AN TAWO NAIIBA HA DAMU NGA PAAGI—NAKAKASURAT KITA, NAKAKADROWING, NAKAKAIMBENTO, NGAN NAKAKAGHUNAHUNA MAHITUNGOD HAN IMPORTANTE NGA MGA PAKIANA HA KINABUHI: Kay ano nga naeksister an uniberso? Paonan-o kita umeksister? Ano an katuyoan han kinabuhi? Ano an aton magigin kabubuwason?

May mga tawo nga nalikay hini nga mga pakiana kay naghuhunahuna hira nga makuri ito mabaton. An iba nasiring nga waray pulos ito nga mga pakiana kay an kinabuhi produkto la han ebolusyon. “Waray mga dios, waray katuyoan,” siring han propesor ha kasaysayan ngan biolohiya nga hi William Provine. Hiya nagdugang: “Waray basihan an mga prinsipyo, waray katuyoan an kinabuhi.”

Kondi an iba diri nauyon hito nga panhunahuna. Para ha ira, an uniberso kontrolado han husto, mag-opay, ngan detalyado nga mga balaud. Naiimpres hira ha magpakaruruyag nga disenyo ha palibot, nga an pipira hito ginsusubad han mga tawo ha ira imbensyon. Ngan an kada adlaw nga mga panhitabo nagpapamatuod nga an komplikado nga mga disenyo ginhimo hin usa nga intelihente nga disenyador, diri produkto hin pwersa nga waray nagkukontrol.

An sugad nga pangatadongan nagpagios ha pipira nga ebolusyonista nga usisahon utro an ira gintotoohan. Iini hin duha nga ehemplo:

AN NEUROSURGEON NGA HI DR. ALEXEI MARNOV. “Igintutdo ha amon ha eskwelahan an ateyismo ngan ebolusyon,” siring niya. “An bisan hin-o nga natoo ha Dios ginhuhunahuna nga kulang hin kahibaro.” Kondi han 1990, nagbag-o an iya panhunahuna.

“Nangangalimbasog ako pirme nga masabtan an lohikal nga rason ha pag-eksister han mga butang, upod na han utok han tawo,” siring niya. “Inin urusahon nga bahin han lawas husto gud tawagon nga an pinakakomplikado nga butang ha uniberso. Pero gindisenyo ba an utok basi la magkaada kahibaro ngan abilidad, katapos mamamatay? Baga hin diri ito makatadunganon. Salit nahunahuna ko: ‘Kay ano nga aanhi kita? Ano an katuyoan han kinabuhi?’ Katapos ko ito pamalandungon hin maopay, nakasiring ako nga may-ada gud Maglalarang.”

Tungod han hingyap nga mahibaroan an katuyoan han kinabuhi, naaghat hi Alexei nga usisahon an Biblia. Katapos, an iya asawa, nga usa liwat nga doktor ngan ateyista, nag-aram liwat han Biblia, basi pamatud-an la nga sayop hiya! Kondi yana, hira nga duha marig-on nga natoo ha Dios ngan maaram han Iya katuyoan para ha tawo sugad han iginsasaysay han Biblia.

AN SYENTISTA NGA HI DR. HUABI YIN. Hi Huabi Yin nag-aram hin physics, ngan iya gin-adman an plasma ha sulod hin damu ka tuig. An plasma (ha adlaw) nga ginkukonsiderar nga ikaupat nga klase han substansya kadak-an nga ginkukompwesto hin electron ngan positive ion.

“Ha kada panahon nga gin-aadman namon nga mga syentista an mga nahitatabo ha palibot,” siring ni Huabi, “pirme namon nakikita an pagin organisado gud hito, nga resulta han husto ngan detalyado nga mga balaud. ‘Paonan-o nahimo ini nga mga balaud?’ nahunahuna ko. ‘Bisan ngani an kalayo nga ginagamit pagluto kinahanglan kontrolon, sigurado nga may-ada naghimo han mga balaud nga nagkukontrol han adlaw.’ Ha urhi, nakasiring ako nga an pinakalohikal nga baton mababasa ha siyahan nga bersikulo han Biblia: ‘Ha tinikangan an Dios naghimo han mga langit ngan han tuna.’”—Genesis 1:1.

Sigurado nga an syensya may baton ha damu nga pakiana, sugad han: Paonan-o nagana an mga selyula han utok? Ngan paonan-o nagpapagawas an adlaw hin kapaso ngan lamrag? Pero sugad han hinbaroan nira Alexei ngan Huabi, ginbabaton han Biblia an mas importante nga mga pakiana, sugad han: Kay ano nga naeksister an uniberso? Kay ano nga may ginsusunod ito nga mga balaud? Ngan kay ano nga naeksister kita?

May kalabotan han tuna, an Biblia nasiring: “[An Dios] nagtukud hini ngan nagbuhat hini nga diri bayaan, nga naghitsura hini ha pagkaurukyan.” (Isaias 45:18) Oo, may katuyoan an Dios para ha tuna, ngan sugad han iginpapakita han sunod nga artikulo, ito nga katuyoan may-ada gud kalabotan ha aton paglaom ha tidaraon.