1. Ano an makakaliaw ha aton kon inaabat naton nga nag-uusahan la kita o diri na naton kaya an aton mga problema? (Salmo 118:5-7)

INABAT mo na ba nga nag-uusahan ka la ngan waray nabulig ha imo basi makaya mo an imo problema? Damu an inabat hin sugad hito, upod na an matinumanon nga mga surugoon ni Jehova. (1 Hadi 19:14) Kon mahitabo ito ha imo, hinumdumi an saad ni Jehova: “Diri ko gud ikaw babayaan, ngan diri ko gud ikaw papabay-an.” Salit makakasiring kita nga may pagsarig: “Hi Jehova an akon parabulig; diri ako mahahadlok.” (Heb. 13:5, 6) Iginsurat ito ni apostol Pablo ha iya mga igkasi-tumuroo ha Judea han mga 61 C.E. Ito nga iya ginsiring nagpapahinumdom ha aton han mga pulong ha Salmo 118:5-7.​—Basaha.

2. Ano an aton hihisgotan hini nga artikulo, ngan kay ano?

² Pariho han salmista, maaram hi Pablo nga hi Jehova an iya Parabulig kay iya mismo ito naeksperyensyahan. Pananglitan, sobra duha ka tuig antes himoon ni Pablo an iya surat ha mga Hebreo, nakaeksperyensya hiya hin makusog nga bagyo samtang nagbibiyahe ha dagat. (Buh. 27:4, 15, 20) Hito nga pagbiyahe ngan ha mga panahon antes hito, ginbuligan ni Jehova hi Pablo ha iba-iba nga paagi. Hihisgotan naton an tulo hito. Naghatag hi Jehova hin bulig pinaagi kan Jesus ngan han mga anghel, han mga tawo nga may awtoridad, ngan han mga igkasi-tumuroo. An pagrepaso hini nga mga panhitabo ha kinabuhi ni Pablo magpapahilarom han aton pagsarig ha saad han Dios nga babatunon liwat Niya an aton mga pag-ampo para hin bulig.

3. Ano an bangin ginhunahuna ni Pablo, ngan kay ano?

³ Hi Pablo nagkinahanglan hin bulig. Han mga 56 C.E., gindanas  hiya tipagawas ha templo han Jerusalem hin grupo hin mga tawo ngan gin-ikaparatay hiya. Kinabuwasan, han gindara hi Pablo ha atubangan han Sanhedrin, haros ginkuniskunis na hiya han iya mga kaaway. (Buh. 21:30-32; 22:30; 23:6-10) Hito nga takna, bangin naghunahuna hi Pablo, ‘Tubtob san-o ko makakaya ini nga pagmaltrato?’

4. Paonan-o ginbuligan ni Jehova hi Pablo pinaagi kan Jesus?

⁴ Ano nga bulig an nakarawat ni Pablo? Pagkagab-i katapos arestuhon hi Pablo, “an Ginoo” nga hi Jesus tinindog hirani ha iya ngan nagsiring: “Magmaisugon ka! Kay sugad la nga nagpapamatuod ka hin bug-os mahitungod ha akon ha Jerusalem, kinahanglan magpamatuod ka liwat ha Roma.” (Buh. 23:11) Napapanahon gud ito nga pagparig-on! Ginkumendasyonan ni Jesus hi Pablo tungod han iya pagsangyaw ha Jerusalem. Ngan nagsaad hiya nga talwas nga makakaabot hi Pablo ha Roma, diin magsasangyaw liwat hiya didto. Katapos makarawat ni Pablo ito nga pasarig, sigurado nga gin-abat niya nga talwas hiya sugad hin anak nga ginkukugos han iya tatay.

5. Paonan-o ginbuligan ni Jehova hi Pablo pinaagi hin anghel? (Kitaa an retrato ha kobre.)

⁵ Ano pa nga makuri nga mga sitwasyon an gin-atubang ni Pablo? Mga duha ka tuig katapos hito nga mga panhitabo ha Jerusalem, nakaeksperyensya hi Pablo hin makusog nga bagyo samtang sakay hiya hin barko nga tipakadto ha Italya. Makusog gud ito salit kahuna han mga tripulante ngan mga pasahero nga mamamatay na hira. Pero waray mahadlok hi Pablo. Kay ano? Ginsidngan niya an mga sakay: “Kagab-i an Dios nga nagtatag-iya ha akon ngan gintatagan ko hin sagrado nga pag-alagad nagsugo hin anghel nga tinindog ha akon sapit ngan nagsiring: ‘Ayaw kahadlok, Pablo. Kinahanglan tumindog ka ha atubangan han Cesar, ngan kitaa! iginhahatag han Dios ha imo an ngatanan nga kaupod mo ha paglayag.’” Gin-gamit ni Jehova an usa nga anghel basi utruhon an pasarig nga Iya iginhatag hadto kan Pablo pinaagi kan Jesus. Ngan nakaabot gud man hi Pablo ha Roma.​—Buh. 27:20-25; 28:16.

6. Ano nga saad ni Jesus an nakakaparig-on ha aton, ngan kay ano?

⁶ Ano nga bulig an aton nakakarawat? Bubuligan kita ni Jesus pariho han iya ginbuhat kan Pablo. Pananglitan, nagsasaad hi Jesus ha ngatanan niya nga sumurunod: “Kaupod niyo ako ha ngatanan nga adlaw tubtob ha ikatarapos han sistema han mga butang.” (Mat. 28:20) Napaparig-on gud kita hini. Kay ano? Kay may mga panahon nga nakukurian kita nga makapadayon. Pananglitan, kon namatyan kita hin hinigugma, naabat kita hin kasakit diri la hin pipira ka adlaw kondi posible ha sulod hin damu ka tuig. An iba nakukurian tungod han kalagas. An iba naman nakakaeksperyensya hin  depresyon. Bisan pa hito, nagkakaada kita kusog nga makapadayon kay maaram kita nga kaupod naton hi Jesus ha “ngatanan nga adlaw,” pati na ha pinakamakuri nga mga panahon ha aton kinabuhi.​—Mat. 11:28-30.

7. Sumala ha Pahayag 14:6, paonan-o kita ginbubuligan ni Jehova yana?

⁷ An Pulong han Dios nagpapasarig ha aton nga ginbubuligan kita ni Jehova pinaagi han iya mga anghel. (Heb. 1:7, 14) Pananglitan, ginbubuligan ngan gin-gigiyahan kita han mga anghel samtang nagsasangyaw kita han “maopay nga sumat han Ginhadian” ha mga tawo ha “tagsa nga nasud ngan tribo ngan pinulongan.”​—Mat. 24:13, 14; basaha an Pahayag 14:6.

8. Paonan-o ginbuligan ni Jehova hi Pablo pinaagi han usa nga kumander han militar?

⁸ Ano nga bulig an nakarawat ni Pablo? Han 56 C.E., ginpasarig ni Jesus hi Pablo nga makakaabot hiya ha Roma. Pero may mga Judio ha Jerusalem nga nagplano pag-ambus ngan pagpatay kan Pablo. Han nahibaroan ito han Romano nga kumander han militar nga hi Claudio Lisias, ginbuligan niya hi Pablo. Ginpadara dayon niya hi Pablo​—nga protektado hin damu nga sundalo—​ngadto ha Cesarea, nga an ruta nga gin-agian mga 105 ka kilometro tikang ha Jerusalem. Ha Cesarea, nagsugo hi Gobernador Felix nga “gwardyahan hi Pablo ha palasyo ni Herodes.” Salit adton nag-iikaparatay kan Pablo diri na gud makakabuhat hin maraot ha iya.​—Buh. 23:12-35.

9. Paonan-o ginbuligan ni Gobernador Festo hi Pablo?

⁹ Paglabay hin duha ka tuig, priso la gihapon hi Pablo ha Cesarea. Hi Felix ginsaliwnan na ni Festo sugad nga gobernador. An mga Judio nakimalooy kan Festo nga dad-on hi Pablo ha Jerusalem basi bistahon, pero diniri hi Festo. Bangin maaram an gobernador nga an mga Judio “nagpaplano . . . nga ambuson hi Pablo ngan patayon hiya ha dalan.”​—Buh. 24:27–25:5.

10. Ano an ginbuhat ni Gobernador Festo han naghangyo hi Pablo nga hukman hiya ha atubangan han Cesar?

¹⁰ Ha urhi, ginbista hi Pablo ha Cesarea. Tungod kay karuyag ni Festo nga “paboran hiya han mga Judio,” ginpakianhan niya hi Pablo: “Karuyag mo ba sumagka ha Jerusalem ngan didto ka hukman ha akon atubangan?” Maaram hi Pablo nga posible patayon hiya ha Jerusalem, ngan maaram liwat hiya kon ano an kinahanglan niya buhaton basi matalwas an iya kinabuhi, makaabot ha Roma, ngan matuman an iya ministeryo. Hiya nagsiring: “Naapela ako ha Cesar!” Katapos konsultahon ni Festo an iya mga magsaragdon, nagsiring hiya kan Pablo: “Naapela ka ha Cesar; makadto ka ha Cesar.” Ito nga desisyon ni Festo nagtalwas kan Pablo tikang ha iya mga kaaway. Waray pag-iha, nakaabot hi Pablo ha Roma​—hirayo gud ha mga Judio nga nag-iikaparatay ha iya.​—Buh. 25:6-12.

11. Ano an makaparig-on nga ginsiring ni Isaias nga posible nga ginhunahuna ni Pablo?

¹¹ Samtang naghuhulat hi Pablo han iya biyahe pakadto ha Italya, posible nga ginhunahuna niya an pahamangno ni propeta Isaias ha mga nakontra kan Jehova: “Paghimo kamo hin plano, kondi mapapakyas ito! Pagyakan kamo han iyo karuyag, kondi diri ito maglalampos, kay kaupod namon an Dios!” (Isa. 8:10) Maaram hi Pablo nga bubuligan hiya han Dios, ngan sigurado nga nagparig-on ini ha iya basi maatubang an mga pagsari nga iya pa maieksperyensyahan.

12. Paonan-o gintratar ni Julio hi Pablo, ngan ano an posible nga nasabtan ni Pablo?

¹² Han 58 C.E., nagbiyahe hi Pablo pakadto ha Italya. Sugad nga priso, igintubyan hiya kan Julio, nga usa nga Romano nga opisyal han kasundalohan. Tikang hito nga takna, may awtoridad hi Julio nga maltratuhon hi Pablo o trataron hiya hin maopay. Paonan-o niya gagamiton an iya awtoridad? Kinabuwasan, pagduong  nira, “hi Julio nagpakita hin pagkabuotan kan Pablo ngan gintugotan hiya nga kumadto ha iya kasangkayan.” Ha urhi, gintalwas pa ngani ni Julio hi Pablo. Paonan-o? Karuyag patayon han mga sundalo an ngatanan nga priso nga sakay han barko, pero ginpugngan hira ni Julio. Kay ano? ‘Determinado hiya nga madara nga talwas hi Pablo.’ Posible nga nasabtan ni Pablo nga gin-gagamit ni Jehova iton buotan nga opisyal basi buligan hiya.​—Buh. 27:1-3, 42-44.

13. Paonan-o mahimo gamiton ni Jehova an mga tawo nga may awtoridad?

¹³ Ano nga bulig an aton nakakarawat? Kon uyon ito ha kaburut-on ni Jehova, mahimo niya gamiton an iya gamhanan nga baraan nga espiritu basi pagiuson an mga tawo nga may awtoridad nga buhaton an iya karuyag. Hi Hadi Solomon nagsurat: “An kasingkasing han usa nga hadi pariho hin mga sapa han tubig ha kamot ni Jehova. Iya ito ginigiyahan diin man Niya karuyag.” (Prob. 21:1) Ano an iginpapasabot hito? An mga tawo puydi maghimo hin kanal basi isimang an tubig han usa nga sapa ngadto ha direksyon nga ira karuyag. Sugad man, mahimo gamiton ni Jehova an iya espiritu basi isimang an panhunahuna han mga magmarando ngadto ha direksyon nga uyon han iya katuyoan. Kon nahitatabo ito, an mga tawo nga may awtoridad napapagios nga maghimo hin mga desisyon nga pabor ha katawohan han Dios.​—Ikompara an Ezra 7:21, 25, 26.

14. Uyon ha Buhat 12:5, hin-o an mahimo naton ig-ampo?

¹⁴ Ano an puydi naton buhaton? Mahimo kita mag-ampo “para ha mga hadi ngan ha ngatanan nga may awtoridad” kon naghihimo hira hin mga desisyon nga makakaapekto ha aton Kristiano nga pagkinabuhi ngan ministeryo. (1 Tim. 2:1, 2, ftn.; Neh. 1:11) Pariho han siyahan-siglo nga mga Kristiano, naniniguro liwat kita pag-ampo ha Dios para ha aton priso nga kabugtoan. (Basaha an Buhat 12:5; Heb. 13:3) Mahimo liwat naton ig-ampo an mga gwardya ha prisohan nga nagbabantay ha aton kabugtoan. Mahimo kita makimalooy kan Jehova nga impluwensyahan an ira panhunahuna basi maaghat hira nga gumios pariho kan Julio ngan trataron nga may “pagkabuotan” an aton priso nga kabugtoan.​—Kitaa an study note han Buhat 27:3.

15-16. Paonan-o ginbuligan ni Jehova hi Pablo pinaagi kanda Aristarco ngan Lucas?

¹⁵ Ano nga bulig an nakarawat ni Pablo? Samtang nagbibiyahe hi Pablo pakadto ha Roma, pauroutro nga nakarawat niya an bulig ni Jehova pinaagi han iya mga igkasi-tumuroo. Hisgotan naton an pipira nga ehemplo.

 ¹⁶ Gin-updan hi Pablo han iya duha nga maunungon nga sangkay nga hira Aristarco ngan Lucas ha iya pagbiyahe pakadto ha Roma. * Andam hira nga ibutang ha peligro an ira kinabuhi basi makaupod hi Pablo, bisan kon baga hin waray hira pasariga ni Jesus nga makakaabot hira nga talwas ha Roma. Nahibaroan la nira nga matatalwas hira han ginbabagyohan na hira ha dagat. Salit han hira Aristarco ngan Lucas sinakay ha barko ha Cesarea, sigurado nga kinasingkasing nga nag-ampo hi Pablo kan Jehova basi magpasalamat han bulig nga iya iginhatag pinaagi hinin duha nga maisugon nga mga igkasi-tumuroo.​—Buh. 27:1, 2, 20-25.

17. Paonan-o ginbuligan ni Jehova hi Pablo pinaagi han iya mga igkasi-tumuroo?

¹⁷ Ha pagbiyahe ni Pablo, damu ka beses nga ginbuligan hiya han iya mga igkasi-tumuroo. Pananglitan, han dinuong hira ha syudad han Sidon, gintugotan ni Julio hi Pablo nga “kumadto ha iya kasangkayan basi maataman nira hiya.” Ngan katapos, ha syudad han Puteoli, hi Pablo ngan an iya mga kaupod ‘may nakita nga kabugtoan ngan ginhangyo hira [han kabugtoan] nga magpabilin upod nira hin pito ka adlaw.’ Samtang igintatagana han mga Kristiano hito nga mga lugar an panginahanglan ni Pablo ngan han iya mga kaupod, sigurado nga napalipay gud hira ni Pablo pinaagi ha pagsumat ha ira hin makaparig-on nga mga eksperyensya. (Ikompara an Buhat 15:2, 3.) Katapos hiton makapadasig nga pagbisita, hi Pablo ngan an iya mga kaupod nagpadayon ha pagbiyahe.​—Buh. 27:3; 28:13, 14.

18. Kay ano nga hi Pablo nagpasalamat ha Dios ngan nagkaada kaisog?

¹⁸ Samtang nagbabaktas hi Pablo tipakadto ha Roma, sigurado nga nahunahuna niya an iya iginsurat ha kongregasyon hito nga syudad tulo ka tuig na an naglabay: “Damu ka tuig na nga naghihingyap ako pagkada ha iyo.” (Roma 15:23) Pero waray gud niya laumi nga maabot hiya didto sugad nga priso. Sigurado nga naparig-on hiya han nakita niya an kabugtoan tikang ha Roma nga naghuhulat ha dalan basi  tapoon hiya! “Pakakita ni Pablo ha ira, nagpasalamat hiya ha Dios ngan nagkaada kaisog.” (Buh. 28:15) Tigamni nga nagpasalamat hi Pablo ha Dios tungod han presensya han kabugtoan. Kay ano? Kay nakita utro niya nga ginbubuligan hiya ni Jehova pinaagi han iya mga igkasi-tumuroo.

19. Sugad han siring han 1 Pedro 4:10, paonan-o kita mahimo gamiton ni Jehova ha pagbulig ha mga nanginginahanglan?

¹⁹ Ano an puydi naton buhaton? May mga kakongregasyon ka ba nga nag-aantos tungod ha sakit o iba pa nga magkuri nga problema? O bangin namatayan hira hin hinigugma. Kon may mahibaroan kita nga nanginginahanglan hin bulig, mahimo kita maghangyo kan Jehova nga buligan kita nga may maisiring o mabuhat nga maopay. An aton mga pulong ngan buhat bangin amo gud an ginkikinahanglan han aton bugto basi maparig-on hiya. (Basaha an 1 Pedro 4:10.) * An aton ginbubuligan mahimo magkaada utro bug-os nga pagsarig han saad ni Jehova nga “diri ko gud ikaw babayaan, ngan diri ko gud ikaw papabay-an.” Sigurado nga makakapalipay gud ito ha imo!

20. Kay ano nga may pagsarig nga makakasiring kita: “Hi Jehova an akon parabulig”?

²⁰ Pariho kan Pablo ngan han iya mga kaupod, nakakaeksperyensya kita hin sugad bagyo nga mga problema samtang nagbibiyahe kita ha dalan ngadto ha kinabuhi. Bisan pa hito, maaram kita nga puydi kita magmaisugon kay kaupod naton hi Jehova. Ginbubuligan kita niya pinaagi kan Jesus ngan han mga anghel. Dugang pa, kon uyon ito ha kaburut-on ni Jehova, mahimo kita niya buligan pinaagi han mga tawo nga may awtoridad. Ngan sugad han naeksperyensyahan mismo han damu ha aton, ginagamit ni Jehova an iya baraan nga espiritu basi pagiuson an iya mga surugoon nga buligan an ira kabugtoan. Salit pariho kan Pablo, may pagsarig nga makakasiring kita: “Hi Jehova an akon parabulig; diri ako mahahadlok. Ano an mahihimo ha akon han tawo?”​—Heb. 13:6.