1. Ano an inabat ni David mahitungod kan Jehova, ngan nagpagios ini ha iya nga buhaton an ano?

HI Hadi David nagsurat: “Daku hi Jehova, ngan pagdayawon gud hin daku.” (Sal. 145:3) Hinigugma niya hi Jehova, ngan ito nga gugma nagpagios ha iya nga dayawon an Dios “ha butnga han katiguban.” (Sal. 22:22; 40:5) Sigurado nga hinigugma mo hi Jehova ngan nauyon ka hini nga ginsiring ni David: “Bulahan ka, O Jehova, an Dios ha Israel nga amon amay, ha kagihaponan.”​—1 Kron. 29:10-13.

2. (a) Paonan-o naton madadayaw hi Jehova? (b) Ano an inaabat han pipira may kalabotan ha pagkomento, ngan ano an aton hihisgotan?

² Yana, usa nga paagi nga gindadayaw naton hi Jehova amo an pagkomento ha Kristiano nga mga katirok. Kondi, an pipira nga kabugtoan nakukurian ha pagbuhat hito. Karuyag nira magkomento ha mga katirok, pero napupugngan hira han kahadlok. Paonan-o nira malalamposan ito nga kahadlok? Ngan ano nga praktikal nga mga suhestyon an mabulig ha aton ngatanan basi makaghatag kita hin makaparig-on nga mga komento? Antes naton batunon ito nga mga pakiana, hisgotan anay naton an upat nga importante nga rason kon kay ano nga nagkukomento kita ha mga katirok.

3-5. (a) Sumala ha Hebreo 13:15, kay ano nga nagkukomento kita ha mga katirok? (b) Kita ba ngatanan kinahanglan maghatag hin parapriho nga klase hin komento? Isaysay.

³ Kita ngatanan gintatagan ni Jehova hin pribilehiyo nga dayawon hiya. (Sal. 119:108) An aton mga komento ha mga katirok bahin han aton “halad han pagdayaw,” ngan waray bisan hin-o nga makakaghatag hito nga halad para ha aton. (Basaha an Hebreo 13:15.) Naglalaom ba hi Jehova nga an tagsa ha aton maghahatag  hin parapriho nga klase hin halad, o komento? Diri gud!

⁴ Maaram hi Jehova nga iba-iba an aton mga abilidad ngan kahimtang, ngan ginpapabilhan gud niya an mga halad nga kaya naton ihatag ha iya. Hunahunaa an klase han mga halad nga ginkarawat niya tikang ha mga Israelita. An iba nga Israelita kaya maghalad hin nati nga karnero o hin kanding. Pero an usa nga pobre nga Israelita bangin maghalad hin “duha nga sarapati, o duha nga piso nga tukmo.” Ngan kon diri kaya han usa nga Israelita an duha nga tamsi, hi Jehova nakarawat hin ‘ikanapulo nga bahin han usa ka epa han harina nga pino.’ (Leb. 5:7, 11) Mas barato an harina, pero ginpapabilhan la gihapon ito ni Jehova, basta ito nga halad “harina nga pino.”

⁵ Yana, ito liwat an inaabat han aton buotan nga Dios. Kon nagkukomento kita, diri hiya naglalaom nga kita ngatanan magigin maopay magyakan pariho kan Apolos o makakombinse pariho kan Pablo. (Buh. 18:24; 26:28) An karuyag la ni Jehova nga magkomento kita ha pinakamaopay nga aton mahihimo, uyon ha aton kapasidad. Hinumdumi an balo nga babaye nga naghatag han duha nga sinselyo. Presyoso hiya kan Jehova kay iginhatag niya an pinakamaopay nga iya maihahatag.​—Luc. 21:1-4.

6. (a) Sumala ha Hebreo 10:24, 25, ano an mahimo magin epekto ha aton han mga komento nga aton nababatian? (b) Paonan-o mo maipapakita an imo apresasyon ha mga baton nga nakakaparig-on ha imo?

⁶ Ginpaparig-on naton an usa kag usa pinaagi han aton mga komento. (Basaha an Hebreo 10:24, 25.) Gin-aapresyar naton ngatanan an magkadurodilain nga komento ha aton mga katirok. Nalilipay kita ha simple ngan sinsero nga baton han usa nga bata. Napaparig-on gud kita ha kalipay han usa samtang nagkukomento hiya mahitungod han kamatuoran nga iya pa la hinbaroan. Ngan gin-aapresyar naton adton nangangalimbasog nga magkaada kaisog basi makakomento, bisan kon awdanon hira o nagtitikang pa la pag-aram han aton linggwahe. (1 Tes. 2:2) Paonan-o naton maipapakita an aton apresasyon ha ira pangalimbasog? Mahimo naton hira pasalamatan ha ira makaparig-on nga komento katapos han katirok. Ngan an usa pa nga paagi amo an aton mismo paghatag hin komento. Hini nga paagi, diri la kita napaparig-on ha aton mga katirok kondi napaparig-on liwat naton an iba.​—Roma 1:11, 12.

7. Paonan-o kita nagpapahimulos kon nagkukomento kita?

⁷ Nagpapahimulos kita kon nagkukomento kita. (Isa. 48:17) Paonan-o? Siyahan, kon tumong naton nga magkomento, labi nga naaaghat  kita nga mangandam hin maopay para ha mga katirok. Kon nangangandam kita hin maopay, nagkakaada kita mas hilarom nga pagsabot ha Pulong han Dios. Ngan kon mas hilarom an aton pagsabot, mas maiaaplikar naton an aton mga nahibabaroan. Ikaduha, posible nga mas mag-enjoy kita ha katirok tungod kay nakikigbahin kita ha paghisgot. Ikatulo, tungod kay kinahanglan an pangalimbasog basi makakomento, kasagaran nga nahinunumdoman naton an aton komento bisan kon maiha na nga naglabay an katirok.

8-9. (a) Sugad han iginpapakita ha Malakias 3:16, ano an inaabat ni Jehova mahitungod ha aton mga komento? (b) Ha ano bangin nahahadlok an iba?

⁸ Napapalipay naton hi Jehova kon iginpapahayag naton an aton pagtoo. Makakasiguro kita nga ginpapamatian kita ni Jehova ngan gin-aapresyar niya an aton pangalimbasog nga makakomento ha mga katirok. (Basaha an Malakias 3:16.) Iginpapakita niya an iya apresasyon pinaagi ha pagbendisyon ha aton kon nangangalimbasog gud kita nga mapalipay hiya.​—Mal. 3:10.

⁹ Matin-aw, may-ada kita mag-opay nga rason nga magkomento ha mga katirok. Bisan pa hito, an iba bangin nahahadlok ha pag-alsa han ira kamot. Kon ito an imo inaabat, ayaw panluya. Maghisgot kita hin mga prinsipyo ha Biblia, mga ehemplo, ngan praktikal nga mga suhestyon nga makakabulig ha aton ngatanan nga mangalimbasog nga magkomento hin mas agsob ha mga katirok.

10. (a) Ano an ginkakahadlokan han kadam-an ha aton? (b) Kay ano nga an kahadlok ha pagkomento posible nga maopay nga sinyales?

¹⁰ Ginkukulba ka ba hinduro ha kada higayon nga naghuhunahuna ka pag-alsa han imo kamot basi magkomento? Kon oo, diri ka nag-uusahan. Ha pagkamatuod, an kadam-an ha aton naabat hin kahadlok ha pagkomento. Basi malamposan mo ini nga pag-abat, kinahanglan mo hibaroan an hinungdan hito. Nahahadlok ka ba nga makalimtan an imo karuyag isiring o nga sayop an imo maisiring? Nababaraka ka ba nga an imo komento diri magin sugad kaopay ha mga komento han iba? Ha pagkamatuod, ito nga kahadlok posible nga maopay nga sinyales. Nagpapakita ito nga  mapainubsanon ka ngan ginhuhunahuna mo an iba nga mas labaw ha imo. Karuyag gud ni Jehova ito nga kalidad. (Sal. 138:6; Fil. 2:3) Pero karuyag liwat ni Jehova nga dayawon mo hiya ngan parig-unon mo an kabugtoan ha mga katirok. (1 Tes. 5:11) Hinigugma ka niya ngan tatagan ka niya han kaisog nga imo kinahanglan.

11. Ano nga Kasuratanhon nga mga pahinumdom an makakabulig ha aton?

¹¹ Hunahunaa an pipira nga Kasuratanhon nga mga pahinumdom. An Biblia nasiring nga kita ngatanan nagsasayop ha aton mga ginyayakan ngan ha kon paonan-o naton ito ginyayakan. (San. 3:2) Hi Jehova diri naglalaom hin kahingpitan ha aton, pati liwat an aton kabugtoan. (Sal. 103:12-14) Hira an aton espirituwal nga pamilya, ngan hinigugma kita nira. (Mar. 10:29, 30; Juan 13:35) Naiintindihan nira nga usahay an aton mga komento diri amo an karuyag naton igkomento.

12-13. Ano an aton hinbaroan ha ehemplo nira Nehemia ngan Jonas?

¹² Hunahunaa an pipira nga ehemplo ha Biblia nga makakabulig ha imo nga malamposan an imo kahadlok. Usa hito amo hi Nehemia. Nagserbi hiya ha palasyo han usa nga gamhanan nga hadi. Masurub-on gud hi Nehemia kay hinbaroan niya nga guba an mga pader ngan mga ganghaan han Jerusalem. (Neh. 1:1-4) Hunahunaa la an duro nga kakulba nga posible nga iya inabat han ginpakianhan hiya han hadi kon kay ano nga masurub-on gud hiya! Nag-ampo dayon hi Nehemia ngan katapos binaton. Sugad nga resulta, damu gud an ginbuhat han hadi ha pagbulig ha katawohan han Dios. (Neh. 2:1-8) Hunahunaa liwat hi Jonas. Han ginsugo hiya ni Jehova nga magsangyaw ha mga taga-Ninibe, nahadlok gud hiya salit kinadto hiya ha iba nga direksyon. (Jon. 1:1-3) Pero ha bulig ni Jehova, natuman ni Jonas an iya toka. Ngan an mensahe nga iya iginsumat nakabulig gud ha mga taga-Ninibe. (Jon. 3:5-10) Ha ehemplo ni Nehemia, hinbaroan naton nga importante an pag-ampo antes kita bumaton. Ngan kan Jonas, hinbaroan naton nga mabubuligan kita ni Jehova ha pag-alagad ha iya bisan pa han aton duro nga kahadlok. Kon huhunahunaon, may-ada ba kongregasyon nga sugad kamakaharadlok pariho han mga taga-Ninibe?

¹³ Ano nga praktikal nga mga suhestyon an makakabulig basi makaghatag ka hin makaparig-on nga mga komento ha katirok? Aton hisgotan an pipira nga suhestyon.

14. Kay ano nga sadang kita mangandam hin maopay para ha aton mga katirok, ngan san-o naton ito mahimo buhaton?

¹⁴ Pag-andam para ha tagsa nga katirok. Kon abanse ka nga nagpaplano ngan nangangandam hin maopay, mas magkakaada ka kompyansa ha pagkomento. (Prob. 21:5) Syempre, iba-iba an aton eskedyol ha pagpangandam. Hi Eloise, usa nga balo nga sobra 80 anyos na, nagtitikang ha pag-andam para ha Pag-aram ha Barantayan ha tinikangan pa la han semana. Hiya nagsiring, “Mas nalilipay ako ha mga katirok kon abanse ako nga nag-aaram.” Hi Joy, nga full-time an trabaho, naggagahin hin oras ha Sabado basi pag-adman an Barantayan. “Karuyag ko nga presko pa ha akon hunahuna an aradman,” siring niya. Hi  Ike nga usa nga sagipo nga tigurang ngan payunir, nagsiring, “Maopay gud para ha akon an madaliay la nga pag-aram hin pipira ka beses ha bug-os nga semana kay ha durodiretso nga pag-aram.”

15. Paonan-o ka makakapangandam hin maopay para ha katirok?

¹⁵ Ano an nahiuupod ha pag-andam hin maopay para ha katirok? Tikangi an tagsa nga pag-aram pinaagi ha pagpangaro kan Jehova han baraan nga espiritu. (Luc. 11:13; 1 Juan 5:14) Katapos, paggahin hin pipira ka minuto ha pag-usisa han artikulo. Analisara an ulohan, mga sub-ulohan, mga retrato, ngan mga kahon. Ngan ha imo pag-aram ha tagsa nga parapo, basaha an gin-unabi nga mga teksto tubtob ha imo mahihimo. Pamalandonga an impormasyon, labi na an mga punto nga karuyag mo komentohan. Kon nakapangandam ka hin maopay, mas magpapahimulos ka ngan magigin mas masayon ha imo an pagkomento.​—2 Cor. 9:6.

16. Ano nga mga garamiton an igintagana ha aton, ngan paonan-o mo ito ginagamit?

¹⁶ Kon posible, gamita an elektroniko nga mga garamiton nga may-ada ha linggwahe nga imo hinbabaroan. Pinaagi han iya organisasyon, gintatagan kita ni Jehova hin elektroniko nga mga garamiton nga mabulig ha aton ha pagpangandam para ha mga katirok. Pinaagi han JW Library^® nga app, mada-download naton ha aton gadyet an aradman nga mga publikasyon. Katapos, mahimo na naton pag-adman an publikasyon​—o bisan la mabasa o mapamatian ito—​ha bisan ano nga oras o ha bisan diin. Ginagamit han pipira ini nga garamiton basi mag-aram durante han ira lunch break ha trabaho o ha eskwelahan o samtang nagbibiyahe hira. Gamit an Watchtower Library ngan an Watchtower ONLINE LIBRARY^™, masayon gud la kita makagsaliksik han mga punto ha artikulo nga karuyag naton pag-adman hin mas maopay.

17. (a) Kay ano nga maopay nga mag-andam hin pipira nga komento? (b) Ano an imo hinbaroan ha video nga Magin Sangkay ni Jehova—Pag-andam ha Pagkomento?

¹⁷ Kon posible, pag-andam hin pipira nga komento para ha tagsa nga artikulo. Kay ano? Kay bangin diri ka pirme matawag kon mag-alsa ka han imo kamot. Posible makadungan mo an iba ha pag-alsa, ngan bangin usa ha ira an pilion han nagdudumara. Basi matapos ha eksakto nga oras an katirok, bangin limitahan han nagdudumara an kadamu han nagkukomento ha pipira nga parapo. Salit ayaw kasubo o panluya kon diri ka niya tawagon ha tinikangan nga bahin han pag-aram. Kon mag-aandam ka hin pipira nga komento, mas damu an imo higayon nga makapartisipar ha paghisgot. An usa han mga komento nga imo aandamon mahimo mag-upod ha pagbasa hin teksto. Pero kon mahihimo mo, pag-andam liwat hin komento, gamit an imo kalugaringon nga mga pulong. *

18. Kay ano nga maopay an paghatag hin haglipot nga komento?

¹⁸ Paghatag hin haglipot nga komento. Kasagaran  na nga an haglipot ngan simple nga komento amo an makaparig-on gud. Salit pangalimbasugi nga magin halipot an imo mga baton. Limitahi ito hin mga 30 ka segundo. (Prob. 10:19; 15:23) Kon damu ka tuig ka na nga nagkukomento ha mga katirok, importante nga magpakita ka hin maopay nga susbaranan pinaagi ha paghatag hin haglipot la nga komento. Kon magkukomento ka mahitungod ha damu nga punto ha sulod hin pipira ka minuto, an iba bangin mag-alang ha pagkomento ngan maghunahuna nga diri nira kaya subaron an imo paagi ha pagkomento. Dugang pa, mas damu an makakapartisipar ha katirok kon haglipot la an komento. Kon ikaw an siyahan nga gintawag, maopay gud nga maghatag ka hin simple ngan direkta nga baton ha pakiana. Ayaw komentuhi an ngatanan nga punto ha parapo. Kon nahisgotan na an nangunguna nga punto, mahimo ka magkomento mahitungod ha dugang nga mga punto.​—Kitaa an kahon nga “ Ano an Akon Mahimo Igkomento?”

19. Paonan-o ka mabubuligan han nagdudumara, pero ano an kinahanglan mo buhaton?

¹⁹ Sumati an nagdudumara nga karuyag mo magkomento ha espisipiko nga parapo. Kon ito an imo karuyag buhaton, sadang mo daupon an nagdudumara antes magtikang an katirok. Kon ito na nga parapo an kukomentohan, alsaha dayon hin hitaas an imo kamot basi makita ka han nagdudumara.

20. Paonan-o an katirok ha kongregasyon sugad hin pangaon kaupod an kasangkayan?

²⁰ Hunahunaa an mga katirok ha kongregasyon nga sugad hin pangaon kaupod an mag-opay nga kasangkayan. Handurawa nga nagpaplano hin piknik an pipira nga kabugtoan ha kongregasyon ngan ginhangyo ka nga mag-andam hin simple nga pagkaon. Ano an imo bubuhaton? Bangin mabaraka ka, pero posible nga bubuhaton mo an imo pinakamaopay basi makagdara hin pagkaon nga maruruyagan han ngatanan. Hi Jehova, nga amo an nag-imbitar ha aton, nag-aandam hin lamesa nga puno hin mag-opay nga butang para ha aton ha mga katirok. (Sal. 23:5; Mat. 24:45) Ngan nalilipay hiya kon nagdadara kita hin simple nga regalo, an pinakamaopay nga aton maihahatag. Salit pag-andam hin maopay ngan pagkomento tubtob ha imo mahihimo. Hito nga paagi, diri ka la makakakaon ha lamesa ni Jehova kondi may-ada ka liwat regalo nga maihahatag ha kongregasyon.