1-2. Ano nga mga bendisyon an makakarawat han usa katapos niya magpabawtismo?

 USA nga kalipay an mabawtismohan ngan magin bahin han pamilya ni Jehova. Adton may sugad nga pribilehiyo mauyon han ginsiring han salmista nga hi David: “Malipayon hiya nga imo ginpipili [Jehova] ngan ginpapahirani ha imo basi umukoy ha imo mga bungsaran.”—Sal. 65:4.

² Diri gintutugotan ni Jehova nga kumadto ha iya bungsaran an bisan hin-o la. Sugad han ginhisgotan ha naglabay nga artikulo, ginpipili niya nga magin duok hadton nagpapamatuod nga karuyag nira magkaada duok nga relasyon ha iya. (San. 4:8) Kon igindidedikar mo an imo kalugaringon kan Jehova ngan nagpapabawtismo nagigin mas duok ka kan Jehova ha espesyal nga paagi. Katapos han imo bawtismo, makakasiguro ka nga ‘magbubuhos hiya ngada ha iyo hin bendisyon tubtob nga waray bisan ano nga kulang.’—Mal. 3:10; Jer. 17:​7, 8.

3. Ano an seryoso nga responsabilidad han mga Kristiano nga dedikado ngan bawtismado? (Eclesiastes 5:​4, 5)

³ Syempre, an bawtismo tinikangan pa la. Katapos mo buhaton ito nga pitad, kinahanglan mo himoon an imo pinakamaopay nga magkinabuhi uyon ha imo saad han nagdedikar ka, bisan pa kon umatubang ka hin mga pagsulay o pagsari han imo pagtoo. (Basaha an Eclesiastes 5:​4, 5.) Sugad nga disipulo ni Jesus, kinahanglan mo sundon hin maopay an iya ehemplo ngan mga sugo tubtob nga posible. (Mat. 28:​19, 20; 1 Ped. 2:21) Ini nga artikulo mabulig ha imo nga buhaton ito.

 “PADAYON NGA SUMUNOD” KAN JESUS BISAN PA HAN MGA PAGSARI NGAN PAGSULAY

4. Ha ano nga paagi an mga disipulo ni Jesus nagpapas-an hin “pasakitan nga kahoy”? (Lucas 9:23)

⁴ Katapos han bawtismo, ayaw hunahunaa nga diri ka na magkakaproblema. Ngani, ginklaro ni Jesus nga an iya mga disipulo magpapas-an hin “pasakitan nga kahoy.” Ha pagkamatuod, ira ito bubuhaton “kada adlaw.” (Basaha an Lucas 9:23.) Iginpapasabot ba ni Jesus nga an iya mga sumurunod pirme gud mag-aantos? Diri. Karuyag la niya pabug-atan nga labot han mga bendisyon nga ira maieksperyensyahan maatubang hira hin mga problema. An pipira hini nga mga problema bangin makuri gud.—2 Tim. 3:12.

5. Ano nga mga bendisyon an iginsaad ni Jesus hadton naghimo hin mga sakripisyo?

⁵ Posible nga inatubang ka na hin mga pagkontra tikang ha imo kapamilya, o bangin iginsakripisyo mo an imo materyal nga mga butang basi unahon an mga buruhaton han Ginhadian. (Mat. 6:33) Kon ito an imo sitwasyon, makakasiguro ka nga nakikita ni Jehova an imo matinumanon nga mga buhat. (Heb. 6:10) Posible nga naeksperyensyahan mo nga tinuod gud an mga pulong ni Jesus: “Waray bisan hin-o nga binaya ha balay o ha mga bugto nga lalaki o mga bugto nga babaye o nanay o tatay o mga anak o kaumhan tungod ha akon ngan tungod han maopay nga sumat an diri makakakarawat hini nga peryodo han panahon hin 100 ka pilo—mga balay, mga bugto nga lalaki, mga bugto nga babaye, mga nanay, mga anak, ngan mga uma, upod an mga pagtimaraot—ngan ha tiarabot nga sistema han mga butang, hin kinabuhi nga waray kataposan.” (Mar. 10:​29, 30) An mga bendisyon nga imo nakarawat mas labaw gud kay ha bisan ano nga mga sakripisyo nga imo ginbuhat.—Sal. 37:4.

6. Kay ano nga kinahanglan mo nga padayon nga atohan “an hingyap han unod” katapos han imo bawtismo?

⁶ Katapos han imo bawtismo kinahanglan mo la gihapon atohan “an hingyap han unod.” (1 Juan 2:16) Kay kon huhunahunaon, makasasala ka la gihapon nga tulin ni Adan. May mga panahon nga bangin abaton mo an puropariho han gin-abat ni apostol Pablo. Hiya nagsurat: “Ha akon kasingkasing nalilipay gud ako ha balaud han Dios, pero nakikita ko ha akon lawas nga may iba nga balaud nga nakikig-away ha balaud han akon hunahuna ngan naghihimo ha akon nga bihag han balaud han sala nga aadi ha akon lawas.” (Roma 7:​22, 23) Bangin manluya ka tungod han imo makasasala nga tendensya. Pero an paghunahuna han imo iginsaad kan Jehova han igindedikar mo an imo kalugaringon ha iya magpaparig-on han imo determinasyon nga atohan an pagsulay. Ito nga saad mabulig ha imo kon naatubang ka hin mga pagsulay. Paonan-o?

7. Paonan-o an pagin dedikado kan Jehova mabulig ha imo nga magpabilin nga matinumanon ha iya?

⁷ Kon nagdidedikar ka kan Jehova, iginsasalikway mo an imo kalugaringon. Nagpapasabot ini nga isasalikway mo an imo personal nga mga hingyap ngan ambisyon nga magpapasubo kan Jehova. (Mat. 16:24) Salit kon umatubang ka hin pagsari, diri mo na kinahanglan hunahunaon kon ano an imo bubuhaton. Nakagdesisyon ka na kon ano an imo bubuhaton—an magpabilin nga matinumanon kan Jehova. Magpapabilin ka nga determinado nga lipayon hi Jehova. Magigin pariho ka kan Job. Bisan pa kon inatubang hiya hin magkuri gud nga pagsari, determinado hiya nga nagsiring: “Diri ko isasalikway an akon integridad!”—Job 27:5.

8. Paonan-o an pagpamalandong ha imo pag-ampo han dedikasyon makakabulig ha imo nga atohan an pagsulay?

⁸ Pinaagi ha pagpamalandong han imo pag-ampo han dedikasyon kan Jehova, magkakaada ka kusog nga atohan an bisan ano nga pagsulay. Pananglitan, magpapakita ka ba hin romantiko nga atensyon ha asawa han iba? Diri gud!  Nagsaad ka na nga diri mo ito bubuhaton. Kon diri mo tutugotan nga magtubo an sayop nga mga pagbati, ha urhi diri ka makukurian nga wad-on ito. ‘Maisisimang’ ka tikang ha “aragian han magraot.”—Prob. 4:​14, 15.

9. Paonan-o an pagpamalandong ha imo pag-ampo han dedikasyon makakabulig liwat ha imo nga padayon nga unahon an espirituwal nga mga buruhaton?

⁹ Ano man kon may mag-offer ha imo hin trabaho nga makakaulang han imo regular nga pagtambong han Kristiano nga mga katirok? Maaram ka na han imo bubuhaton. Antes pa hito, nagdesisyon ka na nga diri karawaton an sugad nga trabaho. Salit diri mo na kinahanglan testingan kon maglalampos ba an sayop nga desisyon. An pagpamalandong han determinasyon ni Jesus nga lipayon an iya Amay, mabulig ha imo nga marig-on nga isalikway dayon an bisan ano nga maaram ka nga magpapasubo ha Dios kan kanay ka dedikado.—Mat. 4:10; Juan 8:29.

10. Paonan-o ka bubuligan ni Jehova nga “padayon nga sumunod” kan Jesus katapos han imo bawtismo?

¹⁰ Ha pagkatinuod, an mga pagsari ngan pagsulay naghahatag ha imo hin higayon nga ipakita nga determinado ka nga “padayon nga sumunod” kan Jesus. Samtang ginbubuhat mo ito, makakasiguro ka nga bubuligan ka ni Jehova. An Biblia nasiring: “An Dios matinumanon, ngan diri niya itutugot nga sulayon kamo labaw han iyo maiilob, pero kon umabot an pagsulay maghihimo liwat hiya hin paagi nga makagawas kamo basi makailob hito.”—1 Cor. 10:13.

KON PAONAN-O PADAYON NGA MASUNOD KAN JESUS

11. Ano an usa han pinakamaopay nga paagi basi padayon nga masunod hi Jesus? (Kitaa liwat an piktyur.)

¹¹ Madasigon hi Jesus, ngan nagpabilin hiya nga duok kan Jehova pinaagi ha pag-ampo. (Luc. 6:12) Ngani, usa han pinakamaopay nga paagi basi padayon mo nga masunod hi Jesus katapos han imo bawtismo amo an padayon  nga pagbuhat han mga butang nga mabulig ha imo nga magin mas duok kan Jehova. An Biblia nasiring: “Anoman nga pag-uswag an aton nahimo, padayon kita nga maglakat hin maopay ha amo gihapon nga paagi.” (Fil. 3:16) Ha panapanahon, mababatian mo an mga eksperyensya han kabugtoan nga nagdesisyon nga mas damu an buhaton ha pag-alagad kan Jehova. Bangin nag-eskwela hira ha School for Kingdom Evangelizers o binalhin ha lugar nga mas daku an panginahanglan. Kon makakahimo ka hito, maopay gud ito nga tumong. Karuyag gud han katawohan ni Jehova nga magpahaluag han ira ministeryo. (Buh. 16:9) Pero ano man kon diri ka hito yana makakahimo? Ayaw hunahunaa nga minos ka kay hadton makakahimo. An importante amo an imo pagpabilin nga mapailubon. (Mat. 10:22) Ayaw minosa an pagkaimportante han pag-alagad kan Jehova anoman an imo mga abilidad ngan kahimtang. Usa ito nga importante nga paagi basi makapadayon ka ha pagsunod kan Jesus katapos han bawtismo.—Sal. 26:1.

12-13. Ano an puydi mo buhaton kon nagtitikaluya na an imo kadasig? (1 Corinto 9:​16, 17) (Kitaa liwat an kahon nga “ Magpabilin ha Rumba.”)

¹² Ano man kon may mga panahon nga inaabat mo nga an imo mga pag-ampo sugad hin rutina na la o diri ka na nag-i-enjoy ha imo ministeryo? Ngan ano man kon an imo pagbasa han Biblia baga hin diri mo na nai-enjoy sugad hadto? Kon umabat ka hin sugad hito katapos han imo bawtismo, ayaw hunahunaa nga waray na ha imo an baraan nga espiritu ni Jehova. Diri ka perpekto nga tawo, ngan an imo mga pag-abat puydi magburobag-o. Kon nagtitikaluya an imo kadasig, pamalandonga an ehemplo ni apostol Pablo. Bisan kon nangalimbasog hiya nga subaron hi Jesus, maaram hi Pablo nga danay maabat hiya hin diri pariho nga kadasig. (Basaha 1 Corinto 9:​16, 17.) Hiya nagsiring: “Bisan pa kon mapiritan la ako pagbuhat hito,  igintapod la gihapon ha akon an pagkatinaporan.” Karuyag sidngon, determinado hi Pablo nga tumanon an iya ministeryo anoman an bangin niya abaton.

¹³ Ha pariho nga paagi, ayaw paghimo hin mga desisyon nga basado la ha kon ano an imo gin-aabat. Magin determinado nga buhaton an tama anoman an imo inaabat. Kon padayon mo nga bubuhaton an tama, maabot an panahon nga bangin magbag-o an imo inaabat. Samtang waray pa ito, an pagtipig hin maopay nga espirituwal nga rutina mabulig ha imo nga padayon nga sumunod kan Jesus katapos han bawtismo. An imo pagpabilin nga madasigon nakakadasig liwat ha imo mga igkasi-tumuroo.—1 Tes. 5:11.

“PADAYON NGA SARIHI . . . PADAYON NGA PAMATUD-I”

14. Ano an dapat mo regular nga usisahon, ngan kay ano? (2 Corinto 13:5)

¹⁴ Katapos han bawtismo, mabulig liwat ha imo an regular nga pag-usisa han imo kalugaringon. (Basaha an 2 Corinto 13:5.) Ha panapanahon, maopay nga usisahon mo kon nag-aampo ka ba kada adlaw, nagbabasa, ngan nag-aaram han Biblia, naatender ha mga katirok, ngan nakikigbahin ha ministeryo. Pamiling hin mga paagi nga ma-enjoy ngan mas magpahimulos hini nga mga buruhaton. Pananglitan, pakianhi an imo kalugaringon: ‘Maisasaysay ko ba ha iba an nangunguna nga mga katutdoan han Biblia? May mga paagi ba nga puydi ko buhaton basi mas magin makalilipay an akon ministeryo? Ano ka espisipiko an akon mga pag-ampo, ngan nagpapakita ba ito nga bug-os nga nasarig ako kan Jehova? Regular ba ako nga naatender ha Kristiano nga mga katirok? Paonan-o ko mapapauswag an akon pokus ngan partisipasyon ha mga katirok?’

15-16. Ano an imo nahibaroan ha eksperyensya han usa nga brother mahitungod ha pag-ato ha pagsulay?

¹⁵ Importante liwat nga mahibaroan mo kon ano an imo mga kaluyahan. An brother nga hi Robert nagsumat hin eksperyensya nga nagsasaysay hito nga punto: “Han mga 20 anyos ako, may-ada ako part-time nga trabaho. Usa ka adlaw katapos han trabaho, gin-imbitar ako han akon katrabaho nga babaye ngadto ha ira balay. Nagsiring hiya nga hira la didto nga duha ngan ginpaabat niya nga karuyag niya makig-sex. Ha siyahan, naghimo ako hin pipira nga pasangil, pero ha urhi nagdumiri ako ngan iginsaysay kon kay ano.” Gin-atohan ni Robert an pagsulay, ngan maopay ito. Pero ha urhi, nahunahuna niya kon ano an nahitabo ngan nasantop niya nga dapat iba unta an iya ginbuhat. Gin-amin niya: “Waray ko atohi dayon o marig-on nga isalikway an pagsulay sugad han ginbuhat ni Jose han ginsusulay hiya han asawa ni Potipar. (Gen. 39:​7-9) Ngani, nahipausa ako nga nakurian  ako pagdumiri. Ito nga hitabo nakabulig ha akon nga mahibaroan nga kinahanglan ko pa parig-unon an akon pakigsangkay kan Jehova.”

¹⁶ Mahimo ka magpahimulos kon uusisahon mo an imo kalugaringon pariho han ginbuhat ni Robert. Bisan kon naglampos ka ha pag-ato han pagsulay, pakianhi an imo kalugaringon, ‘Ano kaiha antes ako dumiri?’ Kon may makita ka nga angay pauswagon, ayaw panluya. Magin malipayon nga yana maaram ka na han imo kaluyahan. Ig-ampo ito, ngan buhata an mga butang nga magpaparig-on han imo determinasyon nga magkinabuhi uyon ha mga suruklan ni Jehova ha moral.—Sal. 139:​23, 24.

17. Ha eksperyensya ni Robert, paonan-o apektado an ngaran ni Jehova?

¹⁷ May iba pa kita nga mahibabaroan ha eksperyensya ni Robert. Nagsiring pa hiya: “Katapos ko dumiri han imbitasyon han akon katrabaho, nagsiring hiya, ‘Nakapasar ka ha akon pagtesting!’ Ginpakianhan ko hiya kon ano an iya karuyag sidngon. Siring han akon katrabaho nga may-ada hiya sangkay nga Saksi hadto, nga nagsiring ha iya nga an ngatanan nga batan-on nga Saksi sekreto nga nagbubuhat hin sala kon may higayon ha pagbuhat hito. Salit nagsiring an akon katrabaho ha iya sangkay nga iya ako titestingan. Katapos, nahunahuna ko nga maopay na gud la nga napasidunggan ko an ngaran ni Jehova.”

18. Ano an imo determinasyon katapos han imo bawtismo? (Kitaa liwat an kahon nga “ An Serye nga Imo Mai-enjoy.”)

¹⁸ Kon igdedikar mo an imo kalugaringon kan Jehova ngan magpabawtismo, iginpapakita mo nga karuyag mo baraanon an iya ngaran anoman an mahitabo. Ngan makakasarig ka nga maaram hi Jehova han mga problema nga imo gin-aatubang ngan han mga pagsulay nga imo gin-aatohan. Iya bibendisyonan an imo pangalimbasog nga magpabilin nga matinumanon. Sarig nga pinaagi han iya baraan nga espiritu, mahimo ka niya tagan hin kusog basi mabuhat ito. (Luc. 11:​11-13) Ha bulig ni Jehova, makakapadayon ka ha pagsunod kan Jesus katapos han imo bawtismo.