MAPASALAMATON ako nga ginpadaku ako hin Kristiano nga mga kag-anak, hira Fred ngan Edna Molohan, nga nagtutdo ha akon nga magkaada debosyon ha Dios. Aktibo na hira nga mga Estudyante han Biblia (mga Saksi ni Jehova) ha sulod hin 20 ka tuig han natawo ako han 1934. Nag-ukoy an amon pamilya ha Parsons, usa nga gutiay nga bungto ha sur-este han Kansas. Membro kami han kongregasyon didto nga haros ngatanan nga membro dinihogan nga mga Kristiano. An amon pamilya may maopay nga rutina ha pagtambong ha mga katirok ngan pagsangyaw han kamatuoran han Pulong han Dios. Kasagaran na nga igin-gagahin an Sabado nga kulop para ha pagsangyaw ha kalsada, nga gintatawag namon hadto nga pagsangyaw ha publiko. Usahay makapoy ito, pero katapos han pagsangyaw pirme kami ginpapalitan ni Tatay hin ice cream.

An amon gutiay nga kongregasyon may daku nga teritoryo nga nag-uupod han pipira nga gudtiay nga bungto ngan damu nga kaumhan ha kahirani nga mga probinsya. Kon nagsasangyaw kami ha mga parauma, kasagaran na nga amon iginbabalyo an aton mga literatura hin mga utanon, mga bonay (tikang pa la ha pugaran), o hin buhi nga mga manok pa ngani. Tungod kay abanse hi Tatay nga naghahatag hin kontribusyon para ha mga literatura, ito nga mga pagkaon nakabulig basi may makaon an amon pamilya.

An akon mga kag-anak nagkaada ponograpo, nga ginagamit nira ha pagsangyaw. Tungod kay gutiay pa ako, diri pa ako nakakapatokar, pero nalipay gud ako pagbulig kanda Tatay ngan Nanay samtang ira iginpapatokar an nakarekord nga mga pahayag ni Bugto Rutherford durante han mga pagbalik-bisita ngan mga pag-aram ha Biblia.

Ginhimo ni Tatay an amon 1936 Ford nga awto ha gintatawag namon nga sound car, usa nga sarakyan nga may daku nga speaker ha atop. Epektibo gud ito ha pagpasamwak han mensahe han Ginhadian. Kasagaran nga nagpapatokar anay hin nakarekord nga  musika basi makuha an atensyon han mga tawo, ngan katapos hito, nagpapatokar hin pahayag nga basado ha Biblia. Katapos han pahayag, nagtatanyag kami hin literatura ha mga interesado.

Ha gutiay nga bungto han Cherryvale, Kansas, ginsidngan hi Tatay han mga pulis nga diri puydi patokaron an sound car ha park han bungto, diin damu an nagpapahalibway kon Domingo, pero puydi ito patokaron ha gawas han park. Salit iginbalhin ni Tatay an awto ha kahirani nga kalsada nga atbang han park basi mabatian pa gihapon han mga tawo an mensahe, ngan padayon niya ito nga ginpatokar. Makalilipay gud pirme nga makaupod hi Tatay ngan hi Kuya Jerry ha sugad nga mga okasyon.

Ha ikatarapos han dekada han 1930, nakigbahin kami ha espesyal nga mga kampanya ha madagmit nga pagkobre han mga teritoryo diin nakontra an mga tawo ha aton buruhaton. Namata kami antes sumidlit an adlaw (sugad han amon ginbuhat ha Joplin, Missouri) ngan maikmat nga nagbubutang hin tract o bokleta ha ilarom han purtahan han mga balay. Katapos, nagkikirigta kami ha gawas han syudad basi hibaroan kon may nadakop ba ha amon han mga pulis.

Hito nga mga tuig, may usa pa nga makalilipay nga paagi han pagministeryo nga gintatawag namon nga information march. Basi ipasamwak an Ginhadian, nagsusul-ot kami hin mga plakard ngan nagmamartsa nga nakalinya ha usa nga syudad. Nahinunumdoman ko pa an usa nga higayon han nagmartsa an kabugtoan ha amon bungto nga nakasul-ot han plakard nga may nakasurat nga “Religion Is a Snare and a Racket” (An Relihiyon Usa nga Lit-ag Ngan Panlimbong). Nagbaktas hira hin mga 1.6 ka kilometro ha bungto ngan katapos binalik ha amon balay. Maopay na la nga waray kinontra ha ira pagmartsa, pero damu nga mga nag-obserbar an interesado mahibaro.

An amon pamilya agsob magbiyahe tikang ha Kansas ngadto ha Texas basi tumambong ha mga kombensyon. Nagtatrabaho hi Tatay ha Missouri-Kansas-Texas Railroad (kilala liwat sugad nga M-K-T, o Katy, Railroad), salit libre nga nakakasakay kami ha tren. Tungod hito, nakakabisita kami ha amon mga paryente ngan nakakatambong ha mga kombensyon. An magurang ni Nanay nga hi Fred Wismar, ngan an iya asawa nga hi Eulalie, nag-ukoy ha Temple, Texas. Hi Tiyo Fred nahibaro han kamatuoran sugad nga batan-on temprano han dekada han 1900, nabawtismohan hiya, ngan ginsumatan niya an iya kabugtoan mahitungod han iya mga hinbaroan, upod na hi Nanay. Kilala hiya han kabugtoan ha bug-os nga sentral Texas, diin nag-alagad hiya hadto sugad nga zone servant (gintatawag yana nga paramangno han sirkito). Buotan hiya ngan malipayon pirme, ngan maopay gud hiya nga kaupod. Madasigon hiya ha kamatuoran, ngan maopay gud hiya nga impluwensya ha akon han batan-on pa ako.

Han 1941 an amon pamilya nagbiyahe sakay hin tren ngadto ha St. Louis, Missouri, basi tumambong hin daku nga kombensyon. An ngatanan nga batan-on gin-aghat nga lumingkod ha usa nga espesyal nga lokasyon han pasilidad basi mamati ha pahayag ni Bugto Rutherford nga may ulohan nga “Children of the King” (Mga Anak han Hadi). Katapos han iya pahayag, nasurprisa an tagsa ha amon kay usa-usa kami nga gintagan hin regalo nga bag-o nga libro nga Children ni Bugto Rutherford ngan han iya mga kabulig. Sobra 15,000 nga batan-on an nakakarawat hini nga espirituwal nga bendisyon.

 Han Abril 1943 tinambong kami ha gutiay pero makatirigamnan nga “Call to Action” Assembly ha Coffeyville, Kansas. Didto, iginpahibaro nga an ngatanan nga kongregasyon magkakaada bag-o nga eskwelahan, an Teokratiko nga Eskwelahan ha Ministeryo. Iginrelis liwat an bokleta nga may 52 nga leksyon nga gagamiton hito nga eskwelahan. Ha urhi hito nga tuig, ginpresentar ko an akon siyahan nga bahin sugad nga estudyante. Espesyal liwat para ha akon ito nga asembleya, kay nabawtismohan ako kaupod han pipira nga iba pa ha matugnaw ngan gutiay nga sapa ha kahirani nga uma.

Naggradwar ako ha hayskul han 1951 ngan kinahanglan ko magdesisyon kon ano an karuyag ko buhaton ha akon kinabuhi. Hingyap ko gud nga mag-alagad ha Bethel, diin nag-alagad hadto hi Kuya Jerry, salit nagpasa ako hin aplikasyon. Ito nga desisyon nakabulig gud ha akon espirituwalidad. Waray pag-iha, naaprobaran an akon aplikasyon, ngan gin-imbitar ako nga mag-alagad ha Bethel han Marso 10, 1952.

Karuyag ko gud magtrabaho ha imprintahan basi makabulig ha pag-imprinta han mga magasin ngan iba pa nga literatura. Pero igintoka ako sugad nga waiter ngan ha urhi, ha kusina. Nalipay ako hini nga trabaho ngan damu an akon hinbaroan. Waray gud ako makapribilehiyo nga magtrabaho ha imprintahan. Pero an eskedyol para ha mga nagtatrabaho ha kusina pabor ha akon kay nagkaada ako panahon durante han adlaw para ha personal nga pag-aram gamit an daku nga librarya han Bethel. Nakabulig ini ha akon nga mag-uswag ha espirituwal ngan maparig-on an akon pagtoo. Nagparig-on liwat ini han akon determinasyon nga mag-alagad kan Jehova ha Bethel tubtob nga mahihimo ko. Ginawas ha Bethel hi Kuya Jerry han 1949 ngan nagpakasal kan Ate Patricia, pero inukoy hira hirani ha Brooklyn. Pirme gud nira ako ginbubuligan ngan gindadasig han bag-o pa la ako ha Bethel.

Waray pag-iha pag-abot ko ha Bethel, nagkaada kahikayan nga mamiling hin mga brother nga idudugang ha listahan hin mga Bethelite nga mamumulong. An mga brother nga nakalista igintutoka ha pagbisita ha mga kongregasyon nga mga 322 ka kilometro an kahirayo ha Brooklyn basi maghatag hin pahayag publiko ngan umupod ha kongregasyon ha pagsangyaw. Usa ako han mga nakakarawat hito nga pribilehiyo. Ginkulba gud ako han iginpresentar ko an akon siyahan nga pahayag publiko, nga hadto usa ka oras an kahilaba. Kasagaran nga nagbibiyahe ako sakay hin tren tipakadto ha mga kongregasyon. Nahinunumdoman ko pa an nahitabo ha akon han Domingo han kulop han 1954. Sinakay ako hin tren tipabalik ha New York ngan makakaabot unta ako ha Bethel temprano han gab-i. Pero nagkaada bagyo nga may dara nga makusog nga hangin ngan uran nga niebe. Naparong an makina han tren. Nakaabot ito ha New York City han mga alas singko na han Lunes nga aga. Tikang didto, nagdali-dali ako pagkadto ha subway basi makasakay tipauli ha Brooklyn ngan dumiretso ako ha kusina, medyo na-late ako ngan kapoy hinduro kay bug-os nga gab-i ako nga waray makakaturog ha palyado nga tren. Pero an sugad nga panhitabo waray gud makagwara han kalipay nga akon inabat ha pagserbi ha kabugtoan ngan pagkaada damu nga kasangkayan hini nga espesyal nga pag-alagad durante han kataposan han semana.

Han pipira ka tuig pa la ako ha Bethel, nakapribilehiyo ako nga makigbahin ha usa nga programa ha radyo nga iginbubrodkast han estasyon nga WBBR. An mga studio nahimumutang ha ikaduha ka andana han bilding ha 124 Columbia Heights. Usa ako han mga kaapi han programa nga pag-aram ha Biblia nga iginbubrodkast kada semana. Hi Bugto A. H. Macmillan, nga maiha na nga membro han pamilya han Bethel, regular nga nakikigbahin hini nga mga programa ha radyo. Gintatawag namon hiya nga Bugto Mac. Maopay gud hiya nga ehemplo ha amon nga mga batan-on nga Bethelite tungod han iya pagin mapailubon ha pag-alagad kan Jehova bisan pa han mga kakurian.

Han 1958, nagbag-o an akon toka ngan nagtikang ako pagtrabaho para ha Gilead School. An akon toka amo an pagbulig ha mga naggradwar nga makakuha hin visa ngan pag-asikaso han mga pagbiyahe hinin madasigon nga kabugtoan. Hadto, mahal hinduro an pamasahe ha eruplano, salit gutiay la han mga naggradwar an nakakagbiyahe sakay hin eruplano. Kadam-an han mga nagbiyahe tipakadto ha Aprika ngan Asia sinakay ha pankargamento nga mga barko. Han nagbarato an pamasahe ha eruplano, ito na an ginsasakyan han kadam-an han mga misyonero tipakadto ha ira toka.

Han 1960, nagin trabaho ko liwat an pagplete hin mga eruplano nga magbibiyahe tikang ha Estados Unidos ngadto ha Europa para ha 1961 nga internasyonal  nga mga kombensyon. Inupod ako hito nga pagbiyahe tikang ha New York ngadto ha Hamburg, Alemanya, para hito nga kombensyon. Katapos han kombensyon, kaupod an tulo nga Bethelite nagplete kami hin awto ngan nagbiyahe tikang ha Alemanya ngadto ha Italya, ngan ginbisita an sanga nga opisina ha Roma. Tikang didto, nagbiyahe kami tipakadto ha Fransia, inagi ha Pyrenees Mountains, ngan kumadto ha Espanya, diin igindidiri an aton buruhaton. Nakaghatag kami hin pipira nga publikasyon ha kabugtoan ha Barcelona, nga amon ginputos sugad hin mga regalo. Makalilipay gud nga makilala hira! Tikang didto, nagbiyahe kami sakay hin awto tipakadto ha Amsterdam ngan sinakay hin eruplano tipabalik ha New York.

Han 1962, gintokahan ako nga mag-asikaso han mga biyahe han pinili nga mga delegado nga matambong ha espesyal nga serye han internasyonal nga mga kombensyon nga hihimoon ha bug-os nga kalibotan. Ito an “Everlasting Good News” Assembly han 1963. Naghimo hin mga kahikayan para ha 583 nga delegado nga magbibiyahe ha bug-os nga kalibotan basi tumambong han mga kombensyon ha Europa, Asia, ngan Sur Pasipiko ngan katapos, makadto hira ha Honolulu, Hawaii, ngan Pasadena, California. Bibisitahon liwat nira an Lebanon ngan Jordan para hin espesyal nga tour ha mga lugar nga gin-uunabi ha Biblia. Labot ha pag-eskedyol han ira pagbiyahe ngan han mga hotel nga ira uukyan, gin-asikaso liwat han amon departamento an pagkuha han ngatanan nga visa nga ginkikinahanglan para ha pipira nga nasud nga ira kakadtoan.

An 1963 importante liwat nga tuig para ha akon tungod hin usa pa nga rason. Han Hunyo 29, ginkasal kami ni Lila Rogers nga taga-Missouri, nga tulo ka tuig na nga Bethelite. Usa ka semana katapos han amon kasal, inupod kami ha pagbiyahe ha bug-os nga kalibotan basi tumambong han mga kombensyon ngan ginbisita namon an Gresya, Ehipto, ngan Lebanon. Tikang ha Beirut, nag-eruplano kami tipakadto ha gutiay nga airport ha Jordan. Tungod kay igindidiri an aton buruhaton ha Jordan ngan ginsidngan kami nga an mga Saksi ni Jehova diri gintatagan hin visa basi makasulod hito nga nasud, nahunahuna namon kon ano an mahitatabo pag-abot namon didto. Hunahunaa la an amon kalipay ngan kahipausa han pag-abot namon ha airport, nakita namon an kabugtoan nga naninindog ha terminal ngan may dara nga baner nga may nakasurat nga “Malipayon nga pag-abot mga Saksi ni Jehova”! Makalilipay liwat nga makita mismo an mga lugar nga gin-uunabi ha Biblia! Ginbisita namon an mga lugar diin nag-ukoy an kadaan nga mga patriarka, diin nagsangyaw hi Jesus ngan an mga apostol, ngan diin nagtikang pagsarang an Kristianidad tubtob ha mga sidsid han tuna.​—Buh. 13:47.

Ha sulod hin 55 ka tuig, nagin maunungon ko nga kaupod hi Lila ha ngatanan namon nga toka ha pag-alagad. Nakabisita kami hin pipira ka beses ha Espanya ngan Portugal han panahon nga igindidiri an aton buruhaton didto. Nagkaada kami higayon nga parig-unon an kabugtoan ngan madad-an hira hin mga literatura ngan iba pa nga ira ginkikinahanglan. Nabisita pa ngani namon an pipira nga kabugtoan nga priso ha usa nga kadaan nga kampo han mga sundalo ha Cádiz, Espanya. Nalipay gud ako nga naparig-on ko hira pinaagi hin pahayag nga basado ha Kasuratan.

Han sumunod nga mga tuig tikang han 1963, nakapribilehiyo ako ha pag-asikaso han mga pagbiyahe  para ha internasyonal nga mga kombensyon ha Aprika, Australia, Sentral ngan Sur Amerika, Europa, Asia, Hawaii, New Zealand, ngan Puerto Rico. Nakapahimulos kami ni Lila pagtambong hin damu nga kombensyon nga diri gud namon mahingangalimtan, usa na hito an ha Warsaw, Polandia, han 1989. Damu nga kabugtoan ha Rusya an nakatambong hito nga daku nga kombensyon​—an ira siyahan nga kombensyon! May nakilala kami nga pipira nga kabugtoan nga napriso hin damu ka tuig ha Unyon Sobyet tungod han ira pagtoo.

An pagbisita ha mga sanga nga opisina ha bug-os nga kalibotan basi parig-unon ngan dasigon an mga Bethelite ngan an mga misyonero makalilipay gud nga pribilehiyo para ha akon. Ha amon ultimo nga branch visit, ginbisita namon an South Korea, ngan nakilala namon an 50 han aton kabugtoan nga priso ha Suwon. Hira ngatanan may positibo gud nga disposisyon ngan ginpapamulat nira nga makabalik hira utro ha ira pagministeryo. Naparig-on gud kami han amon pagbisita ha ira!​—Roma 1:11, 12.

Ha sulod hin mga katuigan, nakita ko kon paonan-o ginbibendisyonan ni Jehova an iya katawohan. Han nabawtismohan ako han 1943, mga 100,000 pa la an magwarali, pero yana, sobra 8,000,000 na an nag-aalagad kan Jehova ha 240 nga nasud. An pagin maduruto han mga naggradwar ha Gilead daku gud an naibulig hini nga pag-uswag. Makalilipay gud an pagtrabaho kaupod han damu hini nga mga misyonero han naglabay nga katuigan ngan ha pagbulig ha ira nga makakadto ha ira mga toka!

Mapasalamaton gud ako nga nagdesisyon ako sugad nga batan-on nga pauswagon an akon ministeryo pinaagi ha pag-aplay ha Bethel. Hura nga ginbibendisyonan ako ni Jehova tubtob yana. Labot ha makalilipay nga pag-alagad ha Bethel, nalipay liwat kami ni Lila ha pagsangyaw kaupod an pipira nga kongregasyon ha Brooklyn ha sulod hin sobra 50 ka tuig na, diin damu an amon nagin tinuod nga kasangkayan.

Padayon pa gihapon ako nga nag-aalagad ha Bethel ha bulig ni Lila. Bisan kon sobra 84 anyos na ako yana, nalilipay ako nga may-ada pa gihapon ako nahihimo nga mapulsanon nga trabaho, an pagbulig ha pag-asikaso han mga surat nga iginpapadara ngan nakakarawat han sanga nga opisina.

Makalilipay gud nga magin bahin han urusahon nga organisasyon ni Jehova ngan makita an daku nga kaibahan hadton nag-aalagad kan Jehova ngan hadton diri nag-aalagad ha iya. Mas klaro na ha amon an ginsisiring han Malakias 3:18: “Dida hito kamo mabalik ngan magtitino han ginkakalainan han matadong ngan han maraut, han ginkakalainan niya nga nagaalagad han Dios ngan niya nga diri nagaalagad ha iya.” Kada adlaw, nakikita naton nga nagtitikasamok an sistema ni Satanas, ngan an mga tawo waray paglaom ngan gutiay la hinduro an ira kalipay ha kinabuhi. Pero adton nahigugma ngan nag-aalagad kan Jehova may malipayon nga kinabuhi​—bisan hinin makuri nga panahon—​ngan may sigurado nga paglaom ha tidaraon. Pribilehiyo gud naton nga ipasamwak an maopay nga sumat han Ginhadian! (Mat. 24:14) Ginpapamulat gud naton an panahon, nga diri na gud mag-iiha, nga bubungkagon han Ginhadian han Dios inin daan nga sistema ngan isasaliwan an bag-o nga kalibotan, ngan matutuman an ngatanan nga saad hito, sugad han mahimsog nga panlawas ngan kinabuhi nga dayon. Hito nga panahon, an matinumanon nga mga surugoon ni Jehova dinhi ha tuna magpapahimulos hin kinabuhi nga waray kataposan.