Ito an nagin konklusyon mahitungod ha climate change han usa nga internasyonal nga team han mga researcher. Kon natoo ka ha usa nga Maglalarang nga nahigugma ha mga tawo, ini nga konklusyon nga iginbasar ha syensya bangin magpahinumdom ha imo han damu nga paagi nga ginhimo han Dios basi an aton planeta makaglugaring ha pagrekober.

Pero tungod han damu hinduro nga kadaot nga ginhihimo han tawo ha tuna, diri na kaya han tuna makarekober pinaagi la ha natural nga mga proseso. Kay ano nga makakasarig kita nga may bubuhaton an Dios mahitungod hito?

Pansina an mga teksto nga aada ha kahon nga nagpapasarig ha aton nga masasalbar an tuna ngan magigin maopay pa ngani ito hinduro.

• An aton planeta ginlarang han Dios. “Ha tinikangan ginlarang han Dios an langit ngan an tuna.”—Genesis 1:1

• An Dios an tag-iya han aton planeta. “Kan Jehova a an tuna ngan an ngatanan nga aada hito.”—Salmo 24:1

• Gindisenyo han Dios nga an aton planeta magpabilin ha kadayonan. “Gin-establisar niya an tuna ha mga pundasyon hito; diri ito mababalhin ha hinmumutangan hito ha kadayonan, oo ha kadayonan.”—Salmo 104:5

• An Dios nagsasaad nga an kinabuhi magpapadayon ha aton planeta ha waray kataposan. “An tinuod nga Dios, Hiya nga nagporma han tuna, . . . waray maglarang hito nga waray la katuyoan, kondi nagporma hito basi ukyan.”—Isaias 45:18

• An Dios nagsasaad nga an mga tawo maukoy ha aton planeta ha waray kataposan. “An magtadong magtatag-iya han tuna, ngan maukoy hira dida ha waray kataposan.” —Salmo 37:29

Gindisenyo han Dios an tuna nga may abilidad nga makapabilin bisan pa han mga epekto han mga ginbubuhat han tawo. An Biblia nagtatagna nga tatapuson ni Jehova nga Dios ha iya itinanda nga panahon an ginbubuhat nga mga pag-abuso nga nagriresulta hin kadaot ha aton planeta.—Pahayag 11:18

An Biblia nagsasaad nga katapos hito, hihimoon han Dios an aton planeta nga mahusay nga paraiso ngan bubuklaron niya an iya kamot basi ‘tagbawon an hingyap han tagsa nga buhi nga linarang.’—Salmo 145:16