Ano an Espirituwal nga Paraiso?

HI Gustavo nagtubo ha gutiay nga siyudad ha Brazil. a Tikang ha pagkabata gintutdoan hiya nga an maopay nga mga tawo makadto ha langit kon mamatay. Diri hiya maaram mahitungod han katuyoan han Dios nga an matinumanon nga katawohan magpapahimulos hin hingpit nga kinabuhi ha paraiso ha tuna ha maabot nga panahon. (Pahayag 21:3, 4) Ngan mayada pa diri niya hinbabaroan. Diri hiya maaram nga bisan yana, mahimo hiya mahingadto ha espirituwal nga paraiso.

Hinbatian mo na ba an mahitungod hiton espirituwal nga paraiso? Maaram ka ba kon ano ito ngan kon ano an ginkikinahanglan basi magin kaupod hito? Bisan hin-o nga naruruyag magin totoo nga malipayon kinahanglan mahibaro mahitungod hito nga paraiso.

Pakabiling han Espirituwal nga Paraiso

An pagsiring nga bisan yana nga panahon an tawo mahimo makaukoy ha paraiso baga hin imposible toohan. Ini nga kalibotan diri gud paraiso. Damu hinduro nga mga tawo an nakakaeksperyensya han iginsaysay han kadaan Hebreohanon nga hadi: “Kitaa, an mga luha hito nga gintatalumpigos, ngan hira waray maglilipay; ngan ha dapig han ira mga magtatalumpigos nakada an gahum: kondi waray ha ira maglilipay.” (Eklesiastes 4:1) An ginatos ka milyon nga mga tawo nag-aantos ilarom han maglimbong nga sistema ha politika, relihiyon, ngan ekonomiya, ngan waray hira kagawasan, waray “maglilipay.” Damu pa an nangangalimbasog ha pagbayad han ira mga kabaraydan, pagpadaku han ira mga anak, ngan pagbuhat hin damu pa nga mga butang nga ginkikinahanglan basi maglampos. Hira liwat nagkikinahanglan hin maglilipay, usa nga magpapagaan han pinas-an bisan la gutiay. Para ha ira ngatanan, an kinabuhi imposible magin sugad hin ha paraiso.

Hain, kon sugad, an espirituwal nga paraiso? Bueno, an Ingles nga pulong “paradise” may kalabotan ha Griego, Persiano, ngan Hebreo nga mga pulong nga ngatanan nagpapasabot hin parke o hardin, usa nga mamurayawon, makarepresko nga lugar. An Biblia nagsasaad nga maabot an panahon nga an tuna magigin pisikal nga paraiso, pariho hin hardin nga urukyan para han waray sala nga katawohan. (Salmo 37:10, 11) Samtang ginhuhunahuna ini, nasasabtan naton nga an espirituwal nga paraiso amo an palibot nga makaruruyag ha mga mata ngan mahayahay ha mga ugat, nagtutugot ha usa nga magpahimulos hin kamurayawan ha iya igkasi-tawo ngan ha Dios. Yana, sugad han hinbaroan ni Gustavo, naeksister an sugad nga paraiso, ngan nag-uupod ito han nagdadamu nga mga tawo.

Ha edad nga 12 anyos, nagdesisyon hi Gustavo nga magin padi han Romano Katoliko. Ha pagtugot han iya mga ginikanan, sinulod hiya ha relihiyoso nga seminaryo. Didto nainteres hiya ha musika, teatro, ngan politika, nga sinusuportahan han iglesia basi madani an mga batan-on. Maaram hiya nga sadang ihatag han padi an iya panahon ha mga tawo ngan diri hiya mahimo mag-asawa. Kondi, an iba han kapadian ngan mga seminarista nga kilala ni Gustavo mayada imoral nga mga binuhatan. Ha sugad nga palibot, waray pag-iha nagtikang mag-ininom hin sobra hi Gustavo. Matin-aw nga waray pa niya mabilngi an espirituwal nga paraiso.

Usa ka adlaw, nabasa ni Gustavo an tract han Biblia nga naghihisgot mahitungod han tunan-on nga paraiso. Tungod hito nahunahuna niya an katuyoan han kinabuhi. Hiya nasiring: “Gintikangan  ko basahon pirme an Biblia, kondi waray ko hisabti ito. Waray ko ngani makita nga may ngaran an Dios.” Binaya hiya ha seminaryo ngan nakiistorya ha mga Saksi ni Jehova, naghahangyo hin bulig nga masabtan an Biblia. Katapos hito, nag-uswag dayon hiya ngan waray pag-iha igindedikar an iya kinabuhi ha Dios. Hi Gustavo nahibabaro mahitungod han espirituwal nga paraiso.

Usa nga Grupo han Katawohan Para ha Ngaran han Dios

Hinbaroan ni Gustavo nga an ngaran han Dios, nga Jehova, usa nga importante nga impormasyon para ha estudyante ha Biblia. (Eksodo 6:3) Importante ito nga bahin han totoo nga pagsingba. Hi Jesus nagtutdo ha iya mga sumurunod nga mag-ampo: “Amay namon, nga aada ka ha langit, gindadayaw an imo ngaran.” (Mateo 6:9) Ha paghisgot may kalabotan ha mga Hentil nga nagin mga Kristiano, hi disipulo Jakobo nagsiring: “[Iginbirik han Dios an iya atensyon] ha mga Hentil, ha pagkuha tikang ha ira hin nasud tungod ha iya ngaran.” (Buhat 15:14) Ha siyahan nga siglo, an “nasud tungod ha iya ngaran” amo an Kristiano nga kongregasyon. Mayada ba mga tawo para ha ngaran han Dios yana nga panahon? Oo, ngan hinbaroan ni Gustavo nga ito nga katawohan amo an mga Saksi ni Jehova.

An mga Saksi ni Jehova aktibo ha 235 nga nasud ngan teritoryo. Sobra unom ka milyon hira nga ministro, ngan walo pa ka milyon nga mga interesado an natambong ha ira mga katirok. Kaylap nga ginkikilala tungod han ira ministeryo ha publiko, ginsusunod nira an mga pulong ni Jesus: “Ini nga Maopay nga Sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Kondi, kay ano nga inabat ni Gustavo nga nabilngan niya an espirituwal nga paraiso ha pakig-upod ha mga Saksi ni Jehova? Hiya siniring: “An akon nakita ha kalibotan ngan labi na ha seminaryo akon igintanding ha akon nakita ha mga Saksi ni Jehova. An daku nga kaibahan amo an gugma ha butnga han mga Saksi.”

Pariho an komento han iba mahitungod han mga Saksi ni Jehova. Hi Miriam, usa nga batan-on nga babaye nga taga-Brazil, siniring: “Diri ako maaram malipay, bisan ha akon pamilya. Ha mga Saksi ni Jehova nakita ko ha siyahan nga panahon an gugma nga nagios.” An lalaki nga hi Christian nagsiring: “Ha panapanahon nakigbahin ako ha espiritismo, kondi diri importante ha akon an relihiyon. Mas importante ha akon an akon katungdanan ha sosiedad ngan an akon trabaho sugad nga enhinyero. Kondi, han an akon asawa nagtikang mag-aram ha Biblia kaupod han mga Saksi ni Jehova, nakita ko an iya pagbag-o. Nainteres liwat ako han kalipay ngan kadasig han Kristiano nga kababayin-an nga nabisita ha iya.” Kay ano nga nagyayakan an mga tawo hin sugad mahitungod han mga Saksi ni Jehova?

Ano an Espirituwal nga Paraiso?

Usa nga butang nga nakakahimo han mga Saksi ni Jehova nga naiiba amo an ira apresasyon han kahibaro ha Biblia. Natoo hira nga an Biblia matuod ngan ito an Pulong han Dios. Salit, diri hira natatagbaw ha paghibaro la han mga doktrina han ira relihiyon. Mayada hira nagpapadayon nga programa han personal nga pag-aram ngan pagbasa ha Biblia. Kon mas maiha na nga nakikig-upod an usa ha mga Saksi ni Jehova, mas mahibabaro hiya mahitungod ha Dios ngan han Iya kaburut-on sugad han iginpahayag ha Biblia.

An sugad nga kahibaro nagtatalwas han mga Saksi ni Jehova tikang ha mga butang nga nagkukuha han kalipay han mga tawo, sugad han mga patootoo ngan nakakadaot nga mga ideya. Hi Jesus nagsiring: “An kamatuoran magluluwas ha iyo,” ngan nakikita han mga Saksi ni Jehova nga totoo ini. (Juan 8:32) Hi Fernando, nga nagbuhat hadto hin espiritismo, nasiring: “An paghibaro mahitungod han kinabuhi nga waray kataposan daku gud nga kagawasan. Nahadlok ako nga bangin mamatay ako o an akon mga ginikanan.” Pinaagi han kamatuoran nawara an kahadlok ni Fernando ha kalibotan han mga espiritu ngan ha tinatawag nga kinabuhi-katapos-han-kamatayon.

Ha Biblia, an kahibaro ha Dios may kalabotan gud ha paraiso. Hi propeta Isaias nagsiring: “Diri hira magdadaot o diri maggugunaw ha bug-os ko nga bukid nga baraan; kay an tuna mapupuno han  hibaro ni Jehova, sugad nga an katubigan nagpupuno han dagat.”—Isaias 11:9.

Siyempre, an kahibaro la diri igo na ha pagdara han kamurayawan nga igintagna ni Isaias. An tawo angay gumios sumala ha iya hinbabaroan. Hi Fernando nagkomento: “Kon ginbubuhat han tawo an mga bunga han espiritu, nakakabulig hiya para han espirituwal nga paraiso.” Gin-uunabi ni Fernando an mga pulong ni apostol Pablo, nga nagtawag han maopay nga mga kalidad nga sadang patuboon han usa nga Kristiano nga “[mga] bunga han espiritu.” Iya iginlista ito sugad nga “gugma, kalipay, pakigdait, pagkamailob, pagkamalolooyon, pagkamaopay, pagkamatinoohon, pagkaaghop, [pagpugong] ha kalugaringon.”—Galasia 5:22, 23.

Nakikita mo ba kon kay ano nga an pakig-upod ha komunidad han mga indibiduwal nga nangangalimbasog ha pagpatubo han sugad nga mga kalidad pariho han pagin aadto ha paraiso? An espirituwal nga paraiso nga igintagna ni propeta Sepania maeksister ha sugad nga katawohan. Hiya nagsiring: “Diri [hira] magbubuhat han karat-an, o diri magyayakan hin mga buwa; diri man an malimbungon nga dila hiaagian dida ha ira baba; kay hira manginginaon ngan manluluob, ngan waray bisan hin-o nga maghahadlok ha ira.”—Sepania 3:13.

An Importante nga Bahin han Gugma

Bangin naobserbahan mo nga gugma an siyahan han mga bunga han espiritu nga gin-unabi ni Pablo. Ini an kalidad nga ginhihisgotan gud han Biblia. Hi Jesus nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:35) Oo, diri hingpit an mga Saksi ni Jehova. Usahay diri hira nagkakauruyon sugad la han mga apostol ni Jesus. Kondi hinigugma gud nira an kada usa, ngan igin-aampo nira an suporta han baraan nga espiritu samtang ginpapatubo nira ini nga kalidad.

Sugad nga resulta, naiiba an ira asosasyon. Waray araway han tribo o nagbabahin nga nasyonalismo ha ira. Ha pagkamatuod, ginpanalipdan han damu nga mga Saksi nga nakada ha butnga han araway han tribo ngan pagpoo han rasa durante han ikatarapos han ika-20 ka siglo an usa kag usa bisan kon nameligro an ira kalugaringon nga mga kinabuhi. Bisan kon “tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan,” mayada hira pagkaurosa nga makuri hisabtan kon diri mo maeksperyensyahan ito.—Pahayag 7:9.

Paraiso Para Hadton Nagbubuhat han Kaburut-on han Dios

Waray lugar ha espirituwal nga paraiso an kahakog, imoralidad, ngan pagkamakikalugaringon. Ginsusumatan an mga Kristiano: “Diri kamo angay umuyon hini nga panahon: Kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.” (Roma 12:2) Kon nagkikinabuhi kita hin limpyo, maopay ha moral nga kinabuhi ngan nagbubuhat han kaburut-on han Dios ha iba nga mga paagi, nabulig kita pagtukod han espirituwal nga paraiso ngan nakakaamot kita ha aton personal nga kalipayan. Nakita ni Carla nga totoo ini. Hiya nasiring: “Gintutdoan ako han akon amay nga magin maduruto ha trabaho basi magin independente ha pinansyal. Kondi bisan kon umabat ako hin seguridad tungod han akon pag-eskwela ha unibersidad, waray ko maeksperyensyahi an pagkaurosa han pamilya ngan an seguridad nga maihahatag la han kahibaro ha Pulong han Dios.”

Siyempre, an pagpahimulos han espirituwal nga  paraiso diri nagwawara han mga problema ha kinabuhi. Nagkakasakit pa gihapon an mga Kristiano. An nasud nga ira gin-uukyan mahimo maapektohan han girra sibil. Damu an nag-aantos han kakablas. Kondi, an pagkaada duok nga relasyon kan Jehova nga Dios—nga amo an importante nga bahin han espirituwal nga paraiso—nangangahulogan nga makakalaom kita han iya suporta. Oo, ginhahangyo kita niya nga ‘ihatag an aton mga kabaraka ha iya,’ ngan damu an makakagpamatuod han urusahon nga mga paagi nga iya sinusuportahan hira ha pinakamakuri nga mga kahimtang. (Salmo 55:22; 86:16, 17) Nagsasaad an Dios nga maupod ha iya mga magsiringba bisan ha “patag han lambong han kamatayon.” (Salmo 23:4) An pagsarig ha pagkadisidido han Dios ha pagsuporta ha aton nakakabulig ha pagtipig han aton “kamurayawan han Dios, nga labaw ha ngatanan nga hibabroan,” nga amo an yawi ha espirituwal nga paraiso.—Filipos 4:7.

Pagkaada Bahin ha Espirituwal nga Paraiso

Kadam-an nga mga tawo an nalilipay ha pagbisita ha parke o hardin. Nalilipay hira nga mamasyada didto o bangin lumingkod ha bangko ngan pahimulsan an mga palibot. Ha pariho nga paagi, damu an nalilipay ha pakig-upod ha mga Saksi ni Jehova. Naoobserbahan nira nga an asosasyon makarepresko, may kamurayawan, ngan nagpapakusog. Kondi, an matahom nga hardin kinahanglan atamanon kon titipigan ito sugad nga paraiso. Ha sugad nga paagi, naeksister an espirituwal nga paraiso hinin diri gud sugad-paraiso nga kalibotan tungod la kay ginkukultibar ito han mga Saksi ni Jehova, ngan ginbibendisyonan han Dios an ira mga pangalimbasog. Paonan-o, kon sugad, magkakaada importante nga bahin an usa para hito nga paraiso?

Siyahan, kinahanglan makig-upod ka ha usa nga kongregasyon han mga Saksi ni Jehova, mag-aram ha Biblia kaupod nira, ngan magkaada kahibaro ha Biblia nga amo an pundasyon han espirituwal nga paraiso. Hi Carla nagsiring: “Waray espirituwal nga paraiso kon waray espirituwal nga pagkaon.” Nag-uupod ini han regular nga pagbasa ha Pulong han Dios ngan paghunahuna han imo ginbasa. An kahibaro nga nakuha magpapaduok ha imo kan Jehova nga Dios, ngan hihigugmaon mo hiya. Mahibabaro ka liwat pakiistorya ha iya ha pag-ampo ngan hangyoon an iya giya ngan an iya espiritu ha pagsuporta ha imo samtang binubuhat mo an iya kaburut-on. Ginsumatan kita ni Jesus nga magpadayon ha pag-ampo. (Lukas 11:9-13) Hi apostol Pablo nagsiring: “Mag-ampo . . . ha waray udong-udong.” (1 Tesalonika 5:17) An pribilehiyo ha pakiistorya ha Dios ha pag-ampo nga may bug-os nga pagsarig nga namamati hiya ha imo amo an importante nga bahin han espirituwal nga paraiso.

Samtang nalabay an panahon, mag-uuswag an imo kinabuhi pinaagi han imo hinbabaroan, ngan maabot an panahon nga maruruyag ka ha pagsumat hito ha iba. Ngan masusunod mo an sugo ni Jesus: “Iglawag niyo an iyo mga suga ha atubangan han mga tawo, basi hira kumita han iyo mga magopay nga buhat, ngan maghimaya hira ha iyo Amay nga aadto ha langit.” (Mateo 5:16) An pagsumat ha iba mahitungod han kahibaro kan Jehova nga Dios ngan kan Jesu-Kristo ngan an paghimaya han daku nga gugma nga iginpapakita hini nira ha katawohan nagriresulta hin daku nga kalipay.

Tiarabot an panahon nga an bug-os nga tuna magigin paraiso—pariho hin hardin nga lugar nga waray polusyon ngan angayan nga urukyan para han matinumanon nga katawohan. An pag-eksister han espirituwal nga paraiso hinin “magpakalilisang nga mga panahon” amo an pamatuod han gahum han Dios ngan pagpakita han iya mahihimo ngan pagbubuhaton ha tiarabot.—2 Timoteo 3:1.

Bisan yana, adton nagpapahimulos han espirituwal nga paraiso nakakaeksperyensya han espirituwal nga katumanan han Isaias 49:10: “Diri hira gugutumon o diri uuhawon; diri man an kapaso o diri man an adlaw mahampak ha ira: kay hiya nga may kalooy ha ira magmamando ha ira, bisan pinaagi han mga burabod han tubig hiya magmamando ha ira.” Pamamatud-an ni José an pagkatotoo hito. Naghandom hiya nga magin bantogan nga musikero, kondi nakabiling hiya hin mas daku nga katagbaw ha pag-alagad ha Dios kaupod han Kristiano nga kongregasyon. Hiya nasiring: “Yana nagpapahimulos ako hin mapulsanon nga kinabuhi. Inaabat ko an kasigurohan ha sulod han Kristiano nga pagminagburugto, ngan maaram ako nga hi Jehova mahigugmaon nga Amay nga aton masasarigan.” An kalipay ni José—ngan han minilyon nga iba pa nga pariho ha iya—iginsaysay hin maopay ha Salmo 64:10: “An mga magtadong magmamalipay kan Jehova, ngan maayop dida ha iya.” Maopay gud ito nga paghulagway han espirituwal nga paraiso!

[Footnote]

[Retrato ha pahina 10]

Samtang nagpapahimulos han espirituwal nga paraiso, bulig ha pagpahaluag hito!