SERYOSO ini nga panawagan: “Mga Magwarali han Ginhadian ha Britanya—Pagmata!!” (Disyembre 1937 nga Informant, * London nga edisyon) An subtitulo hito nasiring: “Mahinay an Pag-uswag ha Sulod hin Napulo ka Tuig.” Ginpapamatud-an ito han siyahan nga pahina diin makikita an report han pag-alagad ha sulod hin napulo ka tuig tikang 1928 tubtob 1937.

Kay ano nga naghinay an pag-uswag han pagsangyaw nga buruhaton ha Britanya? Posible nga padayon nga ginsinunod han mga kongregasyon an ira maiha na nga nahiaraan. Dugang pa, nagdesisyon an sanga nga opisina nga an teritoryo nagkikinahanglan la hin mga 200 nga payunir nga mag-aalagad ha higrayo nga teritoryo imbes nga ha mga kongregasyon. Salit, an mga naruruyag magpayunir ginsidngan han sanga nga opisina nga damu na an payunir ha Britanya ngan gin-aghat hira nga mag-alagad ha iba nga nasud han Europa. Makalilipay nga damu nga payunir an bumaya ha Britanya ngan binalhin ha iba nga nasud sugad han Fransia bisan kon gutiay la o waray hira hinbabaroan han linggwahe hito.

An artikulo han Informant han 1937 naghimo hin tumong para ha 1938: Usa ka milyon ka oras! Makakab-ot ini kon an mga magwarali maggagahin hin 15 ka oras kada bulan ha ministeryo ngan 110 ka oras para ha mga payunir. Nagsuhestyon ito nga mag-organisa hin mga grupo nga maggagahin hin lima ka oras kada adlaw para ha pagsangyaw ngan magpokus ha pagbalik-bisita, labi na ha gab-i ha kabutngaan han semana.

Ini nga pag-aghat nga tagan hin mas daku nga importansya an ministeryo nakapalipay gud ha damu. “Makapagios ito nga panawagan tikang ha headquarters kay kadam-an ha amon an naghihingyap gud ha pagbuhat hito ngan waray pag-iha nagkaada ito makalilipay nga mga resulta,” siring ni Hilda Padgett. * Hi Sister E. F. Wallis nagsiring: “Epektibo gud an suhestyon nga lima ka oras kada adlaw! May iba pa ba nga makalilipay gud nga buruhaton kay ha paggahin hin usa ka adlaw para ha pag-alagad ha Ginoo?” Usahay nauli hira nga kapoy, pero malipayon gud hira! Inabat han batan-on nga hi Stephen Miller an pagkaapurado hito nga panawagan salit nakigbahin hiya hito. Karuyag gud niya ito buhaton samtang may higayon hiya! Nahinunumdoman niya an grupo hin kabugtoan nga nagbibisikleta ngan nagmiministeryo ha bug-os nga adlaw, ngan kon katpaso nagpapatokar hira hin nakarekord nga mga pahayag durante han gab-i. Madasigon hira ha pagsangyaw gamit an mga plakard ngan ha pagtanyag hin mga magasin ha kalsada.

Nagkaada liwat bag-o nga panawagan ini nga Informant: “Kinahanglan naton hin 1,000 nga payunir.” Nagkaada bag-o nga kahikayan ha pagkobre han teritoryo; an mga payunir diri na maglulugaring pagbuhat kondi makikig-upod na hira ha kongregasyon basi buligan ngan parig-unon an kabugtoan. “Damu nga kabugtoan  an nakasantop nga kinahanglan nira magpayunir,” siring ni Joyce Ellis (Barber hadto). “Bisan kon 13 anyos pa la ako hito nga panahon,” siring niya, “ito gud an akon karuyag; karuyag ko magpayunir.” Nakab-ot niya ito nga tumong han Hulyo 1940, han 15 anyos hiya. Han hinbaroan liwat ni Peter, nga nagin bana ni Joyce, an panawagan nga “Pagmata,” napagios hiya nga “hunahunaon an pagpayunir.” Han Hunyo 1940, han 17 anyos hi Peter, nagbisikleta hiya hin 105 ka kilometro pakadto ha Scarborough, an iya bag-o nga toka sugad nga payunir.

An bag-o nga payunir nga hira Cyril ngan Kitty Johnson may-ada gud pagsakripisyo ha kalugaringon. Nagdesisyon hira nga ibaligya an ira balay ngan mga panag-iya basi masuportaran an ira pagpayunir. Inundang hi Cyril ha iya trabaho, ngan ha sulod hin usa ka bulan andam na hira magpayunir. Hiya nagsiring: “Determinado kami nga buhaton ito. Malipayon ngan kinaburut-on namon nga ginbuhat ito.”

Samtang madagmit nga nagtitikadamu an payunir, may responsable nga mga brother nga naghunahuna hin praktikal nga mga paagi basi masuportaran ini nga mga payunir. Han 1938, ginsunod ni Jim Carr, usa nga zone servant (gintatawag yana nga paramangno han sirkito), an suhestyon nga magkaada mga balay para ha mga payunir ha mga syudad. Gin-aghat an mga payunir nga mag-urosa hin urukyan ngan magburublig ha trabahoon basi makatipid. Ha Sheffield, nagplete hira hin daku nga balay nga ginpapanginano hin usa nga responsable nga brother. An lokal nga kongregasyon naghatag hin kwarta ngan muwebles. Nahinunumdoman pa ni Jim: “An kada tagsa binulig basi maglampos ito.” Napulo nga magduruto nga payunir an naukoy dida hito, ngan may-ada hira maopay nga rutina ha espirituwal. “An [inadlaw] nga teksto ginhihisgotan kada aga durante han pamahaw,” ngan “kada adlaw, napakadto an mga payunir ha ira teritoryo ha magkalain-lain nga parti han syudad.”

Sumugot an mga magwarali ngan payunir ha panawagan nga abuton an usa ka milyon nga oras han 1938. Ngani, iginpapakita han mga report an pag-uswag ha ngatanan nga bahin han pagministeryo. Ha sulod hin lima ka tuig, nagdamu hin haros tulo ka pilo an mga magwarali ha Britanya. An kadasig han katawohan ni Jehova ha pag-alagad nakabulig gud ha ira nga maatubang an mga pagsari ha tiarabot nga girra.

Yana, nagtitikadamu na liwat an mga payunir ha Britanya samtang nagtitikahirani an girra han Dios, an Armagedon. Han naglabay nga napulo ka tuig, may-ada ito pinakahitaas nga kadamu han mga payunir nga inabot hin 13,224 han Oktubre 2015. Nasasantop gud hini nga mga payunir nga an bug-os-panahon nga pagministeryo amo an pinakamaopay nga paagi nga magagamit nira an ira kinabuhi.