1. Paonan-o an tulo nga Saksi ni Jehova nga gin-unabi ha parapo nagpabilin nga maunungon kan Jehova?

HUNAHUNAA an sitwasyon hinin tulo nga Saksi ni Jehova. (1) Usa nga bata nga babaye an nakada ha eskwelahan han gin-aghat han titser an ngatanan nga estudyante nga makigbahin ha usa nga selebrasyon. An bata maaram nga ini nga selebrasyon diri nakakapalipay ha Dios, salit matinalahuron nga nagdumiri hiya. (2) Usa nga awdanon nga batan-on nga lalaki an nagsasangyaw ha balay-balay. Nasabtan niya nga kaeskwela niya an naukoy ha sunod nga balay, ngan gintitinamay hini nga iya kaeskwela an mga Saksi ni Jehova. Pero nagpadayon la gihapon hiya ngadto hito nga balay ngan nagtuktok. (3) Usa nga lalaki an maduruto nga nagtatrabaho basi makagtagana ha iya pamilya, pero usa ka adlaw ginhangyo hiya han iya agaron nga maglimbong o magbuhat hin ilegal. Bisan kon mahimo hiya matanggal ha iya trabaho, iginsaysay niya nga kinahanglan hiya magin tangkod ngan sumunod ha balaud kay ito an sugo han Dios ha Iya mga surugoon.​—Roma 13:1-4; Heb. 13:18.

2. Ano nga mga pakiana an aton hihisgotan, ngan kay ano?

² Ano nga kalidad an imo nakita hinin tulo nga indibiduwal? Bangin may nakita ka nga pipira nga kalidad, sugad han kaisog ngan pagin tangkod. Pero iginpakita nira an usa nga kalidad nga importante gud—an integridad. Hira nga tulo nagpakita hin pagkamaunungon kan Jehova. An tagsa ha ira nagdumiri nga ikompromiso an mga suruklan han Dios. An integridad nagpagios hini nga mga indibiduwal nga buhaton an ira ginbuhat. Sigurado nga nalipay gud hi Jehova ha tagsa ha ira tungod ha pagpakita hito nga kalidad. Karuyag liwat naton mapalipay an aton langitnon nga Amay. Salit, hisgotan naton ini nga mga pakiana: Ano an integridad? Kay ano nga kinahanglan naton an integridad? Ngan paonan-o naton mapaparig-on an aton determinasyon nga tipigan an aton integridad durante hinin makuri nga panahon?

3. (a) Ano an integridad? (b) Ano nga mga ehemplo an makakabulig ha aton nga masabtan an kahulogan han integridad?

³ Kon an integridad ginagamit para ha aton nga mga surugoon  han Dios, nangangahulogan ito hin bug-os-kasingkasing nga gugma ngan marig-on gud nga debosyon kan Jehova sugad nga Persona, nga tungod hito gin-uuna naton an iya kaburut-on ha ngatanan naton nga desisyon. Tagda inin pipira nga impormasyon. Ha Biblia, an pulong nga iginhubad nga “integridad” nangangahulogan hin kompleto, mahimsog, o bug-os. Pananglitan, an mga Israelita naghahalad hin mga hayop para kan Jehova, ngan an Balaud nagsiring nga an mga hayop kinahanglan mahimsog. * (Leb. 22:21, 22) Diri gintutugotan an katawohan han Dios nga maghalad hin hayop nga kulang hin tiil, talinga, o mata; diri liwat hira puydi maghalad hin masakiton. Importante kan Jehova nga an hayop kompleto, mahimsog, o bug-os. (Mal. 1:6-9) Masasabtan naton kon kay ano nga importante kan Jehova an pagin mahimsog o pagin kompleto. Kon may ginpapalit kita, prutas man ito, libro, o garamiton, diri naton karuyag nga may buho ito o may kulang nga parte. Karuyag naton an kompleto, waray depekto, o bug-os. Ito liwat an inaabat ni Jehova ha aton iginpapakita nga gugma ngan pagkamaunungon ha iya. Kinahanglan nga kompleto o bug-os ito.

4. (a) Kay ano nga an diri perpekto nga tawo mahimo magkaada integridad? (b) Sumala ha Salmos 103:12-14, ano an ginlalaoman ha aton ni Jehova?

⁴ Sadang ba kita maghunahuna nga kinahanglan naton magin perpekto basi magkaada integridad? Aw, bangin abaton naton nga nakakabuhat kita hin damu nga sayop, o salaan pa ngani kita. Tagda an duha nga rason kon kay ano nga diri kita angay mahadlok. Siyahan, diri nagpupokus hi Jehova ha aton mga sayop. An iya Pulong nasiring: “Kon imo panginanoon, O Jehova, an mga karat-an, O Ginoo, hin-o pa in matindog?” (Sal. 130:3) Maaram hiya nga diri kita perpekto ngan makasasala kita, pero hura nga nagpapasaylo hiya ha aton. (Sal. 86:5) Ikaduha, maaram hi Jehova han aton mga limitasyon, ngan diri hiya naglalaom hin labaw kay han aton mahihimo. (Basaha an Salmos 103:12-14.) Kon sugad, ha ano nga paagi kita mahimo magin kompleto o bug-os ha iya paniplatan?

5. Para ha mga surugoon ni Jehova, kay ano nga kinahanglan an gugma basi magkaada integridad?

⁵ Para ha mga surugoon ni Jehova, kinahanglan an gugma basi magkaada integridad. An aton gugma ha Dios ngan maunungon nga debosyon ha iya sugad nga aton langitnon nga Amay kinahanglan magpabilin nga kompleto o bug-os. Kon nagpapabilin nga sugad hito an aton gugma bisan kon ginsasarihan kita, karuyag sidngon, may-ada kita integridad. (1 Kron. 28:9; Mat. 22:37) Hunahunaa utro an tulo nga Saksi nga gin-unabi kanina. Kay ano nga amo adto an ira ginbuhat? Nadiri ba an bata nga babaye nga magin malipayon ha eskwelahan, o karuyag ba han batan-on nga lalaki nga maalohan ha purtahan, o karuyag ba han pamilyado nga lalaki nga mawad-an hin trabaho? Diri. Lugod, maaram hira nga may magtadong nga suruklan hi Jehova, ngan nakapokus an ira hunahuna ha pagpalipay han ira langitnon nga Amay. An ira gugma ha iya nagpapagios ha ira nga hunahunaon hiya pirme antes magdesisyon. Hini nga paagi, iginpapakita nira nga may integridad hira.

6. (a) Kay ano nga kinahanglan mo an integridad? (b) Paonan-o napakyas hira Adan ngan Eva ha pagpakita han integridad?

⁶ Kay ano nga kinahanglan naton ngatanan an integridad? Kinahanglan mo an integridad kay gin-aayat ni Satanas hi Jehova, ngan gin-aayat ka liwat niya. Ito nga rebelyoso nga anghel naghimo han iya kalugaringon nga Satanas, o “Parakontra,” didto ha hardin han Eden. Ginpakaraot niya an maopay nga ngaran ni Jehova; sugad hin nasiring hiya nga maraot, makikalugaringon, ngan buwaon nga Magmarando hi Jehova. Makasurubo, dinapig hira Adan ngan Eva kan Satanas ha pagrebelde kan Jehova. (Gen. 3:1-6) An ira  pag-ukoy ha Eden naghatag ha ira hin damu gud nga higayon nga parig-unon an ira gugma kan Jehova. Pero han ginsulay hira ni Satanas, an ira gugma diri kompleto o diri bug-os. Usa pa nga isyu an bumangon: May-ada ba tawo nga magpapabilin nga maunungon kan Jehova tungod han gugma ha iya? Ha iba nga pagkayakan, may kapas ba an tawo nga magpakita hin integridad? Ini nga isyu iginbangon ha kahimtang ni Job.

7. Sugad han iginpapakita han Job 1:8-11, ano an inabat ni Jehova ngan ano liwat an inabat ni Satanas mahitungod ha integridad ni Job?

⁷ Nagkinabuhi hi Job ha panahon nga nakadto an mga Israelita ha Ehipto. Waray kapariho an iya integridad ha iya panahon. Pariho ha aton, diri hiya perpekto. Nakabuhat hiya hin mga sayop. Bisan pa hito, hinigugma ni Jehova hi Job tungod han iya integridad. Posible nga gintitinamay na ni Satanas hi Jehova mahitungod han integridad han tawo. Salit gin-unabi ni Jehova hi Job kan Satanas. An pagkinabuhi ni Job nagpamatuod nga buwaon hi Satanas! Ginsidngan ni Satanas hi Jehova nga sarihan an integridad ni Job. Nasarig hi Jehova ha iya sangkay nga hi Job, salit gintugotan niya hi Satanas nga sarihan hi Job.​—Basaha an Job 1:8-11.

8. Paonan-o gin-atake ni Satanas hi Job?

⁸ Maraot gud hi Satanas, ngan usa hiya nga parapamatay. Ginkuha niya an ngatanan nga panag-iya ni Job, ginpamatay an iya mga uripon, ngan gindaot an iya reputasyon. Gin-atake niya an pamilya ni Job, ginpamatay an iya napulo nga hinigugma nga anak. Katapos, gin-atake niya an lawas ni Job pinaagi ha pagpahinabo nga magkaada hiya mangutngot nga mga hubag tikang ha ulo tubtob ha tiil. An iya asawa desperado ngan duro an kasubo; gin-aghat niya hi Job nga diri na magtipig han iya integridad, nga igsumpa an Dios ngan mamatay na la. Bisan kon naghingyap hi Job nga mamatay na la, gintipigan la gihapon niya an iya integridad. Katapos, nagsari hi Satanas  hin iba nga pamaagi ha pag-atake. Gin-gamit niya an tulo nga sangkay ni Job. Ginbisita hi Job hini nga kalalakin-an hin pipira ka adlaw, pero waray hira makaghatag hin pagliaw. Lugod, waray kalooy nga ginsaway ngan ginbusaan nira hiya. Nagsiring hira nga an Dios an nagpahinabo han iya kasakitan ngan diri importante ha Dios an iya integridad. Nagsiring pa ngani hira nga maraot nga tawo hi Job ngan angay la ha iya an magpakangingirhat nga nahitatabo ha iya!​—Job 1:13-22; 2:7-11; 15:4, 5; 22:3-6; 25:4-6.

9. Bisan kon inatubang hi Job hin makuri gud nga sitwasyon, ano an waray niya buhata?

⁹ Ano an nagin reaksyon ni Job hini ngatanan nga kasakitan? Diri hiya perpekto. Nasisina nga ginsaway niya an iya diri tinuod nga mga paraliaw, ngan aminado hiya nga may nayakan hiya nga waray anay niya hunahunaa. Mas gindepensahan niya an iya pagkamatadong imbes nga an kanan Dios. (Job 6:3; 13:4, 5; 32:2; 34:5) Kondi, bisan kon makuri gud an sitwasyon ni Job, waray hiya bumaya kan Jehova nga Dios. Waray hiya tumuod ha kabuwaan han iya diri tinuod nga kasangkayan. Hiya nagsiring: “Ipaharayo ha akon nga pagmatadongon ko ikaw: Ngada han akon kamatay diri ko isasalikway tikang ha akon an akon pagkamaligdong [o, integridad].” (Job 27:5) Iginpapakita hini nga determinado hi Job nga tipigan an iya integridad anoman an mahitabo. Nahimo ito ni Job; mahihimo liwat naton ito.

10. Paonan-o ka nahidadabi ha isyu nga iginbangon ni Satanas mahitungod kan Job?

¹⁰ Paonan-o ka nahidadabi ha isyu nga iginbangon ni Satanas mahitungod kan Job? Pariho hito an akusasyon ni Satanas ha kada tagsa ha aton. Sugad hin nasiring hiya nga diri mo tinuod nga hinigugma hi Jehova nga Dios, nga maundang ka ha pag-alagad ha iya basi talwason an imo kalugaringon, ngan diri mo titipigan an imo integridad! (Job 2:4, 5; Pah. 12:10) Ano an imo inaabat mahitungod hito? Masakit gud ito, diri ba? Pero, hunahunaa ini: Daku an pagsarig ni Jehova ha imo salit gintatagan ka niya hin makaruruyag nga oportunidad. Gintutugotan ni Jehova hi Satanas nga sarihan an imo integridad. Nasarig hi Jehova nga matitipigan mo an imo integridad ngan makakabulig ka ha pagpamatuod nga buwaon hi Satanas. Ngan nagsasaad hiya nga bubuligan ka niya basi mahimo ito. (Heb. 13:6) Daku gud nga pribilehiyo nga taporan han Soberano han uniberso! Nakikita mo ba kon kay ano nga importante gud an integridad? Pinaagi hini mapapamatud-an naton nga buwaon hi Satanas, madidepensahan an maopay nga ngaran han aton Amay, ngan masusuportaran an iya paagi han pagmando. Ano an mahimo naton buhaton basi matipigan an aton integridad?

11. Ano an aton mahibabaroan ha ehemplo ni Job?

¹¹ Mas ginpapakusog ni Satanas an iya mga pag-atake durante hinin masamok nga “kataposan nga mga adlaw.” (2 Tim. 3:1) Hinin maraot nga panahon, paonan-o naton mapaparig-on an aton determinasyon nga tipigan an aton integridad? Mahitungod hini, may mahibabaroan kita ha ehemplo ni Job. Antes pa han mga pagsari ha iya, damu na ka beses nga ginpamatud-an ni Job an iya integridad. Tagda an tulo nga leksyon nga aton mahibabaroan ha iya ehemplo mahitungod ha pagparig-on han aton determinasyon nga tipigan an aton integridad.

12. (a) Sugad han ginsiring han Job 26:7, 8, 14, paonan-o nakultibar ni Job an matinalahuron nga kahadlok kan Jehova? (b) Paonan-o kita magkakaada matinalahuron nga kahadlok ha Dios?

¹² Ginparig-on ni Job an iya gugma kan Jehova pinaagi ha pagkultibar hin matinalahuron nga kahadlok ha iya. Naggahin hin panahon hi Job ha pagpamalandong han urusahon nga mga linarang ni Jehova. (Basaha an Job 26:7, 8, 14.) Nahipausa gud hiya han ginhunahuna niya an mahitungod han tuna, langit, dampog, ngan dalugdog, pero ginkarawat niya nga gutiay gud la an iya hinbabaroan mahitungod ha damu hinduro nga linarang. Ginpabilhan liwat niya an mga ginyakan ni Jehova. Hiya nagsiring:  “Akon ginmahal an mga polong han iya baba.” (Job 23:12) Duro an kahipausa ni Job kan Jehova ngan daku gud an iya respeto ha iya. Hinigugma niya an iya Amay ngan karuyag niya nga lipayon hiya. Salit, nagin mas marig-on an determinasyon ni Job nga tipigan an iya integridad. Kinahanglan naton subaron an ginbuhat ni Job. Mas damu an aton nahibabaroan yana mahitungod ha urusahon nga mga linarang kay ha mga tawo ha panahon ni Job. Ngan may-ada kita han kompleto nga Biblia nga nabulig ha aton nga makilala hin maopay hi Jehova. An ngatanan nga aton nahibabaroan mabulig ha aton nga magkaada matinalahuron nga kahadlok. Ngan ini nga kahadlok kan Jehova magpapagios ha aton nga higugmaon ngan sugton hiya ngan parig-unon an aton hingyap nga tipigan an aton integridad.​—Job 28:28.

13-14. (a) Sugad han iginpapakita han Job 31:1, paonan-o ginpamatud-an ni Job an iya pagin masinugtanon? (b) Paonan-o naton masusubad an ehemplo ni Job?

¹³ Ginparig-on ni Job an iya determinasyon nga tipigan an iya integridad pinaagi ha pagin masinugtanon. Maaram hi Job nga kinahanglan an pagin masinugtanon basi magkaada integridad. Ngani, ha tagsa nga higayon nga nasugot kita napaparig-on naton an aton determinasyon nga tipigan an aton integridad. Nangalimbasog hi Job nga magin masinugtanon ha Dios kada adlaw. Pananglitan, naghirot gud hiya ha iya pagtratar ha mga babaye. (Basaha an Job 31:1.) Sugad nga inasaw-an, maaram hiya nga sayop an pagpakita hin romantiko nga interes ha bisan hin-o nga babaye labot la ha iya asawa. Nagkikinabuhi kita yana ha kalibotan diin damu an pagsulay nga magbuhat hin seksuwal nga imoralidad. Pariho kan Job, lilikyan ba naton an pagpakita hin diri angayan nga atensyon ha diri naton asawa? Lilikyan ba liwat naton an pagkita hin bisan ano nga malaw-ay o pornograpiko nga materyal? (Mat. 5:28) Kon mangangalimbasog kita nga magkaada pagpugong ha kalugaringon kada adlaw, mapaparig-on naton an aton determinasyon nga tipigan an aton integridad.

¹⁴ Nagin masinugtanon liwat hi Job kan Jehova ha iya panhunahuna ha materyal nga butang. Nasabtan ni Job nga kon sumarig hiya ha iya mga panag-iya, daku gud ini nga sayop nga angay  hin sirot. (Job 31:24, 25, 28) Nagkikinabuhi kita yana ha kalibotan nga materyalistiko hinduro. Kon kukultibaron naton an pagkaada balanse nga panhunahuna ha kwarta ngan mga panag-iya, sugad han iginsasagdon ha aton han Biblia, mapaparig-on naton an aton determinasyon nga tipigan an aton integridad.​—Prob. 30:8, 9; Mat. 6:19-21.

15. (a) Ano an ginlalaoman ni Job nga nakabulig ha iya nga tipigan an iya integridad? (b) Kay ano nga makakabulig ha aton an pirme paghinumdom han paglaom nga iginhahatag ni Jehova?

¹⁵ Gintipigan ni Job an iya integridad pinaagi ha pagpokus ha paglaom nga babalosan hiya han Dios. Natoo hiya nga importante ha Dios an iya integridad. (Job 31:6) Bisan pa han iya mga pag-antos, nasarig hi Job nga babalosan hiya ni Jehova. An iya pagsarig sigurado nga nakabulig ha iya nga tipigan an iya integridad. Nalipay gud hi Jehova ha integridad ni Job salit hura nga ginbalosan Niya hiya bisan kon diri pa hiya perpekto! (Job 42:12-17; San. 5:11) Ngan mas damu pa nga balos an makakarawat ni Job ha tidaraon. Marig-on ba an imo paglaom nga babalosan ni Jehova an imo integridad? An aton Dios diri nagbabag-o. (Mal. 3:6) Kon pirme naton hihinumdoman nga ginpapabilhan niya an aton integridad, matitipigan naton nga buhi ha aton kasingkasing an aton makalilipay nga paglaom.​—1 Tes. 5:8, 9.

16. Ano an sadang naton magin determinasyon?

¹⁶ Salit, magin determinado nga tipigan an imo integridad! Ha panapanahon, bangin umabat ka nga an mga tawo ha imo palibot diri nagtitipig han ira integridad, pero diri ka gud mag-uusahan. Magigin usa ka han minilyon ha bug-os nga kalibotan nga matinumanon nga nagtitipig han ira integridad. Mahiuupod ka liwat ha kalalakin-an ngan kababayin-an hadto nga may marig-on nga pagtoo nga nagtipig han ira integridad, bisan pa han tarhog nga patayon. (Heb. 11:36-38; 12:1) Hinaot kita ngatanan magin determinado nga tipigan an aton integridad pariho kan Job nga nagsiring: “Diri ko isasalikway tikang ha akon an akon pagkamaligdong [o, integridad].” Ngan hinaot an aton integridad maghimaya kan Jehova ha waray kataposan!