USAHAY gin-uuroutro han mga parasurat han Biblia an pariho nga grupo han mga pulong. Pansina an tulo nga butang nga bangin nakaimpluwensya ha mga parasurat nga buhaton ito:

An peryodo han panahon han ginsurat ito. Ha kadaan nga Israel, kadam-an an waray personal nga mga kopya han Balaud. Agsob nga nababatian nira an pagbasa han Balaud kon an nasud nagkakatitirok ha tabernakulo. (Deut. 31:​10-12) Posible gud nga may-ada mga nakakadisturbo samtang namamati ngan natukdaw hira hin pipira ka oras kaupod an damu nga tawo. (Neh. 8:​2, 3, 7) Ha sugad nga mga kahimtang, magigin mas masayon para ha mga tawo nga mahinumdoman an kasuratan ngan iaplikar ito kon uutruhon an importante nga mga pulong. An pag-utro han pipira nga pulong makakabulig gud ha ira nga mahinumdoman an detalyado nga mga butang, sugad han mga regulasyon ngan hudisyal nga mga desisyon han Dios.—Lev. 18:​4-22; Deut. 5:1.

An estilo han pagsurat. Mga 10 porsyento han Biblia an ginkukompwesto hin mga kanta—upod na an mga libro han Salmo, Kanta ni Solomon, ngan Pagtangis. Usahay, an mga kanta may mga pulong nga gin-uutro, nga nagpapabug-at ha tema han kanta nga nabulig ha mga mamarati nga mamemorya an mga pulong. Pananglitan, pansina an mga pulong nga mababasa ha Salmo 115:​9-11: “O Israel, sarig kan Jehova—Hiya an nabulig ha ira ngan an ira taming. O panimalay ni Aaron, sarig kan Jehova—Hiya an nabulig ha ira ngan an ira taming. Kamo nga may kahadlok kan Jehova, sarig kan Jehova—Hiya an nabulig ha ira ngan an ira taming.” Nakikita mo ba kon paonan-o an pag-utro hito nga mga pulong nakabulig ha mga parakanta nga mahisulod ha ira hunahuna ngan kasingkasing an presyoso nga mga kamatuoran?

Basi pabug-atan an importante nga mga butang. Usahay, gin-uutro han mga parasurat han Biblia an importante nga mga pulong. Pananglitan, han ginsugo ni Jehova an mga Israelita nga diri kumaon hin dugo, damu ka beses nga ginpautro niya kan Moises an rason. Karuyag han Dios nga pabug-atan nga an kinabuhi han buhi nga linarang aada ha dugo, karuyag sidngon, an dugo nagrirepresentar han kinabuhi. (Lev. 17:​11, 14) Ha urhi, han iginlista han mga apostol ngan han mga tigurang ha Jerusalem an importante nga mga paagi basi malikyan nga mapasubo an Dios, ira ginpabug-atan utro nga kinahanglan likyan an dugo.—Buh. 15:​20, 29.

Bisan kon may-ada gin-uutro nga mga pulong an Biblia, diri ito nagpapasabot nga karuyag ni Jehova nga magin batasan naton an pag-uroutro hin mga pulong. Pananglitan, hi Jesus nagsiring: “Kon nag-aampo, ayaw pag-uroutroha an amo gihapon nga mga pulong.” (Mat. 6:7) Katapos, nag-unabi hiya hin mga butang nga mahimo naton ig-ampo. (Mat. 6:​9-13) Salit bisan kon aton ginlilikayan nga uroutruhon an pariho nga mga pulong ha aton mga pag-ampo, puydi naton utruhon an pariho nga mga topiko.—Mat. 7:​7-11.

May maopay nga rason kon kay ano nga gin-uutro an pipira nga pulong ha giniyahan nga Pulong han Dios. Usa ito han damu nga paagi nga gintututdoan kita han aton Harangdon nga Instruktor basi kita magpahimulos.—Isa. 48:​17, 18.