Ha diri na maiha, an ginpipinamulat nga Ginhadian han Dios—an gobyerno ha kalibotan nga gin-establisar han Dios—magdadara hin kamurayawan ngan pagkaurosa ha tuna. “An kamurayawan magigin hura,” sugad han iginsaad ha Salmo 72:7. Kondi san-o magmamando an Ginhadian? Paonan-o ito magmamando? Ngan paonan-o ka magpapahimulos ha pagmando hito?

An Biblia nagtagna hin makatirigamnan nga mga panhitabo nga magpapakita nga an Ginhadian han Dios hirani na umabot. Ito nga mga panhitabo nagkukompwesto hin “tigaman” nga nag-uupod han girra ha iba-iba nga nasud, gutom, sakit, linog, ngan han pag-uswag han pagkamatinalapason.—Mateo 24:3, 7, 12; Lucas 21:11; Pahayag 6:2-8.

Usa pa nga tagna an nasiring: “Ha kataposan nga mga adlaw maabot an peligroso nga mga panahon nga makuri pakiangayan. Kay an mga tawo magigin mahigugmaon ha ira kalugaringon, mahigugmaon ha kwarta, . . . diri masinugtanon ha mga kag-anak, diri mapasalamaton, diri maunungon, waray kinaiya nga gugma, diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan, . . . mahilig magrakudaku, mahigugmaon ha kalipayan imbes nga mahigugmaon ha Dios.” (2 Timoteo 3:1-4) Ini nga mga batasan makikita la hadto ha pipira nga tawo. Pero yana, komon na ito.

Ito nga mga tagna nagtikang matuman han 1914. Ngani, an mga historyador, politiko, ngan awtor nagkomento nga daku gud an iginbag-o han kalibotan katapos hito nga tuig. Pananglitan, an historyador nga taga-Denmark nga hi Peter Munch nagsiring: “An girra han 1914 amo an makatirigamnan nga panhitabo ha kasaysayan han tawo. Tikang ha panahon han kahimyangan, . . . sinulod kita ha panahon han kalamidad, kahadlok, kapungot, ngan kawaray-kasigurohan ha bisan diin.”

Kondi ha luyo nga bahin, ito nga mga kahimtang pariho hin bagyo, diin katapos hito magkakaada kalmado nga panahon. Nagpapamatuod ito nga hirani na magmando an Ginhadian ha bug-os nga tuna. Ngani, igin-upod ni Jesus ini ha tigaman han kataposan: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan katapos hito maabot an kataposan.”—Mateo 24:14.

Ito nga maopay nga sumat an nangunguna nga tema han mensahe han mga Saksi ni Jehova. Ngani, an ira nangunguna nga publikasyon may ulohan nga An Barantayan Nagsasamwak han Ginhadian ni Jehova. Regular nga naghihisgot ini han urusahon nga mga butang nga pagbubuhaton han Ginhadian han Dios para ha katawohan ngan ha tuna.

An baton hini nag-uupod hin upat nga importante nga detalye:

1. An Ginhadian diri mamandoan hin mga lider han politika hini nga kalibotan.

2. Ha pangalimbasog han mga lider han politika nga diri mawara an ira awtoridad, kukontrahon nira an Ginhadian han Dios.—Salmo 2:2-9.

3. Kinahanglan bungkagon han Ginhadian han Dios an politikal nga mga ginhadian nga naruruyag magpadayon ha pagdominar ha katawohan. (Daniel 2:44; Pahayag 19:17-21) Inin ultimo nga girra ha bug-os nga kalibotan gintatawag nga Armagedon.—Pahayag 16:14, 16.

4.   An ngatanan nga nagpapasakop ha Ginhadian han Dios matatalwas ha Armagedon ngan magkikinabuhi ha mamurayawon nga bag-o nga kalibotan. Hira an magkukompwesto han gintatawag han Biblia nga “usa nga daku nga grupo,” nga posible minilyon an kadamu.—Pahayag 7:9, 10, 13, 14.

An siyahan nga pitad basi magin sakop han Ginhadian han Dios amo an pagkaada kahibaro. Ha pag-ampo ni Jesus ha Dios, hiya nagsiring: “Nangangahulogan ini hin kinabuhi nga waray kataposan, an ira padayon nga pagkilala ha imo, an amo la nga tinuod nga Dios, ngan ha iya nga imo ginsugo, hi Jesu-Kristo.”—Juan 17:3.

Kon ginkikilala han usa hi Jehova nga Dios sugad nga Persona, nagpapahimulos hiya ha damu nga paagi. Hisgotan naton an duha hito. Siyahan, nagkakaada hiya marig-on nga pagtoo ha Dios. Ito nga pagtoo nga iginbasar ha ebidensya, nagkukombinse ha iya nga tinuod an Ginhadian han Dios ngan hirani na ito magmando. (Hebreo 11:1) Ikaduha, naghihilarom an iya gugma ha Dios ngan ha igkasi-tawo. An gugma ha Dios nagpapagios ha iya nga kinasingkasing nga sugton Hiya. An gugma ha igkasi-tawo nag-aaghat ha iya nga iaplikar an mga pulong ni Jesus nga agsob tawagon nga Bulawanon nga Surundon. Ito nasiring: “An karuyag niyo buhaton ha iyo han mga tawo, buhata liwat ha ira.”—Lucas 6:31.

Pariho hin mahigugmaon nga tatay, karuyag han aton Maglalarang an gimaopayi para ha aton. Karuyag niya magkaada kita han gintatawag han Biblia nga “an tinuod nga kinabuhi.” (1 Timoteo 6:19) An kinabuhi yana diri amo “an tinuod nga kinabuhi.” Para ha minilyon, an kinabuhi yana makuri hinduro. Basi mahanduraw mo iton “tinuod nga kinabuhi,” hunahunaa an pipira han urusahon nga butang nga pagbubuhaton han Ginhadian han Dios para ha mga sakop hito.