Natawo ako han 1948 ha usa nga gutiay nga baryo ha sur-weste han Nigeria. Hito nga panahon, hi Uncle Moustapha, nga manghod ni Tatay, ngan hi Kuya Wahabi, an amon suhag nga bugto, nabawtismohan sugad nga mga Saksi ni Jehova. Han noybe anyos ako, namatay hi Tatay. Nasubo gud ako. Ginsidngan ako ni Kuya Wahabi nga makikita namon utro hi Tatay ha pagkabanhaw. Iton nakakaliaw nga mga pulong nagpagios ha akon nga mag-aram ha Biblia. Nabawtismohan ako han 1963. An akon tulo nga kabugtoan nabawtismohan liwat.

Han 1965, gin-updan ko an akon kuya nga hi Wilson ha Lagos ngan nalipay ako ha pakig-upod ha iba nga mga regular payunir ha Igbobi Congregation. An ira kalipay ngan kadasig nakaaghat ha akon, ngan han Enero 1968, nagpayunir liwat ako.

Hi Brother Albert Olugbebi nga nag-aalagad ha Bethel, nag-organisar hin espesyal nga katirok para ha amon nga mga batan-on mahitungod ha panginahanglan para ha mga espesyal payunir ha norte han Nigeria. Nahinunumdoman ko pa hi Brother Olugbebi ha iya kadasig ha pagsiring: “Mga batan-on kamo, ngan magagamit niyo an iyo panahon ngan kusog para kan Jehova. Damu an buruhaton didto!” Karuyag ko magin sugad kan Isaias ngan kumadto bisan diin ipadara ni Jehova, salit nagpasa ako hin aplikasyon.—Isa. 6:8.

 Han Mayo 1968, igintoka ako sugad nga espesyal payunir ha syudad han Kano, ha norte han Nigeria. Panahon ito han Biafran nga Girra (1967-1970), nga tungod hito nagkaada duro nga pag-antos ngan kamatayon ngan nakaabot ito ha este han Nigeria. Tungod han maopay nga intensyon, may brother nga nagkombinse ha akon nga diri ako kumadto. Pero ginsidngan ko hiya: “Salamat han imo kabaraka. Pero kon karuyag ni Jehova nga mag-alagad ako ha iya hini nga toka, sigurado nga uupdan niya ako.”

Makasurubo gud an kahimtang ha Kano. An girra sibil nakadaot gud hinin daku nga syudad. Samtang aada ha ministeryo, usahay naaagian namon an mga lawas han mga ginpamatay ha panahon han girra. Bisan kon damu an kongregasyon ha Kano, namalagiw an kadam-an han kabugtoan. Diri maabot hin 15 nga magwarali an nagpabilin, ngan nahahadlok hira ngan nanluluya. Nalipay gud ito nga kabugtoan han nagkaabot kami nga unom nga espesyal payunir. Ngan nadasig hira han amon pagparig-on. Ginbuligan namon hira nga maibalik an ira espirituwal nga rutina ngan maipadayon an pagpadara ha sanga nga opisina han ira report ha pag-alagad ngan mga order han literatura.

Kami nga mga espesyal payunir nagtikang pag-aram han Hausa nga linggwahe. Han nabatian an mensahe han Ginhadian ha ira kalugaringon nga linggwahe, damu nga taga-didto an namati ha amon. Pero an mga membro han nangunguna nga relihiyon ha Kano, waray maruyag ha amon pagsangyaw, salit kinahanglan namon nga magin maikmat gud. Ha usa nga higayon, ako ngan an akon partner ginlanat hin lalaki nga may kutsilyo. Maopay na la, mas malaksi kami dumalagan ngan waray niya kami kaabti! Bisan pa han mga peligro, hi Jehova ‘nagpaukoy ha amon nga may seguridad’ ngan an kadamu han magwarali nadugangan. (Sal. 4:8) Yana sobra 500 nga magwarali an nag-aalagad ha 11 nga kongregasyon ha Kano.

Ha urhi, han Agosto 1968, katapos hin pipira ka bulan namon ha Kano, ginpadara kami ha Niamey, an kapital han Republic of Niger, upod an duha pa nga espesyal payunir. Waray pag-iha nadiskobrehan namon nga an Niger ha West Africa, usa han pinakamapaso nga lugar ha tuna. Labot la nga kinahanglan  namon mahibaro ha pagsangyaw ha mapaso hinduro nga temperatura, kinahanglan liwat namon mahibaro han opisyal nga linggwahe nga amo an French. Bisan pa hito, sumarig kami kan Jehova ngan nagtikang pagsangyaw ha syudad kaupod an pipira nga magwarali nga taga-didto. Ha sulod hin halipot nga panahon, haros ngatanan ha Niamey nga nakakabasa nakakarawat hin kopya han libro nga gin-gagamit pag-Bible study nga An Kamatuoran nga Nagtutugway Ngadto ha Kinabuhi nga Waray Kataposan. An mga tawo namimiling pa ngani ha amon basi mangaro hin libro!

Waray pag-iha, nahibaroan namon nga an mga awtoridad nadiri ha mga Saksi ni Jehova. Han Hulyo 1969, nagkatitirok kami para ha pinakasiyahan nga sirkito nga asembleya hini nga nasud nga mga 20 an inatender. Eksayted kami nga makita an bawtismo han duha nga bag-o nga magwarali. Pero ha siyahan nga adlaw han asembleya, inabot an mga pulis ngan ginpaundang an programa. Gindara nira an mga espesyal payunir ngan an paramangno han sirkito ha estasyon han pulis. Katapos nira kami imbistigaron, ginsugo kami nga bumalik ha sunod nga adlaw. Nasabtan namon nga bangin samukon kami han mga awtoridad, salit nag-organisar kami hin pahayag ha bawtismo ha pribado nga balay ngan pasekreto nga ginbawtismohan an mga kandidato ha salog.

Paglabay hin pipira ka semana, ginsugo ako han gobyerno ngan an lima pa nga espesyal payunir nga bumaya ha nasud. Gintagan nira kami hin 48 ka oras basi bumaya ha nasud, ngan kami la an mag-aasikaso ha amon paggawas. Ginsugot namon ito ngan nagdiretso kami ha sanga nga opisina ha Nigeria, diin nakarawat namon an bag-o nga mga toka.

Igintoka ako ha baryo han Orisunbare ha Nigeria, diin na-enjoy ko an mabungahon nga ministeryo kaupod an gutiay nga grupo han mga magwarali nga taga-didto. Pero paglabay hin unom ka bulan, ginpabalik ako han sanga nga opisina ha Niger nga ako la. Ha siyahan nasurprisa ako ngan nabaraka, pero katapos, nagin eksayted ako nga makita utro an kabugtoan ha Niger!

Binalik ako ha Niamey. Ha sunod nga adlaw tikang han inabot ako, usa nga negosyante nga Nigerian an nakakilala nga Saksi ako ngan nagtikang hiya pagpakiana mahitungod ha Biblia. Nag-aram kami han Biblia, ngan katapos niya umundang ha pagsigarilyo ngan pag-ininom, nabawtismohan hiya. Nalipay ako ha pakig-upod ha kabugtoan basi magsangyaw ha iba-iba nga bahin han Niger ngan ha paglabay han mga tuig, makita an hinay-hinay nga pagkarawat han mga tawo han kamatuoran. Han pag-abot ko, may-ada 31 nga Saksi hini nga nasud; ngan han pagbaya ko may-ada 69.

Han Disyembre 1977, binalik ako ha Nigeria basi makakarawat hin training. Ha kataposan han tulo ka semana nga klase, ginpabasa ha akon han koordinetor han Branch Committee nga hi Malcolm Vigo an surat tikang ha sanga nga opisina han Sierra Leone.  An kabugtoan namimiling hin mahimsog, solo nga brother nga payunir nga maaram mag-Ingles ngan French basi mag-alagad sugad nga paramangno han sirkito ha Guinea. Ginsidngan ako ni Brother Vigo nga gin-train na ako para hito nga toka. Ginklaro niya nga diri ito masayon nga toka. Ginsagdonan niya ako: “Hunahunaa ito hin maopay antes mo karawaton.” Binaton dayon ako: “Tungod kay hi Jehova an nagsusugo ha akon, makadto ako.”

Nag-eruplano ako tikadto ha Sierra Leone ngan nakilala ko ha sanga nga opisina an kabugtoan. Usa nga membro han Branch Committee an nagsiring ha akon, “Diri damu an amon nahibabaroan mahitungod ha buruhaton han Ginhadian ha Guinea.” Bisan kon an sanga an may responsabilidad ha pagsangyaw nga buruhaton ha kahirani nga Guinea, diri posible an pakigkomunikar ha mga magwarali tungod ha kasamok ha politika didto. Makadamu nga nagtesting hira nga magpadara hin brother nga mabisita ha kabugtoan ha Guinea, pero waray gud nira ito mahimo. Tungod hito, ginhangyo ako nga magbiyahe ngadto ha Conakry nga sentro han Guinea, basi makakuha hin permit ha gobyerno nga makaukoy didto.

Han inabot ako ha Conakry, kumadto ako ha embassy han Nigeria ngan nakaistorya ko an ambassador didto. Ginsumatan ko hiya nga karuyag ko magsangyaw ha Guinea. Ginsidngan niya ako nga diri magpabilin kay bangin ako arestuhon o buhatan hin mas maraot pa. “Balik ha Nigeria ngan didto pagsangyaw,” nagsiring hiya, ngan binaton ako, “Karuyag ko gud mag-ukoy dinhi.” Salit nagsurat hiya ha Guinean Minister of the Interior basi buligan ako, ngan ginbuligan ako han minister.

Waray pag-iha, binalik ako ha sanga nga opisina ha Sierra Leone ngan ginsumatan an kabugtoan ha desisyon han minister. An kabugtoan nan-gugliat ha kalipay han nabatian nira kon paonan-o ginbendisyonan ni Jehova an akon pagbiyahe. Gintugotan ako han gobyerno nga umukoy ha Guinea!

Tikang han 1978 tubtob 1989, nag-alagad ako ha sirkito nga buruhaton ha Guinea, Sierra Leone, ngan sugad nga kasaliwan nga paramangno han sirkito ha Liberia. Ha siyahan, agsob ako magkasakit. Usahay nahitatabo ini ha higrayo nga mga lugar. Pero ginhihimo han kabugtoan an ira pinakamaopay nga madara ako ha hospital.

Makausa, nagkaada ako grabe nga malaria ngan nagkaada bitok. Han nakarekober na ako, nahibaroan ko nga nagsarabot ngay-an an kabugtoan kon diin ako iglulubong! Bisan pa hini nga mga peligro, waray ko gud mahunahuna nga bayaan an akon mga toka. Ngan pirme ako kombinsido nga an tinuod ngan nagpapadayon nga seguridad nagtitikang ha Dios nga makakabanhaw ha aton.

Han 1988, nakilala ko hi Dorcas, usa nga payunir nga sister nga nahigugma gud kan Jehova ngan duro gud kamapainubsanon. Nagpakasal kami, ngan nagkaupod kami ha akon toka ha sirkito nga buruhaton. Hi Dorcas mahigugmaon ngan nagsasakripisyo ha kalugaringon nga asawa. Nagbaktas kami hin 25 ka kilometro pagkadto ha mga kongregasyon nga may dara nga mga bagahe. Ha mas higrayo nga mga kongregasyon, nasakay kami ha bisan ano nga masasakyan basi makagbiyahe ha lapukon ngan lubakon nga mga dalan.

Hi Dorcas maisugon gud. Pananglitan, natabok kami usahay hin katubigan nga may mga buaya.  Makausa kinahanglan namon magbiyahe hin lima ka adlaw, ngan may tatabukon kami nga salog pinaagi hin mga baluto kay ruba an kahoy nga mga tulay. Han tinindog hi Dorcas basi humaw-as ha baluto, nahulog hiya ha hilarom nga tubig. Diri kami maaram lumangoy, ngan may mga buaya ito nga salog. Maopay na la may batan-on nga mga lalaki nga nanlukso ha tubig basi talwason hiya. Ha sulod hin pipira ka panahon, kami nga duha nag-iinop hiton maraot nga nahitabo, pero nagpadayon kami ha amon toka.

Temprano han 1992, nasurprisa gud kami han nahibaroan namon nga burod hi Dorcas. Ito na ba an kataposan han amon karera ha bug-os panahon nga pag-alagad? Siring namon, “Hi Jehova naghatag ha amon hin regalo!” Salit nagdesisyon kami nga ngaranan an amon anak nga babaye hin Jahgift. Paglabay hin upat ka tuig, tikang han natawo hi Jahgift, natawo naman an iya bugto nga hi Eric. An amon duha nga anak regalo gud tikang han Jehova. May panahon nga hi Jahgift nakag-alagad ha remote translation office ha Conakry, ngan hi Eric usa nga ministeryal nga surugoon.

Bisan kon ha urhi kinahanglan umundang hi Dorcas ha pagin espesyal payunir, nagpadayon hiya sugad nga regular payunir, bisan pa kon nag-aataman hiya han amon mga anak. Ha bulig ni Jehova nagpadayon ako ha espesyal nga bug-os panahon nga pag-alagad. Han dagku na an amon mga anak, nakag-alagad utro sugad nga espesyal payunir hi Dorcas. Yana nag-aalagad kami sugad nga misyonero ha Conakry.

Pirme ako napakadto diin man ako ni Jehova dad-a. Agsob nga naabat namon nga mag-asawa an iya proteksyon ngan bendisyon. An pagsarig kan Jehova nagtalwas ha amon ha damu nga mga problema nga nakakaistres hadton nasarig ha materyal nga mga butang. Nahibaroan namon ni Dorcas ha amon personal nga eksperyensya nga an Gintitikangan han tinuod nga seguridad amo an “Dios nga amon paratalwas,” hi Jehova. (1 Cron. 16:35) Kombinsido ako nga an kinabuhi han ngatanan nga nasarig ha iya “puputson hin maopay ni Jehova . . . ha surudlan han kinabuhi.”—1 Sam. 25:29.