Sumat han mga Parasamwak han Ginhadian

Hin-agian Niya an Katuyoan ha Kinabuhi

HI Jesus nasiring nga kilala niya an iya mga karnero. (Juan 10:14) Kon an usa ka tawo mayada maopay nga kasingkasing ngan gugma ha kamurayawan ngan katadongan, iton nga usa mahirani ha mga sumuronod ni Jesus. An sugad nga indibiduwal makakaagi hin katuyoan ha kinabuhi, sugad han usa ka babaye ha Belgium. Ini an iya istorya:

“Han tumuktok an mga Saksi ni Jehova ha akon purtahan, masurub-on gud ako ngan naghuhunahuna ha pagtapos han akon kinabuhi. Naruyagan ko an ginsiring han mga Saksi mahitungod han kasulbaran ha mga problema hinin masakiton nga kalibotan kondi diri ko karuyag an ideya nga nahiuupod an Dios. Hinmunong ako ha pagsingba walo ka tuig na hadto, kay napungot ako han pagkasalingkapaw nga hinkit-an ko didto. Kondi, pinaagi han mga Saksi, nakilala ko an taginting han kamatuoran ha ginsiring nira ngan hinsabtan ko nga, bisan pa hini ngatanan, makuri an mabuhi nga waray an Dios.

“Makasurubo, katapos hin pipira nga pagbisita, nawara an mga Saksi. Nagmabidoon ako. Nagsigarilyo ako hin duha ka pakete han sigarilyo ha usa ka adlaw ngan nagtikang paggamit hin droga. Tungod kay karuyag ko makigkomunikar ha akon patay na nga apoy nga lalaki, nahiupod ako ha espiritismo. Nahadluk gud ako han nag-uusahan la ha gab-i naeksperiensiahan ko an pag-atake han demonyo sugad nga resulta! Nagpadayon ini hin mga bulan. Kada gab-i nalilisang ako ha paghunahuna nga nag-uusahan.

“Niyan, usa ka adlaw linakat ako, iba nga dalan an akon inagian kay han kasagaran na nga akon inaagian, ngan hinkit-an ko an daku nga lugar han pagtukod. Natingala ako nga hinkit-an ko an daku nga kadam-an didto. Ha paghirani pa gud, hinkit-an ko nga mga Saksi ni Jehova an nagtutukod hin usa nga Kingdom Hall. Nahinumduman ko an mga pagbisita han mga Saksi ha akon panimalay, ngan naghunahuna ako nga urosahon gud ito kon an bug-os nga kalibotan magkikinabuhi sugad hini nga mga tawo.

“Naghandum gud ako nga an mga Saksi bumalik ha akon panimalay, salit nakiistorya ako ha iba hadton nagtatrabaho ha katirokan. Nag-ampo ako ha Dios, ngan napulo ka adlaw an naglabay an tawo nga siyahan nga nakigkita ha akon nakada ha akon purtahan. Siring niya nga igpapadayon namon an pag-aram ha Biblia, ngan malipayon nga inmuyon ako. Gindapit niya ako dayon ha mga katirok ha Kingdom Hall. Kinarawat ko ito. Waray ko pa gud makita an sugad nga panan-awon! Maiha na gud nga namiling ako han mga tawo nga nahigugma ha usa kag usa ngan maglipayon. Ngan iini na hira ha kataposan!

“Katapos hito natambong na ako ha ngatanan nga mga katirok. Katapos hin mga tulo ka semana, hinmunong ako ha maraut nga batasan han pagsigarilyo. Iginlabug ko an akon mga libro ha astrolohiya ngan mga rekord han sataniko nga musika, ngan inaabat ko nga an mga demonyo waray na gahum ha akon. Gintadong ko an akon kinabuhi sumala han mga suruklan ni Jehova ha Biblia, ngan katapos hin tulo ka bulan nagtikang ako pagwali han maopay nga sumat. Katapos hin unom ka bulan nabawtismohan ako. Duha ka adlaw katapos han akon bawtismo, nagtikang ako ha auxiliary nga pagpayunir.

“Nagpapasalamat ako kan Jehova para han ngatanan magopay nga mga butang nga ginbubuhat niya para ha akon. An akon kinabuhi mayada na katuyoan ha kataposan. Oo, an ngaran ni Jehova amo an marig-on nga baluarte nga an matadong nadalagan ngadto ngan naluluwas. (Proberbios 18:10) Inaabat ko gud an inabat han salmista han magsurat hiya han Salmo 84:​10 (NW): ‘An usa ka adlaw dida hiton imo mga bungsaran maoroopay kay han usa ka yukot ha gawas! Gabay pa ako magparabantay han ganghaan han balay han akon Dios kay han mag-ukoy dida ha mga payag han karautan.’”

Inin maaghup-an-kasingkasing nga babaye nakaagi hin katuyoan ha kinabuhi. Sugad man an bisan hin-o nga namimiling kan Jehova upod an maopay nga kasingkasing.