1-2. (a) Ano nga selebrasyon an iginsasaurog han pipira nga tawo? (Kitaa an kahon nga “ Ano an Tuig han Kagawasan?”) (b) Sumala ha Lucas 4:16-18, ano an ginhisgotan ni Jesus?

HA PIPIRA nga nasud, may ginhihimo nga espesyal nga selebrasyon para ha ika-50 ka tuig nga pagmando han usa nga hadi o rayna. Ito nga mga selebrasyon mahimo umabot hin usa ka adlaw, usa ka semana, o hin mas maiha pa, pero natatapos gihapon ito ngan an kalipay nga resulta hito madagmit la nga nangangalimtan.

² Hihisgotan naton an usa nga mas maopay nga selebrasyon, mas maopay pa kay han bug-os-tuig nga selebrasyon nga ginhihimo kada ika-50 ka tuig ha kadaan nga Israel. Ito nga selebrasyon nga gintatawag nga Tuig han Kagawasan naghatag hin kagawasan ha mga Israelita. Kay ano nga angay kita mainteres hito? Tungod kay an Tuig han Kagawasan ha Israel nagpapahinumdom ha aton hin usa nga makaruruyag nga kahikayan nga ginhihimo ni Jehova para hin waray kataposan nga kagawasan nga mapapahimulosan naton bisan yana pa la, usa nga kagawasan nga ginhisgotan ni Jesus.​—Basaha an Lucas 4:16-18.

3. Sumala ha Levitico 25:8-12, paonan-o nagpahimulos an mga Israelita ha Tuig han Kagawasan?

³ Mas masasabtan naton kon ano nga kagawasan an ginhisgotan ni Jesus pinaagi ha pag-usisa han kahikayan han Tuig han Kagawasan nga iginhatag han Dios ha Israel. Ginsidngan ni Jehova an mga Israelita: “Kinahanglan magin baraan ha iyo an ika-50 ka tuig ngan ipasamwak an kagawasan ha tuna ha ngatanan nga umurukoy hito. Magigin Tuig han Kagawasan ito para ha iyo, ngan an tagsa ha iyo mabalik ngadto ha tuna nga iya gintatag-iya ngan an tagsa ha iyo sadang bumalik ngadto ha iya pamilya.” (Basaha  an Levitico 25:8-12.) Ha nauna nga artikulo, ginhisgotan naton kon paonan-o an mga Israelita nagpahimulos ha sinemana nga Sabbath. Kondi, paonan-o nagpahimulos an mga Israelita ha Tuig han Kagawasan? Pananglitan, an usa nga Israelita nagkaada daku nga utang ngan tungod hito kinahanglan niya ibaligya an iya tuna basi makabayad. Ha Tuig han Kagawasan, ito nga tuna ibabalik ha iya. Salit masisiring nga ito nga tawo “mabalik ngadto ha tuna nga iya gintatag-iya,” ngan an panurundon han iya mga anak diri mawawara. Ha iba liwat nga kahimtang, kon an tawo may daku nga utang bangin ibaligya niya an usa han iya mga anak​—o bisan an iya kalugaringon—​ha pagkauripon basi makabayad. Ha Tuig han Kagawasan, an uripon kinahanglan “bumalik ngadto ha iya pamilya.” Salit waray bisan usa nga magigin permanente nga uripon! Ini nga kahikayan kapahayagan gud han gugma ni Jehova!

4-5. Kay ano nga importante nga mahibaro kita mahitungod han Tuig han Kagawasan?

⁴ Ano an usa pa nga kapulsanan han Tuig han Kagawasan? Hi Jehova nagsasaysay: “Waray bisan usa dida ha iyo nga magigin pobre, kay sigurado nga bibendisyonan ka ni Jehova dida ha tuna nga iginhahatag ha imo ni Jehova nga imo Dios basi pagtag-iyahon sugad nga panurundon.” (Deut. 15:4) Kabaliktaran gud ito ha nahitatabo yana ha kalibotan, diin an riko kaurogan nga mas nagtitikariko la ngan an pobre mas nagtitikapobre!

⁵ Sugad nga mga Kristiano, diri kita sakop han Mosaiko nga Balaud. Karuyag sidngon diri naton ginsusunod an kahikayan han Tuig han Kagawasan diin gintatagan hin kagawasan an mga uripon, ginkakansela an mga utang, ngan iginbabalik an mga panurundon nga tuna. (Roma 7:4; 10:4; Efe. 2:15) Pero, importante nga mahibaro kita mahitungod han Tuig han Kagawasan. Kay ano? Kay may mapapahimulosan kita nga kagawasan nga magpapahinumdom ha aton han kahikayan nga iginhatag ni Jehova ha mga Israelita.

6. An mga tawo nagkikinahanglan hin kagawasan tikang ha ano?

⁶ Ngatanan kita nagkikinahanglan hin kagawasan kay uripon kita han sala, an pinakamaraot  nga pagkauripon. Tungod kay makasasala kita, nalalagas kita, nagkakasakit, ngan namamatay. Napapamatud-an ito han damu kon nangingespiho hira o nagpapatambal ha doktor. Nasusubo liwat kita kay nakakasala kita. Hi apostol Pablo nagsiring nga “bihag [hiya] han balaud han sala nga [aada ha iya] lawas.” Nagsiring liwat hiya: “Kairo ko nga tawo! Hin-o an magtatalwas ha akon tikang hini nga lawas nga magriresulta han akon kamatayon?”​—Roma 7:23, 24.

7. Ano an igintagna ni Isaias mahitungod ha kagawasan?

⁷ Maopay na la kay naghimo an Dios hin paagi basi matalwas kita, o magkaada kagawasan tikang ha sala. Nagin posible ini nga kagawasan tungod kan Jesus. Sobra 700 ka tuig antes kumanhi hi Jesus ha tuna, nagtagna hi Isaias hin usa nga daku gud nga kagawasan. Ito nga daku gud nga kagawasan mas maopay gud kay ha naihahatag han Tuig han Kagawasan ha Israel. Hiya nagsurat: “An espiritu ni Jehova nga Soberano nga Ginoo aadi ha akon, kay gindihogan ako ni Jehova basi magpasamwak hin maopay nga sumat ha mga maaghop. Ginsugo niya ako basi tambalon an mga ruba an kasingkasing, basi magpasamwak hin kagawasan ha mga bihag.” (Isa. 61:1) Kan kanay aplikado ito nga tagna?

8. Kan kanay aplikado an tagna ni Isaias mahitungod ha kagawasan?

⁸ Iton importante nga tagna mahitungod ha kagawasan nagtikang matuman han gintikangan ni Jesus an iya ministeryo. Han kinadto hiya ha sinagoga han ira bungto han Nazaret, ginbasa ni Jesus ha mga Judio nga nagkakatirok didto an tagna mismo ni Isaias. Gin-aplikar ni Jesus ha iya kalugaringon ini nga mga pulong: “An espiritu ni Jehova aadi ha akon, kay gindihogan niya ako basi magpasamwak hin maopay nga sumat ha mga pobre. Ginsugo niya ako basi magpasamwak hin kagawasan ha mga bihag ngan hin pagpahiuli han pagkita ha mga buta, basi maghatag hin kagawasan ha mga tinalumpigos, basi igsangyaw an tuig han pag-uyon ni Jehova.” (Luc. 4:16-19) Paonan-o gintuman ni Jesus ito nga tagna?

9. Ano nga kagawasan an ginlalaoman han damu nga tawo ha panahon ni Jesus?

⁹ An kagawasan nga igintagna ni Isaias ngan ginbasa ni Jesus nagtikang ihatag han siyahan nga siglo. Ito an ginpabug-atan ni Jesus han hiya nagsiring: “Yana nga adlaw natuman ini nga kasuratan nga iyo pa la nabatian.” (Luc. 4:21) An damu hadton nakabati han ginbasa ni Jesus posible nga naglalaom hin kagawasan tikang ha pagmando han Roma. Bangin an ira inaabat pariho han duha nga tawo nga nagsiring: “Naglaom kami nga ini nga tawo an magtatalwas han Israel.” (Luc. 24:13, 21) Pero maaram kita nga waray  aghata ni Jesus an iya mga sumurunod nga magrebelde ha madarahog nga pagmando han Roma. Lugod, iya hira ginsidngan nga ihatag ha “Cesar an mga butang han Cesar.” (Mat. 22:21) Kon sugad, paonan-o naghatag hi Jesus hin kagawasan hito nga panahon?

10. Ginbuligan ni Jesus an mga tawo nga magkaada kagawasan tikang ha ano?

¹⁰ An Anak han Dios kinanhi basi buligan an mga tawo nga magkaada kagawasan ha duha nga paagi. Siyahan, ginbuligan ni Jesus an mga tawo nga magkaada kagawasan tikang ha sayop nga mga doktrina han mga lider han relihiyon. Damu nga Judio hadto an uripon ha mga tradisyon ngan sayop nga mga gintotoohan. (Mat. 5:31-37; 15:1-11) Adton nag-aangkon nga mga magturutdo ha espirituwal masisiring nga mga buta. Tungod kay ginsalikway nira an Mesias ngan an kamatuoran nga iya igintutdo, nagpabilin hira ha kasisidman ngan ha sala. (Juan 9:1, 14-16, 35-41) Pinaagi han kamatuoran nga igintutdo ni Jesus ngan han iya maopay nga ehemplo, iginpakita niya ha mga mapainubsanon kon paonan-o magkakaada kagawasan tikang ha buwa nga katutdoan.​—Mar. 1:22; 2:23–3:5.

11. Ano an ikaduha nga paagi nga nagtagana hi Jesus hin kagawasan?

¹¹ Ikaduha, ginhimo ni Jesus nga posible nga an mga tawo magkaada kagawasan tikang ha pagkauripon ha napanunod nga sala. Tungod han halad-lukat ni Jesus, mapapasaylo han Dios an mga sala hadton nagpapakita hin pagtoo ngan nakarawat hito nga lukat nga igintagana han Dios. (Heb. 10:12-18) Nagsiring hi Jesus: “Kon an Anak maghatag ha iyo hin kagawasan, magkakaada kamo tinuod nga kagawasan.” (Juan 8:36) Ito nga kagawasan mas daku gud kay han kagawasan nga nakakarawat ha Tuig han Kagawasan ha Israel! Pananglitan, an tawo nga nakakarawat hin kagawasan ha Tuig han Kagawasan mahimo magin uripon utro, ngan ha urhi namamatay hiya.

12. Hin-o an siyahan nga nagpahimulos han kagawasan nga iginpasamwak ni Jesus?

¹² Han Pentekostes 33 C.E., gindihogan ni Jehova hin baraan nga espiritu an mga apostol ngan an iba pa nga magtinumanon. Gin-ampon niya hira basi pag-abot han panahon, banhawon hira ha langit ngan maghadi kaupod ni Jesus. (Roma 8:2, 15-17) Hira an siyahan nga nakakarawat han kagawasan nga iginpasamwak ni Jesus ha sinagoga han Nazaret. Ito nga magtinumanon diri na uripon han buwa nga katutdoan ngan diri kasuratanhon nga mga kustomre han Judio nga mga lider han relihiyon. Gintratar liwat hira han Dios sugad nga nakagawas na tikang ha makamaratay nga mga epekto han sala. An simboliko nga Tuig han Kagawasan nga  nagtikang han gindihogan an mga sumurunod han Kristo han 33 C.E. matatapos kahuman han Usa ka Yukot ka Tuig nga Pagmando ni Jesus. Ano nga mag-opay nga butang an mahitatabo tikang yana tubtob ha kahuman han pagmando ni Jesus?

13-14. Labot ha dinihogan nga mga Kristiano, hin-o pa an makakakarawat han kagawasan nga iginpasamwak ni Jesus?

¹³ Yana, an minilyon han sinsero nga mga tawo tikang ha ngatanan nga nasud kaapi han “iba nga mga karnero.” (Juan 10:16) Waray hira pilia han Dios nga maghadi ha langit kaupod ni Jesus. Lugod, nagsiring an Biblia nga may-ada hira paglaom nga mabuhi hin waray kataposan ha tuna. Ito ba an imo paglaom?

¹⁴ Bisan yana, nakakarawat mo na an pipira han napapahimulosan hadton magigin bahin han langitnon nga Ginhadian han Dios. Pinaagi han imo pagtoo ha halad ni Jesus, makakaaro ka hin kapasayloan han imo mga sala. Tungod hito, magkakaada ka han pag-uyon han Dios ngan limpyo nga konsensya. (Efe. 1:7; Pah. 7:14, 15) Hunahunaa liwat an mga bendisyon nga imo napapahimulosan tungod han pagkaada kagawasan tikang ha diri kasuratanhon nga mga gintotoohan. Hi Jesus nagsiring: “Mahibabaro kamo han kamatuoran, ngan an kamatuoran maghahatag ha iyo hin kagawasan.” (Juan 8:32) Makalilipay gud an pagkaada hito nga kagawasan!

15. Ano nga kagawasan ngan mga bendisyon an aton malalaoman ha tiarabot nga panahon?

¹⁵ Makakalaom ka hin labaw pa nga kagawasan  ha tiarabot nga panahon. Diri na mag-iiha, bubungkagon ni Jesus an buwa nga relihiyon ngan an maraot nga pagmando han tawo. Puproteksyonan han Dios an “daku nga grupo” nga nag-aalagad ha iya, ngan tutugotan hira nga magpahimulos han mga bendisyon ha paraiso nga tuna. (Pah. 7:9, 14) Damu gud nga tawo an babanhawon ngan magkakaada hira higayon nga makagawas tikang ha ngatanan nga epekto han sala ni Adan.​—Buh. 24:15.

16. Ano nga daku nga kagawasan an makakarawat han katawohan?

¹⁶ Ha Usa ka Yukot ka Tuig nga Pagmando, bubuligan ni Jesus ngan han iya mga igkasi-magmarando an katawohan nga magkaada perpekto nga pisikal ngan espirituwal nga kahimsog. Ini nga panahon han pagpahiuli ngan kagawasan magigin pariho han Tuig han Kagawasan ha Israel. Iginpapasabot hini nga an ngatanan nga tawo nga nag-aalagad hin maunungon kan Jehova magigin perpekto na ngan diri na makakasala.

17. Ano an tagna han Isaias 65:21-23 mahitungod han katawohan han Dios? (Kitaa an retrato ha kobre.)

¹⁷ An usa nga tagna nga naghuhulagway han magigin kinabuhi ha tuna mababasa ha Isaias 65:21-23. (Basaha.) Hito nga kinabuhi, diri nga waray kita paghihimoon. Lugod, iginhuhulagway han Biblia nga an katawohan han Dios hito nga panahon magkakaada mapulsanon ngan makalilipay nga buruhaton. Ha kataposan han Usa ka Yukot ka Tuig nga Pagmando, makakasiguro kita nga “an mga linarang mismo tatagan liwat hin kagawasan tikang ha pagin uripon han pagkadunot ngan magkaada han mahimayaon nga kagawasan han mga anak han Dios.”​—Roma 8:21.

18. Kay ano nga makakasarig kita nga magkakaada gud kita maopay nga kabubuwason?

¹⁸ Sugad la nga naghimo hi Jehova hin kahikayan para ha mga Israelita basi magin balanse hira may kalabotan ha pagtrabaho ngan pagpahuway, ito liwat an iya hihimoon para ha iya katawohan ha tiarabot nga Usa ka Yukot ka Tuig nga Pagmando han Kristo. Sigurado nga magkakaada panahon para ha espirituwal nga buruhaton. An pagsingba ha Dios importante basi magin malipayon kita yana, salit ha bag-o nga kalibotan magkakaada gud kita panahon para hito. Oo, an ngatanan nga matinumanon nga tawo magigin malipayon gud ha Usa ka Yukot ka Tuig nga Pagmando han Kristo kay magkakaada kita makalilipay nga trabaho ngan kita ngatanan mag-aalagad ha Dios.