Sumat han mga Parasamwak han Ginhadian

Kinarawat han Latvia an Maopay nga Sumat

MATIN-AW nga ipinapakita han Biblia nga kaburut-on han Dios nga “an ngatanan nga mga tawo maluwas, ngan . . . makadangat ha pagkilala han kamatuoran.” (1 Timoteo 2:4) Adton ha damu nga katuigan waray higayon nga makabati han maopay nga sumat yana nakakabati na hito! Ha Latvia, sugad man ha iba nga mga bahin han kalibotan, an mga tawo ha ngatanan nga pangidaron ngan ha magkalainlain nga mga gintikangan nakarawat han mensahe, sugad han ipinapakita han masunod nga mga eksperyensya.

• Ha Rēzekne, usa nga bungto ha este han Latvia, usa nga iroy ngan an iya tinedyer nga anak nga babaye nagpatutdo han direksyon ha babaye nga nakadto ha kalsada. Katapos isumat ha ira an impormasyon, gindapit hira han babaye, nga usa han mga Saksi ni Jehova, ngadto ha mga katirok han mga Saksi.

Tungod kay relihiyoso an iroy ngan an anak, nagdesisyon hira nga kumadto ha katirok. Ha dalan, nagkauyon hira nga kon mayada hira makita nga bisan ano nga sayop didto, mabaya hira dayon. Kondi, makapainteres hinduro an katirok nga waray na gud hira makahunahuna ha pagbaya. Ginkarawat nira an tanyag ha pag-aram ha Biblia ngan nagtikang tumambong hin regular ha mga katirok. Ha sulod la hin tulo ka bulan, karuyag na nira makigbahin ha pagwali nga buruhaton ngan naglalaom nga mabawtismohan ha tidaraon.

• Ha usa nga siyudad ha weste nga bahin han Latvia, nakaistorya han usa nga Saksi an 85-anyos nga hi Anna, nga nagpakita hin totoo nga interes ngan inuyon ha pag-aram ha Biblia. An iya anak nga babaye ngan an iba nga mga membro han pamilya kinontra gud ha iya. Kondi waray tuguti ni Anna ito o an iya kalagas ngan maluya nga kahimsog nga makapugong ha iya padayon nga pag-aram ha Biblia.

Usa ka adlaw, ginsumatan ni Anna an iya anak nga babaye nga mapabawtismo na hiya. “Kon mapabawtismo ka, dadad-on ko ikaw ha balay nga nag-aataman han mga lagas,” binaton an anak ni Anna. Kondi, ini nga tarhog waray magpaluya kan Anna. Tungod han iya pisikal nga kahimtang, ginbawtismohan hiya ha iya kalugaringon nga balay.

Paonan-o ginios mahitungod hini an anak ni Anna? Nagbag-o an iya pagtagad, ngan nag-andam hiya hin espesyal nga pagkaon para ha iya iroy katapos han bawtismo. Katapos ginpakianhan niya an iya iroy, “Yana nga bawtismado ka na, ano an imo inaabat?” An baton ni Anna? “Pariho hin bag-o nga natawo!”

• Han Disyembre 1998, nakaistorya han duha nga Saksi an retirado nga opisyal han militar han kadaan nga Soviet Union. Tungod kay natoo hiya ha Maglalarang, inuyon hiya ha pag-aram ha Biblia, ngan an iya asawa inupod ha iya ha urhi. Madagmit an ira pag-uswag ngan waray pag-iha nagin diri-bawtismado nga mga magwarali. Han sunod nga panahon han katpaso, nabawtismohan an opisyal hadto. An daku nga gugma hini nga mag-asawa ha espirituwal nga mga butang nakakadasig ha ngatanan ha kongregasyon. Dugang pa, binulig hira ha pag-ayad han lokal nga balay basi magin matahom nga Kingdom Hall.