1. Ano an epekto ha aton han pagkanta?

USA nga kilala nga parasurat hin kanta an nagsiring: “An mga pulong nag-aaghat ha imo nga hunahunaon an mensahe. An musika nag-aaghat ha imo nga abaton an emosyon. Pero an kanta nag-aaghat ha imo nga abaton an mensahe.” May mas maopay pa ba nga mensahe nga makakabantad ha aton kasingkasing kay han mensahe nga nagpapahayag han aton pagdayaw ngan gugma ha aton langitnon nga Amay nga hi Jehova? Diri urusahon nga an pagkanta importante nga bahin han putli nga pagsingba, nagkakanta man kita nga nag-uusahan o kaupod han kongregasyon han katawohan han Dios.

2, 3. (a) Ano an bangin inaabat han iba may kalabotan ha pagkanta ha daku nga tingog kaupod han kongregasyon? (b) Ano nga mga pakiana an aton hihisgotan?

² Pero ano an imo inaabat ha pagkanta ha daku nga tingog kaupod han kongregasyon? Naaawod ka ba? Ha pipira nga kultura, an kalalakin-an bangin nag-aalang ha pagkanta ha publiko. Ini nga disposisyon mahimo makaapekto ha bug-os nga kongregasyon, labi na kon an mga nangunguna namimiling hin rason basi diri magkanta o naghihimo hin iba nga buruhaton samtang nagkakanta an iba nga kabugtoan.​—Sal. 30:12.

³ Kon gintatagad gud naton an pagkanta sugad nga bahin han aton pagsingba, diri gud kita maruruyag nga gumawas o diri magin presente hito nga bahin han programa. Salit sadang naton pakianhan an aton  kalugaringon: ‘Ano an akon pagtagad ha pagkanta ha mga katirok? Paonan-o ko mahimo malamposan an anoman nga kahadlok nga bangin magpugong ha akon ha pagkanta hin malipayon ngan ha daku nga tingog? Ano an mahimo ko buhaton basi mas maabat ko an emosyon han aton ginkakanta?’

4, 5. Ano nga mga kahikayan an nagpapakita nga importante ha kadaan nga Israel an pagkanta para ha pagsingba?

⁴ An musika maiha na nga ginagamit han matinumanon nga mga magsiringba ni Jehova sugad nga paagi han ira pagdayaw ha iya. Makatirigamnan nga han matinumanon pa nga nag-aalagad kan Jehova an mga Israelita hadto, an pagkanta importante nga bahin han ira pagsingba. Pananglitan, han igin-andam ni Hadi David an pag-alagad ha templo, nag-organisar hiya hin 4,000 nga Lebita basi magkanta hin mga pagdayaw. Upod hito an 288 nga “gintutdoan hin kanta ngadto kan Jehova,” ngan hira ‘ngatanan mga senate.’​—1 Kron. 23:5; 25:7.

⁵ Ha inagurasyon han templo, an musika ngan pagkanta may importante nga papel. An asoy nasiring: “Nahanabu, han pagkaurusa han mga parahuyup han trompeta ngan han mga parakanta, ha paghimo hin usa nga tingug nga hibabatian ha pagdayaw ngan pagpasalamat kan Jehova; ngan han ira pagalsaha han ira tingug, upud an mga trompeta ngan an mga platilyo ngan an mga toronggon han musika, ngan pagdayawa kan Jehova, . . . an himaya ni Jehova nagpuno han balay han Dios.” Makaparig-on gud ha pagtoo ito nga okasyon!​—2 Kron. 5:13, 14; 7:6.

6. Ihulagway an espesyal nga presentasyon han pagkanta durante han pagmando ni Nehemia sugad nga gobernador han Jerusalem.

⁶ Han ginpangunahan ni Nehemia an matinumanon nga mga Israelita ha pagtukod utro han pader han Jerusalem, gin-organisar liwat niya an mga parakanta nga mga Lebita ngan nagtagana hiya hin kompleto nga mga instrumento ha pagkanta. Han igindedikar an gintukod utro nga pader, an espesyal nga presentasyon han musika nakabulig gud nga magin makalilipay an okasyon. Hini nga higayon, may-ada “duha nga dagku nga panon [grupo hin mga parakanta] nga naghatag hin mga pagpasalamat.” Naglakat hira ha bawbaw han pader tikang ha magkaiba nga direksyon tubtob nga nagtapo hira ha pader nga hirani ha hinmumutangan han templo basi makahimo hin tingog nga mababatian ha hirayo. (Neh. 12:27, 28, 31, 38, 40, 43) Sigurado nga nalipay gud hi Jehova nga mabatian an iya mga magsiringba nga madasigon nga nagdadayaw ha iya pinaagi hin kanta.

7. Paonan-o ginpabug-atan ni Jesus an pagkaimportante han pagkanta ha Kristiano nga pagsingba?

⁷ Han naestablisar an Kristiano nga kongregasyon, an musika padayon nga nagin importante nga bahin han tinuod nga pagsingba. Tagda an nahitabo ha pinakaimportante nga gab-i ha kasaysayan han tawo. Katapos tikangan ni Jesus an Panihapon han Ginoo kaupod an iya mga disipulo, nagkanta hira hin mga pagdayaw kan Jehova.​—Basaha an Mateo 26:30.

8. Paonan-o an mga Kristiano han siyahan nga siglo nagpakita hin maopay nga ehemplo ha pagkanta durante han pagsingba?

⁸ An mga Kristiano han siyahan nga siglo nagpakita hin maopay nga ehemplo ha urosa nga pagdayaw ha Dios pinaagi hin kanta. Bisan kon kasagaran na nga ha pribado nga balay hira nagkakatirok, iton simple nga katirokan para ha pagsingba waray magwara han ira kadasig ha pagkanta kan Jehova. Pinaagi han giya han baraan nga espiritu, ginsugo ni apostol Pablo an iya Kristiano nga kabugtoan: “Padayon nga magtinutdoay ngan magparig-onay kamo pinaagi hin mga salmo, pagdayaw ha Dios, pagkanta hin espirituwal nga mga kanta upod an pagpasalamat, ngan kinasingkasing nga magkanta kamo kan Jehova.” (Col. 3:16) An mga kanta ha aton songbook mga “espirituwal nga mga kanta [nga sadang kantahon] upod an pagpasalamat.” Bahin ini han espirituwal nga pagkaon nga igintatagana han “matinumanon ngan maaramon nga uripon.”​—Mat. 24:45.

9. (a) Kay ano nga bangin mag-alang an pipira ha pagkanta hin malipayon ngan ha daku nga tingog ha aton mga katirok ngan asembleya? (b) Paonan-o kita sadang magkanta hin mga pagdayaw kan Jehova, ngan hin-o an sadang manguna? (Kitaa an retrato ha tinikangan hini nga artikulo.)

⁹ Ano man kon diri hiara an iyo pamilya ha pagkanta o diri ito komon ha iyo kultura o komunidad? Tungod han moderno nga teknolohiya, bangin nalilipay ka pagpamati ha propesyonal nga mga parakanta. Kondi bangin maawod ka o mawarayan gana kon ikompara mo an imo tingog hito nga mga parakanta. Pero diri ini sadang makapugong ha imo responsabilidad nga magkanta hin mga pagdayaw kan Jehova. Lugod, alsaha an imo songbook, tadonga an imo ulo, ngan kinasingkasing nga magkanta! (Esra 3:11; basaha an Salmos 147:1.) Ha damu nga Kingdom Hall yana, igindidispley ha monitor han TV an liriko han mga kanta, nga nabulig ha aton nga makagkanta ha daku nga tingog. Makapainteres liwat nga an pagkanta han mga kanta han Ginhadian igin-upod na ha kurikulum han Kingdom Ministry School para ha mga tigurang. Ginpapabug-atan hini an pagkaimportante para ha mga tigurang nga manguna ha pagkanta ha kongregasyon.

10. Ano an sadang naton hinumdoman kon nag-aalang kita pagkanta tungod han kahadlok?

¹⁰ An usa nga rason nga damu an nag-aalang ha pagkanta ha daku nga tingog amo an kahadlok. Bangin nahahadlok hira nga lumabaw an ira tingog o diri maruyagan han iba an ira tingog. Kondi sadang naton tigamnan nga kon kita nagyayakan, “kita ngatanan damu ka beses nga nagsasayop.” (San. 3:2) Pero diri ito nagpupugong ha aton nga magyakan. Salit kay ano nga tutugotan naton an aton diri perpekto nga tingog nga magpugong ha aton ha pagkanta hin pagdayaw kan Jehova?

11, 12. Ano an pipira nga suhestyon basi mapauswag an aton pagkanta?

¹¹ Bangin nag-aalang kita pagkanta kay diri kita sigurado kon paonan-o an pagkanta. Pero mahimo naton mapauswag an aton pagkanta pinaagi ha pagsunod ha pipira nga suhestyon. *

 ¹² Mahimo ka mahibaro pagkanta nga may pwersa ngan ha daku nga tingog pinaagi ha husto nga pagginhawa. Sugad la nga an koryente nakakapalaga hin bombilya, an pagginhawa nagpapakusog han imo tingog kon nagyayakan ka o nagkakanta. An kadaku han imo tingog ha pagkanta sadang magin pariho kon nagyayakan ka o mas daku pa ngani hito. (Kitaa an mga suhestyon ha Magpahimulos han Edukasyon Tikang ha Teokratiko nga Eskwelahan ha Ministeryo, pahina 181 tubtob 184, ilarom han sub-ulohan nga “Husto nga Pagkontrol han Imo Pagginhawa.”) Ngani, ha mga konteksto diin gin-uunabi an pagkanta hin mga pagdayaw, usahay an Kasuratan nag-aaghat ha mga magsiringba nga ‘gumuliat ha kalipay.’​—Sal. 33:1-3, Maupay nga Sumat.

13. Isaysay kon paonan-o kita mas magkakaada kompyansa ha pagkanta.

¹³ Durante han pagsingba han pamilya o bisan ha imo personal nga pag-aram, sarihi ini: Pagpili hin usa han imo paborito nga kanta ha aton songbook. Basaha an liriko ha makusog, daku, ngan may kompyansa nga tingog. Sunod, ha pariho gihapon nga kadaku han tingog, iyakan an ngatanan nga pulong han usa nga phrase han kanta ha usa la nga pagginhawa. Katapos, kantaha an phrase gamit an amo gihapon nga kadaku han tingog. (Isa. 24:14) An imo tingog magigin mas bug-os, ngan maopay ito nga pag-uswag. Ayaw kahadlok o kaawod!

14. (a) Paonan-o an pagbuka hin mas daku han aton baba magpapauswag han aton pagkanta? (Kitaa an kahon nga “ Kon Paonan-o Mapapauswag an Imo Pagkanta.”) (b) Ano nga mga suhestyon an imo nakita nga makakabulig ha imo may kalabotan ha paglampos ha problema ha tingog?

¹⁴ Diri magigin bug-os an imo tingog ha pagkanta kon diri mo ibubuka an imo baba. Salit an usa pa nga suhestyon amo an pagbuka han imo baba hin mas daku kay ha imo normal nga pagyakan. Ano an imo sadang himoon kon inaabat mo nga maluya an imo tingog o bangin sobra kahitaas an tono han imo tingog? Makakabiling ka hin praktikal nga mga suhestyon ha Magpahimulos han Edukasyon Tikang ha Teokratiko nga Eskwelahan ha Ministeryo, pahina 184, ha kahon nga “Paglampos han Espisipiko nga mga Problema.”

15. (a) Ano an iginpahibaro durante han 2016 nga tinuig nga katirok? (b) Ano an pipira nga rason han pagrebisa han songbook?

¹⁵ Durante han 2016 nga tinuig nga katirok han  Watch Tower Bible and Tract Society of Pennsylvania, an mga tinambong nalipay han iginpahibaro han usa nga membro han Nagmamando nga Lawas nga hi Bugto Stephen Lett nga may bag-o nga songbook nga may ulohan nga “Sing Out Joyfully” to Jehovah, nga diri na mag-iiha gagamiton ha mga katirok. Iginsaysay ni Bugto Lett nga an usa nga rason han pagrebisa han songbook amo an pagpahiuyon han mga kanta ha ginrebisa nga New World Translation of the Holy Scriptures. Kinahanglan kuhaon o bag-uhon an mga pulong ha mga liriko han kanta nga diri na mababasa ha ginrebisa nga New World Translation han 2013. Dugang pa, may igindugang nga bag-o nga mga kanta mahitungod ha aton pagsangyaw nga buruhaton ngan mga kanta nga nagpapahayag han aton pagpasalamat ha lukat. Ngan tungod kay an pagkanta importante nga bahin han aton pagsingba, karuyag han Nagmamando nga Lawas nga magkaada hin de-kalidad nga songbook nga pariho an kobre ha ginrebisa nga New World Translation.

16, 17. Ano nga mga pagbag-o an ginhimo ha bag-o nga songbook?

¹⁶ Basi magin masayon an paggamit han “Sing Out Joyfully” to Jehovah, an mga kanta hito ginhan-ay uyon ha topiko. Pananglitan, an siyahan nga 12 nga kanta may kalabotan kan Jehova, an sunod nga 8 nga kanta mahitungod kan Jesus ngan ha lukat, ngan ito liwat an ginhimo ha iba pa nga kanta. May-ada ito indise han mga topiko nga makakabulig, pananglitan, kon nagpipili hin kanta para ha pahayag publiko.

¹⁷ Basi makagkanta an ngatanan hin kinasingkasing, ginrebisa an pipira nga liriko para magin mas matin-aw an mensahe ngan ginsaliwnan an mga pulong nga diri na komon nga ginagamit. Pananglitan, an pulong nga “shall” diri na komon nga ginagamit yana, salit ginsaliwnan ito. Sugad man an ulohan nga “Long-Suffering” ginsaliwnan hin “Exercise Patience,” ngan ginbag-o liwat an liriko han kanta. An ulohan nga “Guard Your Heart” nga ginsaliwnan hin “We Guard Our Hearts” nagpapakita gud han pagin makonsiderasyon. Kay ano? Ha aton mga katirok, asembleya, ngan kombensyon, damu an bag-ohan, interesado, batan-on, ngan mga sister. Kon ginkakanta nira ito nga kanta, bangin nag-aalang hira kay inaabat nira nga gindidiktahan nira an iba kon ano an sadang buhaton. Salit ginbag-o an ulohan ngan liriko han kanta.

18. Kay ano nga kinahanglan kita magin pamilyar ha mga kanta ha aton bag-o nga songbook? (Kitaa an footnote.)

¹⁸ Damu han mga kanta ha “Sing Out Joyfully” to Jehovah an ginhimo nga baga hin pag-ampo. Pinaagi hini nga mga kanta, maipapahayag mo kan Jehova an imo mga pagbati. An iba nga mga kanta mag-aaghat ha aton ha “pagpakita hin gugma ngan mag-opay nga buhat.” (Heb. 10:24) Sigurado nga karuyag gud naton nga magin pamilyar ha tono ngan liriko han aton mga kanta. Mahihimo mo ito pinaagi ha pagpamati han vocal rendition ha jw.org. Pinaagi ha pagpraktis ha iyo balay han mga kanta, mahibabaro ka ha pagkanta nga may kompyansa ngan kinasingkasing. *

19. Paonan-o an ngatanan ha kongregasyon mahimo makigbahin hin direkta ha pagsingba kan Jehova?

¹⁹ Tigamni nga an pagkanta importante nga bahin han aton pagsingba. Usa ini nga paagi ha pagpakita han aton gugma ngan apresasyon kan Jehova. (Basaha an Isaias 12:5.) Kon nagkakanta ka nga malipayon ngan ha daku nga tingog, madadasig mo liwat an iba nga magkanta nga may kompyansa. Oo, an ngatanan nga aada ha kongregasyon​—bata, lagas, ngan mga interesado—​mahimo makigbahin hinin direkta nga paagi han pagsingba kan Jehova. Salit ayaw pag-alang ha pagpahayag han imo inaabat pinaagi ha pagkanta. Lugod, sunda an matin-aw nga giniyahan nga sugo han salmista: “Pagkanta ngadto kan Jehova”! Oo, malipayon nga magkanta!​—Sal. 96:1.