1. Ano an kinahanglan buhaton naton ngatanan?

MARURUYAG ka ba pagdalagan ha usa nga rumba nga maaram ka nga makuri, labi na kon may sakit ka o kinakapoy? Posible nga diri. Kondi, hi apostol Pablo nagsiring nga an tanan nga tinuod nga Kristiano aada ha usa nga rumba. (Heb. 12:1) Ngan kita ngatanan, bata man o lagas, makusog pa o kinakapoy, kinahanglan magpailob tubtob ha kataposan kon karuyag naton makarawat an premyo nga iginhahatag ni Jehova.​—Mat. 24:13.

2. Sumala ha 2 Timoteo 4:7, 8, kay ano nga hi Pablo may kagawasan ha pagyakan?

² Hi Pablo may kagawasan ha pagyakan kay malampuson nga “natapos [niya] an rumba.” (Basaha an 2 Timoteo 4:7, 8.) Pero ano gud ba ito nga rumba nga ginhisgotan ni Pablo?

3. Ano an rumba nga ginhisgotan ni Pablo?

³ Usahay hi Pablo naggamit hin mga butang nga may kalabotan ha mga uyag ha kadaan nga Gresya basi magtutdo hin importante nga mga leksyon. (1 Cor. 9:25-27; 2 Tim. 2:5) Ha pipira ka beses, iginpariho ni Pablo ha pagdalagan ha usa nga rumba an Kristiano nga pagkinabuhi. (1 Cor. 9:24; Gal. 2:2; Fil. 2:16) An usa nga tawo naapi hini nga “rumba” kon igindidedikar niya an iya kalugaringon kan Jehova ngan nagpapabawtismo. (1 Ped. 3:21) Nakakaabot hiya ha finish line kon iginhahatag na ha iya ni Jehova an premyo nga kinabuhi nga waray kataposan.​—Mat. 25:31-34, 46; 2 Tim. 4:8.

4. Ano an aton hihisgotan hini nga artikulo?

⁴ Ano an pipira nga kaparihoan han pagdalagan ha hirayo nga rumba ngan han Kristiano nga pagkinabuhi? May pipira nga kaparihoan. Hisgotan naton an tulo. Una, kinahanglan sundon naton  an tama nga dalan; ikaduha, kinahanglan magpokus kita ha finish line; ngan ikatulo, kinahanglan lamposan naton an mga kakurian dida ha dalan.

5. Ano nga dalan an kinahanglan sundon naton, ngan kay ano?

⁵ Basi magin kwalipikado pagkarawat han premyo ha usa nga literal nga rumba, kinahanglan sundon han mga paradalagan an ruta nga ginpili han mga organisador han rumba. Sugad man, kon karuyag naton makarawat an premyo nga kinabuhi nga waray kataposan, kinahanglan sundon naton an Kristiano nga dalan, o paagi han pagkinabuhi. (Buh. 20:24; 1 Ped. 2:21) Pero, karuyag ni Satanas ngan han mga nasunod ha iya nga iba an aton pilion; karuyag nira nga padayon kita nga dumalagan kaupod nira. (1 Ped. 4:4) Gintatamay nira an aton paagi han pagkinabuhi ngan nasiring hira nga mas maopay an dalan nga ira gin-aagian, kay nagriresulta ito hin kagawasan. Pero buwa ito.​—2 Ped. 2:19.

6. Ano an imo nahibaroan ha ehemplo ni Brian?

⁶ An bisan hin-o nga nadalagan upod han mga naimpluwensyahan han kalibotan ni Satanas nahibabaro dayon nga an dalan nga ira ginpili diri nagriresulta hin kagawasan, lugod ha pagkauripon. (Roma 6:16) Kitaa an ehemplo ni Brian. Gin-aghat hiya han iya mga kag-anak nga sundon an Kristiano nga pagkinabuhi. Pero han tin-edyer na hiya, nagruhaduha hiya kon ito ba nga pagkinabuhi makakapalipay ha iya. Nagdesisyon hi Brian nga dumalagan upod hadton nagkikinabuhi ha mga pamaagi ni Satanas. “Waray ko gud mahunahuna nga an kagawasan nga akon gin-uungara magdadara ha akon ha adiksyon,” siring niya. “Nagtikang ako magdroga, mag-ininom, ngan magin imoral. Han sumunod nga mga tuig, naggamit na ako hin mas mag-isog nga droga ngan naadik ha damu hito. Basi masuportahan an akon mga bisyo, nagbaligya ako hin droga.” Ha urhi, nagdesisyon hi Brian nga magkinabuhi uyon ha mga suruklan ni Jehova. Ginbag-o niya an iya pagkinabuhi ngan nagpabawtismo han 2001. Malipayon na gud hiya yana kay ginsusunod na niya an Kristiano nga pagkinabuhi. *

7. Sumala ha Mateo 7:13, 14, ano an duha nga dalan nga aton mapipilian?

⁷ Importante gud nga pilion naton an tama nga dalan! Karuyag ni Satanas nga diri na kita dumalagan ha gutiay nga dalan nga “tipakadto ha kinabuhi” ngan bumalhin ha hilapad nga dalan diin aada an kadam-an nga tawo hini nga kalibotan. Popular ito nga dalan ngan masayon agian. Pero “tipakadto [ito] ha kabungkagan.” (Basaha an Mateo 7:13, 14.) Basi magpabilin ha tama nga dalan ngan diri mahisimang,  kinahanglan sumarig kita kan Jehova ngan mamati ha iya.

8. Kon nahipapakdol an usa nga paradalagan, ano an iya ginhihimo?

⁸ An mga paradalagan ha hirayo nga rumba pirme nagkikita ha dalan nga ira gin-aagian basi diri hira mahipakdol. Pero, mahimo la gihapon hira mapalatid o mabinti han ira igkasi-paradalagan o makatamak hin buho. Kon matumba hira, nabuhat dayon hira ngan nagpapadayon pagdalagan. Nagpupokus hira, diri ha kon ano an nakapakdol ha ira, kondi ha finish line ngan ha premyo nga ira ginhihingyap nga madaogan.

9. Kon mahipakdol kita, ano an angay naton buhaton?

⁹ Ha aton rumba, mahimo kita mahipakdol hin damu ka beses, pinaagi ha pakahimo hin sayop ha aton ginyayakan o ginbubuhat. O an aton mga igkasi-paradalagan bangin makahimo hin mga sayop nga makakasakit ha aton. Diri kita angay mahipausa hito. Kita ngatanan diri perpekto, ngan kita ngatanan nadalagan ha gutiay nga dalan tipakadto ha kinabuhi. Salit usahay, bangin “magkaburunggoay” kita ha usa kag usa. Hi Pablo nagsiring nga usahay makakahimo kita hin butang nga magigin ‘hinungdan nga magreklamo’ an iba. (Col. 3:13) Pero imbes nga magpokus ha kon ano an nakapakdol ha aton, magpokus lugod kita ha premyo ha unahan. Kon matumba kita, buhat ngan padayon nga dumalagan. Kon masisina kita ngan magdudumot ngan diri mabuhat, siring pa, diri kita makakaabot ha finish line ngan diri naton makakarawat an premyo. Dugang pa, posible nga magin ulang kita ha iba nga nangangalimbasog pagdalagan ha gutiay nga dalan tipakadto ha kinabuhi.

10. Paonan-o naton malilikayan nga magin “hiparakdolan” kita ha iba?

¹⁰ An usa pa nga paagi nga malilikayan naton nga magin “hiparakdolan” kita ha aton mga igkasi-paradalagan amo an pagin mapauyon-uyon ha ira mga karuyag kon posible imbes nga ipirit an aton mga katungod. (Roma 14:13, 19-21; 1 Cor. 8:9, 13) Hinin importante nga paagi, diri kita pariho han mga paradalagan ha literal nga rumba. Nakikigkompetensya hira ha iba nga mga paradalagan, ngan an tagsa ha ira nangangalimbasog nga makuha an premyo para la ha ira kalugaringon. Ginhuhunahuna hito nga mga paradalagan an ira la personal nga kaopayan. Salit bangin iduso nira paligid an iba basi la mahiuna hira. Ha  kabaliktaran, diri kita nakikigkompetensya ha usa kag usa. (Gal. 5:26; 6:4) An aton tumong amo an pagbulig ha mas damu nga tawo tubtob nga posible nga makaabot ha finish line kaupod naton ngan makarawat an premyo nga kinabuhi. Salit nangangalimbasog kita nga sundon an giniyahan nga sagdon ni Pablo nga ‘panginanoon diri la an aton kalugaringon nga kaopayan, kondi pati liwat an kaopayan han iba.’​—Fil. 2:4.

11. Ha ano nagpupokus an usa nga paradalagan, ngan kay ano?

¹¹ Labot pa han pagkita pirme ha dalan nga ira gin-aagian, an mga paradalagan ha literal nga rumba nagpupokus ha finish line. Bisan kon diri nira ito nakikita, naiimadyin nira an ira kalugaringon nga nakaabot na hito ngan ginkakarawat na an premyo. An paghunahuna pirme han premyo nabulig ha ira nga magpabilin nga determinado.

12. Ano an may pagkabuotan nga iginhahatag ha aton ni Jehova?

¹² Ha aton rumba, may pagkabuotan nga naghahatag hi Jehova hin sigurado nga premyo ha iya katawohan tungod han pagtapos nira han rumba​—kinabuhi nga waray kataposan ha langit man o ha paraiso nga tuna. Iginhuhulagway han Kasuratan ini nga premyo, basi maimadyin naton kon mationan-o kaopay an aton magigin kinabuhi. Kon gintitipigan naton nga buhi ha aton hunahuna ngan kasingkasing ini nga paglaom, magigin mas determinado kita nga magpadayon.

13. Ano nga bentaha an may-ada kita kompara ha literal nga mga paradalagan?

¹³ Kinahanglan lamposan han mga paradalagan ha mga uyag han mga Griego an mga kakurian, sugad han kakapoy ngan kaul-ol. Pero an ira la ginsasarigan amo an ira training ngan an ira kalugaringon nga kusog. Pariho hito nga mga paradalagan, nakakakarawat liwat kita hin training kon paonan-o madalagan ha aton rumba. Pero mas may bentaha kita kay ha literal nga mga paradalagan. Makakakuha kita hin kusog tikang kan Jehova, ngan waray ito limitasyon. Kon nasarig kita kan Jehova, nagsasaad hiya nga diri la kay babansayon kita niya kondi pakukusgon liwat kita!​—1 Ped. 5:10.

14. Paonan-o an 2 Corinto 12:9, 10 nabulig ha aton nga maatubang an mga kakurian?

¹⁴ Kinahanglan atubangon ni Pablo an damu nga kakurian. Labot pa ha pan-insulto ngan pagtimaraot ha iya han iba, usahay naabat hiya hin panluya ngan kinahanglan atubangon niya an “tunok ha unod.” (2 Cor. 12:7) Pero imbes nga hunahunaon ito nga mga kakurian sugad nga rason para diri na mag-alagad, ginhunahuna niya ito sugad nga oportunidad nga sumarig kan Jehova. (Basaha an 2 Corinto 12:9, 10.) Tungod kay nagkaada hi Pablo hini nga panhunahuna, ginbuligan hiya ni Jehova nga malamposan an ngatanan niya nga kakurian.

15. Kon susubaron naton hi Pablo, ano an aton maieksperyensyahan?

¹⁵ Kita liwat bangin insultuhon o pagtimarauton tungod han aton pagtoo. Bangin kinahanglan liwat naton magpailob tungod han diri maopay nga panlawas o kaguol. Pero kon ginsusubad naton hi Pablo, an tagsa hito nga mga kakurian mahimo magin oportunidad basi maeksperyensyahan an mahigugmaon nga bulig ni Jehova.

16. Bisan kon may problema ha panlawas, ano an imo mahihimo?

¹⁶ Naghihinigda ka na la ba o naka-wheelchair na? Maluya ba an imo mga tuhod o harap an imo mga mata? Kon ito an imo kahimtang, makakadalagan ka ba upod han mga batan-on ngan maghimsog? Sigurado gud! Damu nga lagas ngan may problema ha panlawas an nadalagan ha dalan ngadto ha kinabuhi. Diri nira ito mahihimo ha ira la kalugaringon nga kusog. Lugod, nakuha hira hin kusog kan Jehova pinaagi ha pagpamati ha mga katirok pinaagi ha pag-tie-in ha telepono  o pagkita ha mga katirok ha video streaming. Ngan nakikigbahin hira ha panhimo hin disipulo nga buruhaton pinaagi ha pagsangyaw ha mga doktor, nars, ngan mga paryente.

17. Ano an inaabat ni Jehova hadton may pisikal nga mga limitasyon?

¹⁷ Kon limitado na an imo nahihimo ha pag-alagad, ayaw panluya ngan ayaw hunahunaa nga diri ka makakapadayon pagdalagan ha dalan ngadto ha kinabuhi. Hinigugma ka ni Jehova tungod han imo pagtoo ha iya ngan han imo pagin mapailubon. Mas kinahanglan mo gud yana an iya bulig, ngan diri ka niya papabay-an. (Sal. 9:10) Ngani, mas magigin duok pa gud hiya ha imo. Hunahunaa an ginsiring han sister nga may mga problema ha panlawas: “Samtang nagtitikadamu an akon mga problema ha panlawas, naoobserbaran ko nga talagsa ko na la maisangyaw ha iba an kamatuoran. Pero maaram ako nga nalilipay hi Jehova bisan ha gutiay nga akon nahihimo, ngan nalilipay ako tungod hito.” Kon nadidepres ka, hinumdumi nga diri ka nag-uusahan. Hunahunaa an ehemplo ni Pablo, ngan hinumdumi an iya makaparig-on nga ginsiring: “Nalilipay ako ha mga kaluyahan, . . . kay kon ako maluya, makusog lugod ako.”​—2 Cor. 12:10.

18. Ano nga makuri gud nga sitwasyon an gin-aatubang han iba?

¹⁸ An pipira nga nadalagan ha dalan ngadto ha kinabuhi naatubang hin iba nga sitwasyon. Nakakaeksperyensya hira hin mga problema nga diri nakikita han iba ngan bangin diri nasasabtan. Pananglitan, an iba may mga depresyon o naabat hin sobra nga kabaraka. Kay ano nga makuri gud an kahimtang hinin hinigugma nga mga surugoon ni Jehova? Kay kon an usa nga tawo bari an butkon o naka-wheelchair na, nakikita han ngatanan an iya problema ngan bangin maaghat hira nga bumulig. Kondi, adton may mga sakit ha emosyon o ha hunahuna bangin diri magpakita hin mga tigaman nga nag-aantos ngay-an hira. Naabat hira hin kasakit pariho hadton nabarian hin butkon o tiil, pero bangin diri nira makarawat an gugma ngan pagpaid nga ira liwat ginkikinahanglan.

19. Ano an aton mahibabaroan tikang ha ehemplo ni Mefiboset?

¹⁹ Kon limitado an imo mga nahihimo ngan inaabat mo nga diri ka nasasabtan han iba, mahimo ka maparig-on han ehemplo ni Mefiboset. (2 Sam. 4:4) Kinahanglan niya ilubon an iya pagin baldado, ngan sayop nga ginhukman hiya ni Hadi David. Waray ginbuhat nga sayop hi Mefiboset para mahitabo ha iya ito nga mga kasakit. Pero, waray niya tuguti nga magin negatibo hiya, lugod, gin-apresyar niya an mag-opay nga nahitabo ha iya kinabuhi. Mapasalamaton hiya ha iginpakita ha iya ni David nga pagkabuotan han naglabay. (2 Sam. 9:6-10) Salit han sayop nga ginhukman hiya ni David, nangalimbasog hi Mefiboset nga kitaon an bug-os nga kahimtang. Waray niya tuguti nga masina hiya tungod han  sayop ni David. Ngan waray niya basola hi Jehova ha ginbuhat ni David ha iya. Nagpokus hi Mefiboset ha kon ano an iya mahihimo ha pagsuporta ha ginpili ni Jehova nga hadi. (2 Sam. 16:1-4; 19:24-30) Iginparekord ni Jehova ha iya Pulong an maopay gud nga ehemplo ni Mefiboset basi kita mahibaro tikang ha iya.​—Roma 15:4.

20. Ano an mahimo magin epekto ha iba han kabaraka, pero ha ano hira makakasarig?

²⁰ Tungod han sobra nga kabaraka, an iba nga kabugtoan ginninerbyos gud ngan diri komportable ha normal nga mga sitwasyon kaupod an iba nga mga tawo. Bangin nakukurian hira kon aada hira ha damu nga tawo, pero padayon hira nga natambong ha mga katirok han kongregasyon, asembleya, ngan kombensyon. Nakukurian hira pakiistorya ha diri nira kakilala, pero nakikiistorya hira ha iba ha ministeryo. Kon sugad hito an imo kahimtang, sarig nga diri ka nag-uusahan. Damu liwat an nakakaeksperyensya hin sugad. Hinumdumi nga nalilipay hi Jehova han imo bug-os-kalag nga mga pangalimbasog. An imo diri paghunong ha pag-alagad pamatuod nga ginbibendisyonan ka niya ngan gintatagan ka hin kusog nga imo ginkikinahanglan. * (Fil. 4:6, 7; 1 Ped. 5:7) Kon nag-aalagad ka kan Jehova bisan pa han imo mga gin-aantos ha pisikal o ha emosyon, makakasarig ka nga napapalipay mo hi Jehova.

21. Ha bulig ni Jehova, ano an mahihimo naton ngatanan?

²¹ Maopay na la kay may mga kaibahan an literal nga rumba ngan an rumba nga ginhisgotan ni Pablo. Ha literal nga rumba ha panahon han Biblia, usa la an nakakakuha han premyo. Ha kabaliktaran, an ngatanan nga nagpapadayon nga matinumanon ha Kristiano nga pagkinabuhi nakakakarawat han premyo nga kinabuhi nga waray kataposan. (Juan 3:16) Ngan ha literal nga rumba, an ngatanan nga paradalagan kinahanglan mahimsog; kay kon diri, diri hira magdadaog. Ha luyo nga bahin, damu ha aton an may mga limitasyon ha pisikal, pero nagpapadayon kita. (2 Cor. 4:16) Ha bulig ni Jehova, matatapos naton ngatanan an rumba!