Istorya han Kinabuhi

Ginparig-on ni Jehova ha Ngatanan Ko nga mga Adlaw

IGINSUMAT NI FORREST LEE

Ginkompiskar pa la han mga polis an amon mga ponograpo ngan an amon literatura han Biblia. An Girra ha Kalibotan II nagin hinungdan basi aghaton han mga nakontra an bag-o nga gobernador-heneral han Canada nga ideklara nga ilegal an buruhaton han mga Saksi ni Jehova. Nahitabo ini han Hulyo 4, 1940.

WARAY manluya bisan pa han nahitabo, kinuha kami hin dugang nga literatura tikang ha gintagoan hito ngan nagpadayon ha amon pagwali. Pirme ko nahinunumduman an mga pulong ni Tatay hito nga okasyon: “Diri kita maundang tungod la hito. Ginsugo kita ni Jehova nga magwali.” Hito nga panahon, aktibo ako nga diyes-anyos an pangidaron. Kondi bisan yana, an determinasyon ni Tatay ngan an iya kadasig ha ministeryo padayon pa gihapon nga nagpapahinumdom kon paonan-o an aton Dios, hi Jehova, nagpaparig-on han iya mga maunungon.

Han sunod nga panahon nga ginpaundang kami han mga polis, diri la kay ginkuha nira an amon literatura kondi ira liwat ginpriso hi Tatay, ginbayaan hi Nanay nga may upat nga kabataan. Nahitabo ito han Septyembre 1940 ha Saskatchewan. Waray pag-iha katapos hito ginpaiwas ako ha eskwelahan tungod ha pagsunod han akon binansay ha Biblia nga konsensya ngan ha diri pagsaludo ha bandera o pagkanta han kanta han nasud. An pagpadayon han akon pag-eskwela pinaagi ha surat naghatag ha akon hin maipapahiuyon nga eskedyol, ngan mas nakigbahin ako ha pagwali nga buruhaton.

Han 1948 mayada panawagan para han mga payunir, an bug-os-panahon nga mga ministro han mga Saksi ni Jehova, nga bumalhin ngadto ha este nga baybayon han Canada. Salit kinadto ako basi magpayunir ha Halifax, Nova Scotia, ngan ha Cape Wolfe, Prince Edward Island. Han sumunod nga tuig, gindapit ako nga magtrabaho hin duha ka semana ha sanga nga opisina han mga Saksi ni  Jehova ha Toronto. Iton duha ka semana nagin sobra unom may balos nga tuig ha pag-alagad. Inabot an panahon, nakilala ko hi Myrna, nga nahigugma liwat kan Jehova, ngan ginkasal kami han Disyembre 1955. Nag-ukoy kami ha Milton, Ontario, ngan waray pag-iha naporma didto an bag-o nga kongregasyon. Nagin Kingdom Hall an basement han amon balay.

Hingyap ha Pagpahaluag han Amon Ministeryo

Han sumunod nga mga tuig, sunodsunod nga nagkaanak kami hin unom. Hi Miriam an amon suhag. Katapos hi Charmaine, Mark, Annette, Grant, ngan an kataposan hi Glen. Agsob nga ha akon pag-uli naaabotan ko an akon gudtiay nga mga anak nga nalingkod ha salog palibot ha pugon, nga ginbabasahan ni Myrna han Biblia, ginsasaysayan han mga asoy han Biblia ngan iginpapasilsil ha ira mga kasingkasing an totoo nga gugma kan Jehova. Tungod han iya mahigugmaon nga suporta, an ngatanan namon nga mga anak nagkaada igo nga kahibaro ha Biblia ha temprano nga pangidaron.

An kadasig han akon amay ha ministeryo nagbilin hin marig-on nga impresyon ha akon hunahuna ngan kasingkasing. (Proberbios 22:6) Salit, han 1968, han an mga pamilya han mga Saksi ni Jehova gindapit nga bumalhin ngadto ha Sentral ngan Amerika del Sur basi bumulig ha pagwali nga buruhaton, hingyap han amon pamilya nga karawaton ito nga panawagan. Hito nga panahon an pangidaron han amon mga anak nagtitikang ha 5 ngadto ha 13, ngan waray usa ha amon an maaram mag-Espanyol. Ha pagsunod han iginhatag nga giya, ginbisita ko an magkalainlain nga mga nasud basi usisahon an mga kahimtang ha pagkinabuhi. Ha akon pagbalik, sugad nga pamilya mainampoon nga gin-usisa namon an amon mga pagpipilian ngan nagdesisyon ha pagbalhin ngadto ha Nicaragua.

Pag-alagad ha Nicaragua

Han Oktubre 1970 nakadto na kami ha amon bag-o nga balay, ngan ha sulod hin tulo ka semana igintoka ako ha halipot nga bahin ha katirok han kongregasyon. Nangalimbasog ako ha akon limitado nga Espanyol ngan gintapos an akon toka pinaagi han pagdapit han bug-os nga kongregasyon ha amon balay para hin cerveza ha 9:30 h.a. han Sabado. An akon karuyag ipasabot servicio, an pulong para ha pag-alagad ha kanataran, kondi, gindadapit ko ngay-an an ngatanan para ha pag-inom hin serbesa. An paghibaro han yinaknan usa gud ka ayat!

Ha siyahan, iginsurat ko an presentasyon ha akon kamot ngan ginbansay ito samtang tikadto ha purtahan. Nasiring ako: “Upod hini nga libro an libre nga pag-aram ha Biblia ha balay.” Usa nga tawo nga kinarawat han tanyag nagsiring katapos nga kinahanglan niya tumambong ha amon mga katirok basi hisabtan kon ano an akon ginsisiring ha iya. Ini nga lalaki nagin usa han mga Saksi ni Jehova. Matin-aw gud nga an Dios amo an nagpapatubo han mga liso han kamatuoran ha mapainubsanon nga mga kasingkasing, sugad han ginsiring ni apostol Pablo!—1 Korinto 3:7.

Paglabay hin duha ka tuig ha kapital nga siyudad  han Managua, ginhangyo kami nga bumalhin ngadto ha sur nga bahin han Nicaragua. Didto nagtrabaho kami kaupod han kongregasyon ha Rivas ngan han kahirani nga nabubulag nga mga grupo han mga interesado. Hi Pedro Peña, usa ka matinumanon nga lagas nga Saksi, naupod ha akon kon nabisita kami hini nga mga grupo. An usa aadto ha isla nga may bulkan ha Lake Nicaragua, diin usa la ka pamilya an mga Saksi ni Jehova.

Bisan kon kablas hinduro ha materyal ini nga pamilya, iginpakita gud nira an ira apresasyon ha amon pagbisita. Ha gab-i han amon pag-abot, andam na an amon panihapon. Nagpabilin kami hin usa ka semana, ngan gintagan kami hin pagkaon han damu han mahigugmaon nga mga tawo didto nga nahigugma han Biblia. Nalipay kami nga 101 an tinambong ha pahayag publiko ha Biblia han Domingo.

Inabat ko an nagpaparig-on nga gahum ni Jehova han, ha lain nga okasyon, bibisitahon namon an grupo han mga interesado ha kabukiran hirani ha giutan han Costa Rica. Ha adlaw nga mabaya na kami, inagi ha akon hi Pedro, kondi nahigda ako tungod han sakit nga malaria. “Diri ako makakaupod, Pedro,” siring ko. Iginbutang niya an iya kamot ha akon agtang, hiya binaton: “Hitaas an imo hiranat, kondi kinahanglan ka umupod! Naghuhulat an kabugtoan.” Katapos nag-ampo hiya han usa han kinasingkasing gud nga mga pag-ampo nga akon hinbatian.

Katapos, ako siniring: “Inom anay hin fresco (irinmon nga tikang ha prutas). Andam na ako ha mga diyes minutos.” Duha nga pamilya nga mga Saksi an naukoy ha lugar nga amon ginbisita, ngan ira gud kami gin-ataman. Kinabuwasan nagwali kami upod nira, bisan kon maluya pa ako tungod han hiranat. Makapadasig gud nga makita an sobra usa ka gatos nga mga tawo nga tinambong ha amon katirok ha Domingo!

Pagbalhin Utro

Han 1975 natawo an amon ikapito nga anak, hi Vaughn. Han sunod nga tuig, kinahanglan bumalik kami ha Canada tungod han pinansyal nga mga hinungdan. Diri masayon an pagbaya ha Nicaragua tungod kay inabat gud namon an nagpaparig-on nga gahum ni Jehova durante han amon pag-ukoy. Han binaya kami, sobra 500 ha teritoryo han amon kongregasyon an natambong ha mga katirok.

Antes pa hito, han an amon anak nga hi Miriam ngan ako ginpili sugad nga mga espesyal payunir ha Nicaragua, ginpakianhan ako ni Miriam: “Tay, kon kinahanglan niyo bumalik ha Canada, tutugotan mo ba ako nga magpabilin dinhi?” Waray ko plano nga bumaya, salit siniring ako: “Aw, siyempre!” Salit han binaya kami, nagpabilin hi Miriam basi ipadayon an iya bug-os-panahon nga ministeryo. Ha urhi, nakaasawa hiya kan Andrew Reed. Han 1984 tinambong hira han ika-77 nga klase han Gilead, an eskwelahan ha pagmisyonero han mga Saksi ni Jehova, nga nahimumutang hadto ha Brooklyn, New York. Yana hi Miriam nag-aalagad kaupod han iya bana ha Dominican Republic, ha pagtuman han hingyap nga iginpasilsil ha iya han susbaranan nga mga misyonero ha Nicaragua.

Samtang hito nga panahon, an mga pulong ni Tatay nga, “diri kita maundang tungod la hito,” nagpabilin ha akon kasingkasing. Salit han 1981 han nakatirok na kami hin igo nga kuwarta basi makabalik ha Sentral Amerika, binalhin utro kami, hini nga panahon ngadto ha Costa Rica. Samtang nag-aalagad didto, ginhangyo kami ha pagbulig ha konstruksyon han ira bag-o nga mga pasilidad han sanga. Kondi, han 1985, kinahanglan ipadoktor an amon anak nga lalaki nga hi Grant, salit binalik kami ngadto ha Canada. Nagpabilin hi Glen ha Costa Rica basi magtrabaho ha proyekto nga pagtukod han sanga, samtang hi Annette ngan Charmaine nag-alagad sugad nga mga espesyal payunir. Kami nga binaya ha Costa Rica waray gud maghunahuna nga diri na kami mabalik.

Paglampos han Kakurian

Mapawa ngan masirak an adlaw han Septyembre 17, 1993. An amon suhag nga anak nga lalaki, hi Mark, ngan ako nagtaod han atop. Magkasapit kami  nga nagtrabaho ngan nag-istorya mahitungod han espirituwal nga mga butang, sugad han amon nahiaraan. Nawad-an ako hin panimbang ngan nahulog tikang ha atop. Han bumalik na an akon pamurubuot, an akon la nakita amo an masilaw nga mga suga ngan mga tawo nga nakabusag an bado. Emergency room adto han ospital.

Tungod han ginsiring han Biblia, an akon siyahan nga reaksyon amo an: “Diri ako mapaabuno hin dugo, diri ako mapaabuno hin dugo!” (Buhat 15:28, 29) Nawara an akon kabaraka han hibatian ko hi Charmaine nga nasiring: “Ayaw hito kabaraka, Tay. Aadi kami ngatanan.” Hinbaroan ko ha urhi nga nakita han mga doktor an akon medikal nga dokumento, ngan waray gud magin isyu an paggamit han dugo. Nabari an akon liog ngan bug-os nga naparalisado ako, diri ngani nakakalugaring pagginhawa.

Tungod kay diri nakakakiwa, nagkinahanglan ako yana han pagparig-on ni Jehova kay ha kan-o pa man. Gin-operahan ako ha trachea basi maisulod an respirator tube, nga nakabara han aragian han hangin ngadto ha akon mga vocal cord. Diri ako nakakayakan. Kinahanglan kitaon han mga tawo an akon im-im basi hisabtan an akon karuyag igyakan.

Madagmit nga dinaku an mga gastos. Tungod kay an akon asawa ngan an kadam-an han akon mga anak aada ha bug-os-panahon nga ministeryo, ginhunahuna ko kon maundang ba hira hini nga pag-alagad basi mataparan ini nga pinansyal nga mga responsabilidad. Kondi, nakatrabaho hi Mark nga ha sulod la hin tulo ka bulan nakabulig ha pagbayad han daku nga bahin hini nga gastos. Sugad nga resulta, nakapabilin an ngatanan ha bug-os-panahon nga ministeryo gawas la ha amon nga mag-asawa.

Ginatos nga mga kard ngan mga surat tikang ha unom magkalainlain nga nasud an nakapaskin ha bungbong han akon kuwarto ha ospital. Ginpaparig-on gud ako ni Jehova. Ginbuligan liwat han kongregasyon an akon pamilya pinaagi han pagtagana hin pagkaon ha ira durante han lima ngan tunga ka bulan nga nakadto ako ha intensive care unit. Kada kulop, usa nga Kristiano nga tigurang an akon nakakaupod, ginbabasahan ako han Biblia ngan han mga publikasyon ha Biblia, sugad man ginsusumatan ako hin makapadasig nga mga eksperyensya. Duha nga membro han akon pamilya an nag-aandam han tagsa nga katirok han kongregasyon kaupod ha akon, salit napapahimulosan ko gud an importante nga espirituwal nga pagkaon.

Samtang nakadto pa ako ha ospital, ginhimo an paagi basi makatambong ako ha programa han espesyal nga asembleya. Ginhikay han mga nagtatrabaho ha ospital nga updan ako ha bug-os nga adlaw hin nurse ngan hin respiratory technician. Makalilipay gud nga makaupod utro an akon Kristiano nga kabugtoan! Diri ko gud mahikakalimtan nga makita an ginatos nga nakapila, naghuhulat nga makumusta ako.

 Pagtipig han Espirituwalidad

Mga usa ka tuig katapos han aksidente, inuli na ako kaupod han akon pamilya, kondi nagkikinahanglan pa gihapon ako hin 24-oras kada adlaw nga pag-ataman han nurse. Usa nga awto nga kompleto hin kagamitan ha mediko an akon ginsasakyan ngadto ha mga katirok, nga talagsa la nga diri ako makatambong. Kondi, kinakarawat ko nga nagkikinahanglan hin determinasyon nga tumambong. Tikang han akon pag-uli, nakatambong na ako ha ngatanan nga distrito nga mga kombensyon.

Inabot an panahon, han Pebrero 1997, nahibalik na an akon abilidad ha pagyakan bisan kon limitado la. An iba han akon mga nurse maapresyaron nga namamati samtang akon iginsusumat ha ira an akon basado ha Biblia nga paglaom. Nabasa na ha akon han usa nga nurse an bug-os nga libro nga Jehovah’s Witnesses—Proclaimers of God’s Kingdom sugad man an iba nga mga publikasyon han Watch Tower. Nagsusurat liwat ako ha mga tawo pinaagi han paggamit hin estik ha pagkompyuter. Bisan kon makuri an paggamit han kompyuter hini nga paagi, makapatagbaw an pagpabilin nga kaupod ha ministeryo.

Nag-aantos ako hin duro nga kaul-ol ha ugat. Kondi kon nagpapaangbit ako han mga kamatuoran han Biblia ha iba o namamati hini nga ginbabasa ha akon, baga hin naiibanan an akon binabati. Ha panapanahon, nagwawali ako ha kalsada kaupod han akon mabinuligon nga asawa, nga nag-iinterpretar ha akon karuyag isiring kon nagkikinahanglan ako hin bulig. Ha damu nga mga okasyon, nakag-alagad ako sugad nga auxiliary payunir. An pag-alagad sugad nga Kristiano nga tigurang naghahatag ha akon hin kalipay, labi na gud kon an kabugtoan nadaop ha akon ha mga katirok o nabisita ha akon ha balay ngan nabubuligan ngan nadadasig ko hira.

Kinakarawat ko nga masayon manluya. Salit kon naabat ako hin panluya, nag-aampo dayon ako nga magkaada unta ako hin kalipay. Adlaw ngan gab-i nag-aampo ako nga parig-unon ako pirme ni Jehova. An surat o pagbisita han usa pirme nakakapalipay ha akon. An pagbasa han Barantayan o han Awake! nga magasin nagpupuno liwat han akon hunahuna hin makapadasig nga mga punto. Ibaiba nga mga nurse an usahay nagbabasa hini nga mga magasin ha akon. Tikang han maaksidente ako, pito ka beses nga hinbatian ko na an pagbasa han bug-os nga Biblia ha mga cassette tape. Kaupod ini han magkalainlain nga mga paagi nga ginpaparig-on ako ni Jehova.—Salmo 41:3.

Tungod han pagbag-o han akon mga kahimtang nagkaada ako daku nga panahon ha pamalandong kon paonan-o an aton Daku nga Instruktor, hi Jehova, nag-eedukar ha aton para han kinabuhi. Gintatagan kita niya hin husto nga kahibaro han iya kaburut-on ngan katuyoan, birilhon nga ministeryo, sagdon para ha sekreto ha kalipayan han pamilya, ngan kinaadman ha paghibaro kon ano an bubuhaton ha panahon han kakurian. Ginbendisyonan ako ni Jehova hin matinumanon ngan maopay nga asawa. An akon mga anak liwat maunungon nga nasuporta ha akon, ngan nalilipay ako nga hira ngatanan nakikigbahin ha bug-os-panahon nga ministeryo. Ha pagkamatuod, han Marso 11, 2000, an amon anak nga hi Mark ngan an iya asawa, hi Allyson, naggradwar ha ika-108 nga klase ha Eskwelahan han Gilead ngan igintoka ngadto ha Nicaragua. Ako ngan an akon asawa tinambong ha ira gradwasyon. Masisiring ko gud nga an kakurian nakapabag-o han akon kinabuhi kondi diri han akon kasingkasing.—Salmo 127:3, 4.

Nagpapasalamat ako kan Jehova han kinaadman nga iya igintagana nga naipasa ko ha akon pamilya an espirituwal nga panurundon nga akon nakarawat. Napaparig-on ngan nadadasig ako nga makita an akon mga anak nga nag-aalagad ha ira Maglalarang nga may panhunahuna sugad han akon amay, nga nagsiring, “Diri kita maundang tungod la hito. Ginsugo kita ni Jehova nga magwali.” Oo, ginpaparig-on ako ngan an akon pamilya ni Jehova ha ngatanan namon nga mga adlaw.

[Retrato ha pahina 24]

Kaupod hi Tatay, an akon magurang nga kalalakin-an, ngan an akon bugto nga babaye, hirani ha amon inuukyan nga sarakyan, nga ginagamit durante han mga adlaw han pagpayunir. Aada ako ha too

[Retrato ha pahina 26]

Upod an akon asawa, hi Myrna

[Retrato ha pahina 26]

Bag-o nga retrato han amon pamilya

[Retrato ha pahina 27]

Nagwawali pa gihapon ako pinaagi han pagsurat