Teokratiko nga Pinili an mga Paramangno Ngan Ministeryal nga mga Surugoon

‘Magbantay kamo ha iyo kalugaringon ngan ha ngatanan nga panon, nga ha ira an baraan nga espiritu nagpili ha iyo nga mga paramangno.’—BUHAT 20:28.

 1, 2. Paonan-o natutuman an Isaias 60:22?

 HI Jehova maiha na nga nagtagna nga mahitatabo an makatirigamnan nga butang ha panahon han kataposan. Pinaagi kan propeta Isaias, ginsiring ito: ‘An usa nga gutiayay mahihimo nga usa ka yukot, ngan an usa nga gutiay usa nga nasud nga makusog. Ako hi Jehova, magdadagmit hini ha iya panahon.’—Isaias 60:22.

² Mayada ba ebidensya nga ini nga tagna natutuman yana nga panahon? Oo, mayada! Durante han dekada han 1870, usa nga kongregasyon han katawohan ni Jehova an naporma ha Allegheny, Pennsylvania, E.U.A. Tikang hiton gutiay nga tinikangan, napuplo ka yukot han mga kongregasyon an napuporma ngan nag-uuswag ha bug-os nga kalibotan. Minilyon han mga parasamwak han Ginhadian—usa nga nasud nga makusog—an nakikig-upod yana ha sobra 91,000 nga kongregasyon ha 235 nga nasud ha bug-os nga tuna. Waray ruhaduha, nagpapamatuod ini nga ginpapadagmit ni Jehova an pagtirok han totoo nga mga magsiringba antes umabot an “daku nga kagol-anan,” nga hirani na gud yana.—Mateo 24:21; Pahayag 7:9-14.

 3. Ano an kahulogan han pagin bawtismado ‘ha ngaran han Amay, han Anak, ngan han baraan nga espiritu’?

³ Katapos maghimo hin personal nga dedikasyon kan Jehova, ngan uyon han mga sugo ni Jesus, inin minilyon nabawtismohan ‘ha ngaran han Amay ngan han Anak ngan han baraan nga espiritu.’ (Mateo 28:19) An pagin bawtismado “ha ngaran han Amay” nangangahulogan nga kinikilala hinin dedikado nga mga indibiduwal hi Jehova sugad nga ira langitnon nga Amay ngan Humaratag-Kinabuhi ngan nagpapasakop ha iya pagkasoberano. An bawtismo ‘ha ngaran han Anak’ nagpapasabot nga kinakarawat nira hi Jesu-Kristo sugad nga ira Manunubos, Lider, ngan Hadi. Kinikilala liwat nira an bahin han baraan nga espiritu han Dios, o aktibo nga puwersa, ha paggiya ha ira kinabuhi. Iginpapasabot hini nga nabawtismohan hira ‘ha ngaran han baraan nga espiritu.’

 4. Paonan-o gin-oordinahan an Kristiano nga mga ministro?

⁴ Ha ira bawtismo, an bag-o nga mga disipulo gin-ordinahan sugad nga mga ministro ni Jehova nga Dios. Hin-o an nag-oordin ha ira? Ha prinsipyo, an mga pulong ha 2 Korinto 3:5 naaplikar ha ira: “Iton amon mga kabatiran [sugad nga mga ministro] tikang ha Dios.” Waray hira mahihingyap nga labaw nga dungog kay ha pagin ordinado ni Jehova nga Dios mismo! Katapos han ira bawtismo, magpapadayon hira ha pagtubo ha espirituwal sugad nga mga ministro han “maopay nga sumat” tubtob nga kinakarawat nira an mga giya han espiritu han Dios ngan padayon nga inaaplikar an iya Pulong.—Mateo 24:14; Buhat 9:31.

Teokratiko—Diri Demokratiko—nga Pagpili

 5. Pinipili ba an Kristiano nga mga paramangno ngan ministeryal nga mga surugoon ha demokratiko nga paagi? Isaysay.

⁵ Hamtong nga pagmangno han kuwalipikado nga mga paramangno ngan maabtik nga bulig han ministeryal nga mga surugoon an ginkikinahanglan ha pagmangno han espirituwal nga mga panginahanglan han nagdadamu aktibo nga mga ministro. (Filipos 1:1) Paonan-o ginpipili an sugad espirituwal nga kalalakin-an? Diri pariho han mga paagi nga ginhihimo ha Kakristianohan. Pananglitan, an Kristiano nga mga paramangno diri ginpipili ha demokratiko nga paagi, nga nakarawat hin mga butos han kadam-an han mga tawo nga kaupod ha kongregasyon. Lugod, ini nga mga pagpili  ginhihimo ha teokratiko nga paagi. Ano an kahulogan hito?

 6. (a) Ano an totoo nga teokrasya? (b) Kay ano nga teokratiko an pagpili ha mga paramangno ngan ministeryal nga mga surugoon?

⁶ Simple la, an totoo nga teokrasya amo an pagmando han Dios. An mga Saksi ni Jehova kinaburut-on nga nagpapasakop ha iya pagmando ngan nakooperar ngatanan ha pagbuhat han kaburut-on han Dios. (Salmo 143:10; Mateo 6:9, 10) Teokratiko an pagpili ha Kristiano nga mga paramangno, o mga tigurang, ngan ministeryal nga mga surugoon tungod kay an paagi han pagrekomenda ngan pagpili ha sugad responsable nga kalalakin-an ginbubuhat sumala ha kahikayan han Dios nga iginsaysay ha Baraan nga Kasuratan. Ngan sugad nga “pangulo labaw han ngatanan,” hi Jehova siyempre an mayada katungod ha pagsiguro kon paonan-o magios an iya nakikita nga organisasyon.—1 Kronikas 29:11; Salmo 97:9.

 7. Paonan-o ginmamandoan an mga Saksi ni Jehova?

⁷ Kabaliktaran ha damu nga mga grupo han relihiyon ha Kakristianohan, an mga Saksi ni Jehova diri nagdidesisyon para ha ira kalugaringon han porma han espirituwal nga gobyerno nga ilarom hito nagios hira. Inin sinsero nga mga Kristiano nangangalimbasog ha pagsunod ha mga suruklan ni Jehova. An ira mga paramangno diri iginbubutang ha katungdanan pinaagi han pagdumara han kongregasyon, hirarkiya, o presbiteryano nga iglesia. Kon an mga bahin han kalibotan nangangalimbasog ha paghilabot hini nga mga pagpili, an katawohan ni Jehova diri nakompromiso. Marig-on nga gintitipigan nira an determinasyon nga iginpahayag hin maopay han mga apostol ha siyahan nga siglo han hira nagsiring: “Kinahanglan namon nga sugton an Dios san-o an mga tawo.” (Buhat 5:29) Salit, an mga Saksi nagpapasakop ha Dios ha ngatanan nga butang. (Hebreo 12:9; Jakobo 4:7) An pagsunod ha teokratiko nga paagi nagdadara hin pag-uyon han Dios.

 8. Paonan-o nagkakaiba an demokratiko ngan teokratiko nga mga paagi?

⁸ Sugad nga mga surugoon han Daku nga Teokrata, hi Jehova, maopay nga hinumduman naton an mga kaibahan han demokratiko ngan teokratiko nga mga paagi. An demokratiko nga mga proseso nagkikinahanglan hin pariho nga representasyon ngan agsob nga ginhihimo pinaagi han pagkampanya para ha katungdanan ngan eleksyon pinaagi han kadam-an nga butos. An sugad nga mga paagi diri ginagamit ha teokratiko nga mga pagpili. Diri ini nagtitikang ha mga tawo; diri man ito nagtitikang ha legal nga korporasyon. Matin-aw nga ha pag-unabi han pagpili ni Jesus ngan ni Jehova ha iya sugad nga ‘apostol ha mga nasud,’ ginsumatan ni Pablo an mga taga-Galasia nga ginpili hiya “diri tikang ha mga tawo, bisan pinaagi han mga tawo, kondi pinaagi kan Jesu-Kristo, ngan han Dios nga Amay, nga nagbanhaw ha iya tikang ha mga minatay.”—Roma 11:13; Galasia 1:1.

Ginpili han Baraan nga Espiritu

 9. Ano an ginsisiring han Buhat 20:28 mahitungod han pagpili ha Kristiano nga mga paramangno?

⁹ Ginpahinumdom ni Pablo an mga paramangno nga nag-uukoy ha Efeso nga ginpili hira han Dios pinaagi han baraan nga espiritu. Hiya nagsiring: ‘Magbantay kamo ha iyo kalugaringon ngan ha ngatanan nga panon, nga ha ira an baraan nga espiritu nagpili ha iyo nga mga paramangno, basi mangnoan an kongregasyon han Dios, nga ginpalit niya pinaagi han dugo han iya kalugaringon nga Anak.’ (Buhat 20:28) Adton Kristiano nga mga paramangno kinahanglan padayon nga giyahan han baraan nga espiritu samtang ginbubuhat nira an ira mga buruhaton sugad nga mga magbarantay han panon han Dios. Kon an usa nga lalaki nga ginpili ha katungdanan diri na nakakaabot han suruklan han Dios, ha igo nga panahon an baraan nga espiritu magios ha pagkuha ha iya tikang ha iya katungdanan.

10. Paonan-o nga an baraan nga espiritu mayada importante gud nga bahin ha teokratiko nga mga pagpili?

¹⁰ Paonan-o nga an baraan nga espiritu mayada importante gud nga bahin? Siyahan ha ngatanan, an rekord nga nagsasaysay han mga kinahanglanon para han espirituwal nga pagmangno gin-aghat han baraan nga espiritu. Ha iya mga surat kan Timoteo ngan Tito, iginsaysay ni Pablo an mga suruklan nga kinahanglan maabot han mga paramangno ngan ministeryal nga mga surugoon. Ha kabug-osan, gin-unabi niya an 16 magkalainlain nga mga kinahanglanon. Pananglitan, an mga paramangno kinahanglan diri-sarawayon, kasadangan ha mga batasan, maopay an panhunahuna, maligdong, maabiabihon, kuwalipikado ha pagtutdo, ngan susbaranan nga mga ulo han pamilya. Kinahanglan timbang hira ha paggamit han  de-alkohol nga irinmon, diri mahigugmaon ha salapi, ngan nagpupugong ha kalugaringon. Sugad man, hitaas nga mga suruklan an ginkinahanglan para ha kalalakin-an nga nagtitinguha nga magin ministeryal nga mga surugoon.—1 Timoteo 3:1-10, 12, 13; Tito 1:5-9.

11. Ano an pipira han mga kuwalipikasyon nga kinahanglan maabot han kalalakin-an nga nagtitinguha han responsabilidad ha kongregasyon?

¹¹ Ipinapakita han pagrepaso hini nga mga kuwalipikasyon nga adton nangunguna ha pagsingba kan Jehova kinahanglan magin susbaranan ha Kristiano nga paggawi. An kalalakin-an nga nagtitinguha han responsabilidad ha kongregasyon kinahanglan magpakita han ebidensya nga an baraan nga espiritu nagios ha ira. (2 Timoteo 1:14) Kinahanglan makita nga an espiritu han Dios nagpapagios hini nga kalalakin-an nga mamunga han mga bunga han espiritu nga ‘gugma, kalipay, kamurayawan, pagkamainantuson, kalooy, pagkamaopay, pagtoo, kaaghop, pagpugong-ha-kalugaringon.’ (Galasia 5:22, 23) An sugad nga mga bunga sadang makita ha ira pakig-upod ha mga igkasi-tumuroo ngan ha iba. Siyempre, an iba bangin mas maopay ha pagpakita hin espisipiko nga mga bunga han espiritu, samtang an iba bangin nagpapakita han mga kuwalipikasyon para han mga paramangno ha hitaas nga sukol. Kondi, ha ira bug-os nga paagi han kinabuhi, an ngatanan nga naglalaom nga pilion sugad nga mga paramangno o ministeryal nga mga surugoon sadang magpakita nga hira espirituwal nga kalalakin-an, nakakaabot ha mga kinahanglanon han Pulong han Dios.

12. Hin-o an masisiring nga ginpili han baraan nga espiritu?

¹² Han ginsagda ni Pablo an iba nga magsubad ha iya, nahimo niya ito nga may kagawasan ha pagyakan tungod kay hiya mismo nagsusubad kan Jesu-Kristo, nga ‘nagbilin ha aton hin susbaranan basi sundon hin maopay an iya mga pitad.’ (1 Pedro 2:21; 1 Korinto 11:1) Salit adton nakakaabot han Kasuratanhon nga mga kinahanglanon ha panahon han pagpilia ha ira sugad nga mga paramangno o ministeryal nga mga surugoon mahimo sidngon nga ginpili han baraan nga espiritu.

13. Paonan-o nabulig an baraan nga espiritu hadton naghihimo hin mga rekomendasyon han kalalakin-an nga mag-aalagad ha kongregasyon?

¹³ Usa pa nga butang an nagpapakita kon paonan-o nagios an baraan nga espiritu ha rekomendasyon ngan pagpili ha mga paramangno. Hi Jesus nagsiring nga ‘an Amay ha langit naghahatag han baraan nga espiritu hadton nangangaro ha iya.’ (Lukas 11:13) Salit kon nagkakatirok an mga tigurang ha lokal nga kongregasyon ha pagrekomenda han kalalakin-an para han responsabilidad ha kongregasyon, nag-aampo hira para han espiritu han Dios nga maggiya ha ira. Ira iginbabasar an ira mga rekomendasyon ha ginsisiring ha inspirado nga Pulong han Dios, ngan an baraan nga espiritu nabulig ha ira nga masabtan kon an indibiduwal ba nga ginhuhunahuna nga pipilion nakakaabot han Kasuratanhon nga mga kinahanglanon. Adton naghihimo han mga rekomendasyon kinahanglan diri maimpluwensyahan han pisikal nga dagway, edukasyon, mga nahimo, o natural nga mga abilidad. An ira siyahan nga interes kinahanglan nakasentro ha kon an tawo ba usa ka espirituwal nga lalaki, usa nga diri mag-aalang an mga membro han kongregasyon nga dumaop para han espirituwal nga sagdon.

14. Ano an hinbabaroan naton tikang ha Buhat 6:1-3?

¹⁴ Bisan kon an mga lawas han mga tigurang kabulig han nagbibiyahe nga mga paramangno ha pagrekomenda han kabugtoan nga kalalakin-an sugad nga mga tigurang ngan ministeryal nga mga surugoon, an aktuwal nga pagpili ginhihimo sumala han susbaranan ha siyahan nga siglo. Ha usa nga okasyon, binangon an kahimtang nga kinahanglan mangnoan han kuwalipikado ha espirituwal nga kalalakin-an an importante nga toka. An nagmamando nga lawas naghatag han masunod nga sugo: “Bilnga niyo an pito ka tawo ha iyo, nga magopay an kadungganan, puno han espiritu ngan kinaadman, nga amon pagtutungdan hini nga buruhaton.” (Buhat 6:1-3) Bisan kon an kalalakin-an nga direkta nga nagdumara hito nga kahimtang an naghimo han mga rekomendasyon, an mga pagpili ginhimo han responsable nga kalalakin-an didto ha Jerusalem. Pariho nga paagi an ginsusunod yana nga panahon.

15. Paonan-o nahidadabi an Nagmamando nga Lawas ha pagpili hin kalalakin-an?

¹⁵ An Nagmamando nga Lawas han mga Saksi ni Jehova direkta nga nagpipili han ngatanan nga membro han mga Komite han Sanga. Kon nagdidesisyon kon hin-o an makarawat han sugad mabug-at nga responsabilidad, ginsusunod han Nagmamando  nga Lawas an ginsiring ni Jesus: “Kon hin-o an tinagan hin damu, damu an pangingitaon ha iya, ngan kon hin-o an damu an igintapod, labi pa an ira pangangaroon ha iya.” (Lukas 12:48) Dugang pa ha pagpili ha mga membro han Komite han Sanga, an Nagmamando nga Lawas nagpipili hin mga tigurang ha Bethel ngan nagbibiyahe nga mga paramangno. Kondi, ginagamit nira an matataporan nga kabugtoan nga kalalakin-an nga magbuhat para ha ira hin pipira iba nga mga pagpili. Mayada Kasuratanhon nga susbaranan liwat para hini.

‘Magpili Ka, Sugad han Iginsugo Ko ha Imo’

16. Kay ano nga iginbilin ni Pablo hi Tito ha Kreta, ngan ano an iginpapasabot hini mahitungod han teokratiko nga mga pagpili yana nga panahon?

¹⁶ Ginsumatan ni Pablo an iya igkasi-magburuhat nga hi Tito: “Tungod hini nga hinungdan binilin ko ikaw didto ha Kreta, basi nga pag-opayon mo an kulang nga mga bagay, ngan magpili ka hin mga [tigurang] ha tagsatagsa nga bungto, sugad han iginsugo ko ha imo.” (Tito 1:5) Ngan iginsaysay ni Pablo an mga kuwalipikasyon nga kinahanglan pangitaon ni Tito ha kalalakin-an nga magigin kuwalipikado para ha sugad nga mga pagpili. Salit, yana nga panahon, an Nagmamando nga Lawas nagpipili hin kuwalipikado nga kabugtoan nga kalalakin-an ha mga sanga nga magrirepresentar hito ha pagpili hin mga tigurang ngan ministeryal nga mga surugoon. Kinahanglan mag-ikmat nga adton nagrirepresentar para han Nagmamando nga Lawas matin-aw nga nasabot ngan nasunod ha Kasuratanhon nga mga giya ha sugad nga mga pagpili. Salit, ilarom han giya han Nagmamando nga Lawas nga an kuwalipikado nga kalalakin-an ginpipili ha pag-alagad ha mga kongregasyon han mga Saksi ni Jehova ha bug-os nga kalibotan.

17. Paonan-o gindudumara ha sanga nga opisina an mga rekomendasyon para ha pagpili hin mga paramangno ngan ministeryal nga mga surugoon?

¹⁷ Kon iginpapadara ha sanga nga opisina han Watch Tower Society an mga rekomendasyon ha pagpili hin mga paramangno ngan ministeryal nga mga surugoon, an eksperyensyado nga kalalakin-an nasarig ha espiritu han Dios para han giya ha mga pagpili. Inaabat hini nga kalalakin-an nga may baratunon hira, hinsasabtan nga kinahanglan diri hira magdagmit ha pagpili hin bisan hin-o nga tawo, basi diri hira makaangbit ha iya mga sala.—1 Timoteo 5:22.

18, 19. (a) Paonan-o iginpapadara an pipira nga mga pagpili? (b) Paonan-o ginbubuhat an bug-os nga proseso han rekomendasyon ngan pagpili?

 ¹⁸ Mayada pipira nga mga pagpili nga bangin iginpapadara pinaagi han surat nga mayada opisyal nga selyo tikang ha legal nga korporasyon. An sugad nga surat mahimo gamiton ha pagpili hin sobra usa nga bugto nga lalaki ha kongregasyon.

¹⁹ An teokratiko nga mga pagpili nagtitikang kan Jehova pinaagi han iya Anak ngan han nakikita tunan-on nga agianan han Dios, ‘an matinumanon ngan maaramon nga uripon’ ngan han Nagmamando nga Lawas hito. (Mateo 24:45-47) An bug-os nga proseso han sugad nga rekomendasyon ngan pagpili tinutugwayan, o ginigiyahan, han baraan nga espiritu. Ini an kahimtang tungod kay an mga kuwalipikasyon iginsasaysay ha Pulong han Dios, nga inspirado han baraan nga espiritu, ngan an indibiduwal nga ginpili nagpapakita han ebidensya han pamunga hin mga bunga hito nga espiritu. Salit, an pagpili gintatagad sugad nga ginhihimo han baraan nga espiritu. Sugad la han mga paramangno ngan ministeryal nga mga surugoon nga ginpili ha teokratiko nga paagi ha siyahan nga siglo, sugad man yana nga panahon.

Mapasalamaton ha Giya ni Jehova

20. Kay ano nga inaabat naton an pariho han mga pagbati ni David nga nahirekord ha Salmo 133:1?

²⁰ Hini nga panahon han espirituwal nga kauswagan ngan teokratiko nga pag-uswag ha buruhaton nga pagwali-han-Ginhadian, mapasalamaton kita nga hi Jehova an siyahan nga responsable ha pagpili ha mga paramangno ngan ministeryal nga mga surugoon. Inin Kasuratanhon nga kahikayan nabulig ha pagtipig han hitaas nga mga suruklan han Dios han pagkamatadong ha butnga naton sugad nga mga Saksi ni Jehova. Dugang pa, an Kristiano nga espiritu ngan sinsero nga mga pangalimbasog hini nga mga paramangno ngan ministeryal nga mga surugoon naamot hin daku ha aton urusahon nga kamurayawan ngan pagkaurosa sugad nga mga surugoon ni Jehova. Salit, pariho kan salmista David, napapagios kita ha pagsinggit: “Kitaa, hin kamaopay ngan hin makairindig an magburugto nga nagkakatarampo ha pagkaurosa!”—Salmo 133:1.

21. Paonan-o natutuman yana nga panahon an Isaias 60:17?

²¹ Mapasalamaton gud kita han giya ni Jehova pinaagi han iya Pulong ngan han baraan nga espiritu! Ngan tinuod nga makahuluganon an mga pulong ha Isaias 60:17: “Para han tumbaga magdadara ako hin bulawan, ngan para han puthaw magdadara ako hin salapi, ngan para han kahoy tumbaga, ngan para han mga bato, puthaw. Akon liwat papagdaiton an imo mga [paramangno], ngan papagmatadungon an imo mga [parahatag-han-toka].” Samtang an teokratiko nga mga paagi mainuswagon nga ginbubuhat hin mas bug-os ha mga Saksi ni Jehova, naieksperyensyahan naton inin benindisyonan nga mga kahimtang ha bug-os tunan-on nga organisasyon han Dios.

22. Husto nga mapasalamaton kita ha ano, ngan sadang magin determinado kita nga buhaton an ano?

²² Mapasalamaton gud kita han teokratiko nga mga kahikayan nga nahitatabo ha aton. Ngan inaapresyar gud naton an mauyatom kondi makapatagbaw nga buruhaton nga ginbubuhat han pinili ha teokratiko nga paagi nga mga paramangno ngan ministeryal nga mga surugoon. Bug-os-kasingkasing nga gindadayaw naton an aton mahigugmaon langitnon nga Amay, nga naghahatag ha aton hin espirituwal nga kauswagan ngan hura nga ginbibendisyonan kita. (Proberbios 10:22) Salit, magin determinado kita nga padayon nga dumungan ha organisasyon ni Jehova. Labaw ha ngatanan, magpadayon kita ha tarampo nga pag-alagad nga nagkakaurosa ha dungog, pagdayaw, ngan himaya han bantogan ngan baraan nga ngaran ni Jehova.

Paonan-o Mo Babatunon?

• Kay ano nga makakasiring kita nga teokratiko ngan diri demokratiko an pagpili ha mga paramangno ngan ministeryal nga mga surugoon?

• Paonan-o ginpipili han baraan nga espiritu an responsable Kristiano nga kalalakin-an?

• Paonan-o nahidadabi an Nagmamando nga Lawas ha pagpili hin mga paramangno ngan ministeryal nga mga surugoon?

• Mahitungod han teokratiko nga mga pagpili, kay ano nga sadang magin mapasalamaton kita kan Jehova?

[Mga Pakiana]

[Mga Retrato ha pahina 15]

An mga tigurang ngan ministeryal nga mga surugoon may pribilehiyo nga mag-alagad pinaagi han teokratiko nga pagpili