1-2. (a)  Kay ano nga diri kita angay mahipausa kon igdiri an aton pagsingba? (b) Ano an aton hihisgotan hini nga artikulo?

HAN 2018, sobra 223,000 nga magwarali han maopay nga sumat an nag-uukoy ha mga lugar diin an aton espirituwal nga mga buruhaton igindiri o ginlimitahan gud. Diri ini urusahon. Sugad han aton nahibaroan ha nauna nga artikulo, an tinuod nga mga Kristiano maaram nga pagtitimarauton hira. (2 Tim. 3:12) Diin man kita nag-uukoy, bangin tigda ngan diri ginlalaoman nga igdiri han gobyerno an pagsingba ha aton mahigugmaon nga Dios nga hi Jehova.

² Kon igdiri han gobyerno ha iyo lugar an pagsingba kan Jehova, bangin makapakiana ka ha imo kalugaringon: ‘An pagtimaraot ba nagpapasabot nga diri na kita inuuyonan han Dios? Mapapaundang ba han pagdiri an aton pagsingba kan Jehova? Kinahanglan ba ako bumalhin ha lugar diin may kagawasan ako nga makakagsingba ha Dios?’ Hini nga artikulo, hihisgotan naton ito nga mga pakiana. Hihisgotan liwat naton kon paonan-o kita makakapadayon pagsingba kan Jehova ha panahon nga igdiri an aton buruhaton ngan kon ano nga mga lit-ag an kinahanglan naton likyan.

3. Sumala ha 2 Corinto 11:23-27, ano nga pagtimaraot an naeksperyensyahan han matinumanon nga hi apostol Pablo, ngan ano an aton mahibabaroan ha iya ehemplo?

³ Kon igdiri han gobyerno an aton pagsingba, bangin sayop nga maghunahuna kita nga diri na kita inuuyonan han Dios. Pero hinumdumi, an pagtimaraot diri nagpapasabot nga diri na nalilipay ha aton hi Jehova. Tagda pananglitan hi apostol Pablo. Sigurado nga inuuyonan hiya han Dios. Nakapribilehiyo hiya pagsurat han  14 nga surat han Kristiano Griego nga Kasuratan, ngan usa hiya nga apostol ha mga nasud. Bisan pa hito, inatubang hiya hin duro nga pagtimaraot. (Basaha an 2 Corinto 11:23-27.) Hinbaroan naton ha eksperyensya ni apostol Pablo nga gintutugotan ni Jehova nga pagtimarauton an iya matinumanon nga mga surugoon.

4. Kay ano nga nangangalas ha aton an kalibotan?

⁴ Iginsaysay ni Jesus kon kay ano nga sadang naton laoman an pagkontra. Nagsiring hiya nga kangangalasan kita tungod kay diri kita bahin han kalibotan. (Juan 15:18, 19) An pagtimaraot diri tigaman nga diri na kita inuuyonan ni Jehova. Lugod, nagpapakita ito nga ginbubuhat naton an husto!

5. Mapapaundang ba han mga tawo an pagsingba kan Jehova? Isaysay.

⁵ Diri gud mapapaundang han mga parakontra nga tawo an pagsingba ha makagarahum-ha-ngatanan nga Dios, hi Jehova. Damu an nagsari pero napakyas hira. Tagda an nahitabo han Girra ha Kalibotan II. Hito nga panahon, an mga gobyerno ha damu nga nasud nagtimaraot gud ha katawohan han Dios. An buruhaton han mga Saksi ni Jehova waray la igdiri han partido nga Nazi ha Germany kondi pati liwat han mga gobyerno ha Australia, Canada, ngan ha iba pa nga nasud. Kondi, tigamni an nahitabo. Han nagtikang an girra han 1939, may-ada 72,475 nga magwarali ha bug-os nga kalibotan. Iginpakita han mga report nga katapos han girra han 1945, nagkaada 156,299 nga magwarali tungod han bendisyon ni Jehova. Sobra duha ka pilo an naidugang ha kadamu han magwarali!

6. Imbes nga mahadlok kita, ano nga positibo nga mga butang an mahimo mahitabo tungod han pagkontra? Paghatag hin ehemplo.

⁶ Imbes nga mahadlok kita, an pagkontra mahimo mag-aghat ha aton nga magin mas determinado ha pag-alagad kan Jehova. Pananglitan, usa nga mag-asawa nga may gutiay pa nga anak an naukoy ha nasud diin igindiri han gobyerno an aton pagsingba. Imbes nga magpadaog ha kahadlok, an mag-asawa nagregular payunir lugod. Ginbayaan pa ngani han asawa an iya trabaho nga daku an sweldo basi makagpayunir. An bana nagsiring nga tungod han pagdiri, damu an nag-usisa mahitungod ha mga Saksi ni Jehova. Salit, nagin mas masayon para ha iya an pagtikang hin mga pag-aram ha Biblia. An pagdiri nagkaada liwat maopay nga epekto ha iba. Usa nga tigurang hito nga nasud an nagkomento nga damu hadton inundang ha pag-alagad kan Jehova an  nagtikang pagtambong ha mga katirok ngan nagin aktibo utro.

7. (a) Ano an aton mahibabaroan ha Levitico 26:36, 37? (b) Ano an imo bubuhaton kon igdiri an aton buruhaton?

⁷ Kon igindidiri han aton mga kaaway an aton pagsingba, karuyag nira nga mahadlok kita ha pag-alagad kan Jehova. Labot la han pagdiri, mahimo hira magpasarang hin buwa nga mga istorya, magsugo hin mga opisyal nga inspeksyunon an aton balay, dad-on kita ha korte, o prisuhon pa ngani an iba ha aton. Naglalaom hira nga mahahadlok kita tungod kay may pipira na ha aton nga ira iginpapriso. Kon mahahadlok kita ha ira, bangin kita na lugod an “magdiri” ha aton pagsingba. Diri naton karuyag nga magin pariho hadton iginhuhulagway han Levitico 26:36, 37. (Basaha.) Diri naton tutugotan an kahadlok nga magpahinay o magpaundang ha aton espirituwal nga mga buruhaton. Bug-os kita nga nasarig kan Jehova ngan diri nagpapatarantar. (Isa. 28:16) Pirme kita nag-aampo para han giya ni Jehova. Maaram kita nga tungod han iya bulig, bisan an pinakagamhanan nga gobyerno han tawo diri makakapugong ha aton matinumanon nga pagsingba ha aton Dios.​—Heb. 13:6.

8-9. (a) Ano nga personal nga desisyon an kinahanglan himoon han tagsa nga ulo han pamilya o tagsa nga indibiduwal? (b) Ano an mabulig ha usa basi makahimo hin maopay nga desisyon?

⁸ Kon igdiri han gobyerno ha iyo lugar an aton pagsingba, bangin maghunahuna ka kon kinahanglan ka ba bumalhin ha nasud diin may kagawasan ka nga makakag-alagad kan Jehova. Personal ito nga desisyon ngan waray iba nga magdidesisyon hito para ha imo. Bangin makabulig ha pipira an pagkonsiderar han ginbuhat han siyahan-siglo nga mga Kristiano han gintimaraot hira. Katapos batuhon hi Esteban tubtob mamatay, an mga disipulo ha Jerusalem binalhin ha iba-iba nga lugar han Judea ngan Samaria ngan nakaabot pa ngani ha Fenicia, Ciprus, ngan Antiokia. (Mat. 10:23; Buh. 8:1; 11:19) Pero bangin maobserbaran han iba nga han nakaeksperyensya utro hin pagtimaraot an siyahan-siglo nga mga Kristiano, hi apostol Pablo nagdesisyon nga diri bumaya ha mga lugar diin ginkukontra an pagsangyaw nga buruhaton. Lugod, iginbutang niya ha peligro an iya kinabuhi basi isangyaw an maopay nga sumat ngan parig-unon an kabugtoan ha mga syudad nga nag-aantos han duro nga pagtimaraot.​—Buh. 14:19-23.

⁹ Ano an aton mahibabaroan tikang hini nga mga asoy? An tagsa nga ulo han pamilya kinahanglan maghimo hin personal nga desisyon mahitungod han pagbalhin. Antes magdesisyon, kinahanglan hiya mag-ampo ngan maghunahuna hin maopay mahitungod han kahimtang han iya pamilya ngan han positibo ngan negatibo nga epekto nga posible nira maeksperyensyahan tungod han pagbalhin. May kalabotan hini, an tagsa nga Kristiano kinahanglan ‘magdara han iya kalugaringon nga pinas-an.’ (Gal. 6:5) Diri naton puydi hukman an iba ha ira desisyon.

10. Ano nga mga instruksyon an ihahatag han sanga nga opisina ngan han mga tigurang?

¹⁰ Paonan-o ka makakapadayon pagsingba kan Jehova ha panahon han pagdiri? An sanga nga opisina maghahatag ha mga tigurang hin mga instruksyon ngan praktikal nga mga suhestyon kon paonan-o makakakarawat hin espirituwal nga pagkaon, kon paonan-o magkakatirok, ngan kon paonan-o magsasangyaw han maopay nga sumat. Kon an mga tigurang diri nakukontak han sanga nga opisina, an mga tigurang mabulig ha imo ngan ha bug-os nga kongregasyon basi makapadayon ka ha pagsingba kan Jehova. Maghahatag hira hin instruksyon uyon ha ginsisiring han Biblia ngan han aton mga publikasyon.​—Mat. 28:19, 20; Buh. 5:29; Heb. 10:24, 25.

11. Kay ano nga makakasiguro ka nga magkakaada ka hin espirituwal nga pagkaon, ngan ano an imo bubuhaton basi maproteksyonan ito?

 ¹¹ Hi Jehova nagsaad nga an iya mga surugoon bubusugon ha espirituwal. (Isa. 65:13, 14; Luc. 12:42-44) Salit makakasiguro ka nga bubuhaton han iya organisasyon an ngatanan nga mahihimo basi maitagana an espirituwal nga pagparig-on nga imo ginkikinahanglan. Ano an imo bubuhaton? Ha panahon han pagdiri, pagbiling hin maopay nga matatagoan han imo Biblia ngan han iba pa nga publikasyon. Paghirot nga diri gud ibutang iton presyoso nga mga butang​—nakaimprinta man o elektroniko nga pormat—​ha dapit nga masayon la madiskobrehan. An tagsa ha aton kinahanglan maghimo hin praktikal nga mga pitad basi magpabilin nga marig-on an pagtoo.

12. Ano an hihimoon han mga tigurang basi diri abaton an mga katirok?

¹² Kumusta man an mahitungod han aton sinemana nga mga katirok? An mga tigurang maghihimo hin mga paagi nga makatambong ka ha mga katirok nga diri aabaton han mga nakontra. Mahimo hira maghatag hin instruksyon nga magkatirok ha gutiay nga mga grupo, ngan posible nga burobag-uhon nira an eskedyol ngan lokasyon han mga katirok. Makakabulig ka nga magin talwas an mga natambong pinaagi ha diri pag-inaringasa kon naabot o nabaya ha mga katirok. Bangin kinahanglan liwat nga an imo pamado diri makakuha hin atensyon.

13. Ano an aton mahibabaroan ha aton kabugtoan ha Unyon Sobyet?

¹³ May kalabotan ha pagsangyaw nga buruhaton, iba-iba an kahimtang han tagsa nga lugar. Pero tungod kay hinigugma naton hi Jehova ngan nalilipay kita pagsumat ha iba mahitungod han iya Ginhadian, maghihimo kita hin paagi nga makasangyaw. (Luc. 8:1; Buh. 4:29) Mahitungod ha pagsangyaw han mga Saksi ni Jehova ha gintatawag hadto nga Unyon Sobyet, an historyador nga hi Emily B. Baran nagsiring: “Han ginsidngan han gobyerno an mga tumuroo nga diri na hira puydi magsangyaw ha iba mahitungod han ira pagtoo, ginsangyawan han mga Saksi an ira mga amyaw, katrabaho, ngan mga sangkay. Han gindara hira ha mga prisohan para ha pinirit nga pagtrabaho tungod hini, ginsangyawan han mga Saksi an ira mga igkasi-priso.” Bisan pa han pagdiri, an aton kabugtoan ha Unyon Sobyet waray umundang ha pagsangyaw. Kon igdiri man an pagsangyaw nga buruhaton ha iyo lugar, hinaot may-ada ka liwat han sugad nga determinasyon!

14. An Salmo 39:1 makakabulig ha aton nga malikyan an ano nga lit-ag?

¹⁴ Paghirot ha kon ano nga impormasyon an isusumat. Ha panahon han pagdiri, kinahanglan maaram kita kon san-o an “panahon han paghilom.” (Ecles. 3:7) Kinahanglan diri naton isumat an sensitibo nga impormasyon, sugad han ngaran han aton kabugtoan, lokasyon nga ginkakatirokan, paagi han pagsangyaw, ngan kon paonan-o nakakarawat an espirituwal nga pagkaon.  Diri naton isusumat ini nga mga impormasyon ha sekular nga mga awtoridad pati ha aton mga sangkay o paryente nga naukoy ha aton nasud o ha iba nga nasud. Kon mahulog kita hini nga lit-ag, ibubutang naton ha peligro an aton kabugtoan.​—Basaha an Salmo 39:1.

15. Ano an gintatalinguha ni Satanas nga buhaton ha aton, ngan paonan-o naton malilikyan an iya lit-ag?

¹⁵ Ayaw tuguti nga mabahin kita han gudtiay nga problema. Maaram hi Satanas nga an panimalay nga nababahin diri makakapadayon. (Mar. 3:24, 25) Padayon hiya nga mananalinguha nga magkabahinbahin kita. Hito nga paagi, naglalaom hiya nga makikig-away kita ha usa kag usa imbes nga ha iya.

16. Ano nga susbaranan an iginpakita ni Sister Gertrud Poetzinger?

¹⁶ Bisan an hamtong nga mga Kristiano kinahanglan magbantay nga diri mahulog hini nga lit-ag. Tagda an ehemplo han duha nga dinihogan nga sister nga hira Gertrud Poetzinger ngan Elfriede Löhr. Ginpriso hira upod han iba nga mga sister ha usa nga kampo konsentrasyon han Nazi. Naawa hi Gertrud han hi Elfriede naghatag hin makaparig-on nga mga pahayag ha iba nga mga sister ha kampo. Ha urhi, naawod hi Gertrud ngan nangaro hin bulig kan Jehova. Hiya nagsurat: “Kinahanglan mahibaro kita pagkarawat kon an iba mas maabilidad o mas damu an responsabilidad.” Paonan-o niya nalamposan an iya kaawa? Nagpokus hi Gertrud ha mag-opay nga kalidad ngan pagin makisangkayon ni Elfriede. Hini nga paagi, naibalik niya an iya maopay nga relasyon kan Elfriede. Nakatalwas hira nga duha ha kampo konsentrasyon ngan nag-alagad nga matinumanon kan Jehova tubtob nga natapos an ira kinabuhi dinhi ha tuna. Kon mananalinguha kita paglampos ha aton mga problema ha aton kabugtoan, malilikyan naton an lit-ag han pagkabahin-bahin.​—Col. 3:13, 14.

17. Kay ano nga kinahanglan likyan naton an pagin paragbuot?

¹⁷ Likyi an pagin paragbuot. Kon ginsusunod naton an instruksyon tikang ha tinaporan ngan may responsabilidad nga mga brother, malilikyan naton an mga problema. (1 Ped. 5:5) Pananglitan, ha usa nga lugar nga igindidiri an buruhaton, an may responsabilidad nga mga brother naghatag hin instruksyon ha mga magwarali nga diri magbilin hin literatura ha ministeryo. Pero, may payunir nga brother hito nga lugar nga naghunahuna nga mas maaram hiya, salit nanaltag hiya hin literatura. Ano an resulta? Waray pag-iha katapos niya magsangyaw ha diri-pormal nga paagi kaupod han iba nga kabugtoan, ginsitar hira han pulis. Ginsinundan ngay-an hira han mga opisyal ngan ginkuha an mga literatura nga ira ginpanaltag. Ano an aton mahibabaroan hini nga eksperyensya? Kinahanglan sumunod kita ha instruksyon bisan kon inaabat naton nga mas maaram kita. Pirme kita ginbibendisyonan ni Jehova  kon nakooperar kita ha mga brother nga ginpili nga manguna ha aton.​—Heb. 13:7, 17.

18. Kay ano nga kinahanglan naton likyan an paghimo hin diri kinahanglanon nga mga surundon?

¹⁸ Ayaw paghimo hin diri kinahanglanon nga mga surundon. Kon an mga tigurang naghihimo hin diri kinahanglanon nga mga surundon, ginpapakurian nira an iba. Nahinumdoman ni Brother Juraj Kaminský an nahitabo ha panahon han pagdiri ha gintatawag hadto nga Czechoslovakia: “Han gin-aresto an may responsabilidad nga mga brother ngan an damu nga tigurang, an iba hadton nangunguna ha mga kongregasyon ngan ha mga sirkito naghimo hin mga surundon ha paggawi para ha mga magwarali, naghimo hin listahan han angay buhaton ngan diri angay buhaton.” Waray kita tagi ni Jehova hin awtoridad nga magdesisyon para ha iba. An usa nga naghihimo hin diri kinahanglanon nga mga surundon diri nagpapanalipod ha iya bugto, nagpapakaagaron hiya han pagtoo han iya bugto.​—2 Cor. 1:24.

19. Bisan pa han paniguro ni Satanas, ano an iginpapasarig ha aton han 2 Cronicas 32:7, 8?

¹⁹ An aton nangunguna nga kaaway, hi Satanas nga Yawa, diri maundang ha pagtimaraot ha matinumanon nga mga surugoon ni Jehova. (1 Ped. 5:8; Pah. 2:10) Hi Satanas ngan an mga nasuporta ha iya maniniguro nga igdiri an aton pagsingba kan Jehova. Pero, waray rason nga umundang kita ha pag-alagad tungod ha kahadlok! (Deut. 7:21) Hi Jehova kaupod naton, ngan padayon hiya nga mabulig ha aton bisan kon igdiri an aton buruhaton.​—Basaha an 2 Cronicas 32:7, 8.

20. Ano an imo determinasyon?

²⁰ Hinaot an aton determinasyon magin pariho han aton siyahan-siglo nga kabugtoan nga nagsiring ha mga magmarando ha ira panahon: “Kon husto ha pagkita han Dios nga mamati ha iyo imbes nga ha Dios, kamo an paghukom. Kondi para ha amon, diri namon mahihimo nga umundang ha pagyakan mahitungod han mga butang nga amon nakita ngan nabatian.”​—Buh. 4:19, 20.