Pagkinabuhi ha mga Peligro

“Ngatanan nga imo binubuhat kada adlaw—upod na an pagkaturog—may peligro nga magin kataposan na nga butang nga imo mahihimo.”—Discover nga magasin.

AN KINABUHI iginpariho ha paglakat ha lugar nga ginlubngan hin bomba, tungod kay an kadaot o kamatayon mahimo mahitabo ha bisan ano nga panahon, agsob nga waray pahamangno. An mga hinungdan han peligro magkaiba ha tagsa nga nasud. Nag-uupod ito hin mga aksidente ha dalan, girra sibil, gutom, AIDS, kanser, sakit ha kasingkasing, ngan damu iba pa nga mga butang. Pananglitan, ha sur nga bahin han Sahara ha Aprika, an AIDS amo an nangunguna nga parapamatay, nga ha bag-o pa la nga tuig “2.2 milyon nga tawo an namatay, 10 ka pilo han namatay ha ngatanan nga mga girra sibil ha Aprika,” siring han U.S.News & World Report.

Samtang yana, an kalibotan nagasto hin binilyon ha pagpahilawig han kinabuhi ngan pag-iban han peligro han sakit ngan pagkabaldado. Damu han mga ideya nga iginpresentar, sugad han maopay nga mga rutina ha pagkaon ngan pag-inom ngan pisikal nga pag-ehersisyo, nagkaada hin maopay nga resulta. Kondi, mayada surok han masasarigan nga impormasyon han ngatanan importante nga bahin han pagkinabuhi nga makakabulig ha imo ha pagpahimulos hin mas talwas, mas may kasigurohan nga kinabuhi. Ito nga surok amo an Biblia. Nagsusulod ito hin mga giya

ha pagdumara han damu nga mga kabaraka nga nakakaapekto han aton kahimsog ngan kaopayan. Siyempre, an Biblia diri naghihisgot hin detalyado han ngatanan nga problema. Kondi, nagtatagana ito hin maopay nga mga prinsipyo ha paggiya ha aton ha mga butang sugad han rutina ha pagkaon, pisikal nga kahimsog, panhunahuna, sekso, paggamit han alkohol, tabako, ngan han tinatawag nga nakakaliaw nga mga droga, ngan damu iba pa nga mga butang.

Para ha iba an kinabuhi puno liwat hin pinansyal nga mga problema. May kalabotan liwat hini, an Biblia nabulig ha aton. Diri la ito nagdadasig hin maaramon nga pagtagad ngan pagdumara han kuwarta kondi nagpapakita liwat ito kon paonan-o magin maoroopay nga empleyado o agaron. Matin-aw, an Biblia usa nga maopay nga giya, diri la para han pinansyal nga seguridad ngan pisikal nga kaopayan, kondi para ha kinabuhi mismo. Karuyag mo ba hisabtan kon mationan-o kapraktikal an Biblia yana nga panahon? Alayon ipadayon an pagbasa.