1. Ano an usa nga rason nga nagkakaurosa an pamilya ni Jehova?

NALILIPAY gud kita nga magin bahin han pamilya ni Jehova. Kay ano nga murayaw gud kita ngan nagkakaurosa? An usa nga rason tungod kay ginhihimo naton ngatanan an aton bug-os nga mahihimo ha pagrespeto han kahikayan ni Jehova ha pagkaulo. Ngani, samtang mas nasasabtan naton hin maopay an kahikayan ha pagkaulo, mas nagkakaurosa kita.

2. Ano nga mga pakiana an babatunon naton hini nga artikulo?

² Hini nga artikulo, hihisgotan naton an mahitungod han pagkaulo ha kongregasyon. Babatunon liwat naton ini nga mga pakiana: Ano an papel han mga sister? Tinuod ba nga an tagsa nga brother ulo han tagsa nga sister? An awtoridad ba han mga tigurang ha kabugtoan pariho han awtoridad han ulo han pamilya ha iya asawa ngan mga anak? Siyahan, hisgotan naton kon ano an dapat naton magin panhunahuna ha mga sister.

3. Paonan-o naton mapapahilarom an aton apresasyon ha mga ginbubuhat han mga sister?

³ Gin-aapresyar naton an mga sister nga maduruto nga nag-aataman han ira pamilya, nagsasangyaw han maopay nga sumat, ngan nasuporta ha kongregasyon. Mapapahilarom naton an aton apresasyon ha ira kon papamalandungon naton kon ano an panhunahuna ha ira ni Jehova ngan ni Jesus. May mahibabaroan liwat kita ha paagi han pagtratar ni apostol Pablo ha kababayin-an.

4. Paonan-o iginpapakita han Biblia nga pariho importante kan Jehova an kababayin-an ngan kalalakin-an?

⁴ Iginpapakita han Biblia nga pariho importante kan Jehova an kababayin-an ngan kalalakin-an. Pananglitan, iginsusumat hito  nga ha siyahan nga siglo gintagan ni Jehova hin baraan nga espiritu an kababayin-an pati an kalalakin-an basi makahimo hin milagroso nga mga butang, sugad han pagyakan hin magkalain-lain nga linggwahe. (Buh. 2:1-4, 15-18) Pariho hira gindihogan han baraan nga espiritu ngan may paglaom nga magmando kaupod han Kristo. (Gal. 3:26-29) Kababayin-an ngan kalalakin-an an makakakarawat han premyo nga kinabuhi nga waray kataposan ha tuna. (Pah. 7:9, 10, 13-15) Ngan kalalakin-an ngan kababayin-an an igintoka ha pagsangyaw ngan pagtutdo han maopay nga sumat. (Mat. 28:19, 20) Ngani, ha libro han Mga Buhat gin-unabi an usa nga Kristiano nga babaye nga hi Priscila, nga binulig ha iya bana nga hi Aquila, basi isaysay an kamatuoran hin mas husto ha edukado gud nga tawo nga hi Apolos.​—Buh. 18:24-26.

5. Sugad han iginpapakita han Lucas 10:38, 39, 42, ano an pagtratar ni Jesus ha kababayin-an?

⁵ Ginpasidunggan ngan ginrespeto ni Jesus an kababayin-an. Waray niya sunda an kustomre han mga Pariseo, nga nagmiminos ha kababayin-an ngan diri ngani nakikiistorya ha ira ha publiko, labi na mahitungod ha Kasuratan. Lugod, igin-aapi ni Jesus an kababayin-an kon naghihisgot hiya han higlarom nga espirituwal nga mga butang upod han iba pa nga mga disipulo. * (Basaha an Lucas 10:38, 39, 42.) Igin-uupod liwat niya an kababayin-an ha iya pagsangyaw ha iba-iba nga lugar. (Luc. 8:1-3) Ngan gintagan hira ni Jesus han pribilehiyo nga isumat ha mga apostol nga ginbanhaw na hiya.​—Juan 20:16-18.

6. Paonan-o iginpakita ni apostol Pablo nga ginrirespeto niya an kababayin-an?

⁶ Ginpahinumdoman ni apostol Pablo hi Timoteo nga respetuhon an kababayin-an. Ginsidngan hiya ni Pablo nga trataron an “lagas nga kababayin-an sugad hin mga nanay” ngan “an burobata nga kababayin-an sugad hin kabugtoan.” (1 Tim. 5:1, 2) Bisan kon daku an naibulig ni Pablo kan Timoteo basi magin hamtong nga Kristiano, iya ginkilala nga an nanay ngan an lola ni Timoteo an siyahan nga nagtutdo kan Timoteo han “baraan nga mga sinurat.” (2 Tim. 1:5; 3:14, 15) Ha surat ni Pablo ha mga taga-Roma, iya ginngaranan an Kristiano nga kababayin-an ha iya pangumusta ha ira. Diri la kay naobserbaran niya an ira mga ginbuhat kondi iya liwat hira ginkumendasyonan sugad nga Kristiano nga mga ministro.​—Roma 16:1-4, 6, 12; Fil. 4:3.

7. Ano nga mga pakiana an aton hihisgotan?

⁷ Sugad han iginpapakita han nauna nga mga parapo, diri uyon ha Kasuratan an paghunahuna nga an mga sister mas minos kay ha mga brother. An aton mahigugmaon ngan mahinatagon nga mga sister daku gud nga bulig, ngan gin-aapresyar gud han mga tigurang an ira bulig basi magin murayaw ngan nagkakaurosa pirme an kongregasyon. Kondi kinahanglan naton batunon ini nga mga pakiana: Kay ano nga ginsusugo ni Jehova an usa nga sister nga magtabon ha ulo ha pipira nga kahimtang? Ngan tungod kay an mga brother la an ginpipili sugad nga mga tigurang ngan ministeryal nga surugoon, nagpapasabot ba ini nga an tagsa nga brother ulo han tagsa nga sister ha kongregasyon?

8. Sumala ha Efeso 5:23, an tagsa ba nga brother ulo han tagsa nga sister? Isaysay.

⁸ An baton diri! An usa nga brother diri ulo han ngatanan nga sister ha kongregasyon; an Kristo an ira ulo. (Basaha an Efeso 5:23.) Ha pamilya, an bana may awtoridad ha iya asawa. An usa nga bawtismado nga anak nga lalaki diri amo an ulo han iya nanay. (Efe. 6:1, 2) Ngan ha kongregasyon, an mga tigurang may-ada  limitado la nga awtoridad ha mga sister ngan mga brother. (1 Tes. 5:12; Heb. 13:17) An solo nga kababayin-an nga diri na naukoy ha ira mga kag-anak padayon nga narespeto ha ira ngan ha mga tigurang. Pero pariho han mga brother ha kongregasyon, may usa la hira nga ulo, hi Jesus.

9. Kay ano nga may mga panahon nga kinahanglan magbutang hin tabon ha ulo an mga sister?

⁹ Tinuod, hi Jehova nagpili hin kalalakin-an nga mangunguna ha pagtutdo ngan ha pagsingba ha kongregasyon ngan waray niya tagi an kababayin-an hito nga awtoridad. (1 Tim. 2:12) Kay ano? Pariho ito han rason kon kay ano nga hi Jesus ginpili nga ulo han lalaki​—basi magin organisado pirme an kongregasyon. Kon may mga kahimtang nga kinahanglan dumarahon han usa nga sister an toka nga kasagaran na nga gindudumara han usa nga brother, ginsusugo hiya ni Jehova nga magbutang hin tabon ha ulo. * (1 Cor. 11:4-7) Iginpapabuhat ini ni Jehova ha mga sister diri para minuson hira, kondi para maipakita nira nga ginrirespeto nira an prinsipyo ha pagkaulo nga iya iginhatag. Yana, batunon naton ini nga pakiana: May-ada ano nga awtoridad an mga ulo han pamilya ngan mga tigurang?

10. Kay ano nga bangin maaghat an usa nga tigurang nga maghimo hin mga surundon ha kongregasyon?

¹⁰ An mga tigurang nahigugma ha Kristo, ngan nahigugma hira ha “mga karnero” nga iginpapaataman ha ira ni Jehova ngan ni Jesus. (Juan 21:15-17) Tungod han maopay nga intensyon, an usa nga tigurang bangin maghunahuna nga sugad hiya hin tatay ha kongregasyon. Bangin mangatadongan hiya nga kon an usa nga ulo han pamilya may katungod paghimo  hin mga surundon basi maproteksyonan an iya pamilya, an usa nga tigurang puydi liwat maghimo hin mga surundon nga ginhuhunahuna niya nga makakaproteksyon ha mga karnero han Dios. Ngan bangin aghaton han pipira nga kabugtoan an mga tigurang nga magin ira espirituwal nga ulo pinaagi ha paghangyo ha ira nga maghimo hin mga desisyon para ha ira. Pero magkapariho ba an awtoridad han mga tigurang ha kongregasyon ngan han mga ulo han pamilya?

11. Ano an mga kaparihoan han papel han ulo han pamilya ngan han mga tigurang?

¹¹ Iginpakita ni apostol Pablo nga may pipira nga kaparihoan an papel han ulo han pamilya ngan han usa nga tigurang. (1 Tim. 3:4, 5) Pananglitan, karuyag ni Jehova nga an mga membro han pamilya magsugot ha ulo han pamilya. (Col. 3:20) Ngan karuyag niya nga adton aada ha kongregasyon magsugot ha mga tigurang. Naglalaom hi Jehova ha mga ulo han pamilya ngan ha mga tigurang nga sisiguruhon nira nga mahimsog ha espirituwal an ira mga gin-aataman. Pariho liwat nira ginsisiguro nga maihatag an emosyonal nga panginahanglan han mga sakop han ira awtoridad. Ngan pariho han maopay nga mga ulo han pamilya, ginsisiguro han mga tigurang nga makakarawat hin bulig adton ira gin-aataman nga may mga problema. (San. 2:15-17) Ginlalaoman liwat ni Jehova nga  an mga tigurang ngan mga ulo han pamilya mabulig ha iba nga sundon an iya mga balaud. Iya liwat ginpahamangnoan hira nga diri ‘pasobrahan an mga butang nga nahisurat’ ha Biblia.​—1 Cor. 4:6.

12-13. Uyon ha Roma 7:2, ano an mga kaibahan han papel han mga ulo han pamilya ngan han mga tigurang?

¹² Pero may liwat dagku nga kaibahan an papel han usa nga tigurang ngan an papel han usa nga ulo han pamilya. Pananglitan, gintokahan ni Jehova an mga tigurang nga magin mga hukom, ngan gintagan hira hin responsabilidad nga paiwason ha kongregasyon an mga nakakasala nga diri nagbabasol.​—1 Cor. 5:11-13.

¹³ Pero gintagan ni Jehova an ulo han pamilya hin awtoridad nga waray niya ihatag ha mga tigurang. Pananglitan, gintagan niya hin awtoridad an ulo han pamilya nga maghimo ngan magpatuman hin mga patakaran para ha iya pamilya. (Basaha an Roma 7:2.) Pananglitan, an usa nga ulo han pamilya may katungod ha pagdesisyon kon ano nga oras ha gab-i dapat ada na ha balay an iya mga anak. May awtoridad liwat hiya ha pagdisiplina ha iya mga anak kon diri nira ginsusunod ito nga patakaran. (Efe. 6:1) Syempre, an usa nga mahigugmaon nga ulo han pamilya nakonsulta anay ha iya asawa antes maghimo hin mga patakaran para ha ira pamilya kay hira nga duha “usa nga unod.” *​—Mat. 19:6.

14. (a) Uyon ha Marcos 10:45, kay ano nga angayan nga hi Jesus an ginpili ni Jehova nga ulo han kongregasyon? (b) Ano an papel han Nagmamando nga Lawas? (Kitaa an kahon nga “ An Papel han Nagmamando nga Lawas.”)

¹⁴ Pinaagi han lukat, ginpalit ni Jehova an kinabuhi han tagsa nga indibiduwal ha kongregasyon  ngan an bisan hin-o nga nagpapakita hin pagtoo kan Jesus. (Basaha an Marcos 10:45; Buh. 20:28; 1 Cor. 15:21, 22) Salit angayan gud nga hi Jesus, nga naghatag han iya kinabuhi sugad nga lukat, an ginpili ni Jehova nga ulo han kongregasyon. Sugad nga aton ulo, hi Jesus may awtoridad ha paghimo ngan ha pagpatuman hin mga surundon kon ano an dapat buhaton han mga tawo, mga pamilya, ngan han bug-os nga kongregasyon. (Gal. 6:2) Pero hi Jesus diri la basta nga naghihimo hin mga surundon. Ginpapakaon liwat niya ngan ginhihigugma an kada tagsa ha aton.​—Efe. 5:29.

15-16. Ano an imo nahibaroan tikang ha ginsiring han sister nga hi Marley ngan han brother nga hi Benjamin?

¹⁵ Iginpapakita han mga sister nga narespeto hira ha Kristo pinaagi ha pagsunod han giya nga iginhahatag han mga kalalakin-an nga ginpili basi mag-ataman ha ira. Damu nga sister an nauyon kan Marley nga taga-United States. Hiya nagsiring: “Importante gud ha akon an akon papel sugad nga asawa ngan sugad nga sister ha kongregasyon. Padayon ko nga ginkukultibar an husto nga panhunahuna mahitungod ha kahikayan ni Jehova ha pagkaulo. Pero nagin mas masayon ito para ha akon kay ginrirespeto ako han akon bana ngan han mga brother ha kongregasyon, ngan gin-aapresyar nira an akon ginbubuhat.”

¹⁶ Iginpapakita han mga brother nga nasasabtan nira an kahikayan ha pagkaulo pinaagi ha pagrespeto ngan pagpasidungog ha mga sister. An brother nga taga-England nga hi Benjamin, nagsiring: “Damu gud an akon nahibaroan tikang ha mga komento han mga sister ha mga katirok ngan ha ira mga suhestyon kon paonan-o mag-aaram ngan magigin epektibo ha ministeryo. Daku gud nga bulig an ira mga ginbubuhat.”

17. Kay ano nga kinahanglan naton respetuhon an prinsipyo han pagkaulo?

¹⁷ Kon nasasabtan ngan ginrirespeto han ngatanan ha kongregasyon​—lalaki, babaye, ulo han pamilya, ngan tigurang​—an prinsipyo han pagkaulo, may-ada kamurayawan an kongregasyon. Ngan an mas importante, nadadayaw naton an aton mahigugmaon nga Amay ha langit, hi Jehova.​—Sal. 150:6.