Bangin maaghat ka nga magsari nga bag-uhon dayon an ngatanan ha imo kinabuhi. Bangin sumiring ka, ‘Yana nga semana maundang na ako pagsigarilyo, diri na mabuyayaw, makaturog na hin temprano, mag-iehersisyo na, makaon na hin masustansya nga pagkaon, ngan mangungumusta na ha akon lolo ngan lola.’ Kondi ha pangalimbasog nga durungan nga makab-ot an ngatanan mo nga tumong, posible nga waray ka lugod mahihimo bisan usa hito!

An mapainubsanon nga tawo reyalistiko. Iya ginkikilala nga may limitasyon an iya panahon, kusog, ngan mahihimo. Salit imbes nga mangalimbasog nga bag-uhon an ngatanan ha usa la ka higayon, hinay-hinay nga naghihimo hiya hin mga pag-uswag.

Paghatag hin reyalistiko nga panahon ha pagkontrol han imo nahiaraan o ha pagkultibar hin mga rutina. Mahimo makabulig an masunod:

1. Paghimo hin lista han mag-opay nga rutina nga karuyag mo kultibaron ngan hin lista han nakakadaot nga rutina nga karuyag mo iundang. Ibutang ha tagsa nga lista an tanan mo nga mahuhunahuna.

2. Ilista ito sumala ha kon ano an importante ha imo.

3. Tikang ha imo tagsa nga lista, pagpili hin usa o duha nga rutina, ngan pagpokus dida hito. Katapos, pagpili utro hin usa o duha nga rutina ha tagsa mo nga lista.

Basi magin madagmit an proseso, saliwani an maraot nga nahiaraan hin maopay nga rutina. Pananglitan, kon kaupod ha imo lista han nakakadaot nga nahiaraan an pagkinita hin TV ngan kaupod ha imo lista han mag-opay nga rutina an pagin mas duok ha imo mga hinigugma, mahimo ka magdesisyon: ‘Imbes nga abrihan dayon an TV pag-abot ko ha balay, matawag lugod ako ha akon kapamilya o sangkay.’