1-2. Sugad han iginpapakita han eksperyensya ni Angelito, ano an kinahanglan buhaton han tagsa ha aton?

GINPADAKU ka ba hin mga kag-anak nga Saksi ni Jehova? Kon oo, hinumdumi nga diri mo mapapanunod tikang ha ira an personal nga relasyon kan Jehova. Nag-aalagad man ha Dios an aton mga kag-anak o diri, an tagsa ha aton kinahanglan magkultibar hin personal nga pakigsangkay kan Jehova.

² Tagda an eksperyensya han bugto nga hi Angelito. Nagdaku hiya ha Saksi nga pamilya. Pero han burobata pa hiya, diri niya inaabat nga duok gud hiya ha Dios. Hiya nagsiring, “Nag-aalagad ako kan Jehova tungod la kay karuyag ko buhaton an mga ginbubuhat han akon pamilya.” Pero nagdesisyon hi Angelito nga maggahin hin panahon ha pagbasa han Pulong han Dios ngan ha pagpamalandong hito, ngan nagtikang hiya pag-ampo kan Jehova hin mas regular. Ano an resulta? Hi Angelito nagsiring, “Nahibaroan ko nga an paagi la basi magin duok ha akon hinigugma nga Amay, hi Jehova, amo nga ako mismo an kumilala ha iya.” An eksperyensya ni Angelito nag-aaghat ha aton nga hunahunaon an pipira nga pakiana: Ano an kaibahan han pagkaada nahibabaroan mahitungod kan Jehova ngan han pagkilala hin maopay ha iya? Ngan paonan-o naton makikilala hin maopay hi Jehova?

3. Ano an kaibahan han pagkaada nahibabaroan mahitungod kan Jehova ngan han pagkilala hin maopay ha iya?

³ Masisiring naton nga may nahibabaroan mahitungod kan Jehova an usa kon maaram hiya han ngaran han Dios o han pipira han Iya mga ginsiring o ginbuhat. Pero diri la ito an nahiuupod  ha pagkilala hin maopay kan Jehova. Kinahanglan maggahin kita hin panahon ha pag-aram mahitungod kan Jehova ngan han iya mag-opay nga kalidad. Hito la nga paagi naton masasabtan kon ano an nagpapagios ha iya nga magyakan ngan magbuhat hin usa nga butang. Mabulig ito ha aton nga mahibaroan kon gin-uuyonan ba niya an aton mga opinyon, desisyon, ngan buhat. Kon mahibaroan na naton kon ano an iginpapabuhat ha aton ni Jehova, kinahanglan buhaton naton ito.

4. Paonan-o an pag-usisa han mga ehemplo ha Biblia makakabulig ha aton?

⁴ Bangin tamayon kita han pipira nga tawo kon karuyag naton mag-alagad kan Jehova, ngan bangin mas kontrahon pa kita nira kon makig-upod na kita ha iya katawohan. Pero kon masarig kita kan Jehova, diri gud kita niya papabay-an. Ha pagbuhat hito, naghihimo kita hin pundasyon para ha pakigsangkay ha Dios nga magpapadayon ha aton bug-os nga kinabuhi. Puydi gud ba naton makilala hin maopay hi Jehova? Oo! An ehemplo han diri perpekto nga mga tawo, pariho kan Moises ngan kan Hadi David, nagpapamatuod nga posible ito. Samtang ginhihisgotan naton an ira mga ginbuhat, babatunon naton inin duha nga pakiana: Paonan-o nira nakilala hi Jehova? Ngan ano an aton mahibabaroan ha ira ehemplo?

5. Ano an ginpili ni Moises nga buhaton?

⁵ Hi Moises ginios uyon ha iya nahibabaroan. Han mga 40 anyos hi Moises, ginpili niya nga makig-upod ha katawohan han Dios, an mga Hebreo, imbes nga makilala nga “anak han anak nga babaye han Paraon.” (Heb. 11:24) Ginbayaan ni Moises an usa nga prominente nga posisyon. Dinapig hiya ha mga Hebreo nga mga uripon ha Ehipto bisan kon makakapasina ito ha Paraon, nga gamhanan nga magmarando nga ginkikilala nga dios. Kapahayagan gud ito han marig-on nga pagtoo! Hi Moises sinarig kan Jehova. Ito nga pagsarig usa nga importante nga rason kon kay ano nga may marig-on hiya nga relasyon kan Jehova.​—Prob. 3:5.

6. Ano an aton nahibaroan ha ehemplo ni Moises?

⁶ Ano an leksyon? Pariho kan Moises, kita ngatanan may desisyon nga kinahanglan himoon: Pipilion ba naton nga mag-alagad ha Dios ngan makig-upod ha iya katawohan? Bangin kinahanglan naton maghimo hin mga sakripisyo basi makag-alagad kan Jehova, ngan bangin kontrahon kita han mga diri nakilala ha iya. Pero kon masarig kita ha aton Amay ha langit, makakasiguro kita nga bubuligan kita niya!

7-8. Hi Moises nagpadayon ha paghibaro mahitungod ha ano?

⁷ Hi Moises nagpadayon ha paghibaro mahitungod han mga kalidad ni Jehova ngan ha pagbuhat han Iya kaburut-on. Pananglitan, han gintokahan hi Moises nga pangunahan an nasud han Israel paggawas tikang ha pagkabihag, waray hiya kompyansa ngan pauroutro nga ginsidngan niya hi Jehova nga inaabat niya nga diri hiya kwalipikado. An Dios nagpakita gud hin pagpaid kan Moises ngan ginbuligan hiya. (Ex. 4:10-16) Sugad nga resulta, naisumat ni Moises ha Paraon an mapwersa nga mensahe han paghukom. Katapos, nakita ni Moises nga gin-gamit ni Jehova an Iya gahum han Iya gintalwas an mga Israelita kondi ginbungkag an Paraon ngan an iya kasundalohan ha Dagat nga Pula.​—Ex. 14:26-31; Sal. 136:15.

⁸ Katapos pangunahan ni Moises an mga Israelita paggawas ha Ehipto, pirme hira nagrireklamo ha damu nga butang. Bisan pa hito, nakita ni Moises an daku nga pagpailob ni Jehova ha Iya katawohan nga Iya gintalwas tikang ha pagin uripon. (Sal. 78:40-43) Nakita liwat ni Moises an makatirigamnan nga pagpaubos ni Jehova han ginbag-o Niya an Iya desisyon katapos  ni Moises maghangyo nga buhaton ito.​—Ex. 32:9-14.

9. Sumala ha Hebreo 11:27, mationan-o kaduok an relasyon ni Moises kan Jehova?

⁹ Katapos han pagbaya tikang ha Ehipto, an relasyon ni Moises kan Jehova nagin duok gud salit sugad hin nakikita niya an iya langitnon nga Amay. (Basaha an Hebreo 11:27.) Ha paghulagway kon mationan-o kaduok ito nga relasyon, an Biblia nasiring: “Hi Jehova nakiistorya kan Moises nga magkaatubang hira, sugad hin tawo nga nakikiistorya ha iya igkasi-tawo.”​—Ex. 33:11.

10. Basi makilala hin maopay hi Jehova, ano an kinahanglan naton buhaton?

¹⁰ Ano an leksyon? Basi makilala hin maopay hi Jehova, kinahanglan diri la naton hibaroan an iya mga kalidad kondi buhaton liwat an iya kaburut-on. Kaburut-on ni Jehova yana nga “matalwas an ngatanan nga klase hin tawo ngan makadangat ha husto nga kahibaro han kamatuoran.” (1 Tim. 2:3, 4) Usa nga paagi nga ginbubuhat naton an kaburut-on ni Jehova amo an pagtutdo ha iba mahitungod ha iya.

11. Kon nagtututdo kita ha iba mahitungod kan Jehova, paonan-o naton hiya nakikilala hin mas maopay?

¹¹ Kon nagtututdo kita ha iba mahitungod kan Jehova, kaurogan na nga nakikilala naton hiya hin mas maopay. Pananglitan, nakikita naton an ebidensya han pagpaid ni Jehova kon ginigiyahan kita niya nga mabilngan an mga tawo nga karuyag magin iya sangkay. (Juan 6:44; Buh. 13:48) Nakikita naton an gahum han Pulong han Dios samtang aton naoobserbaran an aton mga gindudumarahan hin pag-aram nga ira ginbabayaan an ira magraot nga buhat ngan nagsusul-ot han bag-o nga personalidad. (Col. 3:9, 10) Ngan nakikita naton an pamatuod han pagpailob han Dios samtang iya gintatagan hin damu nga higayon an mga tawo ha aton teritoryo nga mahibaro mahitungod ha iya ngan matalwas.​—Roma 10:13-15.

12. Sumala ha Exodo 33:13, ano an ginhangyo ni Moises, ngan kay ano?

¹² Waray igbalewaray ni Moises an iya relasyon kan Jehova. Bisan han nakahimo na hiya hin gamhanan nga mga buhat ha ngaran ni Jehova, matinalahuron nga naghangyo hiya nga tugotan hiya nga makilala pa hin mas maopay hi Jehova. (Basaha an Exodo 33:13.) Sobra 80 anyos na hi Moises han naghangyo hiya hito, pero maaram hiya nga damu pa gihapon an kinahanglan niya mahibaroan mahitungod ha iya mahigugmaon nga Amay ha langit.

13. Ano an usa nga paagi nga mapapamatud-an naton nga ginpapabilhan naton an aton pakigsangkay ha Dios?

¹³ Ano an leksyon? Bag-ohan man o maiha na kita nga nag-aalagad kan Jehova, diri gud naton angay igbalewaray an aton relasyon ha iya. Usa nga paagi nga mapapamatud-an naton nga ginpapabilhan naton an aton pakigsangkay ha Dios amo an pakiistorya ha iya ha pag-ampo.

14. Kay ano nga an pag-ampo importante gud basi mahibaro kita hin dugang pa mahitungod ha Dios?

¹⁴ An maopay nga komunikasyon importante gud ha marig-on nga relasyon. Salit magin duok ha Dios pinaagi ha pag-ampo pirme ha iya, ngan ayaw kahadlok nga isumat ha iya an imo inaabat ngan ginhuhunahuna. (Efe. 6:18) Hi Krista nga taga-Turkey nagsiring: “Naghihilarom an akon gugma ngan pagsarig kan Jehova ha kada panahon nga iginsusumat ko ha iya ha pag-ampo an akon mga ginhuhunahuna ngan nakikita an iya pagbulig ha akon. Samtang nakikita ko kon paonan-o ginbabaton ni Jehova an akon mga pag-ampo, nabubuligan ako hito nga hunahunaon hi Jehova sugad nga Amay ngan Sangkay.”

15. Ano an ginsiring ni Jehova mahitungod kan Hadi David?

¹⁵ Hi Hadi David natawo ha nasud nga dedikado kan Jehova nga Dios. Pero diri la basta nga  ginsunod niya an relihiyoso nga mga tradisyon han iya pamilya. Nagkultibar hiya hin personal nga relasyon ha Dios, ngan ginhigugma gud hiya ni Jehova. Nagsiring mismo hi Jehova nga hi David “nakakapalipay ha [Iya] kasingkasing.” (Buh. 13:22) Paonan-o hi David nagin duok gud kan Jehova?

16. Ano an nahibaroan ni David mahitungod kan Jehova pinaagi ha pagkita ha mga linarang?

¹⁶ Nahibaro hi David mahitungod kan Jehova tikang ha mga linarang. Han batan-on hi David, damu ka oras hiya nga aadto ha gawas kay nag-aataman hiya han mga karnero han iya tatay. Bangin hito nga panahon nagtikang hiya mamalandong han mga linarang ni Jehova. Pananglitan, samtang ginkikita ni David an kalangitan, diri la mga bitoon an iya nakikita pero posible gud nga nakita liwat niya an mga kalidad han Dios nga naghimo hito. Hi David napagios nga magsurat: “An langit nagpapahayag han himaya han Dios; an kalangitan ha igbaw nagpapasamwak han buhat han iya mga kamot.” (Sal. 19:1, 2) Han ginhunahuna ni David an urusahon nga pagkahimo ha mga tawo, nakita niya nga maaramon gud hi Jehova. (Sal. 139:14) Han ginpamalandong ni David an mga buhat ni Jehova, inabat niya nga gutiay gud la hiya kon ikompara kan Jehova.​—Sal. 139:6.

17. Ano an aton mahibabaroan kon papamalandungon naton an mga linarang?

¹⁷ Ano an leksyon? Magin interesado ha mga linarang. Paggahin hin panahon ha pag-obserbar hinin maopay nga kalibotan nga ginhimo ni Jehova; apresyara ito! Kada adlaw, pamalandonga kon ano an igintututdo ha imo mahitungod kan Jehova han mga linarang ha imo palibot​—an mga tanom, mga hayop, ngan mga tawo. Kon bubuhaton mo ito, damu an imo mahibabaroan kada adlaw mahitungod ha imo mahigugmaon nga Amay. (Roma 1:20) Ngan maoobserbaran mo kada adlaw nga mas nahilarom an imo gugma ha iya.

18. Sugad han iginpapakita ha Salmo 18, ano an nakita ni David?

¹⁸ Nakita ni David nga hi Jehova nabulig ha iya. Pananglitan, han ginproteksyonan ni David an mga karnero han iya tatay tikang ha leon ngan oso, nakita niya nga hi Jehova an binulig ha iya nga mapirde iton magbangis nga hayop. Han napirde ni David an higante nga girriro nga hi Goliat, klaro nga nakita niya nga hi Jehova an naggigiya ha iya. (1 Sam. 17:37) Ngan han pinalagiw hi David tikang ha nangangabugho nga hi Hadi Saul, nakita niya nga hi Jehova an nagtalwas ha iya. (Sal. 18, superskripsyon) An mapahitas-on nga tawo mahimo maghunahuna nga nahimo niya ito ha iya kalugaringon la nga paningkamot. Pero mapainubsanon hi David, salit nakita niya an kamot ni Jehova ha iya kinabuhi.​—Sal. 138:6.

19. Ano an aton mahibabaroan ha ehemplo ni David?

¹⁹ Ano an leksyon? Diri la pangaro kan Jehova hin bulig an kinahanglan naton himoon. Kinahanglan maningkamot liwat kita nga makita kon san-o ngan kon paonan-o niya kita ginbubuligan. Kon mapainubsanon nga ginkakarawat naton an aton mga limitasyon, klaro nga makikita naton nga hi Jehova an nagpupuno han aton kakulangan. Ngan ha kada higayon nga nakikita naton an bulig ni Jehova, mas nagririg-on an aton relasyon ha iya. Ito an naeksperyensyahan ni Isaac nga taga-Fiji, nga damu ka tuig na nga nag-aalagad kan Jehova. Hiya nagsiring: “Kon ginhuhunahuna ko an akon kinabuhi, nakikita ko kon paonan-o ako ginbubuligan ni Jehova tikang han nag-aram ako han Biblia tubtob yana. Sugad nga resulta, tinuod gud para ha akon hi Jehova.”

20. Ano an aton mahibabaroan ha relasyon ni David ha Dios?

²⁰ Ginsubad ni David an mga kalidad ni Jehova. Ginlarang kita ni Jehova nga may abilidad ha pagsubad han iya mga kalidad. (Gen. 1:26)  Samtang mas nahibabaro kita mahitungod ha mga kalidad ni Jehova, mas masusubad naton hiya. Nakilala hin maopay ni David an iya langitnon nga Amay, salit nasubad niya Hiya ha iya pagtratar ha iba. Tagda inin usa nga ehemplo. Nakasala hi David kan Jehova han nag-adulteryo hira ni Bat-seba ngan han iginpapatay niya an bana ni Bat-seba. (2 Sam. 11:1-4, 15) Pero nagpakita hi Jehova hin kalooy kan David, usa nga tawo nga nagpakita hin kalooy ha iba. Tungod kay maopay gud an relasyon ni David kan Jehova, nagin usa hiya han mga hadi nga ginhigugma gud han mga Israelita ngan gin-gamit hiya ni Jehova nga ehemplo para ha iba nga mga hadi ha Israel.​—1 Hadi 15:11; 2 Hadi 14:1-3.

21. Uyon ha Efeso 4:24 ngan 5:1, ano an resulta kon ‘ginsusubad naton an Dios’?

²¹ Ano an leksyon? Kinahanglan ‘subaron naton an Dios.’ Kon ginbubuhat naton ito, diri la kita nagpapahimulos kondi nabubuligan liwat kita nga makilala hiya hin maopay. Kon ginsusubad naton an iya personalidad, ginpapamatud-an naton nga mga anak kita niya.​—Basaha an Efeso 4:24; 5:1.

22-23. Ano an mahitatabo kon gin-aaplikar naton an aton mga nahibabaroan mahitungod kan Jehova?

²² Sugad han aton nahibaroan, nakikilala naton hin maopay hi Jehova pinaagi ha mga linarang ngan han iya Pulong, an Biblia. Iton naiiba nga libro puno hin mga ehemplo han magtinumanon nga surugoon han Dios nga aton masusubad, sugad kanda Moises ngan David. Ginhimo na ni Jehova an iya bahin. Kinahanglan himoon liwat naton an aton bahin ngan kilalahon hi Jehova hin mas maopay tubtob ha aton mahihimo.

²³ Diri gud kita maundang ha paghibaro mahitungod kan Jehova. (Ecles. 3:11) An importante, diri an kadamu han aton nahibabaroan mahitungod ha iya, kondi kon ano an aton ginbubuhat ha aton nahibabaroan. Kon gin-aaplikar naton an aton mga nahibabaroan ngan naniningkamot kita nga subaron an aton mahigugmaon nga Amay, padayon hiya nga magigin duok ha aton. (San. 4:8) Pinaagi han iya Pulong, ginpapasarig kita niya nga diri niya papabay-an an mga naniningkamot nga makilala hiya hin maopay.