1. Gintutugotan kita ni Jehova nga buhaton an ano?

GINTUTUGOTAN kita ni Jehova nga magpili han karuyag naton nga pagkinabuhi. Gintututdoan kita niya ha paghimo hin mag-opay nga desisyon, ngan ginbubuligan kita niya nga maglampos kon nakakapalipay ha iya an aton desisyon. (Sal. 119:173) Samtang mas gin-aaplikar naton an kinaadman han Pulong han Dios, mas nakakahimo kita hin mag-opay nga desisyon.​—Heb. 5:14.

2. Ano nga problema an bangin atubangon naton katapos naton maghimo hin desisyon?

² Pero bisan kon maopay an aton desisyon, bangin makurian kita nga tapuson an aton gintikangan pagbuhat. Tagda an pipira nga ehemplo: Usa nga batan-on nga brother an nagdesisyon nga basahon an bug-os nga Biblia. Nahimo niya ito hin pipira ka semana, pero inundang hiya. Usa nga sister an nagdesisyon nga magregular payunir pero pirme niya gindidelatar an iya pagtikang. Usa nga lawas han mga tigurang an urosa nga nagdesisyon nga mas magin aktibo ha pag-shepherding, pero linabay na an damu ka bulan, waray pa gihapon ito mahihimo. Iba-iba ini nga mga sitwasyon, pero may-ada ini ginkakaparihoan. Waray matuman ito nga mga desisyon. An siyahan-siglo nga mga Kristiano ha Corinto inatubang hin pariho nga problema. Hisgotan naton kon ano an aton mahibabaroan tikang ha ira.

3. Ano nga desisyon an ginhimo han mga taga-Corinto, pero ano an nahitabo?

³ Han mga 55 C.E., naghimo hin importante nga desisyon an mga taga-Corinto. Nahibaroan nira nga nagkukuri an kabugtoan ha Jerusalem ngan Judea ngan an iba nga mga kongregasyon nagkukolekta hin kwarta para bumulig. Tungod han pagkabuotan ngan pagkamahinatagon, nagdesisyon an mga taga-Corinto nga magdonar ngan nagpakiana hira kan apostol Pablo kon paonan-o hira makakabulig. Nagpadara hiya hin instruksyon hito nga kongregasyon ngan ginpili hi Tito basi bumulig ha pagkolekta. (1 Cor. 16:1; 2 Cor. 8:6) Pero paglabay hin pipira ka bulan, hinbaroan ni  Pablo nga waray pa magdonar an mga taga-Corinto. Salit, posible nga diri pa andam an ira bulig ha panahon nga dadad-on na ito ha Jerusalem kaupod han mga donasyon han iba nga mga kongregasyon.​—2 Cor. 9:4, 5.

4. Sumala ha 2 Corinto 8:7, 10, 11, gindasig ni Pablo an mga taga-Corinto nga buhaton an ano?

⁴ An mga taga-Corinto naghimo hin maopay nga desisyon, ngan ginkumendasyonan hira ni Pablo tungod han ira marig-on nga pagtoo ngan hingyap nga maghatag. Pero kinahanglan liwat niya hira dasigon nga tapuson an ira gintikangan pagbuhat. (Basaha an 2 Corinto 8:7, 10, 11.) An ira eksperyensya nagtututdo ha aton nga bisan an matinumanon nga mga Kristiano mahimo makurian pagtuman han ira maopay nga desisyon.

5. Ano nga mga pakiana an aton babatunon?

⁵ Pariho ha mga taga-Corinto, mahimo kita makurian ha pagtuman han aton mga desisyon. Kay ano? Tungod kay diri kita perpekto, bangin langanon naton an pagbuhat hito. O bangin an diri ginlalaoman nga panhitabo magpakuri ha aton ha pagtuman han aton desisyon. (Ecles. 9:11; Roma 7:18) Paonan-o naton rirepasuhon an usa nga desisyon ngan mahibabaroan kon kinahanglan ba ito bag-uhon? Ngan paonan-o naton masisiguro nga matatapos naton an aton gintikangan pagbuhat?

6. Ha ano nga sitwasyon bangin kinahanglan bag-uhon an usa nga desisyon?

⁶ May importante nga mga desisyon nga diri gud naton karuyag bag-uhon. Pananglitan, gintutuman naton an aton desisyon nga mag-alagad kan Jehova, ngan determinado kita nga magin matinumanon ha aton asawa. (Mat. 16:24; 19:6) Pero may iba nga desisyon nga bangin kinahanglan naton bag-uhon. Kay ano? Kay nagbabag-o an mga kahimtang. Ano nga mga pitad an mabulig ha aton nga makahimo, kon posible, han pinakamaopay nga desisyon?

7. Ano an angay naton ig-ampo, ngan kay ano?

⁷ Pag-ampo para hin kinaadman. Gin-giyahan ni Jehova hi Santiago nga magsurat: “Kon may bisan hin-o ha iyo nga kulang hin kinaadman, padayon nga mangaro hiya ha Dios, kay hura nga nahatag hiya ha ngatanan.” (San. 1:5) Ha pipira nga paagi, kita ngatanan “kulang hin kinaadman.” Salit sarig kan Jehova kon naghihimo hin desisyon ngan kon kinahanglan bag-uhon an imo desisyon. Kon bubuhaton mo ito, bubuligan ka ni Jehova nga makagdesisyon hin maaramon.

8. Ano nga pagsaliksik an kinahanglan buhaton antes maghimo hin desisyon?

⁸ Pagsaliksik hin maopay. Konsultaha an Pulong han Dios, basaha an mga publikasyon han organisasyon ni Jehova, ngan pakiistorya ha mga tawo nga makakahatag ha imo hin maaramon nga sagdon. (Prob. 20:18) An sugad nga pagsaliksik importante antes maghimo hin desisyon may kalabotan ha pagbag-o hin trabaho, pagbalhin hin lugar, o pagpili hin angayan nga edukasyon nga mabulig ha pagsuporta han imo ministeryo.

9. Paonan-o kita magpapahimulos kon tangkod kita ha aton kalugaringon?

⁹ Usisaha an imo mga motibo. Importante kan Jehova an aton motibo. (Prob. 16:2) Karuyag niya nga magin tangkod kita ha ngatanan nga butang. Salit kon naghihimo kita hin desisyon, karuyag liwat naton magin tangkod ha aton kalugaringon ngan ha iba may kalabotan ha aton motibo. Kon diri kita tangkod, posible nga makurian kita pagtuman han aton desisyon. Pananglitan, bangin magdesisyon an usa nga batan-on nga brother nga magregular payunir. Pero paglabay hin pipira ka panahon, nakurian hiya pag-abot han kinahanglan nga oras ngan nawara an iya kalipay ha ministeryo. Bangin kahuna niya nga an iya motibo ha pagpayunir amo an iya hingyap nga mapalipay hi Jehova. Pero posible ba nga an iya tinuod nga motibo amo an hingyap nga mapalipay an iya mga kag-anak o an iba nga tawo?

10. Ano an ginkikinahanglan basi makahimo hin mga pagbag-o?

 ¹⁰ Tagda an sitwasyon han usa nga estudyante ha Biblia nga nagdesisyon nga umundang pagsigarilyo. Ha tinikangan, bisan kon nakurian hiya, nahimo niya ito hin usa o duha ka semana, pero nadara hiya utro han hingyap nga magsigarilyo. Pero ha urhi, naglampos hiya! An iya gugma kan Jehova ngan an iya hingyap nga lipayon Hiya nakabulig ha iya nga maiundang an iya bisyo.​—Col. 1:10; 3:23.

11. Kay ano nga kinahanglan may-ada ka espisipiko nga mga tumong?

¹¹ Magin espisipiko. Kon espisipiko an imo tumong, daku an posibilidad nga matapos mo an imo gintikangan pagbuhat. Pananglitan, nagdesisyon ka nga basahon hin regular an Biblia. Pero kon waray ka espisipiko nga eskedyol, bangin diri mo makab-ot an imo tumong. * O bangin magdesisyon an mga tigurang ha kongregasyon nga magin mas aktibo ha pag-shepherding, pero linabay an pipira ka panahon, waray nira ito matuman. Basi maglampos, mahimo nira tagdon ini nga mga pakiana: “May lista na ba kita kon hin-o nga kabugtoan an mahimo magpahimulos han aton pagbisita? May eskedyol na ba kita ha pagbisita ha ira?”

12. Ano an bangin kinahanglan naton buhaton, ngan kay ano?

¹² Magin reyalistiko. Waray usa ha aton an may-ada han panahon, panag-iya, o kusog ha pagbuhat han ngatanan naton nga karuyag. Salit magin reyalistiko ngan makatadunganon. Kon kinahanglan, mahimo mo bag-uhon an imo desisyon nga diri mo kaya matuman. (Ecles. 3:6) Pero sidngon naton nga ginrepaso mo na an usa nga desisyon, ginbag-o na ito, ngan inaabat mo nga kaya mo na ito tumanon. Tagda an lima nga pitad nga mabulig ha imo nga matapos an imo gintikangan pagbuhat.

13. Paonan-o ka magkakaada han kusog nga imo kinahanglan ha pagtuman han imo desisyon?

¹³ Pag-ampo para hin kusog ha pagbuhat. Mahimo ka tagan han Dios hin “gahum ha pagbuhat” ngan pagtuman han imo desisyon. (Fil. 2:13) Salit pangaro han baraan nga espiritu ni Jehova basi magkaada ka han kusog nga imo kinahanglan. Padayon nga mag-ampo bisan kon baga hin diri dayon ito ginbabaton. Hi Jesus nagsiring: “Padayon nga mangaro, ngan tatagan kamo [hin baraan nga espiritu].”​—Luc. 11:9, 13.

14. Paonan-o an prinsipyo ha Proberbios 21:5 mabulig ha imo nga matuman an imo desisyon?

¹⁴ Paghimo hin plano. (Basaha an Proberbios 21:5.) Para matapos an usa nga proyekto nga imo gintikangan, kinahanglan maghimo ka hin plano. Katapos, kinahanglan sundon mo ito nga plano. Sugad man, kon naghihimo ka hin desisyon, ilista an espisipiko nga mga pitad nga imo susundon basi matuman ito nga desisyon. Magigin mas masayon an paghibaro han imo pag-uswag kon an dagku nga buruhaton babahinbahinon mo ha gudti nga buruhaton. Gindasig ni Pablo an mga taga-Corinto nga maglain hin ira iaamot “ha siyahan nga adlaw han kada semana” imbes nga tigda nga kolektahon ito ha iya pag-abot. (1 Cor. 16:2) An pagbahinbahin han dagku nga buruhaton ngadto ha gudti nga buruhaton mabulig liwat nga malikyan an pag-abat nga diri mo kaya.

15. Katapos maghimo hin plano, ano an puydi mo buhaton?

¹⁵ Kon isusurat mo an imo mga plano buhaton, magigin mas masayon an pagtuman hito. (1 Cor. 14:40) Pananglitan, an mga lawas han mga tigurang gintagan hin instruksyon nga magtoka hin tigurang nga magsusurat han tagsa nga desisyon han lawas han mga tigurang, upod na kon hin-o an gintokahan ngan kon san-o ito tatapuson. An mga tigurang nga nasunod hini nga instruksyon mas daku an posibilidad nga makatuman han ira  desisyon. (1 Cor. 9:26) Puydi ka liwat maghimo hin sugad hito ha imo personal nga mga buruhaton. Pananglitan, puydi ka maghimo hin lista han adlaw-adlaw mo nga buruhaton ngan ihan-ay ito uyon ha kon ano an imo prayoridad. Makakabulig ini ha imo nga matapos an imo gintikangan ngan mas damu an imo mabuhat ha halipot nga panahon.

16. Ano an kinahanglan buhaton basi matuman mo an imo desisyon, ngan paonan-o ini ginpapabug-atan han Roma 12:11?

¹⁶ Paningkamot gud. Kinahanglan an paningkamot basi masunod an imo plano ngan matapos an imo gintikangan pagbuhat. (Basaha an Roma 12:11.) Ginsidngan ni Pablo hi Timoteo nga ‘padayon nga buhaton an iya gimaopayi’ ngan maningkamot nga magin mas maopay nga magturutdo. Ito nga sagdon aplikado liwat ha iba nga espirituwal nga mga tumong.​—1 Tim. 4:13, 16.

17. Paonan-o naton maiaaplikar an Efeso 5:15, 16 basi matuman naton an aton desisyon?

¹⁷ Gamita hin maaramon an imo panahon. (Basaha an Efeso 5:15, 16.) Pagpili hin panahon ha pagtuman han imo desisyon ngan sunda gud ito. Likyi an paghinulat han perpekto nga panahon ha pagbuhat hito; posible gud nga diri umabot ito nga perpekto nga panahon. (Ecles. 11:4) Pagbantay nga diri maubos han mga butang nga diri sugad kaimportante an panahon ngan kusog nga imo ginkikinahanglan para ha mas importante nga mga butang. (Fil. 1:10) Kon posible, pagpili hin panahon diin gutiay la an mga disturbo. Pahibaroa an iba nga kinahanglan mo magpokus. Mahimo mo parungon an imo celfon ngan kitaon an imo mga e-mail o social media katapos han imo ginbubuhat. *

18-19. Ano an makakabulig ha imo nga diri umundang ha pagtuman han imo desisyon bisan kon diri masayon an pagbuhat hito?

¹⁸ Pagpokus ha resulta. An resulta han imo desisyon pariho ha destinasyon han usa nga pagbiyahe. Kon karuyag mo gud makaabot ha imo destinasyon, magpapadayon ka ha pagbiyahe bisan kon kinahanglan mo mag-iba hin ruta tungod kay sarado an usa nga kalsada. Ha pariho nga paagi, kon magpupokus kita ha resulta han aton mga desisyon, diri dayon kita maundang bisan kon umatubang kita hin mga ulang o kon kinahanglan kita mag-iba hin ruta, siring pa.​—Gal. 6:9.

¹⁹ Diri masayon an paghimo hin mag-opay nga desisyon, ngan usahay makuri an pagtuman hito. Pero ha bulig ni Jehova, magkakaada ka han kinaadman ngan kusog nga imo kinahanglan basi matapos mo an imo gintikangan pagbuhat.