1-2. Ano nga mga sitwasyon an naieksperyensyahan han damu nga katawohan ni Jehova, ngan ano an mahimo magin epekto hito ha ira?

TAGDA inin tulo nga senaryo: Usa nga brother an nadayagnos nga may grabe nga sakit. Usa nga maduruto nga brother nga sobra 50 anyos an edad an natanggal ha iya trabaho, ngan bisan pa han iya paningkamot nga makatrabaho utro, diri hiya nakakabiling. Usa nga matinumanon nga lagas nga sister an limitado na an nahihimo ha pag-alagad kan Jehova.

² Kon may naieksperyensyahan ka nga pariho han mga sitwasyon nga gin-unabi pa la, bangin abaton mo nga waray ka na pulos. Ito nga mga sitwasyon mahimo makawara han imo kalipay ngan respeto ha kalugaringon ngan makadaot han imo relasyon ha iba.

3. Paonan-o gintatratar ni Satanas ngan hadton mga naimpluwensyahan niya an kinabuhi han tawo?

³ Makikita ha kalibotan an panhunahuna ni Satanas mahitungod ha kinabuhi han tawo. Tikang pa hadto, pirme gintatratar ni Satanas an mga tawo nga baga hin waray hira pulos. Waray kalooy nga ginsidngan niya hi Eva nga magkakaada hiya kagawasan kon talapason niya an Dios, bisan kon maaram hiya nga kamatayon an sirot hito. Tikang pa hadto, ginkukontrol niya an sistema han komersyo, han politika, ngan han relihiyon ha kalibotan. Salit diri urusahon nga damu nga negosyante, politiko, ngan lider han relihiyon an diri liwat narespeto ha kinabuhi ngan dignidad han tawo.

4. Ano an aton hihisgotan hini nga artikulo?

⁴ Ha luyo nga bahin, karuyag ni Jehova nga magin maopay an  aton pag-abat ha aton kalugaringon, ngan iya kita ginbubuligan kon naatubang kita hin mga sitwasyon diin mahimo kita umabat nga waray kita pulos. (Sal. 136:23; Roma 12:3) Hihisgotan hini nga artikulo kon paonan-o kita ginbubuligan ni Jehova ha masunod nga mga sitwasyon: (1) Kon nag-aantos kita hin sakit, (2) kon nagkukuri kita ha pinansyal, ngan (3) kon naabat kita nga baga hin waray na kita nahihimo nga mapulsanon ha pag-alagad kan Jehova tungod han kalagas. Kondi, aton anay hibaroan kon kay ano nga makakasarig kita nga presyoso kan Jehova an tagsa ha aton.

5. Ano an nagpapamatuod ha imo nga presyoso kan Jehova an mga tawo?

⁵ Bisan kon hinimo kita tikang ha tapotapo, mas presyoso gud kita kay ha usa ka harop nga hugaw. (Gen. 2:7) Tagda an pipira han mga rason kon kay ano nga maaram kita nga presyoso kita kan Jehova. Ginlarang niya an tawo nga may abilidad ha pagsubad han iya mga kalidad. (Gen. 1:27) Pinaagi ha pagbuhat hito, iya kita ginhimo nga mas labaw kay ha bisan ano nga linarang ha tuna, ngan igintapod ha aton an pag-ataman han tuna ngan han mga hayop.​—Sal. 8:4-8.

6. Ano an usa pa nga pamatuod nga presyoso kan Jehova an diri perpekto nga mga tawo?

⁶ Bisan han nakasala na hi Adan, presyoso la gihapon kan Jehova an mga tawo. Presyoso gud kita ha iya salit iya iginhatag an iya hinigugma nga Anak nga hi Jesus sugad nga lukat ha aton mga sala. (1 Juan 4:9, 10) Kon iaplikar na an mga kapulsanan han lukat, babanhawon ni Jehova an mga nagkamatay sugad nga resulta han pakasala ni Adan, ‘an mga magtadong ngan an mga diri magtadong.’ (Buh. 24:15) An iya Pulong nagpapakita nga presyoso kita ha iya bisan kon may sakit kita, nagkukuri ha pinansyal, o lagas na.​—Buh. 10:34, 35.

7. Ano an iba pa nga mga rason kon kay ano nga makakatoo an mga surugoon ni Jehova nga presyoso hira ha iya?

⁷ May iba pa kita nga mga rason kon kay ano nga makakatoo kita nga presyoso kita kan Jehova. Iya kita ginpahirani ha iya ngan naghatag hiya hin atensyon ha aton reaksyon ha maopay nga sumat. (Juan 6:44) Samtang nagkakaada kita duok nga pakigsangkay kan Jehova, mas nagigin duok hiya ha aton. (San. 4:8) Naggagahin liwat hi Jehova hin panahon ngan naniningkamot nga tutdoan kita, nga nagpapakita nga presyoso kita ha iya. Maaram hiya kon ano kita nga klase hin tawo yana ngan kon paonan-o kita mag-uuswag. Ngan iya kita gindidisiplina kay hinigugma kita niya. (Prob. 3:11, 12) Marig-on gud ito nga ebidensya nga presyoso kita kan Jehova!

8. Paonan-o an mga pulong ha Salmo 18:27-29 makakaapekto ha aton panhunahuna mahitungod ha aton mga problema?

⁸ Hi Hadi David gintratar han pipira sugad nga waray pulos, pero maaram hiya nga nahigugma ngan nabulig ha iya hi Jehova. Tungod kay maaram hito hi David, nakabulig ito ha iya nga mailob an iya sitwasyon nga may husto nga panhunahuna. (2 Sam. 16:5-7) Kon nadidepres kita o naatubang hin mga problema, mabubuligan kita ni Jehova nga magkaada positibo nga panhunahuna ha aton sitwasyon ngan malamposan an bisan ano nga ulang. (Basaha an Salmo 18:27-29.) Kon may-ada kita han suporta ni Jehova, waray bisan ano nga makakaulang ha aton ha pag-alagad ha iya hin malipayon. (Roma 8:31) Hisgotan naton yana iton tulo nga espisipiko nga sitwasyon diin labi nga kinahanglan naton hinumdoman nga hinigugma kita ni Jehova ngan presyoso kita ha iya.

9. Paonan-o an sakit mahimo makaapekto ha aton pagkita ha aton kalugaringon?

⁹ An pagkaada sakit mahimo makaapekto ha  aton emosyon nga tungod hito naabat kita nga waray na kita pulos ha bisan kan kanay. Bangin maawod kita kon napapansin han iba an aton mga limitasyon o kon kinahanglan naton dumepende ha bulig han iba. Bisan kon diri maaram an iba han aton sakit, bangin maawod kita tungod kay diri na naton nahihimo an iba nga butang nga nahihimo naton hadto. Hiton makasurubo nga mga sitwasyon, ginpaparig-on kita ni Jehova. Paonan-o?

10. Sumala ha Proberbios 12:25, ano an makakabulig ha aton kon may sakit kita?

¹⁰ Kon may sakit kita, an “maopay nga pulong” makakaparig-on ha aton. (Basaha an Proberbios 12:25.) Ha Biblia, gintipigan ni Jehova an maopay nga mga pulong nga nagpapahinumdom ha aton nga importante kita ha iya bisan kon may sakit kita. (Sal. 31:19; 41:3) Kon babasahon naton ngan pauroutro nga babasahon pa ngani iton giniyahan nga mga pulong, bubuligan kita ni Jehova nga malamposan an negatibo nga mga emosyon nga resulta han aton sakit.

11. Paonan-o naeksperyensyahan han usa nga brother an bulig ni Jehova?

¹¹ Tagda an eksperyensya ni Jorge. Sugad nga batan-on, nagkaada hiya sakit nga malaksi nga naggrabe ngan tungod hito inabat niya nga waray hiya pulos. “Diri ako andam ha nagin epekto ha akon han akon sakit o ha kaawod nga akon inabat tungod kay nakakakuha ito hin atensyon,” siring ni Jorge. “Han nagtikagrabe an akon sakit, nahunahuna ko kon paonan-o magbabag-o an akon kinabuhi. Nasubo gud ako ngan nanginyupo kan Jehova nga buligan ako.” Paonan-o hiya ginbuligan ni Jehova? “Tungod kay nakukurian ako ha pagpokus, gindasig ako nga magbasa hin pipira nga bersikulo ha mga Salmo nga nagpapakita han gugma ni Jehova ha iya mga surugoon. Ginbabasa ko utro ito nga mga teksto kada adlaw, ngan naliaw ngan naparig-on ako hito. Ha urhi, napansin han  mga tawo nga pirme na ako nahiyom. Nagsiring pa ngani hira nga naparig-on hira han akon pagin positibo. Nasantop ko nga ginbaton ni Jehova an akon mga pag-ampo! Ginbuligan niya ako nga bag-uhon an akon pagkita ha akon kalugaringon. Nagtikang ako pagpokus ha ginsisiring han iya Pulong mahitungod ha kon ano an iya pagkita ha akon bisan pa han akon sakit.”

12. Kon may sakit ka, paonan-o mo maieksperyensyahan an bulig ni Jehova?

¹² Kon may sakit ka, makakasiguro ka nga maaram hi Jehova han imo mga gin-aantos. Panginyupo ha iya nga buligan ka nga magkaada husto nga panhunahuna ha imo sitwasyon. Katapos, gamita an Biblia basi mahibaroan an maopay nga mga pulong nga gintipigan ni Jehova para ha imo. Pagpokus ha mga teksto nga nagpapakita nga presyoso gud kan Jehova an iya mga surugoon. Samtang ginbubuhat mo ito, makikita mo nga maopay hi Jehova ha tanan nga nag-aalagad ha iya hin matinumanon.​—Sal. 84:11.

13. Ano an mahimo abaton han usa nga ulo han pamilya tungod han kawad-i hin trabaho?

¹³ Karuyag han tagsa nga ulo han pamilya nga maitagana an panginahanglan han iya pamilya. Pero pananglitan, nawad-an hin trabaho an usa nga brother bisan kon waray man hiya nahimo nga sayop. Naniguro gud hiya nga makatrabaho utro pero waray hiya nabilngan. Ha sugad nga sitwasyon, bangin abaton niya nga waray hiya pulos. Paonan-o makakabulig ha iya an pagpokus ha mga saad ni Jehova?

14. Ano an mga rason nga gintutuman ni Jehova an iya mga saad?

¹⁴ Pirme gintutuman ni Jehova an iya mga saad. (Jos. 21:45; 23:14) Ginbubuhat niya ito tungod han pipira nga rason. Siyahan, makakaapekto ito ha iya maopay nga ngaran, o reputasyon. Nagsaad hi Jehova nga aatamanon niya  an iya maunungon nga mga surugoon, ngan para ha iya obligado hiya nga tumanon ito nga saad. (Sal. 31:1-3) Dugang pa, maaram hi Jehova nga masusubo kita kon diri niya aatamanon adton bahin han iya pamilya. Nagsasaad hiya nga tataganahan kita niya ha materyal ngan ha espirituwal, ngan waray makakapugong ha iya ha pagtuman hito nga saad!​—Mat. 6:30-33; 24:45.

15. (a) Ano nga kakurian an naeksperyensyahan han siyahan-siglo nga mga Kristiano? (b) Ano an iginpapasarig han Salmo 37:18, 19?

¹⁵ Kon ginhihinumdom naton kon kay ano nga gintutuman ni Jehova an iya mga saad, may kompyansa nga maaatubang naton an kakurian ha pinansyal. Tagda an ehemplo han mga Kristiano han siyahan nga siglo. Han nagkaada duro nga pagtimaraot ha kongregasyon ha Jerusalem, “an ngatanan labot la han mga apostol nagpatlaag.” (Buh. 8:1) Hunahunaa la kon ano an iginpapasabot hito. Kakurian ha pinansyal! An mga Kristiano posible nga nawad-an han ira mga balay ngan negosyo. Pero waray hira pabay-i ni Jehova; ngan waray liwat mawara an ira kalipay. (Buh. 8:4; Heb. 13:5, 6; San. 1:2, 3) Ginbuligan ni Jehova ito nga matinumanon nga mga Kristiano hadto, ngan bubuligan liwat kita niya.​—Basaha an Salmo 37:18, 19.

16. Ano nga kahimtang an mahimo mag-aghat ha aton nga maghunahuna kon importante ba kan Jehova an aton pagsingba?

¹⁶ Samtang nagtitikalagas kita, bangin abaton naton nga gutiay na la an aton nahihimo para kan Jehova. Hi Hadi David posible nga inabat liwat hin sugad hito han nagtikalagas hiya. (Sal. 71:9) Paonan-o kita mabubuligan ni Jehova?

17. Ano an aton mahibabaroan ha eksperyensya han sister nga hi Jheri?

¹⁷ Tagda an eksperyensya han sister nga hi Jheri. Gin-imbitar hiya nga umatender ha maintenance  training ha Kingdom Hall, pero nadiri hiya pagkadto. Hiya nagsiring: “Lagas na ako ngan balo, ngan waray ako bisan ano nga skill nga magagamit ni Jehova. Waray ako pulos.” Han gab-i antes han training, iginsumat niya kan Jehova ha pag-ampo an tanan niya nga inaabat. Pag-abot niya ha Kingdom Hall kinabuwasan, naghunahuna la gihapon hiya kon angay gud ba nga aadto hiya. Ha miting, ginpabug-atan han usa nga mamumulong nga an aton pinakaimportante nga skill amo an aton pagin andam ha pagpatutdo kan Jehova. Hi Jheri nagsiring: “Naghunahuna ako, ‘May-ada ako hito nga skill!’ Nakatangis ako han nasantop ko nga ginbaton ni Jehova an akon pag-ampo. Ginpapasarig niya ako nga may maihahatag ako ha iya nga mapulsanon ngan andam hiya nga tutdoan ako!” Hi Jheri nagsiring pa: “Sinulod ako hito nga miting nga ginkukulba, nanluluya, ngan nasusubo. Pero ginawas ako nga may kompyansa, ngan inabat ko nga nadasig ako ngan may pulos na!”

18. Paonan-o iginpapakita han Biblia nga presyoso la gihapon kan Jehova an aton pagsingba samtang nagtitikalagas kita?

¹⁸ Samtang nagtitikalagas kita, makakasiguro kita nga may buruhaton pa hi Jehova nga mahihimo naton. (Sal. 92:12-15) Hi Jesus nagtutdo nga bisan kon limitado na an aton mga abilidad o baga hin gutiay la an aton nahihimo, presyoso kan Jehova an bisan ano nga aton ginbubuhat ha pag-alagad ha iya. (Luc. 21:2-4) Salit pagpokus ha kon ano an imo kaya himoon. Pananglitan, puydi ka makiistorya ha iba mahitungod kan Jehova, mahimo mo ig-ampo an kabugtoan, ngan dasigon an iba nga magpabilin nga matinumanon. Para kan Jehova, igkasi-magburuhat ka niya, diri tungod han imo mga nahihimo, kondi tungod han imo pagin andam ha pagsugot ha iya.​—1 Cor. 3:5-9.

19. Ano an iginpapasarig ha aton han Roma 8:38, 39?

¹⁹ Mapasalamaton gud kita ha pagsingba kan Jehova, usa nga Dios nga nagpapakita nga presyoso gud ha iya an mga nag-aalagad ha iya! Ginlarang kita niya basi buhaton an iya kaburut-on, ngan nagkakaada tinuod nga katuyoan an aton kinabuhi tungod han tinuod nga pagsingba. (Pah. 4:11) Bisan kon trataron kita han kalibotan sugad nga waray pulos, diri gud kita iginkakaawod ni Jehova. (Heb. 11:16, 38) Kon nasusubo gud kita tungod hin sakit, kakurian ha pinansyal, o kalagas, hinumdoman naton nga waray bisan ano nga makakagbulag ha aton tikang ha gugma han aton langitnon nga Amay.​—Basaha an Roma 8:38, 39.