1. Hinin bag-o la nga mga dekada, ano nga pagbag-o an nahitabo ha pipira nga lugar?

HA SULOD hin yinukot ka tuig, kadam-an han mga tawo ha kalibotan baga hin may-ada relihiyon. Kondi hinin bag-o la nga mga dekada, nagkaada daku nga pagbag-o. Nagtitikadamu an nasiring nga waray hira relihiyon. Ngani ha pipira nga nasud, kadam-an han mga tawo an nasiring nga diri hira relihiyoso. *​—Mat. 24:12.

2. Ano an pipira nga rason kon kay ano nga damu an diri relihiyoso?

² Kay ano nga nagtitikadamu an nasiring nga diri hira relihiyoso? * An pipira bangin nakapokus na la ha kalipayan o ha mga problema. (Luc. 8:14) An iba nagin ateyista. An iba naman natoo ha Dios pero naghuhunahuna nga an relihiyon kadaan na, waray pulos, ngan diri nauyon ha syensya ngan ha lohikal nga panhunahuna. Bangin nakakabati hira ha ira kasangkayan, mga titser, o mga aada ha media nga an kinabuhi nagtikang ha ebolusyon, pero talagsa la hira makabati hin lohikal nga mga pangatadongan para tumoo ha Dios. An iba nasisina ha mga klero nga hakog ha kwarta ngan gahum. Ha pipira nga lugar, ginlilimitahan han mga gobyerno an buruhaton han mga relihiyon.

3. Ano an katuyoan hini nga artikulo?

³ Ginsugo kita ni Jesus nga ‘manhimo hin mga disipulo ha mga tawo han ngatanan nga nasud.’ (Mat. 28:19) Paonan-o naton mabubuligan an mga diri relihiyoso nga mahibaro ha paghigugma ha Dios ngan magin disipulo han Kristo? Kinahanglan naton hinumdoman  nga an reaksyon han usa ha aton mensahe bangin nakadepende ha lugar nga iya gindak-an. Pananglitan, bangin diri karawaton an aton mensahe han mga nagdaku ha Europa sugad man han mga nagdaku ha Asia; pero bangin magkaiba an ira hinungdan. Kay ano? Ha Europa, damu an maaram mahitungod ha Biblia ngan pamilyar ha ideya nga ginlarang han Dios an ngatanan nga butang. Ha Asia, kadam-an han mga tawo an gutiay la o waray nahibabaroan mahitungod ha Biblia, ngan bangin diri hira natoo ha Maglalarang. Katuyoan hini nga artikulo nga buligan kita nga maabot an kasingkasing han aton nakakaistorya ha ministeryo, anoman an ira gintikangan.

4. Kay ano nga kinahanglan naton tipigan an positibo nga disposisyon?

⁴ Magin Positibo. Kada tuig, may mga diri relihiyoso nga nagigin mga Saksi ni Jehova. Damu an nagkikinabuhi na uyon ha hitaas nga mga suruklan ha moral salit nasisina ha pagin hipokrito han mga relihiyon. An iba naman nagkikinabuhi uyon ha hamubo nga mga suruklan ha moral ngan damu ha ira an may nabatasan nga maraot nga kinahanglan bayaan. Ha bulig ni Jehova, makakasiguro kita nga mabibilngan naton adton “may husto nga disposisyon basi magkaada kinabuhi nga waray kataposan.”​—Buh. 13:48; 1 Tim. 2:3, 4.

5. Ano an kaurogan nga nakakaaghat ha mga tawo nga mamati han aton mensahe?

⁵ Magin Buotan Ngan Mataktika. Kaurogan nga namamati an mga tawo ha aton mensahe, diri tungod ha kon ano an aton ginsisiring, kondi tungod han paagi han aton pagyakan hito. Gin-aapresyar nira kon buotan kita, mataktika, ngan interesado gud ha ira. Diri naton hira ginpipirit nga pamatian an aton ginsisiring. Lugod, naniningkamot kita nga masabtan kon kay ano nga sugad hito an ira opinyon ha relihiyon. Pananglitan, nahibaroan naton nga may mga nadiri pakiistorya mahitungod ha relihiyon ha usa nga estranghero. An iba naman naghuhunahuna nga kawaray-respeto an pagpakiana ha usa mahitungod han iya panhunahuna ha Dios. An iba liwat naaawod kon makit-an hira nga nagbabasa han Biblia, labi na kon kaupod an usa nga Saksi ni Jehova. Anoman an kahimtang, naniningkamot kita nga magin masinabuton ha ira inaabat.​—2 Tim. 2:24, ftn.

6. Paonan-o iginpakita ni apostol Pablo nga mapauyon-uyon hiya, ngan paonan-o naton hiya masusubad?

⁶ Ano an aton bubuhaton kon an usa baga hin diri komportable kon nagamit kita hin mga pulong sugad han “Biblia,” “paglarang,” “Dios,” o “relihiyon”? Mahimo naton subaron hi apostol Pablo, ngan magpahiuyon kita ha aton kaistorya. Han kaistorya ni Pablo an mga Judio, nangatadongan hiya tikang ha Kasuratan. Kondi, han kaistorya niya an Griego nga mga pilosopo ha Areopago, waray niya gamita hin direkta an Biblia. (Buh. 17:2, 3, 22-31) Paonan-o naton masusubad an ehemplo ni Pablo? Kon may makaistorya ka nga diri natoo ha Biblia, bangin mas maopay nga diri mo direkta nga gamiton an Biblia kon nangangatadongan ha iya. Kon maobserbaran mo nga baga hin diri komportable an imo kaistorya ha pagbasa han Biblia, paningkamuti nga ipakita ha iya an mga teksto nga diri mapapansin han mga tawo, sugad han paggamit han gadyet.

7. Ano an mahimo naton buhaton basi masubad an ehemplo ni Pablo nga iginhuhulagway ha 1 Corinto 9:20-23?

⁷ Magin Masinabuton Ngan Mamati. Kinahanglan maningkamot kita nga masabtan kon kay ano nga sugad hito an panhunahuna han aton mga nakakaistorya. (Prob. 20:5) Tagdon naton utro an ehemplo ni Pablo. Nagdaku hiya kaupod han mga Judio. Sigurado nga kinahanglan niya magpahiuyon ha iya pagsangyaw ha mga Hentil​—mga tawo nga gutiay la o waray hinbabaroan mahitungod kan Jehova ngan ha Kasuratan. Bangin kinahanglan kita magsaliksik o mamakiana ha mga eksperyensyado ha kongregasyon basi pumaid kita ngan magin masinabuton ha mga tawo ha aton teritoryo.​—Basaha an 1 Corinto 9:20-23.

8. Ano an usa nga paagi ha pagtikang hin pakiistorya mahitungod han Biblia?

⁸ An aton tumong amo an pamiling han mga  “takos.” (Mat. 10:11) Basi magin epektibo, kinahanglan naton aghaton an mga tawo nga isumat an ira mga opinyon ngan pamatian hira hin maopay. Usa nga bugto ha England an nagpapakiana ha mga tawo han ira opinyon mahitungod ha kon paonan-o magigin malipayon an pag-asawa, kon paonan-o magpapadaku hin mga anak, o kon paonan-o aatubangon an kawaray-hustisya. Katapos niya pamatian an ira mga komento, nasiring hiya, “Ano an imo masisiring hini nga sagdon nga iginsurat haros 2,000 ka tuig na an naglabay?” Katapos, iginpapakita niya an mga teksto gamit an iya celfon nga diri gin-uunabi an pulong nga “Biblia.”

9. Paonan-o naton mahimo mabuligan adton kasagaran na nga nadiri pakiistorya mahitungod ha Dios?

⁹ Mahimo naton maabot an kasingkasing han mga tawo nga kasagaran na nga nadiri pakiistorya mahitungod ha Dios pinaagi ha paghisgot hin usa nga butang nga may epekto ha ira. Pananglitan, damu an nahipapausa mahitungod han mga butang ha palibot. Salit mahimo kita magsiring: “Bangin naoobserbaran mo nga damu nga gin-imbento han mga syentista an ginkopya tikang ha mga butang nga naeksister na. Pananglitan, gin-iistudyohan han mga nagdidisenyo han mikropono an mahitungod han talinga, ngan an mga nagdidisenyo han kamera nag-iestudyo mahitungod han mata. Ano an imo nahuhunahuna mahitungod han mga butang ha palibot? Para ha imo, basta na la ba nga inulpot ito, may naglarang hito, o iba pa?” Katapos mamati hin maopay, mahimo kita sumiring: “Han gin-aadman han mga endyinir an disenyo han talinga ngan mata, bangin maghunahuna kita kon kan kanay kahibaro an ira gin-aadman. Nainteres ako han ginsurat han usa nga kadaan nga parasiday: ‘An Dios nga naghimo han talinga, diri ba hiya makakabati? An Dios nga nagporma han mata, diri ba hiya makakakita? . . . Hiya an Dios nga naghahatag hin kahibaro ha katawohan!’ Ini liwat an nasantop han iba nga syentista.” (Sal. 94:9, 10) Katapos, puydi naton ipakita an usa nga video ha jw.org^® ilarom han “Mga Interbyu at Karanasan” ha mga serye han “Komento sa Pinagmulan ng Buhay.” (Kitaa ha PUBLIKASYON > VIDEO.) O mahimo naton hira tagan han brosyur nga Ginlarang ba an Kinabuhi? o han brosyur nga The Origin of Life​—Five Questions Worth Asking.

10. Paonan-o kita mahimo makagtikang hin pakiistorya ha usa nga nadiri makiistorya mahitungod ha Dios?

¹⁰ Kadam-an han tawo naghihingyap gud hin maopay nga kabubuwason. Pero damu an nahahadlok nga mabubungkag an tuna o diri na ito mauukyan. Usa nga nagbibiyahe nga paramangno ha Norway an nagsiring nga an mga tawo nga nadiri pakiistorya mahitungod ha Dios kaurogan nga naruruyag makiistorya mahitungod han kahimtang han kalibotan. Katapos maghatag hin katalahoran,  nasiring hiya: “Para ha imo, magkakaada daw la kita maopay nga kabubuwason? An aton ba maopay gud nga kabubuwason nakadepende ha mga politiko, mga syentista, o ha iba pa?” Katapos mamati hin maopay, nagbabasa o nagkukotar hiya hin teksto mahitungod ha makalilipay nga kabubuwason. An pipira naiinteres han saad han Biblia nga an tuna magpapadayon ha waray kataposan ngan an mag-opay nga tawo mabubuhi ha kadayonan.​—Sal. 37:29; Ecles. 1:4.

11. Kay ano nga kinahanglan kita gumamit hin iba-iba nga paagi ha pakiistorya, ngan paonan-o naton masusubad an ehemplo ni Pablo nga iginhuhulagway han Roma 1:14-16?

¹¹ Kinahanglan gumamit kita hin iba-iba nga paagi ha pakiistorya ha aton mga ginsasangyawan. Kay ano? Kay iba-iba an tagsa nga tawo. An nakakapainteres ha usa mahimo diri maruyagan han iba. May pipira nga naruruyag makiistorya mahitungod ha Dios o ha Biblia, samtang an iba naman lain nga topiko an karuyag pag-istoryahan. Anoman an kahimtang, salingabuton naton an higayon nga makaistorya an ngatanan nga klase han tawo. (Basaha an Roma 1:14-16.) Syempre, kinahanglan naton hinumdoman nga hi Jehova an nagpapatubo han kamatuoran ha kasingkasing hadton nahigugma ha katadongan.​—1 Cor. 3:6, 7.

12. Ano an aton mahimo buhaton basi makaistorya an mga tawo nga tikang ha Asia nga diri interesado kon may Maglalarang ba o waray?

¹² Ha bug-os nga kalibotan, damu nga magwarali an may nakakaistorya nga mga taga-Asia, upod na hito an pipira nga tikang ha mga lugar nga ginlilimitahan han mga gobyerno an relihiyoso nga mga buruhaton. Ha pipira nga nasud han Asia, damu an diri interesado kon may Maglalarang ba o waray. May pipira nga naiinteres ngan ginkakarawat an direkta nga tanyag nga mag-aram han Biblia, pero an iba naman nag-aalang nga mag-usisa hin bag-o nga mga ideya. Paonan-o naton hira mabubuligan? An pipira nga eksperyensyado nga magwarali naglampos pinaagi ha pagtikang hin makisangkayon nga pakiistorya, pagpakita hin personal nga interes, ngan kon angayan, pagsumat kon paonan-o nagin maopay an ira kinabuhi han nagtikang hira mag-aplikar hin usa nga prinsipyo ha Biblia.

13. Ano an mahimo magin hinungdan nga mainteres ha Biblia an mga tawo? (Kitaa an retrato ha kobre.)

¹³ Damu nga tawo an siyahan nga naiinteres han praktikal nga kinaadman han Biblia. (Ecles. 7:12) Ha New York, usa nga sister nga nabisita ha mga tawo nga nagyayakan hin Mandarin an nagsiring: “Naniningkamot ako nga magpakita hin interes ha mga tawo ngan namamati ako ha ira. Kon nahibabaroan ko nga bag-o la hira nga binalhin, napakiana ako: ‘Kumusta, nakaka-adjust ka na? Nakabiling ka na hin trabaho? Maopay ba an pagtratar ha imo han mga tawo dinhi?’” Usahay, nagigin hinungdan ini nga maisumat an usa nga katutdoan ha Biblia. Kon angayan, nagpapadayon an sister: “Para ha imo, ano an pinakaimportante nga kinahanglan naton buhaton basi magkaada kita maopay nga relasyon ha mga tawo? Puydi ko ba ipakita ha imo an usa nga puplunganon ha Biblia? Nasiring ito: ‘An pagpatikang hin away pariho han pag-abri hin ganghaan han tubig; antes magtikang an away, baya na.’ Ha imo paghunahuna, makakabulig ba ini nga sagdon basi magkaada kita maopay nga relasyon ha iba?” (Prob. 17:14) An sugad nga pakiistorya makakabulig ha aton nga makita kon hin-o an naruruyag nga mahibaro hin dugang pa.

14. Paonan-o ginbubuligan han usa nga bugto ha Far East an mga tawo nga nasiring nga diri hira natoo ha Dios?

¹⁴ Kumusta man adton nasiring nga diri hira natoo ha Dios? Usa nga bugto nga eksperyensyado pagsangyaw ha mga tawo nga diri relihiyoso ha Far East an nagsiring: “Kasagaran na nga kon an usa magsiring, ‘Diri ako natoo ha Dios,’ karuyag sidngon hito nga diri hiya natoo ha mga dios nga ginsisingba han kadam-an nga tawo didto. Salit gin-uuyonan ko hiya nga an kadam-an nga dios hinimo la han tawo ngan diri tinuod.  Agsob ko basahon an Jeremias 16:20: ‘Makakahimo ba an usa nga tawo hin mga dios para ha iya kalugaringon nga diri man ngani ito mga dios?’ Katapos, napakiana ako: ‘Paonan-o naton mahibabaroan kon hain nga dios an tinuod o hinimo la han tawo?’ Namamati ako hin maopay, katapos ginbabasa ko an Isaias 41:23: ‘Sumati kami han mahitatabo ha tidaraon, basi mahibaro kami nga mga dios kamo.’ Katapos, iginpapakita ko an usa nga ehemplo kon paonan-o nakakagtagna hi Jehova han mahitatabo ha tiarabot nga panahon.”

15. Ano an aton mahibabaroan ha ehemplo han usa nga bugto ha East Asia?

¹⁵ Ginagamit han usa nga bugto ha East Asia an masunod nga paagi kon nagbabalik-bisita. Nasiring hiya: “Iginpapakita ko ha ira an mga ehemplo han kinaadman han Biblia, natuman nga mga tagna ha Biblia, ngan an mga balaud nga nagkukontrol ha uniberso. Katapos, iginpapakita ko kon paonan-o ini ngatanan nagpapamatuod nga may-ada buhi ngan maaramon nga Maglalarang. Kon ginkakarawat han usa an posibilidad nga may Dios, iginpapakita ko ha iya kon ano an ginsisiring han Biblia mahitungod kan Jehova.”

16. Sumala ha Hebreo 11:6, kay ano nga an mga estudyante ha Biblia kinahanglan magkaada pagtoo ha Dios ngan ha Biblia, ngan paonan-o naton hira mabubuligan nga magkaada hito?

¹⁶ Kon nagdudumara kita hin mga pag-aram ha Biblia ha mga diri relihiyoso hadto, kinahanglan padayon nga parig-unon naton an ira pagtoo nga may Dios. (Basaha an Hebreo 11:6.) Kinahanglan liwat naton hira buligan nga maparig-on an ira pagtoo ha Biblia. Bangin kinahanglan uroutruhon naton an paghisgot han pipira nga punto. Ha kada pag-aaram, bangin kinahanglan kita maghisgot hin ebidensya nga an Biblia Pulong han Dios. Mahimo ini mag-upod hin halipot nga paghisgot mahitungod han natuman na nga mga tagna ha Biblia, pagin husto han Biblia ha syensya ngan ha kasaysayan, o praktikal nga kinaadman hito.

17. Ano an mahimo magin epekto ha mga tawo han aton gugma?

¹⁷ Ginbubuligan naton an mga tawo nga magin mga disipulo han Kristo pinaagi ha pagpakita ha ira hin gugma, relihiyoso man hira o diri. (1 Cor. 13:1) Samtang gintututdoan naton hira, tumong naton nga ipakita ha ira nga hinigugma kita han Dios ngan karuyag niya nga higugmaon naton hiya. Kada tuig, yinukot hadton gutiay la o waray interes hadto ha relihiyon an nababawtismohan tungod kay nakultibar nira an ira gugma ha Dios. Salit magin positibo, ngan magpakita hin mahigugmaon nga interes ha ngatanan nga klase han tawo. Pamatii hira. Paningkamuti nga masabtan hira. Pinaagi han imo ehemplo, tutdui hira nga magin disipulo han Kristo.