1. Ano nga ehemplo an iginpakita ni Jesus ha iya mga sumurunod, ngan ano an ira ginbuhat? (Kitaa an retrato ha kobre.)

HI Jesus nagpabilin nga positibo ha bug-os niya nga pagministeryo dinhi ha tuna, ngan ito liwat an karuyag niya para ha iya mga sumurunod. (Juan 4:35, 36) Han kaupod pa hi Jesus han iya mga disipulo, madasigon hira ha pagsangyaw. (Luc. 10:1, 5-11, 17) Pero han gin-aresto ngan ginpatay hiya, an mga disipulo temporaryo nga nawad-an han ira kadasig ha pagsangyaw. (Juan 16:32) Kabanhaw ni Jesus, gin-aghat niya hira nga magpokus ha pagsangyaw. Ngan han sinaka na hiya ha langit, madasigon gud hira nga nagsangyaw salit nagreklamo an ira mga kaaway: “Kitaa! ginpuno niyo an Jerusalem han iyo katutdoan.”​—Buh. 5:28.

2. Paonan-o ginbibendisyonan ni Jehova an pagsangyaw nga buruhaton?

² Gin-giyahan ni Jesus an siyahan-siglo nga mga Kristiano ha ira pagsangyaw, ngan ginbendisyonan hira ni Jehova salit nagdamu hira. Pananglitan han Pentekostes 33 C.E., mga 3,000 an nabawtismohan. (Buh. 2:41) Ngan padayon nga nagtikadamu an mga disipulo. (Buh. 6:7) Pero igintagna ni Jesus nga mas damu pa an makarawat han maopay nga sumat ha kataposan nga mga adlaw.​—Juan 14:12; Buh. 1:8.

3-4. Kay ano nga ha iba nga lugar bangin makuri an pagsangyaw, ngan ano an aton hihisgotan hini nga artikulo?

³ Kita ngatanan nangangalimbasog nga magpabilin nga positibo ha ministeryo. Ha iba nga mga nasud, masayon ito himoon. Kay ano? Kay damu gud an interesado ha pagpa-Bible study salit an pipira ha ira kinahanglan maghulat tubtob nga may Saksi nga magdudumara na ha ira hin pag-aram! Pero ha iba nga mga nasud, mas nakukurian an mga magwarali ha pagsangyaw; an mga tawo talagsa la maabtan ha ira balay, ngan adton aada ha ira balay bangin diri masyado interesado ha Biblia.

⁴ Kon naukoy ka ha lugar nga makuri an pagsangyaw, posible gud nga mabuligan ka han mga suhestyon hini nga artikulo. Hihisgotan  naton kon ano an ginbubuhat han iba basi mas damu nga tawo an ira masangyawan. Ngan aton uusisahon kon kay ano nga makakapabilin kita nga positibo kumarawat man an mga tawo ha aton mensahe o diri.

5. Ano nga mga ayat an gin-aatubang han damu nga Saksi?

⁵ Nagtitikakuri para ha damu nga Saksi nga makaistorya an mga tawo ha ira balay. May mga magwarali nga naukoy ha mga lugar nga damu an apartment o subdibisyon nga istrikto an seguridad. Bangin may-ada ito security guard nga diri napasulod ha bisan hin-o kon waray permiso tikang ha usa nga naukoy didto. May mga magwarali naman nga masayon nga nakakasangyaw ha balay-balay, pero gutiay la nga mga tawo an ira naaabtan ha ira balay. An iba nga magwarali naman nagsasangyaw ha higrayo o interyor nga lugar nga gutiay la an naukoy. Bangin magbiyahe hira hin hirayo para la bisitahon an usa nga tagbalay​—nga bangin waray pa ngani ha iya balay! Kon sugad hito an aton teritoryo, kinahanglan padayon kita nga magsangyaw. Ano an aton mahimo buhaton basi malamposan an sugad nga mga ulang ngan magin mabungahon an aton ministeryo?

6. Ha ano nga paagi an mga parasangyaw pariho hin mga parapangisda?

⁶ An pagsangyaw iginpariho ni Jesus ha pagpangisda. (Mar. 1:17) An iba nga parapangisda bangin mangisda hin pipira ka adlaw pero waray hira nadadakop. Pero padayon la gihapon hira nga nangingisda; naghihimo hira hin mga pagbag-o. Ginbabag-o nira an oras han ira pagpangisda, lokasyon, o pamaagi. Mahimo liwat kita maghimo hin mga pagbag-o ha aton ministeryo. Tagda ini nga mga suhestyon.

7. Ano an mahimo magin resulta kon nagsasangyaw kita ha iba-iba nga oras?

⁷ Pagsangyaw ha iba nga oras. Mas damu an aton makakaistorya kon magsasangyaw kita ha oras nga posible nga an mga tawo aada ha ira balay. Baman, mauli man gihap hira ha ira balay! Napansin han damu nga kabugtoan nga mas maopay an pagsangyaw ha kulop o ha gab-i kay mas damu an ira nakakaistorya. Dugang pa, an mga tagbalay bangin mas relaks ngan andam makiistorya hito nga mga oras. O bangin makabulig ha imo an suhestyon han tigurang nga hi David. Nagsiring hiya nga katapos nira magsangyaw hin madaliay ha usa nga teritoryo, ginbabalik niya ngan han iya partner an mga balay nga ira ginkadto nga waray tawo. Nagsiring hiya, “Nahipapausa ako nga damu na an aada ha ira balay kon nabalik kami.” *

8. Paonan-o naton maiaaplikar ha aton ministeryo an Eclesiastes 11:6?

⁸ Kinahanglan diri kita umundang. An tema nga teksto nagpapahinumdom ha aton han dapat naton nga magin disposisyon. (Basaha an Eclesiastes 11:6.) Hi David nga gin-unabi kanina, waray umundang ha pagsangyaw. Ha usa nga balay, naabtan gihapon niya an tagbalay katapos niya bumisita hin pipira ka beses. Ito nga tawo interesado ha Biblia ngan nagsiring, “Mga walo ka tuig na ako nga naukoy dinhi, ngan waray pa gud Saksi ni Jehova nga binisita ha akon.” Hi David nagsiring, “Naobserbaran ko nga kon nakakaistorya mo na an mga tawo ha ira balay, kaurogan na nga namamati hira ha mensahe nga aton iginsasangyaw.”

9. Ano an ginhihimo han iba nga Saksi basi makaistorya an mga tawo nga makuri masangyawan ha ira balay?

⁹ Pagsangyaw ha iba nga lokasyon. Basi makaistorya an mga tawo nga makuri masangyawan ha ira balay, may mga magwarali nga nagsasangyaw ha iba nga lokasyon. Pananglitan, nakita nga epektibo an pagsangyaw ha kalsada ngan paggamit hin mga cart basi makaistorya  an mga naukoy ha dagku nga apartment diin igindidiri didto an pagsangyaw. Pinaagi hito, nakakaistorya han mga Saksi an mga tawo nga naukoy hito nga mga apartment. Napansin liwat han damu nga magwarali nga an mga tawo mas naruruyag makiistorya o kumarawat hin literatura ha mga parke, merkado, ngan mga lugar han negosyo. Hi Floiran, nga usa nga paramangno han sirkito ha Bolivia, nagsiring: “Napakadto kami ha mga merkado ngan mga lugar han negosyo ha mga ala-una tubtob alas-tres ha kulop kay diri na masyado busy an mga nagtitinda. Kaurogan na nga nakakaistorya namon hira hin mas maopay ngan nakakagtikang pa ngani kami hin mga pag-aram ha Biblia.”

10. Ano nga mga pamaagi an mahimo mo gamiton basi masangyawan mo an mga tawo?

¹⁰ Pagsangyaw gamit an iba nga pamaagi. Pananglitan, pauroutro mo na nga ginkadto an usa nga tawo ha ira balay basi makaistorya. Ginkadto mo hiya ha iba-iba nga oras pero diri mo la gihapon hiya naaabtan. May-ada ba iba nga mga paagi basi makaistorya ito nga tawo? Hi Katarína nagsiring, “Ginsusuratan ko adton diri ko gud naaabtan ha ira balay. Gin-uunabi ko ha akon surat an akon unta karuyag isiring ha ira ha personal.” Ano an leksyon? Pangalimbasugi nga masangyawan mo an ngatanan ha iyo teritoryo ha anoman nga paagi samtang ginbubuhat mo an imo ministeryo.

11. Kay ano nga may mga tawo nga diri interesado ha aton mensahe?

¹¹ May mga tawo nga diri interesado ha aton mensahe. Para ha ira, diri nira kinahanglan an Dios o an Biblia. Diri hira natoo ha Dios tungod kay nakikita nira an duro nga pag-antos ha kalibotan.  Diri hira interesado ha Biblia kay nakikita nira an pagin hipokrito han mga lider han relihiyon nga nasiring nga ginsusunod nira an Biblia pero nagbubuhat man hin mga sayop. An iba naman nakapokus na la ha ira trabaho, pamilya, o mga problema salit diri nira nakikita nga makakabulig ha ira an Biblia. Paonan-o kita makakapabilin nga malipayon kon an aton mga ginsasangyawan naghuhunahuna nga diri importante an aton mensahe?

12. Paonan-o makakabulig ha aton ministeryo an pag-aplikar han Filipos 2:4?

¹² Pagpakita hin personal nga interes. Damu nga tawo nga ha siyahan diri interesado han maopay nga sumat an namati ha urhi han inabat nira an sinsero nga personal nga interes ha ira han usa nga magwarali. (Basaha an Filipos 2:4.) Pananglitan, hi David nga gin-unabi kanina, nagsiring, “Kon an usa nga tawo nasiring nga diri hiya interesado, diri namon gin-gagamit an Biblia o an aton literatura, ngan nasiring kami: ‘Puydi ba ako mahibaro kon kay ano nga sugad hito an imo inaabat?’” Napapansin han mga tawo kon an usa interesado ha ira inaabat. Bangin makalimtan nira an aton ginsiring, pero posible gud nga mahinumdoman nira an aton personal nga interes ha ira. Bisan kon diri kita payaknon han aton mga ginsasangyawan, maipapakita naton pinaagi han aton panggawi ngan ekspresyon han nawong nga interesado kita ha ira.

13. Paonan-o naton maipapahiuyon an aton mensahe ha mga panginahanglan han tagsa nga tagbalay?

¹³ Nagpapakita kita hin personal nga interes kon iginpapahiuyon naton an aton mensahe ha mga panginahanglan ngan interes han tagbalay. Pananglitan, may nakikita ba kita nga tigaman nga an tagbalay may gudtiay pa nga anak? An mga kag-anak bangin interesado ha sagdon han Biblia parte ha pagpadaku hin mga anak o ha praktikal nga mga suhestyon para magin mas malipayon an ira pamilya. May nakikita ba kita nga damu nga kandado ha ira purtahan? Bangin an aton ipakiistorya an mahitungod ha krimen ngan ha kahadlok nga inaabat han mga tawo ha kalibotan. Bangin malipay an tagbalay nga mahibaroan nga an krimen mawawara ha kadayonan. Anoman nga topiko an imo gamiton, pangalimbasugi nga mabuligan an imo mga ginsasangyawan nga masabtan kon paonan-o makakabulig ha ira an mga sagdon han Biblia. Hi Katarína, nga gin-unabi kanina, nagsiring, “Ginpapahinumdoman ko an akon kalugaringon kon paonan-o ako nabuligan han kamatuoran.” Tungod hito, may kombiksyon nga nakikiistorya hi Katarína ha mga tawo, ngan sigurado nga nakikita nira ito.

14. Sumala ha Proberbios 27:17, paonan-o an magpartner ha pagsangyaw makakabulig ha usa kag usa?

¹⁴ Pahimulsi an bulig han iba. Han siyahan nga siglo, igintutdo ni Pablo kan Timoteo an iya  mga pamaagi ha pagsangyaw ngan pagtutdo, ngan gin-aghat niya hi Timoteo nga gamiton liwat ito ha pagbulig ha iba. (1 Cor. 4:17) Pariho kan Timoteo, mahibabaro kita tikang ha eksperyensyado nga kabugtoan ha aton kongregasyon. (Basaha an Proberbios 27:17.) Tagda an ehemplo han brother nga hi Shawn. Nagpayunir hiya hin madaliay ha usa nga hirayo nga lugar diin kadam-an han mga tawo kontento na ha ira relihiyon. Paonan-o hiya nakapabilin nga malipayon? Nagsiring hiya, “Tubtob nga posible, nagsasangyaw ako nga may partner. Samtang tipakadto kami ha sunod nga mga balay, gin-iistoryahan namon kon paonan-o namon mapapauswag an amon mga abilidad ha pagtutdo. Pananglitan, gin-iistoryahan namon kon ano an ginsiring han tagbalay ngan kon paonan-o namon ito ginbaton. Katapos, ginhihisgotan namon kon ano an amon mahimo buhaton ha sunod kon may makaistorya kami utro nga sugad hito an isiring.”

15. Kay ano nga an pag-ampo importante ha aton pagsangyaw?

¹⁵ Pag-ampo kan Jehova para hin bulig. Pangaro kan Jehova hin giya ha kada panahon nga magsasangyaw ka. Kon waray han bulig han iya gamhanan nga baraan nga espiritu, waray kita mahihimo nga bisan ano. (Sal. 127:1; Luc. 11:13) Kon nangangaro ka hin bulig kan Jehova pinaagi ha pag-ampo, magin espisipiko. Pananglitan, hangyoa hiya nga giyahan ka ngadto ha mga tawo nga karuyag mahibaro mahitungod ha iya ngan andam mamati. Katapos, gios uyon ha imo pag-ampo pinaagi ha pagsangyaw ha ngatanan nga tawo nga imo iginkikita.

16. Kay ano nga an personal nga pag-aram importante ha aton ministeryo?

¹⁶ Paggahin hin panahon para ha personal nga pag-aram. An Pulong han Dios nasiring: ‘Pamatud-i ha iyo kalugaringon an maopay ngan kinakarawat ngan hingpit nga kaburut-on han Dios.’ (Roma 12:2) Kon mas kombinsido kita nga maaram kita han kamatuoran mahitungod ha Dios, mas nadudugangan an aton kombiksyon samtang nakikiistorya kita ha iba ha ministeryo. Hi Katarína, nga gin-unabi kanina, nagsiring: “Diri pa la maiha, nasantop ko nga kinahanglan ko parig-unon an akon pagtoo ha pipira nga basihan nga mga katutdoan han Biblia. Salit gin-adman ko hin maopay an ebidensya nga may Maglalarang, nga an Biblia Pulong gud han Dios, ngan an Dios may organisasyon yana nga nagrirepresentar ha iya.” Hi Katarína nagsiring nga tungod han iya personal nga pag-aram, naparig-on an iya pagtoo ngan nagin mas malipayon hiya ha ministeryo.

17. Kay ano nga nagpabilin hi Jesus nga positibo ha iya ministeryo?

¹⁷ Hi Jesus nagpabilin nga positibo ngan padayon nga nagsangyaw bisan kon an iba diri interesado ha iya mensahe. Kay ano? Maaram hiya nga kinahanglan gud han mga tawo nga mahibaro han kamatuoran, ngan karuyag niya nga mabuligan an damu nga tawo tubtob nga posible. Maaram liwat hiya nga may mga tawo nga ha siyahan diri magpapakita hin interes pero ha urhi mamamati hira. Tagda an nahitabo ha iya mismo pamilya. Ha sulod han tulo ngan tunga ka tuig nga pagministeryo ni Jesus, waray bisan usa han iya kabugtoan an nagin disipulo niya. (Juan 7:5) Pero han nabanhaw na hiya, nagin mga Kristiano hira.​—Buh. 1:14.

18. Kay ano nga padayon kita nga nagsasangyaw?

¹⁸ Diri kita maaram kon hin-o an makarawat han mga kamatuoran ha Biblia nga aton igintututdo. May mga tawo nga mas maiha kumarawat ha aton mensahe kay ha iba. Bisan adton nadiri mamati ha aton bangin ha urhi ‘maghimaya ha Dios’ kon nakikita nira an aton maopay nga panggawi ngan positibo nga disposisyon.​—1 Ped. 2:12.

19. Sumala ha 1 Corinto 3:6, 7, ano an kinahanglan naton hinumdoman?

 ¹⁹ Samtang nagtatanom kita ngan nagsasaribo, kinahanglan hinumdoman naton nga an Dios an nagpapatubo hito. (Basaha an 1 Corinto 3:6, 7.) An brother nga hi Getahun nga nag-aalagad ha Ethiopia, nagsiring: “Ha sulod hin sobra 20 ka tuig, ako la an Saksi ha usa nga teritoryo nga talagsa la masangyawan. Pero yana 14 na kami nga magwarali​—13 an nabawtismohan, upod na an akon asawa ngan 3 nga anak. Ha amon mga katirok, may aberids nga 32 ka tawo nga mga natambong.” Nalilipay gud hi Getahun nga nagpadayon hiya pagsangyaw samtang mapailubon nga naghuhulat nga buligan ni Jehova an mga tawo nga magin iya mga magsiringba!​—Juan 6:44.

20. Ha ano nga paagi pariho kita hin mga parag-rescue?

²⁰ Presyoso kan Jehova an kinabuhi han ngatanan nga tawo. Gintagan kita niya han pribilehiyo nga magbuhat kaupod han iya Anak ha pagtirok ha mga tawo tikang ha ngatanan nga nasud antes matapos ini nga sistema. (Hag. 2:7) An aton pagsangyaw nga buruhaton maipapariho ha usa nga misyon ha pag-rescue. Ngan pariho kita hin mga membro han usa nga rescue team nga iginpadara basi buligan an mga tawo nga natabonan ha usa nga minahan. Bisan kon bangin pipira la nga minero an mabilngan nga buhi, importante gud an ginbuhat han ngatanan nga membro han team. Pariho liwat hito an aton pagministeryo. Diri kita maaram kon pira nga tawo an matatalwas tikang ha sistema ni Satanas. Pero mahimo gamiton ni Jehova an bisan hin-o ha aton basi buligan hira. Hi Andreas nga taga Bolivia, nagsiring, “Maaram ako nga kon nahibabaro an usa nga tawo han kamatuoran ha Biblia ngan nagpapabawtismo, tungod ito kay damu an nangalimbasog ha pagbulig ha iya.” Hinaot magin positibo liwat kita ha aton ministeryo. Kon bubuhaton naton ito, bibendisyonan kita ni Jehova, ngan makakapalipay gud ha aton an ministeryo.