1-2. (a) Sumala ha Proberbios 16:31, ano an angay naton magin panhunahuna ha matinumanon nga lagas na nga kabugtoan? (b) Ano nga mga pakiana an aton babatunon hini nga artikulo?

HA USA nga parke ha Arkansas, U.S.A., an mga napasyada didto mahimo makakita hin mga diamante dida ha tuna. Pero ito nga mga diamante waray pa pahamisa ngan painggata. Tungod hito, damu han mga nakakakita hito an bangin naghuhunahuna nga diri ito marahalon nga mga bato, salit diri nira ito ginpapansin.

² Ha pipira nga paagi, an matinumanon nga lagas na nga kabugtoan maipapariho hito nga mga diamante; presyoso hira nga mga bahandi. Iginpapariho han Pulong han Dios an ira mga uban ha usa nga korona. (Basaha an Proberbios 16:31; 20:29) Pero ini nga mga bahandi bangin diri naton dayon mapansin. Kon nasasabtan han mga batan-on nga presyoso gud inin lagas naton nga kabugtoan, may makukuha hira nga mas mapulsanon pa kay ha literal nga karikohan. Hini nga artikulo, babatunon naton inin tulo nga pakiana. Kay ano nga ginhuhunahuna ni Jehova inin matinumanon nga lagas na nga kabugtoan sugad nga mga bahandi? Kay ano nga importante hira ha organisasyon ni Jehova? Ano an aton mahimo buhaton basi bug-os nga magpahimulos kita tikang ha ira mga ehemplo?

3. Uyon ha Salmo 92:12-15, kay ano nga presyoso kan Jehova an matinumanon nga lagas na nga kabugtoan?

³ An matinumanon nga lagas nga kabugtoan presyoso kan Jehova. Nakikita niya kon ano gud an ira pagkatawo, ngan maaram hiya han ira mag-opay nga kalidad ngan iya ito ginpapabilhan. Gin-aapresyar niya kon iginpapaangbit nira ha mas bata ha ira an  ira kinaadman nga ira nakuha ha ira maiha na nga matinumanon nga pag-alagad. (Job 12:12; Prob. 1:1-4) Ginpapabilhan liwat ni Jehova an ira pagpailob. (Mal. 3:16) An ira kinabuhi may mga problema; bisan pa hito, nagpapabilin nga marig-on an ira pagtoo kan Jehova. An ira paglaom para ha tiarabot mas marig-on pa kay han bag-o pa la nira nga nahibaroan an kamatuoran. Ngan hinigugma hira ni Jehova kay padayon nga iginpapakilala nira an iya ngaran “bisan ha kalagas.”​—Basaha an Salmo 92:12-15.

4. Ano an mahimo makadasig ha aton lagas na nga kabugtoan?

⁴ Kon nagtitikalagas ka na, hinumdumi nga diri nahingangalimtan ni Jehova an imo mga ginbuhat. (Heb. 6:10) Madasigon nga ginsuportaran mo an pagsangyaw nga buruhaton, ngan nakakapalipay ito ha aton langitnon nga Amay. Gin-ilob mo an mga pagsari​—bisan adton nakapasubo gud ha imo​—ginsunod mo an matadong nga mga suruklan ha Biblia, gintuman mo an magbug-at nga responsabilidad, ngan ginbansay mo an iba. Ginbuhat mo an imo pinakamaopay basi makapahiuyon ha mga pagbag-o han organisasyon ni Jehova. Ginbuligan ngan gindasig mo an iba nga aada ha bug-os-panahon nga pag-alagad. Hinigugma ka gud ni Jehova tungod han imo pagin maunungon. Nagsasaad hiya nga “diri niya babayaan an mga maunungon ha iya”! (Sal. 37:28) Ini an iya pasarig ha imo: “Tubtob nga magin ubanon ka, pirme ko ikaw papas-anon.” (Isa. 46:4) Salit ayaw paghunahuna nga tungod kay lagas ka na, diri ka na importante ha organisasyon ni Jehova. Presyoso ka gud!

5. Ano an angay hinumdoman han lagas nga kabugtoan?

⁵ Damu an mahihimo han mga lagas. Bisan kon bangin waray na hira han ira kusog nga pariho hadto, may-ada hira damu nga eksperyensya nga ira natirok ha sulod hin katuigan. Mahimo hira padayon nga gamiton ni Jehova ha iba-iba nga paagi, sugad han iginpapakita han masunod nga mga ehemplo tikang ha Biblia ngan ha aton presente nga panahon.

6-7. Paghatag hin mga ehemplo ha Biblia han lagas na nga mga surugoon ni Jehova nga nakakarawat hin mga bendisyon tungod han ira maunungon nga pag-alagad.

⁶ May mababasa kita nga mag-opay nga ehemplo ha Biblia han matinumanon nga mga surugoon ni Jehova nga aktibo nga nag-alagad ha iya  bisan kon lagas na hira. Pananglitan, mga 80 anyos na hi Moises han nagtikang hiya mag-alagad sugad nga propeta ni Jehova ngan han ginpili hiya nga lider han nasud han Israel. Gin-gamit la gihapon ni Jehova hi Daniel sugad nga Iya tagapagyakan han an propeta posible nga sobra 90 anyos na. Ngan posible liwat nga sobra 90 anyos na hi apostol Juan han gin-giyahan hiya ha pagsurat han libro han Pahayag.

⁷ Damu han iba pa nga matinumanon nga mga surugoon hadto an diri prominente o diri kilala, ngan bangin diri hira napapansin han mga tawo. Pero nakita hira ni Jehova, ngan ginbalosan niya an ira pagkamaunungon. Pananglitan, diri damu an ginsisiring han Biblia mahitungod han “matadong ngan debotado” nga lalaki nga hi Simeon, pero kilala gud hiya ni Jehova ngan gintagan hiya han pribilehiyo nga makita an minasus-an nga hi Jesus ngan magtagna mahitungod hito nga bata ngan han iya nanay. (Luc. 2:22, 25-35) Hunahunaa liwat an balo nga propetisa nga hi Ana. Bisan kon 84 anyos na hiya, “diri gud hiya napalya ha pagkadto ha templo.” An iya regular nga pag-atender hura nga ginbalosan han usa ka higayon, nakita liwat niya an minasus-an nga hi Jesus. Hira Simeon ngan Ana presyoso kan Jehova.​—Luc. 2:36-38.

8-9. Ano an padayon nga naibubulig han mga balo?

⁸ Ha aton panahon, damu an matinumanon nga lagas nga kabugtoan an maopay nga susbaranan para hadton mas bata ha ira. Tagda an eksperyensya ni Sister Lois Didur. Nagin espesyal payunir hiya ha Canada han 21 anyos pa la hiya. Katapos hito, hiya ngan an iya asawa nga hi John, nag-alagad ha nagbibiyahe nga buruhaton hin damu ka tuig. Kahuman, nag-alagad hira ha Canada Bethel hin sobra 20 anyos. Han hi Lois 58 anyos na, gin-imbitar hira nga mag-asawa para ha usa nga toka ha Ukraine. Ano an ira bubuhaton? Maghuhunahuna ba hira nga lagas na hira para mag-alagad ha iba nga nasud? Ginkarawat nira an toka, ngan hi John ginpili sugad nga membro han Branch Committee didto. Paglabay hin pito ka tuig, namatay hi John. Pero hi Lois nagdesisyon nga magpabilin ha iya toka. Yana, 81 anyos na hiya. Nag-aalagad la gihapon hiya nga matinumanon kan Jehova ha Ukraine Bethel, ngan hinigugma gud hiya han pamilya han Bethel.

⁹ An mga balo pariho kan Lois bangin diri napapansin, diri pariho han hadto nga buhi pa an ira bana; pero an ira pagin balo diri nakakaiban han ira importansya. Ginpapabilhan gud ni Jehova an mga sister nga sinuporta ha ira bana ha sulod hin katuigan ngan yana padayon nga nag-aalagad ha iya hin maunungon. (1 Tim. 5:3) Nakakadasig gud liwat hira ha mga mas bata ha ira.

10. Ano nga maopay nga ehemplo an iginpakita ni Tony?

¹⁰ Presyoso liwat an damu nga matinumanon nga lagas na nga kabugtoan nga naukoy ha mga nursing home. Pananglitan, an brother nga hi Tony naukoy yana ha sugad nga pasilidad. Nabawtismohan hiya ha Pennsylvania, U.S.A., han Agosto 1942 han 20 anyos hiya. Waray pag-iha, napriso hiya hin duha ngan tunga ka tuig tungod han iya pagin neutral. Hiya ngan an iya asawa nga hi Hilda nagkaada duha nga anak nga ginpadaku  nira ha kamatuoran. Ha sulod hin katuigan, nag-alagad hi Tony ha tulo nga kongregasyon sugad nga nangunguna nga paramangno (yana gintatawag na nga koordinetor han lawas han mga tigurang) ngan sugad nga paramangno han sirkito nga asembleya. Nagdumara hiya hin mga katirok ngan pag-aram ha Biblia ha prisohan. Yana nga 98 anyos na hi Tony, damu la gihapon an iya ginhihimo para kan Jehova. Padayon nga ginbubuhat niya an iya pinakamaopay ha pag-alagad kan Jehova kaupod an kabugtoan ha iya kongregasyon!

11. Paonan-o naton maipapakita nga gintatagan naton hin importansya an lagas na nga kabugtoan nga naukoy ha nursing home?

¹¹ Paonan-o naton maipapakita nga ginpapasidunggan naton an lagas na nga kabugtoan nga naukoy ha nursing home? Mahimo hira buligan han mga tigurang nga makigbahin ha mga buruhaton han kongregasyon tubtob nga posible. Maipapakita naton an aton personal nga interes pinaagi ha pagbisita o pag-video call ha ira. Karuyag naton tagan hin espesyal nga atensyon an lagas na nga kabugtoan nga bangin naukoy ha usa nga pasilidad nga hirayo ha ira kongregasyon. Kon diri kita magigin mabinantayon, bangin mahingalimtan naton hira. An pipira ha ira bangin mag-alang pag-istorya mahitungod ha ira kalugaringon. Pero magpapahimulos gud kita kon maggagahin kita hin panahon ha pagpakiana ha ira ngan ha pagpamati samtang iginsusumat nira an ira makalilipay nga mga eksperyensya ha organisasyon ni Jehova.

12. Ano an mahimo naton makita ha aton mismo kongregasyon?

¹² Bangin masurprisa kita nga may-ada ngay-an mag-opay nga mga ehemplo han matinumanon nga lagas nga kabugtoan ha aton mismo kongregasyon. Pananglitan, an sister nga hi Harriette nag-alagad kan Jehova hin matinumanon ha sulod hin mga katuigan ha iya kongregasyon ha New Jersey, U.S.A. Katapos, linungon hiya ha iya anak, salit binalhin hiya hin kongregasyon. An kabugtoan ha iya bag-o nga kongregasyon naggahin hin panahon basi makilala hiya, ngan ira nakita nga presyoso gud hiya. Gindasig niya hira pinaagi ha pagsumat han iya mga eksperyensya ha pagsangyaw han bag-o pa la niya nga nahibaroan an kamatuoran han mga 1925. Hito nga panahon, pirme hiya nagdadara hin toothbrush kon nagsasangyaw​—kay bangin arestuhon hiya. Ngani, han 1933, duha ka beses nga ginpriso hiya hin tag-usa ka semana. Hito nga mga panahon, an iya diri Saksi ngan mabinuligon nga asawa an nag-ataman ha ira tulo nga bata pa nga anak. Oo, angay gud pasidunggan an matinumanon nga lagas nga kabugtoan pariho kan Harriette!

13. Ano an aton nahibaroan mahitungod han papel han lagas na nga kabugtoan ha organisasyon ni Jehova?

¹³ An aton lagas na nga kabugtoan may importante nga papel ha organisasyon ni Jehova. Nakita nira kon paonan-o ginbibendisyonan ni Jehova ha damu nga paagi an iya organisasyon ngan hira mismo. Nahibaro hira hin importante nga mga leksyon tikang ha ira mga sayop. Hunahunaa hira sugad nga “burabod han kinaadman,” ngan mahibaro tikang ha ira mga eksperyensya. (Prob. 18:4) Kon maggagahin ka hin panahon basi makilala hira, magririg-on an imo pagtoo ngan damu an imo mahibabaroan!

14. Ano an igin-aaghat han Deuteronomio 32:7 nga buhaton han mga mas bata?

¹⁴ Pag-una pakiistorya ha lagas na nga kabugtoan. (Basaha an Deuteronomio 32:7.) Tinuod, bangin harap na hira, bangin mahinay na hira gumios ngan magyakan, pero karuyag nira nga may-ada la gihapon hira ginbubuhat, ngan nakahimo hira hin “maopay nga ngaran” kan Jehova. (Ecles. 7:1) Hinumdumi kon kay ano nga presyoso hira kan Jehova. Padayon hira nga  pasidunggi. Magin pariho kan Eliseo. Nag-insister hiya nga magpabilin nga duok kan Elias ha ultimo nga adlaw nga magkaupod hira. Tulo ka beses nga nagsiring hi Eliseo: “Diri ko ikaw babayaan.”​—2 Hadi 2:2, 4, 6.

15. Ano an mahimo naton igpakiana ha lagas na nga kabugtoan?

¹⁵ Pagpakita hin personal nga interes ha lagas na nga kabugtoan pinaagi ha pagpakiana ha ira ha buotan nga paagi. (Prob. 1:5; 20:5; 1 Tim. 5:1, 2) Puydi ka magpakiana hin sugad hini: “Han burobata ka pa, ano an nakakombinse ha imo nga nabilngan mo na an kamatuoran?” “Paonan-o an imo mga eksperyensya nakabulig ha imo nga magin mas duok kan Jehova?” “Ano an imo sekreto nga nagpapabilin ka nga malipayon ha pag-alagad kan Jehova?” (1 Tim. 6:6-8) Katapos, pamati ha ira samtang nag-iistorya hira.

16. Kon nag-iistorya an lagas na ngan an burobata nga bugto, paonan-o hira nagpapahimulos?

¹⁶ Kon nag-iistorya an lagas na ngan an burobata nga bugto, hira nga duha nagpapahimulos. (Roma 1:12) Maghihilarom an apresasyon han burobata nga bugto kon paonan-o gin-aataman ni Jehova an iya matinumanon nga mga surugoon, ngan aabaton han lagas na nga bugto nga hinigugma hiya. Malilipay hiya pagsumat ha mga burobata kon paonan-o hiya ginbibendisyonan ni Jehova.

17. Kay ano nga masisiring naton nga an matinumanon nga lagas na nga kabugtoan nagigin mas mahusay samtang nalabay an katuigan?

¹⁷ Kaurogan na nga napapas an pisikal nga kahusay kon nalalagas na an usa, pero adton maunungon kan Jehova nagigin mas mahusay para ha iya ha kada tuig nga nalabay. (1 Tes. 1:2, 3) Kay ano? Tungod kay ha sulod hin katuigan, gintugotan nira an espiritu han Dios nga magmolde ha ira ngan bumulig ha ira nga magkultibar hin mag-opay nga kalidad. Samtang mas nakikilala naton an aton presyoso nga lagas na nga kabugtoan, ginpapasidunggan hira, ngan nahibabaro kita tikang ha ira, mas huhunahunaon naton hira sugad nga marahalon gud nga mga bahandi!

18. Ano an aton hihisgotan ha sunod nga artikulo?

¹⁸ Nagigin mas marig-on an kongregasyon diri la kon gintatagan hin importansya han burobata nga kabugtoan an aton lagas na nga kabugtoan, kondi kon ginpapabilhan liwat han lagas na nga kabugtoan an burobata nga kabugtoan. Ha sunod nga artikulo, hihisgotan naton kon paonan-o maipapakita han lagas na nga kabugtoan nga importante ha ira an burobata nga kabugtoan ha kongregasyon.