Kay Ano nga Sadang Patuboon an Pagkamaopay?

AN HAMTONG an pangidaron nga Hapon nga hi Kunihito binalhin pa la ngadto ha Estados Unidos. a Sulod hin mga semana tikang han iya pag-abot, inatubang hiya ha kahimtang nga makakadaot unta han iya propesyon. Hi Kunihito nagsaysay: “Han nagpakiana ha akon an akon superbisor kon maaakos ko an usa nga responsabilidad, inabat ko nga sigurado ako nga maaakos ko ito. Kondi, tungod kay nagdaku ako nga ginhuhunahuna an pagpaubos sugad nga hiyas, binaton ako: ‘Diri ako sigurado kon mahihimo ko ito, kondi bubuhaton ko an akon maaakos.’ Para ha akon Amerikano nga superbisor, sugad ini hin diri ako kuwalipikado ngan waray pagsarig. Han hinbaroan ko ito, naghunahuna ako nga kinahanglan ko magbag-o.”

Hi Maria, nga nag-uukoy ha Siyudad han New York, maopay nga estudyante, andam pirme pagbulig ha iya mga kaklase. Hi Juan usa nga igkasi-estudyante nga usahay nangangaro han bulig ni Maria. Kondi hi Juan nagkaada liwat romantiko nga interes ha iya ngan nangalimbasog nga maruyagan ni Maria. Bisan pa han iya hingyap nga magpabilin nga limpyo ha moral, nadaog hi Maria han imoral nga mga paagi ni Juan ngan nahiupod ha sayop nga buhat ha sekso.

An pagpakita hin pagkamaopay ha magkalainlain an kultura ngan mahugaw ha moral nga kalibotan yana nga panahon usa gud nga ayat. Salit kay ano nga sadang patuboon an pagkamaopay? Tungod kay an maopay nga batasan nagpapalipay ha Dios, ngan an kadam-an ha aton sigurado nga naghihingyap han iya pag-uyon.

An Pulong han Dios, an Biblia, nagdadasig han mga parabasa hito nga patuboon an pagkamaopay. Pananglitan, hi apostol Pablo nagsurat: “Kon mayada [pagkamaopay], ngan kon mayada pagdayeg, paghunahunaa niyo ini nga mga bagay.” (Filipos 4:8) Ngan gindadasig kita ni apostol Pedro nga ‘sinsero nga mangalimbasog nga idugang ha aton pagtoo an pagkamaopay.’ (2 Pedro 1:5) Kondi ano an pagkamaopay? Maitututdo ba ito ha mga klase? Paonan-o naton mapapatubo ito?

[Footnote]