1. Ano nga maopay nga disposisyon an aton nakikita ha katawohan ni Jehova?

 MAIHA na nga igintagna han Biblia nga an katawohan han Dios “kinaburut-on nga magpipresentar han ira kalugaringon” ha pag-alagad kan Jehova ilarom han paggiya han iya Anak. (Sal. 110:3) Ito nga tagna natutuman gud yana. Kada tuig, an madasigon nga mga surugoon ni Jehova nagahin hin minilyon ka oras ha pagsangyaw nga buruhaton. Boluntaryo nga ginbubuhat nira ito ngan ha ira kalugaringon nga gasto. Nagahin liwat hira hin panahon basi buligan an ira mga igkasi-tumuroo ha ira mga panginahanglan ha pisikal, emosyonal, ngan espirituwal. An mga tigurang ngan mga ministeryal nga surugoon nagahin hin damu ka oras ha pag-andam han ira mga bahin ha katirok ngan pag-shepherding ha ira mga igkasi-tumuroo. Ano an nagpapagios ha ira ha pagbuhat hini? Gugma​—gugma para kan Jehova ngan gugma para ha igkasi-tawo.​—Mat. 22:37-39.

2. Sumala ha Roma 15:1-3, ano nga ehemplo an iginpakita ni Jesus?

² Hi Jesus nagpakita hin maopay gud nga ehemplo ha pag-una ha kaopayan han iba kay ha iya kalugaringon. Nangangalimbasog kita nga buhaton an gimaopayi ha pagsunod han iya mga pitad. (Basaha an Roma 15:1-3.) An mga nagsusubad ha iya magpapahimulos gud. Hi Jesus nagsiring: “Mas daku an kalipay ha paghatag kay ha pagkarawat.”​—Buh. 20:35.

3. Ano an aton hihisgotan hini nga artikulo?

³ Hini nga artikulo, aton rirepasuhon an pipira han mga sakripisyo nga ginhimo ni Jesus basi makaserbi ha iba. Ngan hihisgotan naton kon paonan-o naton masusubad an iya ehemplo. Hihisgotan liwat naton kon paonan-o madudugangan an aton hingyap ha pagserbi ha iba.

4. Paonan-o gin-una ni Jesus an mga panginahanglan han iba kay ha iya kalugaringon?

⁴ Binulig hi Jesus ha iba bisan kon kapoy hiya. Hunahunaa an reaksyon ni Jesus han an damu gud nga tawo kinadto ha iya ha ligid han usa nga bukid, posible nga hirani ha Capernaum. Bug-os nga gab-i nga nag-inampo hi Jesus. Sigurado nga kapoy gud hiya, pero han nakita niya an damu nga tawo, nalooy hiya ha mga pobre ngan mga may sakit nga kaupod nira. Labot la nga gintambal niya hira, iginpresenta liwat niya an usa han mga pinakanakakadasig nga pahayag ha bug-os nga kasaysayan—an Sermon ha Bukid.—Luc. 6:12-20.

5. Paonan-o ginsusubad han mga ulo han pamilya an ehemplo ni Jesus kon ginkakapoy hira?

⁵ Kon paonan-o ginsusubad hi Jesus han mga ulo han pamilya. Imadyina ini nga senaryo: Katapos han bug-os-adlaw nga pagtrabaho, an usa nga ulo han pamilya inuli nga kinakapoy gud. Bisan kon karuyag niya ikansela an Pagsingba han Pamilya nga nakaeskedyol hito nga gab-i, nakimalooy hiya kan Jehova nga tagan hiya hin kusog basi madumara an pag-aram. Ginbaton ni Jehova an iya pag-ampo, ngan naipadayon an ira pag-aram sugad han ira ginhihimo kada semana. An mga anak nahibaro hin importante nga leksyon hito nga gab-i, nga an espirituwal nga mga butang an pinakaimportante para ha ira mga kag-anak.

6. Paghatag hin ehemplo kon paonan-o iginsakripisyo ni Jesus an iya panahon nga para unta ha iya kalugaringon basi buligan an iba.

⁶ Hi Jesus naghatag ha iba hin panahon nga para unta ha iya kalugaringon. Naiimadyin mo ba kon ano an inabat ni Jesus han nahibaroan niya nga ginpugotan an iya sangkay nga hi Juan Bawtista? Sigurado nga nasubo gud hi Jesus. An Biblia nasiring: “Pakabati . . . ni Jesus [mahitungod han kamatay ni Juan], binaya hiya didto sakay hin sakayan ngadto ha usa nga lugar nga nahibubulag basi mag-usahan.” (Mat. 14:10-13) Maiintindihan naton kon kay ano nga karuyag niya mag-usahan. Damu ha aton an mas karuyag nga mag-usahan kon nasusubo. Pero waray ito mahimo ni Jesus. Antes pa hiya makaabot hito nga lugar nga nahibubulag, nakadto na an damu nga tawo. Ano an reaksyon ni Jesus? Ginhunahuna niya an mga panginahanglan hito nga mga tawo, ngan “nalooy” hiya ha ira. Nakita niya nga kinahanglan  gud nira an espirituwal nga karepreskohan, salit ginbuligan dayon niya hira. Ngani, “nagtikang hiya pagtutdo ha ira [diri hin pipira la nga butang, kondi] hin damu nga butang.”​—Mar. 6:31-34; Luc. 9:10, 11.

7-8. Paghatag hin ehemplo nga nagpapakita kon paonan-o ginsusubad hi Jesus han mahigugmaon nga mga tigurang kon may nagkikinahanglan hin bulig.

⁷ Kon paonan-o ginsusubad hi Jesus han mahigugmaon nga mga tigurang. Gin-aapresyar gud naton an mga ginbubuhat han mga tigurang nga andam magsakripisyo para ha aton! Damu han ira mga ginbubuhat an diri hinbabaroan han kadam-an nga kabugtoan ha kongregasyon. Pananglitan, kon may medical emergency, an mga membro han Hospital Liaison Committee nabulig dayon ha ira mga igkasi-tumuroo. Kaurogan na nga an sugad nga mga emergency nahitatabo ha katutnga han gab-i! Pero tungod han ira kalooy ha ira kabugtoan nga ada ha kasakitan, gin-uuna hiton hinigugma nga mga tigurang pati na han ira pamilya an kaopayan han ira mga igkasi-tumuroo kay ha ira kalugaringon.

⁸ An mga tigurang liwat nabulig ha mga konstruksyon han mga Kingdom Hall ngan han iba pa nga pasilidad, pati na ha disaster relief. Ngan damu liwat ka oras an ginagamit han mga tigurang ha aton kongregasyon ha pagtutdo, pagdasig, ngan pagbulig ha aton. Ini nga kabugtoan ngan an ira pamilya angay gud han aton sinsero nga kumendasyon. Hinaot balosan hira ni Jehova tungod han ira disposisyon nga andam magsakripisyo! Syempre, pariho han bisan hin-o, an mga tigurang kinahanglan magin balanse. Kinahanglan diri sobra kadaku nga panahon an ira gagamiton ha sugad nga teokratiko nga mga buruhaton nga tungod hito napapabay-an na nira an panginahanglan han ira pamilya.

9. Sumala ha Filipos 2:4, 5, ano nga disposisyon an dapat kultibaron han ngatanan nga Kristiano?

⁹ Basaha an Filipos 2:4, 5. Oo, diri ngatanan ha aton mga tigurang, pero kita ngatanan mahimo mahibaro ha pagsubad han disposisyon ni Jesus nga andam magsakripisyo. An Biblia nasiring nga “nagin sugad hin uripon” hiya. (Fil. 2:7) Hunahunaa kon ano an aton mahibabaroan tikang hito. An usa nga importante nga uripon o surugoon magbibiling hin mga oportunidad basi mapalipay an iya agaron. Sugad nga uripon ni Jehova ngan surugoon para ha imo kabugtoan, sigurado nga hingyap mo gud nga mas magamit ni Jehova ngan mas makagserbi ha imo mga igkasi-tumuroo. Mahihimo mo ini pinaagi ha pagkonsiderar ha masunod nga mga suhestyon.

10. Ano an mahimo naton igpakiana ha aton kalugaringon?

¹⁰ Analisara an imo disposisyon. Pakianhi an imo kalugaringon han sugad hini nga mga pakiana: ‘Andam ba ako paghimo hin mga sakripisyo basi buligan an iba? Pananglitan, ano an akon ginbubuhat kon ginhahangyo ako nga bisitahon an usa nga lagas nga brother ha nursing home o kuhaon an usa nga lagas nga sister basi makatambong ha mga katirok? Nagpipresentar ba ako dayon kon nanginginahanglan hin mga boluntaryo ha paglimpyo han lugar han kombensyon o ha pagmintinar han Kingdom Hall?’ Han nagdidekar kita kan Jehova, nagsaad kita nga gagamiton naton an aton panahon, kusog, ngan materyal nga mga butang ha pag-alagad ha iya, salit nalilipay hiya kon ginagamit naton ito ha pagbulig ha iba. Kon nakita naton nga may kinahanglan kita pauswagon, ano an aton mahimo buhaton?

11. Paonan-o an pag-ampo makakabulig ha aton nga makultibar an disposisyon nga andam magsakripisyo?

¹¹ Sinsero nga mag-ampo kan Jehova. Pananglitan, nasabtan mo nga may kinahanglan ka pauswagon, pero waray ka hingyap basi himoon an ginkikinahanglan nga mga pagbag-o. Hito nga kahimtang, sinsero nga mag-ampo kan Jehova. Magin tangkod. Isumat kan Jehova an imo inaabat, ngan paghangyo ha iya nga tagan ka “han hingyap ngan han gahum ha pagbuhat.”​—Fil. 2:13.

12. Paonan-o makakabulig ha kongregasyon an batan-on nga bawtismado nga mga brother?

¹² Kon usa ka nga batan-on nga bawtismado nga brother, paghangyo kan Jehova nga buligan ka nga makultibar an hingyap nga mas makabulig ha kongregasyon. Ha iba nga mga nasud, mas damu an mga tigurang kay ha mga ministeryal nga surugoon, ngan damu hito nga mga ministeryal an medyo edaran na o lagas na. Samtang nagtitikadaku an organisasyon, kinahanglan naton hin dugang nga batan-on nga mga brother nga mabulig ha pag-ataman ha katawohan ni Jehova. Kon andam ka ha pag-alagad diin ka man ginkikinahanglan, magigin malipayon ka. Kay ano? Tungod kay mapapalipay mo hi Jehova, magkakaada ka maopay nga reputasyon, ngan magigin malipayon ka tungod han pagbulig ha iba.

13-14. Ano an praktikal nga maibubulig naton ha aton kabugtoan? (Kitaa an retrato ha kobre.)

¹³ Magin alerto ha mga panginahanglan han iba. Hi apostol Pablo nagsagdon ha mga Hebreo: “Ayaw hingalimot ha pagbuhat han maopay ngan ha pagpaangbit ha iba han anoman nga may-ada ka, kay nalilipay gud an Dios ha sugad nga mga halad.” (Heb. 13:16) Praktikal gud ito nga sagdon! Waray pag-iha katapos makarawat ini nga surat, kinahanglan bayaan han mga Kristiano ha Judea an ira mga balay, mga negosyo, ngan an ira diri tumuroo nga mga paryente ngan “magtikang na pagpalagiw ngadto ha kabukiran.” (Mat. 24:16) Hito nga panahon, sigurado nga kinahanglan gud nira  buligan an usa kag usa. Kon antes pa hito nga panhitabo gin-aaplikar na nira an sagdon ni Pablo nga ipaangbit ha usa kag usa kon ano an may-ada hira, magigin mas masayon gud para ha ira an pagpahiuyon ha ira bag-o nga pagkinabuhi.

¹⁴ An aton kabugtoan bangin diri pirme magsumat ha aton kon ano an ira ginkikinahanglan. Pananglitan, may usa nga brother nga nasusubo gud tungod kay namatay an iya asawa. Ito ba nga brother nagkikinahanglan hin bulig ha pagluto han iya pagkaon, transportasyon, o mga buruhaton ha balay? Bangin diri hiya mangaro hin bulig kay diri niya karuyag makadisturbo ha aton. Pero bangin apresyaron gud niya kon bubuligan naton hiya bisan kon diri pa hiya nangangaro hin bulig. Diri kita angay maghunahuna nga may mabulig na ha iya o sisidngan kita niya kon karuyag niya magpabulig ha aton. Pakianhi an imo kalugaringon, ‘Kon ako an aada ha iya sitwasyon, ano nga bulig an akon aapresyaron?’

15. Ano an kinahanglan naton buhaton kon karuyag naton bumulig ha iba?

¹⁵ Magin masayon madaop. Sigurado nga may kilala ka nga kabugtoan ha iyo kongregasyon nga pirme andam bumulig ha iba. Diri gud kita nira ginpapaabat nga nakakadisturbo kita ha ira. Maaram kita nga makakasarig kita ha ira kon nagkikinahanglan kita hin bulig, ngan karuyag gud naton nga magin pariho ha ira! Hi Alan, nga usa nga tigurang nga 45 anyos, karuyag nga magin masayon madaop. Mahitungod han ehemplo ni Jesus, hi Alan nagsiring: “Busy hi Jesus, pero an mga tawo nga iba-iba an edad nadaop ha iya ngan diri nag-aalang pag-aro ha iya hin bulig. Maaram hira nga interesado gud hiya ha ira kaopayan. Karuyag ko gud subaron an disposisyon ni Jesus ngan makilala sugad nga masayon madaop, mahigugmaon, ngan interesado ha kaopayan han iba.”

16. Paonan-o an pag-aplikar han Salmo 119:59, 60 makakabulig ha aton nga sundon hin maopay an ehemplo ni Jesus?

 ¹⁶ Diri kita dapat manluya kon diri naton perpekto nga masubad hi Jesus. (San. 3:2) An usa nga estudyante nga pintor diri perpekto nga makakasubad han painting han eksperto nga pintor nga nagtututdo ha iya. Pero samtang nahibabaro hiya tikang ha iya mga sayop ngan naniningkamot nga subaron hin maopay an iya magturutdo, padayon hiya nga mag-uuswag. Sugad man, kon igin-aaplikar naton an aton nahibabaroan tikang ha aton pag-aram han Biblia ngan padayon nga naniningkamot nga mag-uswag, masusubad naton hin mas maopay an ehemplo ni Jesus.​—Basaha an Salmo 119:59, 60.

17-18. Ano an mag-opay nga mga resulta kon ginsusubad naton an disposisyon ni Jesus nga andam magsakripisyo?

¹⁷ An aton pagin andam magsakripisyo mahimo makatapon. An tigurang nga hi Tim nagsiring: “May batan-on nga mga brother ha amon nga nag-uswag ngan ginpili sugad nga mga ministeryal nga surugoon—an pipira ha ira mga batan-on pa gud—an usa nga rason tungod kay ira ginsubad an disposisyon nga andam magserbi nga ira nakita ha iba. Ini nga mga batan-on daku gud nga bulig ha amon kongregasyon ngan ha mga tigurang.”

¹⁸ Damu nga tawo ha kalibotan yana an makikalugaringon gud. Pero naiiba an katawohan ni Jehova. Nabantad gud kita han disposisyon ni Jesus nga andam magsakripisyo, ngan determinado kita nga sundon an iya ehemplo. Oo, diri naton perpekto nga masusunod an iya mga pitad, pero ‘masusunod naton hin maopay an iya mga pitad.’ (1 Ped. 2:21) Samtang aton ginhihimo an aton pinakamaopay ha pagsubad han disposisyon ni Jesus nga andam magsakripisyo, malilipay liwat kita tungod kay napapalipay naton hi Jehova.