Espesyal nga Pahibaro

HA IKATARAPOS han tinuig nga katirok han Watch Tower Bible and Tract Society of Pennsylvania han Oktubre 7, 2000, mayada espesyal nga pahibaro an tsirman, hi John E. Barr han Nagmamando nga Lawas. Ini nga pahibaro iginbasar ha mga pahayag ni Theodore Jaracz ngan Daniel Sydlik han aga hito nga adlaw.—Kitaa an pahina 12-16 ngan 28-31 hini nga magasin.

Ha pagpahayag han importante gud nga punto, hi Bugto Barr nagsiring: “Igintapod ha matinumanon ngan maaramon nga uripon’ ngan ha Nagmamando nga Lawas hito an mga responsabilidad nga mas hitaas ngan mas haluag an lukop kay han iginhatag ha legal nga mga korporasyon. Nahisurat ha katuyoan han tagsa han sugad legal nga mga korporasyon an mga responsabilidad nga limitado ha ira bahin. Kondi, an aton Agaron, hi Jesu-Kristo, an nagpili han matinumanon nga uripon nga klase ha pagdumara ha ngatanan han iya ‘mga panag-iya,’ o mga interes han Ginhadian dinhi ha tuna.”—Mateo 24:45-47.

May kalabotan han korporasyon ha Pennsylvania, hi Bugto Barr nagdugang: “Tikang han magtikang ito han 1884, an Watch Tower Bible and Tract Society of Pennsylvania mayada importante nga bahin ha aton moderno nga kasaysayan. Kondi, usa la nga legal nga instrumento ito nga ginagamit han ‘matinumanon ngan maaramon nga uripon’ kon kinahanglanon ito.”

Ha ira mga pahayag, iginsaysay nira Bugto Sydlik ngan Jaracz nga an pagtapod ha ‘matinumanon ngan maaramon nga uripon’ han ngatanan tunan-on nga mga panag-iya han Ginoo diri nagpupugong han uripon nga klase ha pagtugot han kuwalipikado nga kalalakin-an tikang ha ‘iba nga mga karnero’ ha pagbuhat hin espisipiko nga mga responsabilidad ha pagdumara. (Juan 10:16) Waray liwat Kasuratanhon nga hinungdan nga kinahanglan dinihogan nga mga Kristiano an ngatanan o an tagsa nga mga direktor han legal nga mga korporasyon nga ginagamit han mga Saksi ni Jehova.

Ginsumatan ni Bugto Barr an mamarati nga hinin bag-o la an iba nga mga membro han Nagmamando nga Lawas han mga Saksi ni Jehova nga nag-aalagad sugad nga mga direktor ngan mga opisyal boluntaryo nga binaya ha pagin mga membro han mga direktor han ngatanan nga mga korporasyon nga ginagamit han ‘matinumanon ngan maaramon nga uripon’ ha Estados Unidos. Ginpili an masasarigan nga kabugtoan han iba nga mga karnero nga klase sugad nga mga kasaliwan.

Ini nga desisyon mapulsanon gud. Nagtutugot ito ha mga membro han Nagmamando nga Lawas nga magkaada dugang nga panahon ha pag-andam han espirituwal nga pagkaon ngan pag-ataman han espirituwal nga mga panginahanglan han bug-os-kalibotan nga pagminagburugto.

Ha pagtapos, an tsirman nagsiring ha iya malipayon nga mamarati: “Samtang igintotoka an magkalainlain legal ngan administratibo nga mga responsabilidad ha eksperyensyado nga mga paramangno, . . . hira ngatanan nag-aalagad ilarom han espirituwal nga pagdumara han Nagmamando nga Lawas. . . . Kita ngatanan mainampoon nga naglalaom kan Jehova para han iya bendisyon ha aton nagkakaurosa nga mga pangalimbasog ha pagbuhat han iya kaburut-on, ha dungog ngan himaya han iya bantogan nga ngaran.”