Pananglitan, iini an pipira han mga tagna ha Biblia:

• “An mga nasud makikig-away ha iba nga nasud ngan an mga ginhadian makikig-away ha iba nga ginhadian, ngan magkakaada gutom ngan mga linog ha iba-iba nga lugar.”—Mateo 24:7.

• “Ha kataposan nga mga adlaw maabot an peligroso gud nga mga panahon nga makuri pakiangayan. Kay an mga tawo magigin mahigugmaon ha ira la kalugaringon, mahigugmaon ha kwarta, hambog, daku an buot, mapasiparahon, diri-masinugtanon ha mga kag-anak, diri mapasalamaton, diri maunungon, waray gugma ha mga kapamilya, diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan, mga traydor, matig-a an ulo, mapahitas-on, mahigugmaon ha kalipayan imbes nga mahigugmaon ha Dios.”—2 Timoteo 3:1-4.

Ito nga mga tagna naghuhulagway han usa nga kalibotan nga hirani na an diri mapugngan nga kabungkagan, sugad han bangin isiring han iba. Karuyag sidngon, nagtitikaraot na gud an aton kalibotan, ngan diri na ito mapupugngan han tawo. Sumala ha Biblia, an tawo waray kinaadman ngan gahum ha paghimo hin permanente nga solusyon. Ini an ginpapabug-atan han masunod nga mga teksto:

• “Mayada dalan nga daw maopay ha tawo; kondi an katapusan hini amo an mga dalan ha kamatayon.”—Proberbios 14:12.

• “An usa ka tawo may gahum labaw han iba ha iya karautan.”—Eklesiastes 8:9.

• “Diri aada ha tawo . . . an pagmando han iya mga pitad.”—Jeremias 10:23.

Kon padayon nga bubuhaton han mga tawo an ira karuyag, posible gud mabungkag an bug-os nga kalibotan. Kondi diri ito mahitatabo! Kay ano? An Biblia nasiring:

• An Dios “nagbubutang han mga karig-onan han tuna, basi nga ito diri . . . makiwa ha waray katapusan.”—Salmos 104:5.

• “An usa ka lito nalakat, ngan an lain nga lito naabut; kondi an tuna nabibilin ha kadayonan.”—Eklesiastes 1:4.

• “An mga magtadung makakapanonod han tuna, ngan maukoy hira dida hin waray katapusan.”—Salmos 37:29.

• “Magkakaada kahura-an hin lugas ha tuna ha bawbaw han mga bukid.”—Salmos 72:16.

 Ini nga mga teksto ha Biblia naghahatag hin klaro nga baton. An katawohan diri mapupoo ha polusyon, gutom, kauhaw, o epidemya ha bug-os nga kalibotan. An kalibotan diri mabubungkag hin nuklear nga hinganiban. Kay ano? Kay kontrolado han Dios an tidaraon han aton planeta. Oo, gintutugotan han Dios an tawo nga gamiton an ira kagawasan. Kondi aanihon nira an resulta han ira mga desisyon. (Galacia 6:7) An kalibotan diri pariho ha nahaguros nga tren, nga diri gud mapugngan ngan tikadto ha kabungkagan. An Dios nagbutang hin tubtoban, o limitasyon, kon mationan-o la kadaku nga kadaot an mahihimo han tawo.—Salmos 83:18; Hebreo 4:13.

Kondi diri la ito an bubuhaton han Dios. Magdadara hiya hin hura nga ‘kamurayawan.’ (Salmos 37:11) An pagin positibo nga iginhuhulagway hini nga artikulo usa la nga ebidensya han makalilipay nga tidaraon nga hinbaroan han minilyon nga mga Saksi ni Jehova ha ira pag-aram han Biblia.

An mga Saksi ni Jehova usa nga komunidad han kalalakin-an ngan kababayin-an ha bug-os nga kalibotan nga iba-iba an pangidaron ngan kultura. Ginsisingba nira an tinuod nga Dios, nga an ngaran Jehova, sugad han mababasa ha Biblia. Diri hira nahahadlok ha tidaraon kay an Biblia nasiring: “Sugad hini nasiring hi Jehova nga nagbuhat han mga langit, an Dios nga naghitsura han tuna ngan naghimo hini, nga nagtukud hini ngan nagbuhat hini nga diri bayaan, nga naghitsura hini ha pagkaurukyan: Ako hi Jehova; ngan waray lain.”—Isaias 45:18.