PARA HA MGA KAG-ANAK
6: Disiplina
AN KARUYAG SIDNGON
An pulong nga disiplina mahimo mangahulogan hin paggiya o pagtutdo. Usahay, nag-uupod ito ha pagtadong han sayop nga pamatasan han bata. Kondi, agsob may kalabotan ito ha pagbansay ha moral han bata basi mabuligan hiya ha paghimo hin maopay nga desisyon.
KON KAY ANO NGA IMPORTANTE
Hinin naglabay la nga mga dekada, haros diri na nagdidisiplina an mga kag-anak kay nahadlok hira nga maibanan an kompyansa han ira mga anak. Kondi an maaramon nga mga kag-anak naghahatag hin mga balaud nga mahimo sundon han kabataan, ngan ginbabansay an kabataan ha pagtuman hito.
“An kabataan nagkikinahanglan hin mga limitasyon basi magtubo sugad nga responsable nga adulto. Kon waray disiplina, an kabataan pariho hin barko nga waray timon, nga ha urhi maaanod o malulunod pa ngani.”—Pamela.
AN IMO PUYDI BUHATON
Ayaw pagburobag-o. Kon an imo anak diri sumunod ha imo balaud, pagpadapat hin sirot. Kondi kon hiya sumunod, kumendasyuni hiya.
“Pirme ko ginkukumendasyonan an akon mga anak han ira pagin masinugtanon kay talagsa na la an masinugtanon yana. Kon gintatagan hira hin kumendasyon nagigin mas masayon para ha ira nga karawaton an ginkikinahanglan nga pagsaway.”—Christine.
PRINSIPYO HAN BIBLIA: “Anoman an iginsasabwag han usa nga tawo, ito liwat an iya aanihon.”—Galacia 6:7.
Magin makatadunganon. Kon naghahatag hin disiplina, ipahiuyon ito ha edad, abilidad, ngan ha pagkaseryoso han nahimo nga sala han imo anak. An mga sirot kasagaran nga mas epektibo kon may kalabotan ito ha sayop nga nabuhat. Pananglitan, an sobra nga paggamit hin celfon mahimo magresulta nga bawion mo anay an celfon ha sulod hin pipira ka panahon. Kondi, likyi nga padakuon an usa nga isyu, kon ha pagkamatuod gutiay man la ito.
“Nangangalimbasog ako hibaroan kon tinuyo ba han akon anak an diri pagsugot o kon nagsayop la ba hiya ha pag-intindi. An maraot nga pamatasan nga kinahanglan bag-uhon diri pariho ha kaluyahan nga kinahanglan la tadungon.”—Wendell.
PRINSIPYO HAN BIBLIA: “Ayaw pagpasinaha an iyo mga anak, basi diri hira masubo.”—Colosas 3:21; footnote.
Magin mahigugmaon. Mas masayon karawaton ngan ig-aplikar han mga anak an disiplina kon maaram hira nga gugma an motibo han kag-anak.
“Kon an amon anak nagsasayop, ginpapasarig namon hiya nga nalilipay kami han iya mag-opay nga desisyon han naglabay. Ginsusumatan namon hiya nga an iya sayop diri makakadaot han iya reputasyon kon kakarawaton niya an disiplina, ngan andam kami pagbulig ha iya.”—Daniel.
PRINSIPYO HAN BIBLIA: “An gugma pasensyoso ngan buotan.”—1 Corinto 13:4.
