1. Ano nga pamaagi ha pag-aram an ginsunod ni Bugto Russell ngan han iya mga kaupod, ngan kay ano nga epektibo ito?

SOBRA usa ka siglo na an naglabay, hi Bugto C. T. Russell ngan an iya mga kaupod, nga usa nga gutiay nga grupo han iba pa nga mga estudyante han Pulong han Dios, nagtikang magkatirok. Karuyag nira mahibaroan kon ano gud ba an igintututdo han Biblia mahitungod kan Jehova nga Dios, kan Jesu-Kristo, ha kahimtang han patay, ngan ha lukat. Simple an ira pamaagi ha pag-aram. May nagbabangon hin pakiana, ngan katapos, gin-uusisa han grupo an tagsa nga teksto nga konektado ha topiko. Kahuman, iginrirekord nira an ira nahibaroan. Tungod han bendisyon ni Jehova, iton sinsero nga Kristiano nga kalalakin-an nahibaro hin damu nga importante nga kamatuoran ha Biblia nga gin-aapresyar naton tubtob yana.

2. Ano usahay an hinungdan nga nagigin diri tama an aton konklusyon kon nangangalimbasog kita nga masabtan an tagna han Biblia?

² Pero waray pag-iha, nakita hito nga mga estudyante han Biblia nga mas makuri an pagsabot ha usa nga tagna han Biblia kay ha pagsabot ha usa nga basihan nga katutdoan han Biblia. Kay ano? Usa nga rason tungod kay an mga tagna han Biblia kaurogan na nga masasabtan hin maopay samtang natutuman ito o kon tapos na ito matuman. Pero may usa pa nga rason. Basi husto nga masabtan an usa nga tagna, kasagaran na nga kinahanglan naton usisahon an kabug-osan hito. Kon magpupokus kita ha usa la nga bahin han tagna ngan ibabalewaray an iba pa, mahimo magin diri tama an aton konklusyon. Sugad hin ito an nahitabo may kalabotan ha usa nga tagna ha libro han Joel. Aton repasuhon ito nga tagna ngan hisgotan kon kay ano nga kinahanglan naton bag-uhon an aton presente nga pagsabot hito.

3-4. Tubtob yana, ha ano naton igin-aaplikar an tagna nga mababasa ha Joel 2:7-9?

 ³ Basaha an Joel 2:7-9. Hi Joel nagtagna nga may peste hin mga duron nga magdadaot han tuna han Israel. An mga ngipon ngan mga panga hito pariho han kanan leon, ngan kakaunon hiton malamon nga mga insekto an ngatanan nga tanom! (Joel 1:4, 6) Ha sulod hin damu ka tuig, simboliko nga gin-aplikar naton ini nga tagna ha padayon nga pagsangyaw han katawohan ni Jehova nga pariho hin panon hin mga duron nga diri mapugngan. An aton pagsabot, ini nga buruhaton may nakakadaot nga mga epekto ha “tuna,” o ha mga tawo nga ginkukontrol han mga lider han relihiyon. *

⁴ Kon an Joel 2:7-9 la an aton babasahon, baga hin tama ito nga esplikasyon. Pero kon ikukonsiderar naton an bug-os nga tagna, makikita naton nga diri ito an iginpapasabot. Aton usisahon an upat nga rason.

5-6. Ano nga pakiana an nabangon kon ginkukonsiderar an (a) Joel 2:20? (b) Joel 2:25?

⁵ Siyahan ha ngatanan, hunahunaa an saad ni Jehova may kalabotan ha peste han mga duron: “Akon tatabugon pahirayo tikang ha iyo an mga nortehanon [an mga duron].” (Joel 2:20) Kon an mga duron nagrirepresentar ha mga Saksi ni Jehova nga nagtutuman han sugo ni Jesus nga magsangyaw ngan manhimo hin disipulo, kay ano nga magsasaad hi Jehova ha pagtabog ha ira? (Ezek. 33:7-9; Mat. 28:19, 20) Klaro, gintatabog ni Jehova, diri an iya matinumanon nga mga surugoon, kondi an butang o indibiduwal nga nakontra ha iya katawohan.

⁶ Ikaduha, hunahunaa an nakasurat ha Joel 2:25. Hi Jehova nagsiring: “Babayaran ko kamo para han mga tuig nga ginkaon an iyo mga tanom han nagpapanon nga mga duron, han waray pako nga mga duron, han malamon nga mga duron, ngan han malaksi mangutkot nga mga duron, an akon damu nga kasundalohan nga akon ginpakada ha iyo.” Tigamni nga nagsasaad hi Jehova nga “babayaran” niya an kadaot nga ginhimo han mga duron. Kon an mga duron nagrirepresentar ha mga parasangyaw han Ginhadian, magpapasabot ito nga an mensahe nga ira iginpapasamwak nakakadaot. Pero ito nga mensahe nagtatalwas hin kinabuhi ngan makakaaghat ito nga magbasol an iba nga magraot. (Ezek. 33:8, 19) Bendisyon gud ito ha ira!

7. Ha Joel 2:28, 29, an mga pulong nga “katapos hito” nabulig ha aton nga masabtan an ano?

⁷ Basaha an Joel 2:28, 29. Hunahunaa an ikatulo nga rason​—an pagkasunod-sunod han mga panhitabo ha tagna. Napansin mo ba nga hi Jehova nagsiring: “Katapos hito, igbububo ko an akon espiritu”; karuyag sidngon, han natapos han mga duron an ira kinahanglan buhaton? Kon an mga duron mga parasangyaw han Ginhadian han Dios, kay ano nga igbububo ha ira ni Jehova an iya espiritu katapos han ira pagsangyaw? Ha tinuod la, kon waray an bulig han gamhanan nga baraan nga espiritu han Dios, diri gud hira makakapadayon ha pagsangyaw ha sulod hin mga dekada ilarom han mga pagkontra ngan pagdiri pa ngani ha ira buruhaton.

8. Hin-o an ginrirepresentaran han mga duron nga ginhuhulagway ha Pahayag 9:1-11? (Kitaa an retrato ha kobre.)

⁸ Basaha an Pahayag 9:1-11. Yana kitaon naton an ikaupat nga rason. Han naglabay, an peste han mga duron nga iginsaysay ni Joel ginkukonektar naton ha aton pagsangyaw nga buruhaton tungod han usa nga puropariho nga tagna nga mababasa ha libro han Pahayag. Ito nga tagna naghuhulagway hin panon han mga duron nga may nawong hin tawo ngan “may-ada baga hin korona nga bulawan” ha ira ulo. (Pah. 9:7) Ginpapasakitan nira “an mga tawo [mga  kaaway han Dios] . . . nga waray han selyo han Dios ha ira agtang” ha sulod hin lima ka bulan, an aberids nga kahilawig han kinabuhi han duron. (Pah. 9:4, 5) Naghuhulagway gud ini ha dinihogan nga mga surugoon ni Jehova. May kaisog nga iginpapasamwak nira an paghukom han Dios hinin maraot nga kalibotan ngan sugad nga resulta, an mga nadapig hito diri gud nalilipay.

9. Ano an importante nga mga kaibahan han mga duron nga nakita ni Joel ngan hadton nakita ni Juan?

⁹ Oo, may mga kaparihoan an tagna ha Pahayag ngan an tagna ha Joel. Pero may importante ito nga mga kaibahan. Hunahunaa ini: Ha tagna ni Joel, gindaot gud han mga duron an mga tanom. (Joel 1:4, 6, 7) Ha bisyon ni Juan, an mga duron “ginsidngan nga diri dauton an mga tanom ha tuna.” (Pah. 9:4) An mga duron nga nakita ni Joel nagtikang ha norte. (Joel 2:20) An mga duron nga nakita ni Juan nagtikang ha “kahiladman.” (Pah. 9:2, 3) An mga duron nga ginhulagway ni Joel gintatabog. Ha Pahayag, an mga duron diri gintatabog lugod ginpapatapos ha ira buruhaton. Waray indikasyon nga diri hira gin-uuyonan ni Jehova.​—Kitaa an kahon nga “ Mga Tagna Mahitungod ha mga Duron—​Puropariho Pero Magkaiba.”

10. Paghatag hin ehemplo ha Kasuratan nga nagpapakita nga an mga duron nga ginhulagway ni Joel ngan ni Juan mahimo magpasabot hin magkaiba nga butang.

¹⁰ An importante nga mga kaibahan han duha nga tagna nabulig ha aton nga masabtan nga  waray ito koneksyon ha kada tagsa. Karuyag sidngon ba hito nga an mga duron nga ginhulagway ni Joel diri pariho ha mga duron nga ginsisiring ha libro han Pahayag? Oo. Ha Biblia, an usa nga simbolo usahay may iba nga kahulogan kon ginagamit ha iba nga paagi. Pananglitan, ha Pahayag 5:5, gintawag hi Jesus nga “an Leon ha tribo ni Juda,” samtang ha 1 Pedro 5:8, an Yawa ginhulagway sugad nga “nag-iinuwang nga leon.” Tungod han mga pakiana nga nabangon ha aton presente nga pagsabot, kinahanglan naton mamiling hin iba pa nga esplikasyon mahitungod han tagna ni Joel. Ano daw la ito?

11. Ano an mga ginsiring ha Joel 1:6 ngan 2:1, 8, 11 nga nabulig ha aton nga masabtan kon hin-o an mga duron?

¹¹ Kon uusisahon naton an iba pa nga mga bersikulo ha tagna ni Joel, masasabtan naton nga an propeta nagtatagna mahitungod han pag-atake han kasundalohan. (Joel 1:6; 2:1, 8, 11) Hi Jehova nagsiring nga gagamiton niya an iya “damu nga kasundalohan” (kasundalohan han Babilonya) basi sirotan an diri masinugtanon nga mga Israelita. (Joel 2:25) An nasulong nga kasundalohan angayan la nga tawagon nga “mga nortehanon” kay an mga taga-Babilonya maatake ha Israel tikang ha norte. (Joel 2:20) Ito nga kasundalohan iginpapariho ha organisado gud nga panon hin mga duron. Mahitungod ha ira, hi Joel nagsiring: “An kada tagsa [nga sundalo] naabante ha iya gin-aagian. . . . Madagmit nga nasulong hira ha syudad, nadalagan hira ha pader. Nasaklang hira ha mga balay, naagi hira ha mga bintana pariho hin kawatan.” (Joel 2:8, 9) Naiimadyin mo ba an eksena? May mga sundalo ha bisan diin. Waray lugar nga matatagoan. Waray makakalikay ha espada han mga taga-Babilonya!

12. Paonan-o natuman an tagna ni Joel mahitungod ha mga duron?

¹² Pariho hin mga duron, an mga taga-Babilonya (o, mga Caldeo) sinulong ha syudad han Jerusalem han 607 B.C.E. An Biblia nasiring: “[An] hadi han mga Caldeo, nga nagpatay han ira batan-on nga mga lalaki pinaagi han espada . . . , waray . . . malooy ha batan-on nga lalaki o ha birhen, ha lagas o ha maluya. An ngatanan igintubyan han Dios ha iya kamot. Ginsunog niya an balay han tinuod nga Dios, ginrumpag an pader han Jerusalem, ginsunog an ngatanan nga magrig-on nga torre hito, ngan ginbungkag an ngatanan nga presyoso nga butang.” (2 Cron. 36:17, 19) Katapos sulungon ngan bungkagon han mga taga-Babilonya an tuna, ini la an maisisiring han mga nakakakita: “Usa ito nga tuna nga waray sulod, nga waray tawo ngan hayop, ngan igintubyan ito ha mga Caldeo.”​—Jer. 32:43.

13. Isaysay an kahulogan han Jeremias 16:16, 18.

¹³ Mga 200 ka tuig katapos magtagna hi Joel, gin-gamit ni Jehova hi Jeremias ha pagtagna hin iba pa nga impormasyon mahitungod hini nga pag-atake. Nagsiring hiya nga pamimilngon hin maopay an mga Israelita nga nagbubuhat hin maraot ngan dadakpon hira ngatanan. “‘Kitaa, magpapatawag ako hin damu nga parapangisda,’ nasiring hi Jehova, ‘ngan pamimilngon nira hira ngan dadakpon. Katapos hito magpapatawag ako hin damu nga parapanganop, ngan pamimilngon nira hira ha tagsa nga bukid ngan ha tagsa nga bungtod ngan ha mga gutak han dagku nga mga bato. . . . Babalosan ko hira hin bug-os nga kantidad tungod han ira sayop ngan han ira sala.’” An diri mabinasulon nga mga Israelita diri makakatago ha kadagatan man o ha kagurangan tikang ha nasulong nga mga taga-Babilonya.​—Jer. 16:16, 18.

14. Kakan-o natuman an Joel 2:28, 29?

¹⁴ Ha positibo nga bahin, hi Joel may sumat mahitungod han pagpahiuli. An tuna magigin produktibo utro. (Joel 2:23-26) Katapos, ha  partikular nga takna ha maabot nga panahon, magkakaada hura nga espirituwal nga pagkaon. “Igbububo ko an akon espiritu ha ngatanan nga klase hin tawo,” siring ni Jehova, “ngan magtatagna an iyo mga anak nga lalaki ngan an iyo mga anak nga babaye . . . Ngan bisan ha akon mga uripon nga lalaki ngan mga uripon nga babaye igbububo ko an akon espiritu.” (Joel 2:28, 29) Ito nga pagbubo han espiritu han Dios waray dayon mahitabo katapos makabalik an mga Israelita ha ira natawhan nga tuna tikang ha Babilonya. Lugod, nahitabo ito paglabay hin mga siglo, han Pentekostes 33 C.E. Paonan-o kita nahibaro?

15. Sumala ha Buhat 2:16, 17, ano nga pagbag-o an ginhimo ni Pedro ha mga pulong ha Joel 2:28, ngan ano an iginpapasabot hito?

¹⁵ Ha paggiya han Dios, gin-aplikar ni apostol Pedro an Joel 2:28, 29 ha usa nga urusahon nga panhitabo ha adlaw han Pentekostes. Han mga alas noybe hito nga aga, iginbubo han Dios an iya baraan nga espiritu ngan adton nakakarawat hito nagtikang magyakan “mahitungod han urusahon nga mga buhat han Dios.” (Buh. 2:11) Ha paggiya han Dios, naggamit hi Pedro hin medyo naiiba nga mga pulong han ginkotar niya an tagna ni Joel. Napansin mo ba kon ano an iya ginbag-o? (Basaha an Buhat 2:16, 17.) Imbes nga tikangan an iya kotasyon han mga pulong nga “katapos hito,” hi Pedro nagsiring: “Ngan ha kataposan nga mga adlaw”​—nga nagtutudlok ha kataposan nga mga adlaw han Judio nga sistema han mga butang—​an espiritu han Dios igbububo “ha ngatanan nga klase hin tawo.” Nagpapasabot ini nga hilawig nga panahon an linabay antes natuman an tagna ni Joel.

16. Ano an epekto han espiritu han Dios ha pagsangyaw nga buruhaton han siyahan nga siglo, ngan kumusta man ha aton panahon?

¹⁶ Katapos igbubo han Dios an iya espiritu ha mga Kristiano han siyahan nga siglo, gintikangan nira an pagsangyaw nga buruhaton nga  ha urhi paghihimoon ha bug-os nga kalibotan. Ha panahon nga nagsurat hi apostol Pablo ha mga taga-Colosas, han mga 61 C.E., masisiring niya nga an maopay nga sumat iginsasangyaw “ha ngatanan nga linarang ha ilarom han langit.” (Col. 1:23) Han nagsiring hi Pablo nga ha “ngatanan nga linarang,” nagtutudlok ito ha mga bahin han kalibotan nga nakadtoan ni Pablo ngan han iba pa. Ha bulig han gamhanan nga baraan nga espiritu ni Jehova, mas naghaluag gud an naaabot han pagsangyaw nga buruhaton ha aton panahon​—“tubtob ha mga sidsid han tuna”!​—Buh. 13:47; kitaa an kahon nga “ Igbububo Ko an Akon Espiritu.”

17. Ano an aton bag-o nga pagsabot ha tagna ni Joel mahitungod ha mga duron?

¹⁷ Ano an nagbag-o? May-ada na kita yana mas husto nga pagsabot ha tagna nga mababasa ha Joel 2:7-9. Klaro nga ini nga mga bersikulo nagtutudlok, diri ha aton madasigon nga pagsangyaw, kondi ha mga ginbuhat han kasundalohan han Babilonya nga sinulong ha Jerusalem han 607 B.C.E.

18. Ano an waray magbag-o mahitungod ha katawohan ni Jehova?

¹⁸ Ano an waray magbag-o? An katawohan ni Jehova padayon nga nagsasangyaw han maopay nga sumat ha bisan diin, gamit an tagsa nga posible nga pamaagi. (Mat. 24:14) Waray restriksyon han gobyerno an makakapugong ha aton ha pagtuman han sugo nga magsangyaw. Ngan tungod han bendisyon ni Jehova, mas aktibo gud kita yana, maisugon nga iginsasangyaw an maopay nga sumat han Ginhadian! Padayon kita nga mapainubsanon nga nadepende kan Jehova ha pagbulig ha aton nga masabtan an tagna han Biblia, kay nasarig kita nga ha eksakto nga panahon, gigiyahan kita niya “ha ngatanan nga kamatuoran”!​—Juan 16:13.