1, 2. (a) Kay ano nga nadadasig kita hadton matinumanon nga nagsasangyaw ha mga teritoryo diin kadam-an an diri makinarawaton? (Kitaa an retrato hini nga pahina.) (b) Ano an ginsiring ni Jesus mahitungod ha pagsangyaw ha “iya lugar”? (Kitaa an footnote.)

HIRA Sergio ngan Olinda mag-asawa nga payunir nga taga-Estados Unidos; hira nga duha sobra 80 anyos na. Hinin bag-o la, nakukurian hira paglakat tungod kay masakit an ira mga bitiis. Kondi sugad han ira ginbubuhat ha sulod hin mga dekada na, nagbabaktas hira tipakadto ha usa nga matawo nga lokasyon han ira bungto ngan nakakaabot hira didto ha ala-syete ha aga. Napwesto hira hirani ha hurulatan hin bus ngan nagtatanyag hin basado ha Biblia nga mga literatura ha mga nalabay. Ginbabalewaray la hira han kadam-an nga tawo, pero nagpapabilin la gihap hira ha ira pwesto ngan nahiyom ha mga nagkikita ha ira. Pagkaudto, hinay-hinay nga nagbabaktas hira tipauli. Kinabuwasan, ha ala-syete ha aga, aadto na liwat hira hito nga lokasyon. Inin matinumanon nga mag-asawa padayon nga nagsasangyaw didto han mensahe han Ginhadian unom ka beses ha usa ka semana, ha bug-os nga tuig.

² Pariho kanda Sergio ngan Olinda, damu nga matinumanon nga kabugtoan  ha bug-os nga kalibotan an mga dekada na nga nagsasangyaw ha ira lugar bisan kon kadam-an an diri makinarawaton. Kon ito liwat an imo sitwasyon, ginkukumendasyonan ka gud namon tungod han imo pagin mapailubon ngan pagin mapinadayunon. * An imo ehemplo ha pag-alagad kan Jehova nakakadasig gud ha damu nga kabugtoan​—bisan hadton maiha na nga nag-aalagad. Tigamni ini nga ginsiring han pipira nga paramangno han sirkito: “Kon nakakaupod ko ha ministeryo an sugad nga matinumanon nga kabugtoan, nadadasig ako han ira susbaranan.” “An ira pagin matinumanon nag-aaghat ha akon nga magin mapinadayunon ngan magin maisugon ha akon ministeryo.” “An ira susbaranan nakakabantad ngan nakakapalipay ha akon.”

3. Ano an tulo nga pakiana nga aton hihisgotan, ngan kay ano?

³ Basi maparig-on an aton determinasyon nga padayon nga suportaran an buruhaton nga igintoka ha aton ni Jesus, hisgotan naton an baton hinin tulo nga pakiana: Kay ano nga usahay bangin umabat kita hin panluya? Paonan-o kita makakapamunga? Ano an mabulig ha aton nga padayon nga mamunga nga may pagpailob?

4. (a) Ano an inabat ni Pablo ha negatibo nga reaksyon han kadam-an nga Judio? (b) Kay ano nga ito an inabat ni Pablo?

⁴ Kon inabat ka na hin panluya ha pagsangyaw ha teritoryo diin kadam-an han mga tawo an diri makinarawaton, masasabtan mo an inabat ni apostol Pablo. Durante han iya pagministeryo nga inabot hin mga 30 ka tuig, damu an iya nabuligan nga magin disipulo han Kristo. (Buh. 14:21; 2 Cor. 3:2, 3) Kondi waray hiya magin malampuson ha pagbulig ha damu nga Judio nga magin tinuod nga magsiringba. Ha kabaliktaran, damu ha ira an waray mamati ha iya ngan gintimaraot pa ngani hiya han pipira ha ira. (Buh. 14:19; 17:1, 4, 5, 13) Ano an inabat ni Pablo hiton negatibo nga reaksyon han mga Judio? Hiya nagsiring: “Nagsusumat ako han kamatuoran mahitungod han Kristo. . . . Daku gud an akon kasubo ngan pirme may kasakit ha akon kasingkasing.” (Roma 9:1-3) Kay ano nga ito an inabat ni Pablo? Tungod kay hinigugma niya an pagsangyaw nga buruhaton. Nagsangyaw hiya ha mga Judio kay hinigugma niya hira. Salit masakit gud para kan Pablo nga waray nira karawata an kalooy han Dios.

5. (a) Ano an nagpapagios ha aton nga magsangyaw? (b) Kay ano nga normal la nga usahay naabat kita hin panluya?

⁵ Pariho kan Pablo, nagsasangyaw kita ha mga tawo tungod kay hinigugma naton hira. (Mat. 22:39; 1 Cor. 11:1) Hinbaroan naton tikang ha aton eksperyensya nga damu nga bendisyon an makakarawat hadton nagdidesisyon nga mag-alagad kan Jehova. Kon nahuhunahuna naton an mga tawo ha aton teritoryo, nakakasiring kita, ‘Kon mabubuligan la unta naton hira nga makita kon ano nga mag-opay nga butang an mahimo nira mapahimulsan!’ Salit, padayon naton hira nga gin-aaghat nga mahibaro han kamatuoran mahitungod kan Jehova ngan han iya katuyoan para ha katawohan. Sugad hin nasiring kita ha aton ginsasangyawan: ‘May maopay kami nga regalo para ha imo. Alayon karawata ini.’ Salit kon diri ginkakarawat han mga tawo ito nga regalo, normal la nga umabat kita hin “kasakit ha [aton] kasingkasing.” Inaabat naton ito, diri tungod kay kulang an aton pagtoo kondi tungod kay hinigugma naton an pagsangyaw nga buruhaton. Salit bisan kon usahay naabat kita hin panluya, nagpapailob kita. Bangin umuyon kita ha ginsiring ni Elena nga sobra 25 ka tuig na nga payunir: “Nakukurian ako ha pagsangyaw. Pero ito pa gihapon an karuyag ko nga buhaton.”

6. Ano nga pakiana an aton hihisgotan, ngan paonan-o naton hibabaroan an baton?

⁶ Kay ano nga makakasiguro kita nga mahimo magin mabungahon an aton ministeryo diin man kita magsangyaw? Basi mabaton inin importante nga pakiana, usisahon naton an duha nga ilustrasyon ni Jesus diin ginhisgotan niya kon kay ano nga importante an ‘pagpamunga.’ (Mat. 13:23) An siyahan amo an ilustrasyon mahitungod han puno han ubas.

7. (a) Hin-o an ginrirepresentaran han “parauma,” han “puno han ubas,” ngan han “mga sanga”? (b) Ano nga pakiana an karuyag naton mabaton?

 ⁷ Basaha an Juan 15:1-5, 8. Tigamni an ginsiring ni Jesus ha iya mga apostol: “An akon Amay napapasidunggan kon padayon nga namumunga kamo hin damu ngan ipinapakita niyo nga akon kamo mga disipulo.” Ginhulagway ni Jesus hi Jehova sugad nga “an parauma,” an iya kalugaringon sugad nga “an totoo nga puno han ubas,” ngan an iya mga disipulo sugad nga “an mga sanga.” * Kon sugad, ano an bunga nga kinahanglan magin bunga han mga sumurunod han Kristo? Hini nga ilustrasyon, waray direkta nga unabiha ni Jesus kon ano ito nga bunga, pero may ginsiring hiya nga importante nga detalye nga mabulig ha aton nga mahibaroan an baton hito.

8. (a) Hini nga ilustrasyon, kay ano nga an bunga diri mahimo magtudlok ha bag-o nga mga disipulo? (b) May kalabotan ha mga iginpapabuhat ha aton ni Jehova, ha ano kita makakasiguro?

⁸ Hi Jesus nagsiring mahitungod han iya Amay: “An tagsa ko nga sanga nga diri namumunga iya gin-uutod.” Ha iba nga pagkayakan, kikilal-on la kita ni Jehova sugad nga iya mga surugoon kon namumunga kita. (Mat. 13:23; 21:43) Salit hini nga ilustrasyon, an bunga nga kinahanglan magin bunga han tagsa nga Kristiano diri mahimo magtudlok ha mga indibiduwal nga bangin mabuligan naton nga magin bag-o nga disipulo. (Mat. 28:19) Kay kon an bunga nagtutudlok ha bag-o nga mga disipulo, an matinumanon nga mga Saksi nga waray nabubuligan nga magin disipulo tungod kay diri makinarawaton an mga tawo ha ira teritoryo maipapariho ha mga sanga nga diri namumunga ha ilustrasyon ni Jesus. Pero diri gud ito makatadunganon! Kay ano? Kay diri naton mapipirit an mga tawo nga magin mga disipulo. Diri gud magigin uyon ha mahigugmaon nga mga paagi ni Jehova kon iya isasalikway an iya mga surugoon tungod la kay waray nira mahimo an butang nga diri man nira kaya himoon. Anoman an iginpapabuhat ha aton ni Jehova makakasiguro kita nga kaya naton ito buhaton.​—Deut. 30:11-14.

9. (a) Namumunga kita pinaagi ha pakigbahin ha ano nga buruhaton? (b) Ano nga ilustrasyon an aton hihisgotan, ngan kay ano?

⁹ Kon sugad, ano an bunga nga kinahanglan naton magin bunga? An bunga sigurado nga nagtutudlok ha usa nga buruhaton nga kaya himoon han tagsa ha aton. Ano nga buruhaton an iginhatag ni Jehova ha ngatanan niya nga surugoon? An pagsangyaw han maopay nga sumat han Ginhadian han Dios. * (Mat. 24:14) Ginpapamatud-an ito han ilustrasyon ni Jesus mahitungod han magsarabwag. Aton hisgotan inin ikaduha nga ilustrasyon.

10. (a) Hini nga ilustrasyon, ano an ginrirepresentaran han binhi ngan han tuna? (b) Ano an nagigin bunga han uhay han trigo?

¹⁰ Basaha an Lucas 8:5-8, 11-15. Ha ilustrasyon mahitungod han magsarabwag, an binhi amo “an pulong han Dios,” o an mensahe han Ginhadian. An tuna nagrirepresentar han simboliko nga kasingkasing han tawo. An binhi nga nahulog ha maopay nga tuna tinurok ngan tinubo, sidngon naton, sugad nga usa nga uhay han trigo. Katapos, “namunga [ito] hin 100 ka pilo.” Pero ano an nagigin bunga han uhay han trigo? Namumunga ba ito hin gudtiay nga mga uhay? Diri, namumunga ito hin bag-o nga mga binhi, nga ha urhi, mahimo tumubo sugad nga uhay. Hini nga ilustrasyon, an usa nga binhi namunga hin 100 nga binhi. Paonan-o ini nga bahin han ilustrasyon naaplikar ha aton ministeryo?

11. (a) Paonan-o naaplikar ha aton ministeryo an ilustrasyon mahitungod han magsarabwag? (b) Paonan-o kita namumunga hin bag-o nga mga binhi han Ginhadian?

¹¹ Basi naton makita an kaparihoan, sidngon naton nga mga tuig na an naglabay, gintutdoan kita han pipira nga Saksi o han aton Kristiano nga mga kag-anak han maopay nga sumat han Ginhadian. Nalipay gud hira han nakita nira nga makinarawaton an aton kasingkasing ha sugad-binhi nga mensahe  han Ginhadian. Pariho han maopay nga tuna ha ilustrasyon ni Jesus diin nahisabwag an binhi, ginkarawat naton an mensahe ngan gintipigan ito. Sugad nga resulta, an sugad-binhi nga mensahe han Ginhadian tinurok, tinubo, ngan nagin uhay han trigo, tubtob nga nagin andam na ito mamunga. Ngan sugad la nga an uhay han trigo namumunga, diri hin bag-o nga mga uhay kondi hin bag-o nga mga binhi, namumunga liwat kita, diri hin bag-o nga mga disipulo kondi hin bag-o nga mga binhi han Ginhadian. * Paonan-o kita namumunga hin bag-o nga mga binhi han Ginhadian? Ha tagsa nga higayon nga iginpapasamwak naton an mensahe han Ginhadian, sugad hin iginsasabwag naton an pariho nga klase han binhi nga nakatanom ha aton kasingkasing. (Luc. 6:45; 8:1) Salit ini nga ilustrasyon nagtututdo ha aton nga samtang padayon naton nga iginpapasamwak an mensahe han Ginhadian, “namumunga [kita] nga may pagpailob.”

12. (a) Ano an aton mahibabaroan ha ilustrasyon ni Jesus mahitungod han puno han ubas ngan han magsarabwag? (b) Ano an imo inaabat may kalabotan hito nga leksyon?

¹² Ano an aton mahibabaroan ha ilustrasyon ni Jesus mahitungod han puno han ubas ngan han magsarabwag? Nabulig ito ha aton nga masabtan nga an aton ‘pagpamunga’ diri nadepende ha reaksyon han mga tawo ha aton teritoryo. Lugod, nadepende ito ha aton pagin matinumanon. Gin-unabi liwat ni Pablo ito nga kamatuoran han hiya nagsiring: “An tagsa nga tawo makarawat han balos uyon ha iya ginbubuhat.” (1 Cor. 3:8) Babalosan kita ni Jehova uyon ha aton ginbubuhat, diri uyon ha resulta han aton ginbubuhat. Hi Matilda, nga 20 ka tuig na nga payunir, nagsiring: “Nalilipay ako ha paghibaro nga ginbabalosan ni Jehova an aton pangalimbasog.”

13, 14. Sumala ha Roma 10:1, 2, kay ano nga waray umundang hi Pablo ha pagsangyaw hadton negatibo an reaksyon ha mensahe han Ginhadian?

¹³ Ano an mabulig ha aton nga padayon nga mamunga nga may pagpailob? Sugad han ginhisgotan na, inabat hi Pablo hin panluya tungod han negatibo nga reaksyon han mga Judio ha mensahe han Ginhadian. Bisan pa hito, waray hiya umundang ha pagsangyaw ha ira. Tigamni an iya dugang nga ginsiring ha iya surat ha mga Kristiano ha Roma mahitungod han iya inaabat hito nga mga Judio: “An  katalwasan han mga Israelita amo gud an ginhihingyap han akon kasingkasing ngan an ginpapangamuyo ko ha Dios. Mapapamatud-an ko nga madasigon gud hira ha pag-alagad ha Dios, pero diri uyon ha husto nga kahibaro.” (Roma 10:1, 2, ftn.) Kay ano nga padayon nga nagsangyaw hi Pablo?

¹⁴ Siyahan, nagsiring hi Pablo nga napagios hiya nga padayon nga magsangyaw ha mga Judio tungod han “ginhihingyap han [iya] kasingkasing.” Hingyap gud niya nga matalwas an mga Judio. (Roma 11:13, 14) Ikaduha, gin-unabi ni Pablo an iya pangamuyo ha Dios para ha ira. Nangamuyo hiya ha Dios pinaagi ha pag-ampo nga buligan an tagsa nga Judio nga karawaton an mensahe han Ginhadian. Ikatulo, hi Pablo nagsiring: “Madasigon gud hira ha pag-alagad ha Dios.” Ginkita niya an mag-opay nga kalidad han mga tawo pati an ira potensyal nga magin magsiringba ni Jehova. An kadasig, kon may husto nga giya, makakabulig ha sinsero nga mga tawo nga magin madasigon nga disipulo han Kristo, sugad han naeksperyensyahan mismo ni Pablo.

15. Paonan-o naton masusubad hi Pablo? Paghatag hin mga ehemplo.

¹⁵ Paonan-o naton masusubad hi Pablo? Siyahan, kinahanglan mangalimbasog kita nga padayon nga magkaada hingyap ha pagpamiling hadton “may husto nga disposisyon basi magkaada kinabuhi nga waray kataposan.” Ikaduha, nanginginyupo kita kan Jehova pinaagi ha pag-ampo nga abrihan an kasingkasing han sinsero nga mga tawo. (Buh. 13:48; 16:14) Hi Silvana, nga haros 30 ka tuig na nga payunir, nagsiring, “Antes ako kumadto ha usa nga balay ha akon teritoryo, nag-aampo ako kan Jehova nga tagan ako niya hin positibo nga panhunahuna.” Nag-aampo liwat kita ha Dios nga giyahan kita han mga anghel nga mabilngan an sinsero nga mga tawo. (Mat. 10:11-13; Pah. 14:6) Hi Robert, nga sobra 30 ka tuig na nga payunir, nagsiring, “Nalilipay gud ako ha pagministeryo kaupod han mga anghel nga maaram kon ano an kahimtang han tagbalay.” Ikatulo, nangangalimbasog kita nga kitaon an mag-opay nga kalidad han mga tawo pati an ira potensyal nga magin magsiringba ni Jehova. Hi Carl, usa nga tigurang nga sobra 50 ka tuig na nga bawtismado, nagsiring, “Namimiling ako hin bisan gutiay nga tigaman nga mahimo magpakita han sinseridad han usa nga tawo, pananglitan, an iya hiyom, buotan nga pamahongpahong, o sinsero nga pakiana.” Oo, pariho kan Pablo, makakapamunga kita nga may pagpailob.

16, 17. (a) Ano nga leksyon an aton mahibabaroan ha Eklesiastes 11:6? (b) Paghatag hin ehemplo kon paonan-o an aton pagsangyaw mahimo makaapekto ha mga nag-oobserbar ha aton.

¹⁶ Bisan kon baga hin diri nakakaabot ha kasingkasing han mga tawo an mensahe han Ginhadian nga aton iginsasangyaw, diri naton sadang minuson an epekto han aton pagsabwag nga buruhaton. (Basaha an Eklesiastes 11:6.) Oo, damu an diri namamati ha aton, pero gin-oobserbaran kita nira. Nakikita nira an aton limpyo nga pamado, pagin matinalahuron, ngan pagin makisangkayon. Ha urhi, an aton panggawi mahimo makabulig ha iba nga masantop nga sayop ngay-an an ira ginhuhunahuna ha aton. Nakita nira Sergio ngan Olinda, nga gin-unabi ha tinikangan, an sugad nga pagbag-o.

¹⁷ Hi Sergio nagsiring: “Tungod han sakit, waray anay kami makakadto ha amon ginpupwestohan. Han nakabalik na kami, an mga nalabay napakiana ha amon, ‘Ano an nahitabo ha iyo? Namingaw kami ha iyo.’” Hi Olinda mahiyom-hiyom nga nagsiring: “An mga drayber han bus nakaway ha amon ngan an pipira naguliat tikang ha ira sarakyan, ‘Maopay ito!’ Nangaro pa ngani hira han aton mga magasin.” Ngan nahipausa gud an mag-asawa han may dumaop ha ira nga lalaki ngan naghatag hin bukad ngan nagpasalamat ha ira tungod han ira ginbubuhat.

18. Kay ano nga determinado ka nga ‘mamunga nga may pagpailob’?

¹⁸ Oo, samtang diri naton ‘ginhahawiran an aton kamot’ ha pagsabwag han binhi han Ginhadian, may-ada kita importante nga bahin ha paghatag hin “pamatuod ha ngatanan nga nasud.” (Mat. 24:14) Labaw ha ngatanan, nalilipay gud kita ha paghibaro nga gin-uuyonan kita ni Jehova, kay hinigugma niya adton “namumunga nga may pagpailob”!