngan buhat han usa nga bugto. Lugod, maopay nga magpokus hira ha iya gugma kan Jehova, pagpailob ha pag-alagad ha Dios, ngan potensyal ha pagbuhat hin maopay. An mga tigurang nga may positibo nga panhunahuna nabulig ha kabugtoan nga umabat nga hinigugma hira han ngatanan ha kongregasyon.

20. Paonan-o an mga tigurang padayon nga makakapahimulos ha ehemplo ni Pablo?

²⁰ Makakabulig ha iyo nga mga tigurang an padayon nga pag-aram han ehemplo ni Pablo. Pananglitan, ha Watch Tower Publications Index, puydi niyo kitaon an ulohan nga “Paul” ngan katapos an sub-ulohan nga “example for elders.” Samtang ginbabasa mo an pipira nga artikulo nga nakalista didto, pakianhi an imo kalugaringon, ‘Paonan-o an ehemplo ni Pablo makakabulig ha akon nga magpabilin nga malipayon samtang gintutuman ko an akon buruhaton sugad nga tigurang?’

21. Ha ano makakasiguro an mga tigurang?

²¹ Mga tigurang, hinumdumi nga diri kamo ginhahangyo ni Jehova nga magin perpekto; ginhahangyo niya kamo nga magin matinumanon. (1 Cor. 4:2) Gin-apresyar ni Jehova an kamaduruto ngan pagkamatinumanon ni Pablo. Makakasiguro kamo nga gin-aapresyar liwat han Dios an iyo ginbubuhat ha pag-alagad ha iya. Diri gud ‘kakalimtan [ni Jehova] an iyo mga buhat ngan an gugma nga iyo iginpakita para ha iya ngaran pinaagi ha pagserbi ngan padayon nga pagserbi ha mga baraan.’​—Heb. 6:10.