1. Kon nagpipili hin maarasawa, ano an pipira nga pakiana nga angay ipakiana han solo nga sister?

AN NGATANAN nga Kristiano sakop han perpekto nga pagkaulo ni Jesu-Kristo. Pero kon nag-aasawa an Kristiano nga babaye, nagigin sakop hiya han pagkaulo han diri perpekto nga lalaki. Puydi ito magin ayat. Salit kon nagpipili hin maarasawa, maopay nga pakianhan niya an iya kalugaringon: ‘Ano an mga indikasyon nga ini nga brother magigin maopay nga ulo han pamilya? Prayoridad ba niya an pag-alagad kan Jehova? Kon diri, kay ano nga masisiring ko nga magigin maopay hiya ha pagpanguna ha espirituwal kon mag-asawa na kami?’ Syempre, maopay liwat nga pakianhan han sister an iya kalugaringon: ‘Ano an akon mga kalidad nga makakabulig nga magin maopay an amon pag-asawa? Pasensyoso ba ako ngan mahinatagon? May marig-on ba ako nga relasyon kan Jehova?’ (Ecles. 4:9, 12) Kon maopay nga mga desisyon an ginhihimo han usa nga babaye antes hiya mag-asawa, mabulig ito nga magin malampuson ngan malipayon an iya pag-asawa.

2. Ano an aton hihisgotan hini nga artikulo?

² Minilyon nga sister an nagpapakita hin maopay nga susbaranan ha pagin mapinasakupon ha ira bana. Angay gud hira kumendasyonan! Nalilipay gud kita ha pag-alagad kan Jehova kaupod hinin maunungon nga kababayin-an! Hini nga artikulo, hihisgotan naton an baton hini nga tulo nga pakiana: (1) Ano nga pipira nga problema an gin-aatubang han mga asawa? (2) Kay ano nga ginpipili han usa nga asawa nga magpasakop ha iya bana? (3) Ano an mahibabaroan han Kristiano nga mga bana ngan asawa mahitungod ha pagpasakop tikang ha ehemplo nira Jesus, Abigail, ngan Maria, nga asawa ni Jose ngan nanay ni Jesus?

3. Kay ano nga waray perpekto nga pag-asawa?

³ An pag-asawa perpekto nga regalo han Dios, pero diri perpekto an mga tawo. (1 Juan 1:8) Salit ginpapahamangnoan han Pulong han Dios an mga mag-asawa nga makakaeksperyensya hira hin mga problema nga ginhuhulagway sugad nga “kakurian ha ira kinabuhi.” (1 Cor. 7:28) Tagda an pipira nga problema nga bangin atubangon han usa nga asawa.

4. Kay ano nga bangin abaton han usa nga asawa nga nakakaminos ha iya an pagpasakop ha iya bana?

⁴ Usahay, tungod han gindak-an han asawa bangin abaton niya nga nakakaminos ha iya an pagpasakop ha iya bana. “Ha lugar nga akon gindak-an,” siring ni Marisol nga naukoy ha United States, “pirme ginsisidngan an mga babaye nga kinahanglan magin pantay hira ha kalalakin-an ha ngatanan nga butang. Maaram ako nga ginhimo ni Jehova an kahikayan ha pagkaulo ngan gintagan niya an mga babaye hin diri prominente nga papel pero angayan hin pagrespeto. Pero diri pirme masayon nga magkaada pirme timbang nga panhunahuna mahitungod ha pagkaulo.”

5. Ano an diri Kasuratanhon nga panhunahuna han pipira mahitungod han papel han kababayin-an?

⁵ Ha luyo nga bahin, bangin an usa nga babaye makaasawa hin lalaki nga naghuhunahuna nga an mga babaye mas minos kay ha mga lalaki. “Ha amon lugar,” siring han sister nga hi Ivon nga taga-South America, “an mga lalaki la anay an nakaon antes an mga babaye. An kabataan nga kababayin-an ginlalaoman nga amo an magluluto ngan manlilimpyo, pero an kabataan nga kalalakin-an ginsiserbihan han ira nanay ngan kabugtoan nga kababayin-an, ngan ginsisidngan hira nga hira an ‘hadi han balay.’” An sister nga hi Yingling nga taga-Asia, nagsiring: “Ha amon linggwahe may puplunganon nga nangangahulogan nga an mga babaye diri kinahanglan magin baltok o magkaada mga abilidad. An ira la papel amo an pagbuhat han mga buruhaton ha balay pero diri hira puydi magpahayag ha ira bana han ira opinyon.” Kon an bana impluwensyado hiton diri mahigugmaon ngan diri Kasuratanhon nga panhunahuna, ginhihimo niya nga miserable an kinabuhi han iya asawa, diri niya ginsusunod hi Jesus, ngan napapasubo niya hi Jehova.​—Efe. 5:28, 29; 1 Ped. 3:7.

6. Ano an kinahanglan buhaton han mga asawa basi maparig-on an ira relasyon kan Jehova?

⁶ Sugad han gin-unabi ha nahiuna nga artikulo, ginlalaoman ni Jehova nga an Kristiano nga mga bana magtatagana han espirituwal, emosyonal, ngan materyal nga panginahanglan han ira pamilya. (1 Tim. 5:8) Pero, an inasaw-an nga mga sister kinahanglan maggahin hin panahon kada adlaw ha pagbasa han Pulong han Dios ngan ha pagpamalandong hito, ngan kinasingkasing nga mag-ampo kan Jehova. Mahimo ini magin makuri. Busy an mga asawa, salit bangin abaton nira nga waray hira panahon o kusog ha pagbuhat hito, pero importante nga maggahin hira hin panahon. Kay ano? Kay karuyag ni Jehova nga an tagsa ha aton magkaada duok nga relasyon ha iya ngan tipigan ito.​—Buh. 17:27.

7. Ano an makakabulig basi magin mas masayon ha usa nga asawa an pagtuman ha iya toka?

⁷ Oo, bangin kinahanglan mangalimbasog gud an usa nga asawa nga magin mapinasakupon ha iya diri perpekto nga bana. Pero magigin mas masayon ha iya an pagtuman han igintoka ha iya ni Jehova kon nasasabtan niya ngan ginkakarawat an Kasuratanhon nga mga rason kon kay ano nga dapat hiya magpasakop.

8. Uyon ha Efeso 5:22-24, kay ano nga ginpipili han Kristiano nga asawa nga magpasakop ha iya bana?

⁸ Ginpipili han usa nga Kristiano nga asawa nga magpasakop ha iya bana kay ito an iginpapabuhat ha iya ni Jehova. (Basaha an Efeso 5: 22-24.) Nasarig hiya ha iya langitnon nga Amay kay maaram hiya nga hinigugma hiya Niya ngan an Iya la iginpapabuhat amo adton makakaopay gud ha iya.​—Deut. 6:24; 1 Juan 5:3.

9. Ano an resulta kon ginrirespeto han usa nga sister an awtoridad han iya bana?

⁹ An kalibotan nag-aaghat ha kababayin-an nga igbalewaray an mga suruklan ni Jehova ngan hunahunaon nga nakakaminos an pagpasakop. Syempre, an mga tawo nga nag-aaghat hito nga mga ideya diri nakilala ha aton mahigugmaon nga Dios. Diri gud maghahatag hi Jehova ha iya hinigugma nga mga anak nga kababayin-an hin sugo nga makakaminos ha ira. Kon nangangalimbasog gud an usa nga sister ha pagtuman han papel nga igintoka ha iya ni Jehova, nakakabulig hiya nga magin mamurayawon an ira pamilya. (Sal. 119:165) Nakakapahimulos hiya, an iya bana, ngan an iya mga anak.

10. Ano nga mga leksyon an aton mahibabaroan ha ginsiring ni Carol?

¹⁰ Kon an asawa nagpapasakop ha iya diri perpekto nga bana, iginpapakita niya nga hinigugma ngan ginrirespeto niya hi Jehova, an naghimo han kahikayan ha pagkaulo. “Maaram ako nga makakasayop an akon bana,” siring ni Carol nga taga-South America. “Maaram liwat ako nga an akon magigin reaksyon hito nga mga sayop magpapakita kon ano kaimportante ha akon an akon pakigsangkay kan Jehova. Salit naniningkamot ako nga pirme magpasakop kay karuyag ko lipayon an akon Amay ha langit.”

11. Ano an nabulig ha sister nga hi Aneese nga magin mapinasayloon, ngan ano an aton mahibabaroan ha iya ginsiring?

¹¹ Mahimo magin makuri ha usa nga asawa nga rumespeto ngan magpasakop kon napapansin niya nga ginbabalewaray han iya bana an iya mga inaabat ngan ginkakabarak-an. Pero tagda an ginbubuhat han sister nga hi Aneese kon nahitatabo ito. Hiya nagsiring: “Nangangalimbasog ako nga diri masina. Ginhuhunahuna ko nga kita ngatanan nakakasayop. Naniningkamot ako nga hura nga magpasaylo pariho kan Jehova. Kon nagpapasaylo ako, nagigin murayaw utro an akon hunahuna.” (Sal. 86:5) Kon mapinasayloon an usa nga asawa, posible gud nga magin mas masayon ha iya nga magpasakop.

12. Ano nga mga ehemplo an aton mababasa ha Biblia?

¹² An iba bangin maghunahuna nga maluya an tawo nga mapinasakupon. Pero diri gud ito tinuod.  Ha Biblia damu an ehemplo mahitungod ha mapinasakupon nga mga tawo nga mga maisugon gud. Tagda kon ano an aton mahibabaroan tikang kanda Jesus, Abigail, ngan Maria.

13. Kay ano nga nagpapasakop hi Jesus kan Jehova? Isaysay.

¹³ Hi Jesus nagpapasakop kan Jehova, diri tungod kay diri hiya baltok o diri hiya maabilidad. An iya simple ngan klaro nga pagtutdo nagpapamatuod nga baltok gud hiya. (Juan 7:45, 46) Maaram hi Jehova nga maabilidad gud hi Jesus, salit gintugotan niya hi Jesus nga magbuhat kaupod niya han ginlarang ni Jehova an uniberso. (Prob. 8:30; Heb. 1:2-4) Ngan tikang han ginbanhaw hi Jesus, iginhatag ni Jehova ha iya “an ngatanan nga awtoridad ha langit ngan ha tuna.” (Mat. 28:18) Bisan kon maabilidad gud hi Jesus, nagpapagiya la gihapon hiya kan Jehova. Kay ano? Kay hinigugma niya an iya Amay.​—Juan 14:31.

14. Ano an mahibabaroan han mga bana tikang (a) ha panhunahuna ni Jehova mahitungod ha kababayin-an? (b) ha mga ginhihisgotan ha Proberbios 31?

¹⁴ An mahibabaroan han mga bana. Karuyag ni Jehova nga magpasakop an asawa ha iya bana, diri tungod kay ginhuhunahuna Niya nga mas ubos an mga babaye kay ha mga lalaki. Ginpamatud-an ito ni Jehova pinaagi ha pagpili hin kababayin-an ngan kalalakin-an nga magin igkasi-magmarando ni Jesus. (Gal. 3:26-29) Iginpakita ni Jehova nga may pagsarig hiya ha iya Anak pinaagi ha paghatag ha iya hin awtoridad. Sugad man, tatagan liwat han maaramon nga bana an iya asawa hin awtoridad. May kalabotan ha papel han may kapas nga asawa, an Biblia nasiring nga mahimo hiya magdumara ha mga buruhaton ha panimalay, pumalit ngan magbaligya hin propyedad, ngan magnegosyo. (Basaha an Proberbios 31:15, 16, 18.) Diri hiya uripon nga waray katungod nga maghatag hin opinyon. Lugod, natapod ha iya an iya bana ngan namamati han iya mga ideya. (Basaha an Proberbios 31:11, 26, 27.) Kon sugad hito an pagtratar han bana ha iya asawa, malilipay an asawa ha pagpasakop ha iya.

15. Ano an mahibabaroan han mga asawa tikang ha ehemplo ni Jesus?

¹⁵ An mahibabaroan han mga asawa. Bisan pa han mag-opay nga nahimo ni Jesus, waray niya abata nga nakakaminos ha iya an pagpasakop ha pagkaulo ni Jehova. (1 Cor. 15:28; Fil. 2:5, 6) Sugad man, diri aabaton han may kapas nga babaye nga nasunod han ehemplo ni Jesus nga nakakaminos ha iya an pagpasakop ha iya bana. Masuporta hiya ha iya bana diri la tungod kay hinigugma niya an iya bana pero labi na kay hinigugma ngan ginrirespeto niya hi Jehova.

16. Sumala ha 1 Samuel 25:3, 23-28, ano nga mga problema an gin-atubang ni Abigail? (Kitaa an retrato ha kobre.)

¹⁶ Hi Abigail nagkaada bana nga an ngaran hi Nabal. Usa hiya nga lalaki nga makikalugaringon, hambog, ngan diri mapasalamaton. Bisan pa hito, waray mamiling hi Abigail hin paagi basi matapos an ira pag-asawa. Puydi unta nga pabay-an na la niya hi David ngan an iya mga tawo nga patayon hi Nabal. Pero naghimo lugod hiya hin praktikal nga mga paagi basi protektaran an iya bana ngan an ira daku nga panimalay. Hunahunaa an kaisog nga ginkinahanglan ni Abigail basi dumaop ha 400 nga armado nga kalalakin-an ngan may respeto nga makiistorya kan David mahitungod han problema. Andam pa ngani hiya nga angkunon an sayop han iya bana. (Basaha an 1 Samuel 25:3, 23-28.) Ginkarawat dayon ni David nga gin-gamit ni Jehova inin maisugon nga babaye ha paghatag ha iya hin ginkikinahanglan nga sagdon, nga tungod hito nalikyan niya an pakabuhat hin seryoso nga sala.

17. Ano an mahibabaroan han mga bana tikang ha asoy mahitungod kanda David ngan Abigail?

¹⁷ An mahibabaroan han mga bana. Hi Abigail maaramon nga babaye. Husto gud an ginbuhat ni David nga namati hiya han iya sagdon. Salit nalikyan niya nga magin salaan ha dugo. Sugad  man, ginkukonsiderar hin maopay han maaramon nga bana an opinyon han iya asawa kon naghihimo hin importante nga mga desisyon. Bangin an opinyon han iya asawa makabulig ha iya nga diri makahimo hin sayop nga desisyon.

18. Ano an mahibabaroan han mga asawa ha ehemplo ni Abigail?

¹⁸ An mahibabaroan han mga asawa. An asawa nga nahigugma ngan narespeto kan Jehova may maopay nga epekto ha iya pamilya, bisan kon an iya bana diri nag-aalagad kan Jehova o kon nag-aalagad man, diri nasunod ha Iya mga prinsipyo. Diri hiya namimiling hin diri Kasuratanhon nga paagi basi matapos an ira pag-asawa. Lugod, maniningkamot hiya nga mapagios an iya bana nga mahibaro mahitungod kan Jehova pinaagi ha pagpakita hin respeto ngan pagin mapinasakupon. (1 Ped. 3:1, 2) Pero bisan kon diri mapagios an bana han maopay nga ehemplo han asawa, gin-aapresyar ni Jehova an pagkamaunungon nga iginpapakita ha Iya han mapinasakupon nga asawa.

19. Ha ano nga mga kahimtang diri susugton han asawa an iya bana?

¹⁹ Pero diri susuportaran han mapinasakupon nga asawa an iya bana kon may iginpapabuhat ha iya nga supak ha mga balaud o mga prinsipyo ha Biblia. Pananglitan, sidngon ta nga ginsusugo an usa nga sister han iya diri Saksi nga bana nga magbuwa, mangawat, o magbuhat hin iba pa nga diri uyon ha Kasuratan. Kinahanglan unahon han ngatanan nga Kristiano​—upod na an inasaw-an nga mga sister—​an pagsugot kan Jehova nga Dios. Kon an usa nga sister hangyoon han iya bana nga supakon an mga prinsipyo ha Biblia, kinahanglan bumaribad hiya ngan isaysay ha buotan pero ha marig-on nga paagi kon kay ano nga diri niya mahihimo an iginpapabuhat ha iya.​—Buh. 5:29.

20. Kay ano nga masisiring naton nga hi Maria may-ada duok nga relasyon kan Jehova?

²⁰ Hi Maria may duok nga relasyon kan Jehova. Pamilyar gud hiya ha Kasuratan. Ha iya pakiistorya kan Elizabeth nga nanay ni Juan Bawtista, sobra 20 ka beses nga nagkotar hiya ha Hebreo nga Kasuratan. (Luc. 1:46-55) Ngan hunahunaa ini: Bisan kon hi Maria karaslon na kan Jose, diri kan Jose siyahan nga nagpakita an anghel ni Jehova. Hi Maria an siyahan ngan direkta nga ginkaistorya han anghel, ngan ginsumatan hiya nga igbuburod niya an Anak han Dios. (Luc. 1:26-33) Kilala gud ni Jehova hi Maria,  ngan nasarig Hiya nga hihigugmaon ngan aatamanon ni Maria an Iya Anak. Ngan sigurado nga padayon nga nagkaada hi Maria hin maopay nga relasyon kan Jehova bisan kon namatay na hi Jesus ngan ginbanhaw na ngadto ha langit.​—Buh. 1:14.

21. Ano an mahibabaroan han mga bana tikang ha mga rekord han Biblia mahitungod kan Maria?

²¹ An mahibabaroan han mga bana. Nalilipay an maaramon nga bana kon an iya asawa pamilyar gud ha Kasuratan. Diri hiya nasisina o naghuhunahuna nga karuyag han iya asawa nga magin ulo han pamilya. Maaram hiya nga an sister nga damu an nahibabaroan ha Biblia ngan ha mga prinsipyo nga aada hito, daku gud nga bulig ha pamilya. Syempre, bisan kon mas edukado an asawa kay ha iya bana, responsabilidad han bana an pagpanguna ha pagsingba han pamilya ngan ha iba pa nga mga buruhaton ha pag-alagad kan Jehova.​—Efe. 6:4.

22. Ano an mahibabaroan han mga asawa tikang kan Maria?

²² An mahibabaroan han mga asawa. An asawa kinahanglan magpasakop ha iya bana. Pero responsabilidad la gihapon niya an pagparig-on han iya espirituwalidad. (Gal. 6:5) Salit kinahanglan maggahin hiya hin panahon ha iya personal nga pag-aram ngan pagpamalandong. Mabulig ito ha iya nga matipigan an iya gugma ngan respeto kan Jehova, ngan magin malipayon ha pagpasakop ha iya bana.

23. Kon mapinasakupon an asawa, paonan-o hiya nagpapahimulos, an iya pamilya, ngan an kongregasyon?

²³ An mga asawa nga padayon nga nagpapasakop ha ira bana tungod han ira gugma kan Jehova magigin mas malipayon ngan kontento kay ha mga nagbabalewaray han kahikayan ni Jehova ha pagkaulo. Nagpapakita liwat hira hin maopay nga susbaranan ha batan-on nga kalalakin-an ngan kababayin-an. Ngan nabulig hira nga abaton an gugma ngan kamurayawan, diri la ha pamilya pero pati ha kongregasyon. (Tito 2:3-5) Yana, kadam-an han maunungon nga mga surugoon ni Jehova mga kababayin-an. (Sal. 68:11) Kita ngatanan, lalaki man o babaye, may importante nga papel ha kongregasyon. Hihisgotan han sunod nga artikulo kon paonan-o matutuman han tagsa ha aton ito nga papel.