Nagkikinabuhi Ka ba Uyon ha Imo Dedikasyon?

“Kon ano an iyo pagbuhaton, buhata niyo ha kinasingkasing, sugad nga ha Ginoo, ngan diri tungod ha mga tawo.”—KOLOSAS 3:23.

 1. Ha sekular nga kahulogan, ano an iginpapasabot han pulong nga “dedikasyon”?

 PAONAN-O nahihimo han mga atleta an gimaopayi han ira buruhaton? Ha tennis, soccer, basketball, baseball, rumba ha pagdalagan, golf, o bisan ano iba nga isport, an gimaopayi nga atleta nakakadangat ha pungkay pinaagi la han diri nagluluya nga dedikasyon. Importante an pag-ataman han lawas ngan hunahuna. Naangay gud ini ha usa han mga kahulogan han pulong nga “dedikado,” nga “bug-os nga nakasentro ha partikular nga panhunahuna o buhat.”

 2. Ano an kahulogan han “dedikasyon” ha Biblia? Iilustrar.

² Kondi, ano an kahulogan han “dedikasyon” ha Biblia? An “pagdedikar” iginhubad tikang ha Hebreo nga berbo nga nangangahulogan “pagpabilin nga bulag; bumulag; bumaya.” a Ha kadaan nga Israel, ha turban han Hitaas nga Saserdote nga hi Aaron mayada ‘han baraan nga tigaman han dedikasyon,’ nga nagraranggat nga pudongpudong han uray nga bulawan nga igin-ukit an Hebreo nga mga pulong para han “An Pagkabaraan kan Jehova.” Nagpapahinumdom ito ha hitaas nga saserdote nga kinahanglan likyan niya an pagbuhat hin bisan ano nga makakahugaw han santuaryo “tungod kay an pudongpudong ngan an lana nga idirihog han iya Dios aada ha iya.”—Eksodo 29:6; 39:30; Lebitiko 21:12.

 3. Paonan-o sadang makaapekto ha aton paggawi an dedikasyon?

³ Makikita naton hini nga konteksto nga an dedikasyon usa ka seryoso nga butang. Nagpapasabot ito hin boluntaryo nga pagpakilala sugad nga surugoon han Dios, ngan nagkikinahanglan ito hin limpyo nga paggawi. Salit, maaapresyar naton kon kay ano nga ginkotar ni apostol Pedro hi Jehova nga nasiring: “Magin baraan kamo; kay ako baraan.” (1 Pedro 1:15, 16) Sugad nga dedikado nga mga Kristiano, mayada kita mabug-at nga responsabilidad nga kinahanglan magkinabuhi uyon ha aton dedikasyon, nga matinumanon tubtob ha kataposan. Kondi ano an nahiuupod ha Kristiano nga dedikasyon?—Lebitiko 19:2; Mateo 24:13.

 4. Paonan-o naton nadadangat an dedikasyon, ngan maipapariho ito ha ano?

⁴ Katapos makarawat naton an husto nga kahibaro kan Jehova nga Dios ngan ha iya mga katuyoan ngan kan Jesu-Kristo ngan ha iya bahin hiton nga mga katuyoan, personal nga nagdesisyon kita nga mag-aalagad ha Dios ha aton bug-os nga kasingkasing, hunahuna, kalag, ngan kusog. (Markos 8:34; 12:30; Juan 17:3) Bangin tagdon pa ngani ito sugad nga personal nga saad, usa nga waray-kondisyon nga dedikasyon ha Dios. An aton dedikasyon diri resulta han tigda nga pagbati han emosyon. Ginhunahuna ito hin maopay ngan mainampoon nga gintirutimbang, ginagamit an abilidad ha pangatadongan. Salit, diri ito temporaryo nga desisyon. Diri kita mahimo magin pariho ha usa nga nagtitikang mag-arado hin uma ngan nahunong ha katung-anan tungod kay matrabaho ito hinduro o tungod kay maiha pa an pag-ani o diri gud ito sigurado. Tagda an mga susbaranan han iba nga ‘nag-arado’ ha teokratiko nga responsabilidad bisan pa han makuri nga mga kahimtang.—Lukas 9:62; Roma 12:1, 2.

Waray Hira Hunong ha Ira Dedikasyon

 5. Paonan-o hi Jeremias nagin bantogan nga susbaranan han usa ka dedikado nga surugoon han Dios?

⁵ An panagna ni Jeremias ha Jerusalem ginbuhat ha sulod hin sobra 40 ka tuig (647-607 A.K.P.), ngan diri ito masayon nga buruhaton. Maaram  gud hiya han iya mga limitasyon. (Jeremias 1:2-6) Ginkinahanglan niya an kaisog ngan pagpailob ha pag-atubang ha masinupakon nga mga tawo han Juda adlaw-adlaw. (Jeremias 18:18; 38:4-6) Kondi, hi Jeremias sinarig kan Jehova nga Dios, nga nagparig-on ha iya salit pinamatud-an niya nga hiya usa ka totoo dedikado nga surugoon han Dios.—Jeremias 1:18, 19.

 6. Ano nga susbaranan an ipinakita ni apostol Juan para ha aton?

⁶ Kumusta man an matinumanon nga hi apostol Juan, nga gindistyero ha makuri ukyan nga isla han Patmos han lagas na hiya tungod ha ‘pagyakan mahitungod ha Dios ngan pagtestigo kan Jesus’? (Pahayag 1:9) Nagpailob hiya ngan nagkinabuhi ha iya dedikado nga kahimtang sugad nga Kristiano hin mga 60 ka tuig. Nabuhi hiya lahos han kabungkagan han Jerusalem ha mga kamot han Romano nga kasundalohan. Nakapribilehiyo hiya ha pagsurat hin usa nga Ebanghelyo, tulo nga inspirado nga surat, ngan han libro han Pahayag, nga nakita niya nga daan an girra han Armagedon. Hinmunong ba hiya han hinbaroan niya nga an Armagedon diri maabot ha iya panahon? Nanluya ba hiya? Waray, hi Juan nagpabilin nga matinumanon tubtob ha iya kamatayon, maaram nga bisan kon ‘an itinanda nga panahon hirani na,’ an katumanan han iya mga bisyon ha maabot pa nga panahon.—Pahayag 1:3; Daniel 12:4.

Moderno nga mga Susbaranan han Dedikasyon

 7. Paonan-o an usa nga bugto nagin maopay nga susbaranan han Kristiano nga dedikasyon?

⁷ Yana nga mga panahon, yinukot han matinumanon nga mga Kristiano an madasigon nga nagpabilin ha ira dedikasyon bisan kon namatay nga waray makita an Armagedon. An usa han sugad nga indibiduwal amo hi Ernest E. Beavor han Inglatera. Nagin Saksi hiya han 1939 ha tinikangan han Girra ha Kalibotan II, ngan binayaan niya an nag-uuswag nga negosyo ha panretrato para han media basi sumulod ha bug-os-panahon nga ministeryo. Tungod ha pagpabilin ha iya Kristiano nga pagkaneutral, napriso hiya hin duha ka tuig. An iya pamilya sinuporta ha iya, ngan han 1950 an iya tulo nga anak tinambong ha Watchtower Bible School of Gilead para ha pagbansay ha mga misyonero, ha New York. Hi Bugto Beavor madasigon gud ha iya pagwali nga buruhaton salit gintawag hiya han iya kasangkayan nga Armagedon Ernie. Maunungon nga nagkinabuhi hiya uyon ha iya dedikasyon, ngan tubtob ha iya kamatayon han 1986, iginpasamwak niya an pagkahirani han girra han Dios nga Armagedon. Waray niya hunahunaa an iya dedikasyon sugad nga halipot la nga kontrata ha Dios! b—1 Korinto 15:58.

8, 9. (a) Ano nga susbaranan an ipinakita han damu nga mga batan-on nga kalalakin-an ha Espanya durante han pagmando ni Franco? (b) Ano nga mga pakiana an angayan?

⁸ Usa pa nga susbaranan han diri-nagluluya nga kadasig an tikang ha Espanya. Durante han pagmando ni Franco (1939-75), ginatos han dedikado batan-on nga mga Saksi an nagpabilin  nga Kristiano nga neutral. Damu ha ira an naggasto hin napulo ka tuig o sobra pa ha mga prisohan han militar. Usa nga Saksi, hi Jesús Martín, napriso ha sulod hin 22 ka tuig. Ginkastigo gud hiya samtang priso ha militar ha Amerika del Norte. Makuri ini ngatanan, kondi waray hiya magkompromiso.

⁹ Agsob, diri gud maaram ini nga mga batan-on kon san-o, kon pagagawson pa ba hira, kay damu, sunodsunod an ira sentensya. Kondi, gintipigan nira an ira integridad ngan nagpabilin nga madasigon ha ministeryo samtang priso. Han an kahimtang nagtikang mag-uswag han 1973, damu hini nga mga Saksi, nga sobra 30 pa la an edad hiton nga panahon, an ginpagawas tikang ha prisohan ngan nagtikang dayon ha bug-os-panahon nga ministeryo, an iba nagin mga espesyal payunir ngan nagbibiyahe nga mga paramangno. Nagkinabuhi hira uyon ha ira dedikasyon ha prisohan, ngan an kadam-an nagpapadayon ha pagbuhat hito tikang han ira pakagawas. c Kumusta man kita yana nga panahon? Matinumanon ba kita ha aton dedikasyon pariho hini nga mga maunungon?—Hebreo 10:32-34; 13:3.

Husto nga Pagtagad ha Aton Dedikasyon

10. (a) Mationan-o naton sadang tagdon an aton dedikasyon? (b) Mationan-o gintatagad ni Jehova an aton pag-alagad ha iya?

¹⁰ Paonan-o naton gintatagad an aton dedikasyon ha Dios ha pagbuhat han iya kaburut-on? Ito ba an siyahan nga butang ha aton kinabuhi? Anoman an aton mga kahimtang, batan-on man o lagas, inasaw-an o solo, mahimsog o masakit, sadang mangalimbasog kita nga magkinabuhi uyon ha aton dedikasyon, sumala ha aton mga kahimtang. An kahimtang han usa ka tawo bangin magtugot ha iya nga mag-alagad ha bug-os-panahon nga ministeryo sugad nga payunir, sugad nga boluntaryo ha sanga nga opisina han Watch Tower Society, sugad nga misyonero, o nagbibiyahe nga ministro. An iba nga mga ginikanan, ha luyo nga bahin, bangin okupado gud ha pagmangno han pisikal ngan espirituwal nga mga panginahanglan han pamilya. An ira ba pipira ka oras nga magagasto ha ministeryo kada bulan gutiay an bili ha mga mata ni Jehova kay han damu nga mga oras nga ginagasto han usa ka bug-os-panahon nga surugoon? Diri. An Dios diri gud naglalaom tikang ha aton han bisan ano nga waray kita. Iginsaysay ni apostol Pablo ini nga prinsipyo: “Kon mayada pag-andam, ito kinakarawat sugad han sadang han tawo, diri sugad han iya pagkawaray sadang.”—2 Korinto 8:12.

11. Ha ano nadepende an aton katalwasan?

¹¹ Ha anoman nga kahimtang, an aton katalwasan nadepende, diri ha anoman nga ginbubuhat naton, kondi ha diri-takos nga kalooy ni Jehova pinaagi kan Kristo Jesus, an aton Ginoo. Hi Pablo matin-aw nga nagsaysay: ‘An ngatanan nagpakasala, ngan nawad-an hira han himaya han Dios; ngan usa ka hatag nga waray bayad nga hira ginpakamatadong pinaagi han iya diri-takos nga kalooy pinaagi han pagtubos nga aada kan Kristo Jesus.’ Kondi, an aton mga buruhaton  amo an ebidensya han aton aktibo nga pagtoo ha mga saad han Dios.—Roma 3:23, 24; Jakobo 2:17, 18, 24.

12. Kay ano nga diri kita sadang maghimo hin mga pagtanding?

¹² Diri kinahanglan itanding naton ha iba kon pira kadamu nga oras an ginagasto naton ha pag-alagad ha Dios, an aton naipahamutang nga mga literatura han Biblia, o an kadamu han mga pag-aram ha Biblia nga aton gindudumara. (Galasia 6:3, 4) Anoman an aton nahimo ha Kristiano nga ministeryo, kinahanglan hinumduman naton ngatanan an mapainubsanon nga mga pulong ni Jesus: “Sugad man kamo, kon iyo mabuhat ngatanan an iginsugo ha iyo, masiring: kami waray pulos nga mga surugoon, kay amon ginbuhat an nahitutungod ha amon nga buruhaton.” (Lukas 17:10) Mationan-o kaagsob nga masisiring gud naton nga ginbuhat naton an ‘ngatanan nga iginsugo’ ha aton? Salit an pakiana amo ini, Ano an sadang magin kalidad han aton pag-alagad ha Dios?—2 Korinto 10:17, 18.

Pabilhi an Tagsa nga Adlaw

13. Ginkikinahanglan naton an ano nga paggios samtang ginbubuhat naton an aton dedikasyon?

¹³ Katapos sagdonan an mga asawa, mga bana, mga anak, mga ginikanan, ngan mga uripon, hi Pablo nagsurat: “Kon ano an iyo pagbuhaton, buhata niyo ha kinasingkasing, sugad nga ha Ginoo, ngan diri tungod ha mga tawo; Kay hinbaroan niyo nga tikang ha Ginoo makakarawat niyo an balos nga panurundon: mag-alagad kamo ha Ginoo nga hi Kristo.” (Kolosas 3:23, 24) Diri kita nag-aalagad basi ipakita ha mga tawo an aton nahihimo ha pag-alagad kan Jehova. Nangangalimbasog kita ha pag-alagad ha Dios pinaagi han pagsunod ha susbaranan ni Jesu-Kristo. Ginbuhat niya an iya madaliay la nga ministeryo nga mayada pagkaapurado.—1 Pedro 2:21.

14. Ano nga pahamangno an iginhatag ni Pedro mahitungod han kataposan nga mga adlaw?

¹⁴ Ipinakita liwat ni apostol Pedro an pagkaapurado. Ha iya ikaduha nga surat, nagpahamangno hiya nga ha kataposan nga mga adlaw,  maabot an mga magyurubit—mga apostata ngan mga maruhaduhaon—nga, sumala ha ira kalugaringon nga karuyag, magruruhaduha han presensya ni Kristo. Kondi, hi Pedro nagsiring: “An Ginoo diri mag-aalang mahitungod ha iya saad, sugad han ginhuhunahuna han iba han pagkaalang; kondi mapailubon ha iyo, ngan diri buot nga mayada mawara, kondi nga an ngatanan magbasol. Kondi an adlaw han Ginoo maabot sugad hin usa nga kawatan.” Oo, an adlaw ni Jehova sigurado nga maabot. Salit, sadang tagdon naton ito adlaw-adlaw sugad nga sigurado nga maabot ngan marig-on an aton pagtoo ha saad han Dios.—2 Pedro 3:3, 4, 9, 10.

15. Paonan-o naton sadang kitaon an tagsa nga adlaw ha aton kinabuhi?

¹⁵ Basi magkinabuhi uyon ha aton dedikasyon ha husto nga paagi, sadang gamiton naton an tagsa nga adlaw ha kadayawan ni Jehova. Ha kataposan han tagsa nga adlaw, makakalingi ba kita hito ngan kitaon kon paonan-o kita nakaamot ha pipira nga paagi ha pagbaraan han ngaran han Dios ngan pagpasamwak han maopay nga sumat han Ginhadian? Bangin pinaagi ito han aton limpyo nga paggawi, han aton makaparig-on nga pakiistorya, o han aton mahigugmaon nga pagtagad ha pamilya ngan mga sangkay. Ginamit ba naton an mga higayon nga ipaangbit an aton Kristiano nga paglaom ha iba? May nabuligan ba kita nga maghunahuna hin seryoso mahitungod han mga saad han Dios? Patuboon naton an usa ka hiyas nga birilhon ha espirituwal kada adlaw, nagtitirok, siring pa, hin totoo, espirituwal nga deposito ha bangko.—Mateo 6:20; 1 Pedro 2:12; 3:15; Jakobo 3:13.

Tipigi an Imo Panan-aw nga Matin-aw

16. Ha ano nga mga paagi nangangalimbasog hi Satanas ha pagpaluya han aton dedikasyon ha Dios?

¹⁶ Nagkikinabuhi kita ha mga panahon nga nagigin mas makuri para ha mga Kristiano. Hi Satanas  ngan an iya mga ahente nangangalimbasog nga diri magin matin-aw an kaibahan han maopay ngan han maraot, han limpyo ngan han mahugaw, han moral ngan han imoral, han husto ngan han sayop. (Roma 1:24-28; 16:17-19) Ginhihimo niya nga masayon para ha aton nga hugawan an aton mga kasingkasing ngan mga hunahuna pinaagi han mga salida ha TV o ha Internet. An aton espirituwal nga panan-aw mahimo magin diri-matin-aw, o diri nakasentro, salit diri naton masabtan an iya malimbong nga mga buhat. An aton determinasyon nga magkinabuhi uyon ha aton dedikasyon mahimo manluya ngan an aton pagkapot ha “arado” kon aton ikompromiso an aton espirituwal nga mga kalidad.—Lukas 9:62; Filipos 4:8.

17. Paonan-o an sagdon ni Pablo mabulig ha aton nga matipigan an aton relasyon ha Dios?

¹⁷ Salit napapanahon gud an mga pulong ni Pablo ha kongregasyon ha Tesalonika: “Kay an kaburut-on han Dios amo ini, an pagkaputli ha iyo, nga maglikay kamo ha pakighilawas. Nga an tagsatagsa ha iyo mahibaro ha pagtipig ha iya kalugaringon nga surudlan ha pagkaputli ngan ha kadungganan. Diri ha kaipa ha diri asawa, sugad ha mga Hentil nga diri nakilala ha Dios.” (1 Tesalonika 4:3-5) Tungod ha imoralidad ginpaiwas an iba tikang ha Kristiano nga kongregasyon—adton nagpasibaya ha ira dedikasyon ha Dios. Ira gintugotan nga manluya an ira relasyon ha Dios, salit diri na hiya importante ha ira kinabuhi. Kondi, hi Pablo nagsiring: “Waray kita pagtawaga han Dios tungod ha kahugawan, kondi tungod ha pagkaputli. Busa an nagsisikway, waray pagsisikway han tawo, kondi han Dios, nga naghatag ha iyo han iya [baraan nga espiritu].”—1 Tesalonika 4:7, 8.

Ano an Imo Determinasyon?

18. Ano an sadang magin determinasyon naton?

¹⁸ Kon inaapresyar naton an pagkaseryoso han aton dedikasyon kan Jehova nga Dios, sadang magin determinado kita nga buhaton an ano? An aton marig-on nga determinasyon amo an pagkaada hin maopay nga konsensya may kalabotan ha aton paggawi ngan ha aton ministeryo. Hi Pedro nagsagda: “Nga mayada niyo maopay nga konsensya; basi, kon kamo paglilibakon, pagpakaalohan hira nga magpapakaraot han iyo magopay nga ginawian ha kan Kristo.” (1 Pedro 3:16) Bangin mag-antos kita ngan atubangon an pag-abuso tungod han aton Kristiano nga paggawi, kondi nag-antos liwat hi Kristo tungod han iya pagtoo ngan pagkamaunungon ha Dios. “Ha pagkaagi nga hi Kristo nag-antos ha unod,” siring ni Pedro, “mag-andam man kamo hin sugad nga hunahuna; kay an nag-antos ha unod nabulag ha kasal-anan.”—1 Pedro 4:1.

19. Ano an karuyag naton nga igsiring mahitungod ha aton?

¹⁹ Tinuod, an aton marig-on nga determinasyon nga magkinabuhi uyon ha aton dedikasyon magpapanalipod ha aton tikang ha mga lit-ag han kalibotan ni Satanas nga masakit ha espirituwal, moral, ngan ha pisikal. Kondi mayada labaw pa hito, makakasarig kita nga mayada kita han pag-uyon han Dios, nga maoroopay gud kay han bisan ano nga igintatanyag ni Satanas ngan han iya mga ahente. Salit, diri gud unta igsiring nga binayaan naton an aton gugma han siyahan nga hinbaroan naton an kamatuoran. Lugod, igsiring unta ha aton an ginsiring ha siyahan-siglo nga kongregasyon ha Tiatira: “Maaram ako ha imo mga buhat, ngan an imo gugma, ngan an imo pagtoo, ngan an imo pagkaministro, ngan an imo pagpailob, ngan, nga an imo urhi nga mga buhat labi pa kay han siyahan.” (Pahayag 2:4, 18, 19) Oo, diri kita magin malanhod ha aton dedikasyon, kondi ‘maabtik ha espiritu,’ madasigon tubtob ha kataposan—ngan an kataposan hirani na.—Roma 12:11; Pahayag 3:15, 16.

Nahinunumduman Mo Ba?

• Ano an nahiuupod ha dedikasyon?

• Ano nga kadaan ngan moderno nga mga susbaranan han dedikado nga mga surugoon han Dios an angay naton subaron?

• Mationan-o naton sadang tagdon an aton pag-alagad ha Dios?

• Ano an sadang magin determinasyon naton may kalabotan ha aton dedikasyon ha Dios?

[Mga footnote]

[Mga Pakiana]

[Retrato ha pahina 15]

Hi Jeremias nagpabilin nga matinumanon bisan pa han maraot nga pagtrato

[Retrato ha pahina 16]

Hi Ernest Beavor nagpakita hin susbaranan para ha iya mga anak sugad nga madasigon nga Kristiano

[Retrato ha pahina 17]

Ginatos han batan-on nga mga Saksi ha mga prisohan ha Espanya an nagtipig han ira integridad

[Mga Retrato ha pahina 18]

Aton patuboon kada adlaw an positibo nga hiyas ha espirituwal