1-2. (a) Sumala ha Efeso 6:16, kay ano nga kinahanglan naton hin “daku nga taming han pagtoo”? (b) Ano nga mga pakiana an aton hihisgotan?

MAY-ADA ka ba “daku nga taming han pagtoo”? (Basaha an Efeso 6:16.) Sigurado nga may-ada ka. Pariho hin daku nga taming nga nagpuprotektar ha kadak-an nga bahin han lawas, an imo pagtoo nagpuprotektar ha imo tikang ha magraot nga impluwensya hini nga kalibotan sugad han imoralidad, kamadarahog, ngan iba pa nga buhat nga diri uyon ha mga suruklan han Dios.

² Kondi nagkikinabuhi kita ha “kataposan nga mga adlaw,” ngan padayon nga masasarihan an aton pagtoo. (2 Tim. 3:1) Paonan-o mo uusisahon an imo taming han pagtoo basi masiguro nga marig-on ito? Ngan paonan-o mo makakaptan hin marig-on an imo taming? Hisgotan naton an baton hito nga mga pakiana.

3. Ano an ginhihimo han mga sundalo ha ira taming, ngan kay ano?

³ Ha panahon han Biblia, an mga sundalo kaurogan na nga may taming nga ginputos hin anit. Gin-aasyetehan han mga sundalo an taming basi mapreserbar an anit ngan basi diri tauyon an metal nga mga parte hito. Kon makita han sundalo nga may guba an iya taming, ginsisiguro niya nga maayad ito basi magin andam hiya pirme ha sunod nga pakig-away. Paonan-o ito nga ehemplo aplikado ha imo pagtoo?

4. Kay ano nga kinahanglan mo usisahon an imo taming han pagtoo, ngan paonan-o mo ito bubuhaton?

⁴ Pariho han mga sundalo ha kadaan nga panahon, kinahanglan mo regular nga usisahon ngan mintinaron an imo taming han pagtoo basi pirme ka magin andam ha pakig-away. Sugad nga mga  Kristiano, may-ada kita espirituwal nga pakig-away ngan an aton mga kaaway nag-uupod han magraot nga espiritu. (Efe. 6:10-12) Waray iba nga makakagmintinar han imo taming han pagtoo para ha imo. Paonan-o mo masisiguro nga andam ka ha pag-atubang ha mga pagsari? Siyahan, kinahanglan mag-ampo ka nga buligan ka han Dios. Katapos, kinahanglan gamiton mo an Pulong han Dios basi mabuligan ka nga makita an imo kalugaringon pariho han pagkita han Dios ha imo. (Heb. 4:12) An Biblia nasiring: “Sarig kan Jehova ha imo bug-os nga kasingkasing, ngan ayaw pagtapod ha imo kalugaringon nga pagsabot.” (Prob. 3:5, 6) Hunahunaa an pipira nga desisyon nga imo pa la ginhimo. Pananglitan, nagkaada ka ba seryoso nga problema ha kwarta? Nahinumdoman mo ba an saad ni Jehova nga nakarekord ha Hebreo 13:5: “Diri ko gud ikaw babayaan, ngan diri ko gud ikaw papabay-an”? Nagpasarig ba ha imo ito nga saad nga bubuligan ka ni Jehova? Kon amo, nagpapakita ito nga gintitipigan mo nga maopay an kondisyon han imo taming han pagtoo.

5. Ano an bangin madiskobrehan mo kon uusisahon mo an imo pagtoo?

⁵ Bangin mahipausa ka ha imo mahibabaroan kon uusisahon mo hin maopay an imo pagtoo. Posible nga may madiskobrehan ka nga mga kaluyahan nga diri mo napapansin hadto. Pananglitan, bangin masantop mo nga an sobra nga kabaraka, kabuwaan, ngan panluya ha emosyon nakadaot na han imo pagtoo. Kon nahitabo ini ha imo, ano an imo mahimo buhaton basi diri na madugangan an kadaot han imo pagtoo?

6. Ano an pipira han mag-opay nga kabaraka?

⁶ May mga kabaraka nga maopay. Pananglitan, angay la nga mabaraka kita kon paonan-o mapapalipay hi Jehova ngan hi Jesus. (1 Cor. 7:32) Kon nakasala kita hin seryoso, nababaraka kita kon paonan-o maibabalik an aton pakigsangkay ha Dios. (Sal. 38:18) Nababaraka liwat kita kon paonan-o mapapalipay an aton asawa ngan maaasikaso an aton pamilya ngan mga igkasi-tumuroo.​—1 Cor. 7:33; 2 Cor. 11:28.

7. Sumala ha Proberbios 29:25, kay ano nga diri kita angay mahadlok ha tawo?

⁷ Ha luyo nga bahin, an sobra nga kabaraka puydi makadaot han aton pagtoo. Pananglitan, bangin pirme kita nagkikinabaraka mahitungod ha aton kakaunon ngan igbabado. (Mat. 6:31, 32) Basi maibanan ito nga kabaraka, bangin magpokus kita ha pagkab-ot hin materyal nga mga butang. Bangin magkaada pa ngani kita gugma ha kwarta. Kon papasagdan naton nga mahitabo ito, magluluya an aton pagtoo kan Jehova ngan madadaot an aton relasyon ha iya. (Mar. 4:19; 1 Tim. 6:10) O bangin mabiktima kita ha usa pa nga klase han sobra nga kabaraka​—an pagkinabaraka kon paonan-o magkakaada han pag-uyon han iba. Tungod hito bangin mas mahadlok kita ha pagtamay o pagtimaraot han mga tawo imbes nga mahadlok nga mapasubo hi Jehova. Basi maproteksyonan an aton kalugaringon tikang hito, kinahanglan makimalooy kita kan Jehova nga tagan kita han pagtoo ngan kaisog nga aton kinahanglan basi diri kita mahadlok ha tawo.​—Basaha an Proberbios 29:25; Luc. 17:5.

8. Ano an angay naton buhaton kon may mag-istorya ha aton hin kabuwaan?

⁸ Ginagamit ni Satanas nga “amay han kabuwaan,” adton mga kontrolado niya basi magpasamwak hin kabuwaan mahitungod kan Jehova ngan ha aton kabugtoan. (Juan 8:44) Pananglitan, an mga apostata nagpupublikar hin kabuwaan ngan nagbabaliko han kamatuoran mahitungod ha organisasyon ni Jehova dida ha mga website ngan pinaagi ha telebisyon ngan iba pa nga klase han media. Ito nga kabuwaan kaapi han mga “naglalaga nga pana” ni Satanas. (Efe. 6:16) Ano an angay naton buhaton kon  may mag-istorya ha aton han sugad nga kabuwaan? Diri kita mamamati ha ira! Kay ano? Kay may pagtoo kita kan Jehova ngan natapod kita ha aton kabugtoan. Ngani, diri gud kita makikigkomunikar ha mga apostata. Diri gud naton tutugotan an bisan hin-o o an bisan ano, pati an aton pagkamausisa, nga mag-aghat ha aton nga makigdiskusyon ha ira.

9. Ano an mahimo magin epekto ha aton han panluya ha emosyon?

⁹ An panluya ha emosyon mahimo magpaluya han aton pagtoo. Diri naton angay igbalewaray an aton mga problema. Ngani, magigin iresponsable kita kon bubuhaton naton ito. Ngan usahay nanluluya an aton emosyon tungod han mga problema. Pero kinahanglan diri an problema na la an aton paghinunahunaon. Kay kon ito an aton bubuhaton, mahimo naton makalimtan an mag-opay nga saad ha aton ni Jehova. (Pah. 21:3, 4) Katapos, an panluya ha emosyon mahimo makaubos han aton kusog ngan magpaundang ha aton ha pag-alagad. (Prob. 24:10) Pero diri ito angay mahitabo ha aton.

10. Ano an imo nahibaroan ha surat han usa nga sister?

¹⁰ Tagda kon paonan-o ginmimintinar han usa nga sister nga taga-Estados Unidos an iya pagtoo samtang nag-aataman ha iya bana nga may grabe nga sakit. Ha iya surat ha headquarters, hiya nagsiring: “Usahay, nakakaistres ngan nakakapaluya ha emosyon an amon sitwasyon, pero marig-on an amon paglaom. Mapasalamaton gud ako ha mga impormasyon nga nagpaparig-on han amon pagtoo ngan nakakadasig ha amon. Kinahanglan gud namon ini nga sagdon ngan pagparig-on. Nabulig ito ha amon nga makapadayon ngan makaya an mga problema nga ginagamit ni Satanas ha pagpaluya ha amon.” Ha ginsiring hini nga sister, nahibaroan naton nga malalamposan naton an panluya ha emosyon! Paonan-o? Hunahunaa an imo mga problema sugad nga pagsari tikang kan Satanas. Hinumdumi nga hi Jehova an gintitikangan han pagliaw. Ngan apresyara an espirituwal nga pagkaon nga iya iginhahatag.

11. Basi mahibaroan an kondisyon han aton pagtoo, ano an angay naton igpakiana ha aton kalugaringon?

¹¹ May parte ba han imo taming han pagtoo nga kinahanglan mintinaron? Ha naglabay nga mga bulan, nalikyan mo ba an pagkinabaraka hin sobra? Nalikyan mo ba an pagpamati ngan pakigdiskusyon  ha mga apostata mahitungod ha kabuwaan nga ira ginpapasamwak? Ngan nalamposan mo ba an panluya ha emosyon? Kon amo, maopay an kondisyon han imo pagtoo. Pero kinahanglan magin mabinantayon kita kay may iba pa nga armas hi Satanas nga ginagamit ha aton. Hisgotan naton an usa hito.

12. Ano an mahimo magin epekto ha aton han materyalismo?

¹² An materyalismo mahimo magin hinungdan nga mawara an aton pokus ngan mapabay-an an aton taming han pagtoo. Hi apostol Pablo nagsiring: “Waray tawo nga nagsiserbisyo sugad nga sundalo an nasulod ha mga negosyo hini nga kinabuhi, basi makarawat an pag-uyon han naglista ha iya.” (2 Tim. 2:4) Ha pagkamatuod, an Romano nga kasundalohan diri puydi magkaada iba nga trabaho. Ano an mahimo mahitabo kon diri susundon han sundalo ito nga restriksyon?

13. Kay ano nga an sundalo diri angay magnegosyo?

¹³ Hunahunaa ini nga kahimtang. Usa ka grupo hin mga sundalo an nagpapraktis ha aga ha paggamit han ira espada, pero waray dida an usa ha ira. Ini nga usa nga sundalo aadto ha merkado nagbabaligya hin pagkaon. Ha gab-i, gin-uusisa han mga sundalo an ira mga gamit pan-girra ngan ginbabaid an ira espada. Pero an sundalo naman nga nagbabaligya hin pagkaon okupado ha pag-andam han iya ibabaligya kinabuwasan. Kondi pagkabuwas han aga, tigda nga inatake an mga kaaway. Hain hini nga mga sundalo an posible nga magigin andam ha pakig-away ngan makakapalipay ha iya kumander? Ngan hin-o an karuyag mo magin sapit​—an sundalo nga andam o an usa nga nagin okupado ha iba nga butang?

14. Sugad nga mga sundalo han Kristo, ano an importante ha aton?

¹⁴ Pariho hiton mag-opay nga sundalo, nakapokus kita ha aton nangunguna nga tumong​—an pagpalipay han aton mga Kumander, hi Jehova ngan an Kristo. Para ha aton, mas importante ito kay han bisan ano nga igintatanyag ha aton han kalibotan ni Satanas. Ginsisiguro naton nga may-ada kita han ginkikinahanglan nga panahon ngan kusog basi makag-alagad kan Jehova ngan matipigan nga maopay an kondisyon han aton taming han pagtoo ngan iba pa nga espirituwal nga gamit pan-girra.

15. Ano an iginpahamangno ha aton ni Pablo, ngan kay ano?

 ¹⁵ Kinahanglan magin mabinantayon kita! Kay ano? Hi apostol Pablo nagpahamangno nga “an mga determinado magin riko” ‘maisisimang tikang ha pagtoo.’ (1 Tim. 6:9, 10) An pulong nga ‘maisisimang’ nagpapakita nga mahimo mawara an aton pokus tungod han paningkamot nga magkaada han mga butang nga diri man naton kinahanglan. Sugad nga resulta, mahimo tumubo ha aton kasingkasing an “damu nga linurong ngan nakakadaot nga mga hingyap.” Imbes nga pasagdan ha aton kasingkasing ito nga mga hingyap, kinahanglan hunahunaon naton nga mga armas ito ni Satanas nga makakadaot ha aton.

16. An asoy ha Marcos 10:17-22 sadang magpagios ha aton nga pamalandungon an ano nga mga pakiana?

¹⁶ Sidngon naton nga may kwarta kita nga maipapalit hin damu nga materyal nga butang. Sayop ba kon mapalit kita hin mga butang nga aton karuyag pero diri man naton kinahanglan? Diri man. Pero hunahunaa ini nga mga pakiana: Bisan kon kaya naton paliton an usa nga butang, may panahon ngan kusog gud ba kita ha paggamit ngan pagmintinar hito? Posible ba liwat nga sobra nga higugmaon naton an aton panag-iya? An aton ba gugma ha materyal nga butang mahimo mag-aghat ha aton nga subaron an ginbuhat han batan-on nga lalaki nga waray kumarawat han imbitasyon ni Jesus nga pauswagon an iya  pag-alagad ha Dios? (Basaha an Marcos 10:17-22.) Mas maopay gud nga magkinabuhi hin simple ngan gamiton an aton presyoso nga panahon ngan kusog ha pagbuhat han kaburut-on han Dios!

17. Ano an diri naton angay hingalimtan?

¹⁷ Diri gud naton angay hingalimtan nga aada kita ha girra ngan kinahanglan andam kita ha pakig-away kada adlaw. (Pah. 12:17) Diri puydi nga an aton kabugtoan an magdara han aton taming han pagtoo para ha aton. Kinahanglan kita mismo an kumapot hito hin marig-on.

18. Ha kadaan nga panahon, kay ano nga ginkakaptan hin marig-on han mga sundalo an ira taming?

¹⁸ Ha kadaan nga panahon, ginpapasidunggan an usa nga sundalo tungod han iya pagin maisugon ha girra. Pero kaarawdan ha iya kon umuli hiya nga waray an iya taming. An Romano nga historyador nga hi Tacitus nagsurat: “Kon mabayaan han usa an iya taming, daku ito nga kaarawdan.” Usa ito nga rason kon kay ano nga ginsisiguro han mga sundalo nga makaptan nira hin marig-on an ira taming.

19. Paonan-o naton makakaptan hin marig-on an aton taming han pagtoo?

¹⁹ Ginkakaptan naton hin marig-on an aton taming han pagtoo pinaagi ha regular nga pagtambong ha Kristiano nga mga katirok ngan pagsumat ha iba mahitungod han ngaran ni Jehova ngan han iya Ginhadian. (Heb. 10:23-25) Dugang pa, nagbabasa kita han Biblia kada adlaw ngan nag-aampo han bulig ni Jehova nga maiaplikar an sagdon ngan giya hito. (2 Tim. 3:16, 17) Kon bubuhaton naton ito, waray armas hi Satanas nga makakadaot ha aton hin permanente. (Isa. 54:17) An aton “daku nga taming han pagtoo” magpuproteksyon ha aton. Matindog kita hin marig-on ngan mag-aalagad kaupod han aton kabugtoan. Magdadaog kita ha aton mga pakig-away kada adlaw. Ngan labaw ha ngatanan, magkakaada kita pribilehiyo ha pagin dapig kan Jesus kon magdaog na hiya ha girra kontra kan Satanas ngan ha iya mga sumurunod.​—Pah. 17:14; 20:10.