MAIHA na nga gintotoohan nga an mga kanaway nalupad hin 35,200 ka kilometro tikang ha Arctic region tipakadto ha Antartika ngan pabalik. Kondi ha pagkatinuod, an bag-o nga mga pag-estudyo nagpapakita nga mas hirayo pa an nalulupad hini nga tamsi.

An pipira hini nga tamsi gintaoran hin gudtiay nga instrumento nga gintatawag nga geolocator. Inin urusahon nga geolocator nga sugad kagaan han paper clip nakabulig nga hibaroan nga an pipira nga kanaway nakalupad ha aberids nga 90,000 ka kilometro balikan—an pinakahirayo nga nabiyahe hin migratory nga hayop. Usa hini nga tamsi an nakalupad hin haros 96,000 ka kilometro! Kay ano nga nagburobag-o an pagbanabana?

Diin man magtikang paglupad an mga kanaway, waray hira espisipiko nga ruta. Sugad han iginpapakita ha igbaw, an usa han ira komon nga ruta ha Dagat Atlantiko may S nga porma. Kay ano? Tungod kay ginpapahimulsan hini nga tamsi an huyop han hangin.

Durante han ira kinabuhi nga naabot hin mga 30 ka tuig, an kanaway mahimo makagbiyahe hin sobra 2.4 milyon ka kilometro. Katugbang ito hin tulo o upat ka balikan nga pagbiyahe ngadto ha bulan! “Urusahon gud ini para ha usa nga tamsi nga sobra 100 ka gramo la an kabug-at,” siring han usa nga syentista. Dugang pa, tungod kay naaabtan han kanaway an katpaso ha duha nga durho han kalibotan, “mas agsob nga [naieksperyensyahan nira an] sirak han adlaw kada tuig kay han iba nga linarang,” siring han libro nga Life on Earth: A Natural History.