Pagrayhak Para Hadton Naglalakat ha Kalamrag
Pagrayhak Para Hadton Naglalakat ha Kalamrag
“Tana kamo, ngan paglakat kita ha kayahag ni Jehova.”—ISAIAS 2:5.
1, 2. (a) Mationan-o kaimportante an kalamrag? (b) Kay ano nga importante gud an pahamangno nga an kasisidman magpuputos han tuna?
HI Jehova an Surok han kalamrag. Tinatawag hiya ha Biblia nga ‘an Humaratag han adlaw para han kalamrag ha adlaw, han mga lagda han bulan ngan han mga bitoon para han kalamrag ha kagab-ihon.’ (Jeremias 31:35; Salmo 8:3) Hiya an Usa nga naghimo han aton adlaw, nga ha pagkamatuod, amo an daku nuklear nga hudno nga nagbubuga ngadto ha kawanangan hin damu nga enerhiya, an iba ha porma han kalamrag ngan kapaso. An gutiay hinduro nga porsyento hito nga enerhiya nga naabot ha aton sugad nga sirak han adlaw nagsusustini han kinabuhi dinhi ha tuna. Kon waray sirak han adlaw, diri kita mabubuhi. An tuna magigin planeta nga waray kinabuhi.
2 Samtang ito an ginhuhunahuna, masasabtan naton nga importante gud an kahimtang nga iginsaysay ni propeta Isaias. Hiya nagsiring: “Kitaa, an kasisidman magpuputos han tuna, ngan an madakmol nga kasisidman han mga katawohan.” (Isaias 60:2) Siyempre, diri gin-uunabi hini an pisikal nga kasisidman. Diri iginpapasabot ni Isaias nga ha maabot nga panahon an adlaw, bulan, ngan mga bitoon diri na maglalamrag. (Salmo 89:36, 37; 136:7-9) Lugod, gin-uunabi niya an espirituwal nga kasisidman. Kondi makamaratay an espirituwal nga kasisidman. Ha kamaihaan, diri kita mabubuhi kon waray espirituwal nga kalamrag sugad la nga diri kita mabubuhi kon waray pisikal nga kalamrag.—Lukas 1:79.
3. Tungod han mga pulong ni Isaias, ano an sadang buhaton han mga Kristiano?
3 Tungod hini, angay gud tigamnan nga an mga pulong ni Isaias, bisan kon natuman ha kadaan nga Juda, mayada labaw nga katumanan yana nga panahon. Oo, ha aton panahon an kalibotan napuputos han espirituwal nga kasisidman. Ha sugad peligroso nga kahimtang, importante gud an espirituwal nga kalamrag. Salit sadang sundon han mga Kristiano an pagsagda ni Jesus: “Iglawag niyo an iyo mga suga ha atubangan han mga tawo.” (Mateo 5:16) Mahihimo han matinumanon nga mga Kristiano nga malamragan an kasisidman para han mga maaghop, gintatagan hira kon sugad han higayon nga magkaada kinabuhi.—Juan 8:12.
Masirom nga mga Panahon ha Israel
4. Kakan-o siyahan nga natuman an matagnaon nga mga pulong ni Isaias, kondi ano nga kahimtang an naeksister na ha iya panahon?
4 An mga pulong ni Isaias mahitungod han kasisidman nga nagpuputos han tuna siyahan nga natuman han an Juda nagin binayaan ngan an iya katawohan ginbihag ha Babilonya. Kondi, bisan antes hito, ha panahon mismo ni Isaias, kadam-an ha nasud an napuputos na han espirituwal nga kasisidman, an kamatuoran nga nagpagios ha iya nga sagdahon an iya mga kahimungto: “O balay ni Jakob, tana kamo, ngan paglakat kita ha kahayag ni Jehova”!—Isaias 2:5; 5:20.
5, 6. Ano nga mga butang an nakakahimo han kasisidman ha panahon ni Isaias?
5 Hi Isaias nagtagna ha Juda “ha mga adlaw ni Usiya, ni Jotam, ni Ahas ngan ni Hesekia, an kahadian han Juda.” (Isaias 1:1) Panahon adto han kasamok ha politika, relihiyoso nga pagkasalingkapaw, kawaray-hustisya, ngan pagtalumpigos ha kablas. Bisan durante han pagmando han matinumanon nga kahadian, sugad kan Jotam, makikita ha igbaw han damu nga mga bungtod an mga halaran han palso nga mga dios. Mas maraot an kahimtang ilarom han pagmando han diri-matinumanon nga kahadian. An maraot nga hi Hadi Ahas, pananglitan, naghalad pa gud han iya anak ha rituwal nga paghalad ha dios nga hi Molek. Kasisidman gud ito!—2 Hadi 15:32-34; 16:2-4.
6 Masirom liwat an kahimtang han iba nga mga nasud. An Moab, Edom, ngan Pilistia padayon nga nagtatarhog ha mga giutan han Juda. An norte nga ginhadian han Israel, bisan kon may relasyon ha dugo, nagin kaaway yana. Ha durho nga norte, an Sirya nagtarhog han kamurayawan han Juda. Mas peligroso pa gud an mabangis nga Asirya, nga nagbabantay pirme han mga higayon ha pagpadaku han iya gahum. Durante han panagna ni Isaias, ginsakop han Asirya an nasud han Israel ngan haros bungkagon an Juda. Ha usa ka panahon ginsakop han Asirya an ngatanan kinutaan nga siyudad ha Juda gawas han Jerusalem.—Isaias 1:7, 8; 36:1.
7. Ano nga dalan an ginpili han Israel ngan Juda, ngan paonan-o binaton hi Jehova?
7 An may-kauyonan nga katawohan han Dios nag-antos han sugad nga mga kakurian tungod kay an Israel ngan Juda diri-maunungon ha iya. Sugad hadton gin-unabi ha libro han Proberbios, hira ‘binaya ha mga agianan han pagkamatadong ha paglakat ha mga dalan han kasisidman.’ (Proberbios 2:13) Kondi, bisan kon nasina hi Jehova ha iya katawohan, waray niya isalikway hira hin bug-os. Lugod, iya sinugo hi Isaias ngan an iba nga mga propeta basi maghatag hin espirituwal nga kalamrag para ha bisan hin-o ha nasud nga nangangalimbasog pa gihapon ha matinumanon nga pag-alagad kan Jehova. Presyoso gud an kalamrag nga igintagana pinaagi hinin mga propeta. Naghahatag-kinabuhi ito.
Mga Panahon han Kasisidman Yana
8, 9. Ano nga mga butang an nakahimo han kasisidman han kalibotan yana?
8 An kahimtang ha panahon ni Isaias pariho gud ha mga kahimtang yana. Ha aton panahon, an tawhanon nga mga lider nagdudumiri kan Jehova ngan ha iya nahitrono nga hadi, hi Jesu-Kristo. (Salmo 2:2, 3) Ginlilimbongan han relihiyoso nga mga lider han Kakristianohan an ira mga panon. An sugad nga mga lider nag-aangkon nga nag-aalagad ha Dios, kondi ha pagkamatuod kadam-an ha ira an nagpapasidungog ha mga dios hini nga kalibotan—an nasyonalismo, militarismo, bahandi, ngan prominente nga mga indibiduwal—gawas pa han pagtutdo hin pagano nga mga doktrina.
9 Ha damu nga mga lugar, an mga relihiyon han Kakristianohan nahidadabi ha mga girra ngan kasamok han mga tawo nga nagpopoo han kaaway nga mga tribo ngan iba pa makangingirhat nga mga buhat. Dugang pa, imbes nga umuyon ha basado-ha-Biblia nga moralidad, damu nga mga iglesia an nagbabalewaray hito o aktibo nga nauyon ha imoral nga mga buhat sugad han pakighilawas ngan homoseksuwalidad. Sugad nga resulta han pagdumiri ha mga suruklan han Biblia, an mga panon han Kakristianohan pariho hadton mga tawo nga gin-unabi han kadaan nga salmista: “Diri hira maaram, bisan ngani diri nakakasabot; naglalakat hira ngadto nganhi ha mga kadulman.” (Salmo 82:5) Totoo, an Kakristianohan, pariho han kadaan nga Juda, aada ha duro nga kasisidman.—Pahayag 8:12.
10. Paonan-o nasanag an kalamrag ha kasisidman yana, ngan paonan-o nagpapahimulos an mga maaghop?
10 Ha butnga han sugad nga kasisidman, ginpapahinabo ni Jehova nga sumanag an kalamrag para ha mga maaghop. Tungod hini, ginagamit niya an iya dinihogan nga mga surugoon ha tuna, ‘an matinumanon ngan maaramon ngan uripon,’ ngan hira ‘naglalamrag sugad hin mga suga ha kalibotan.’ (Mateo 24:45; Filipos 2:15) Iton uripon nga klase, nga binubuligan han minilyon han ‘iba nga mga karnero’ nga mga kaupod, nagpapasanag han espirituwal nga kalamrag tikang ha Pulong han Dios, an Biblia. (Juan 10:16) Hinin masirom nga kalibotan, an sugad nga kalamrag naghahatag ha mga maaghop hin paglaom, nabulig ha ira nga magkaada relasyon ha Dios, ngan nabulig ha ira nga malikyan an espirituwal nga mga lit-ag. Presyoso ito, naghahatag-kinabuhi.
“Akon Pagdadayawon an Imo Ngaran”
11. Ano nga impormasyon an iginhatag ni Jehova ha panahon ni Isaias?
11 Ha masirom nga mga adlaw ni Isaias ngan ha mas masirom pa gud nga mga adlaw katapos hito han ginbihag han mga Babilonyahanon an nasud ni Jehova, ano nga klase hin giya an iginhatag ni Jehova? Gawas pa han paggiya ha moral, abanse nga iginsaysay niya kon paonan-o niya tutumanon an iya mga katuyoan may kalabotan ha iya katawohan. Tagda, pananglitan, an urusahon nga mga tagna ha Isaias kapitulo 25 tubtob 27. Ipinapakita han mga pulong hini nga mga kapitulo kon paonan-o gindumara ni Jehova an mga butang hadto ngan kon paonan-o niya gindudumara ito yana.
12. Ano an kinasingkasing nga iginpahayag ni Isaias?
12 Siyahan, hi Isaias nagpahayag: “O Jehova, ikaw an akon Dios; akon ka pagpapahitas-on, akon pagdadayawon an imo ngaran.” Kinasingkasing gud ito nga pagpahayag hin pagdayaw! Kondi ano an nagpagios ha propeta nga mag-ampo hin sugad hito? An daku nga hinungdan iginpahayag ha urhi nga bahin han bersikulo, nga aton mababasa: “Kay nagbuhat ka [Jehova] hin katingalahan nga mga butang, bisan an mga sagdon ha kadaan, ha kamatinumanon ngan ha kamatuoran.”—Isaias 25:1.
13. (a) Ano nga kahibaro an nagparig-on han apresasyon ni Isaias para kan Jehova? (b) Paonan-o kita mahibabaro tikang ha susbaranan ni Isaias?
13 Ha panahon ni Isaias, hi Jehova nakagbuhat na hin damu urusahon nga mga butang para ha Israel, ngan iginsurat na ini. Matin-aw nga maaram hi Isaias hini nga mga sinurat. Maaram hiya, pananglitan, nga ginpagawas ni Jehova an iya katawohan tikang ha pagkauripon ha Ehipto ngan gintalwas hira tikang ha kasina han kasundalohan ni Paraon ha Dagat nga Pula. Maaram hiya nga gintugwayan ni Jehova an iya katawohan ha kamingawan ngan gindara hira ngadto ha Tuna nga Iginsaad. (Salmo 136:1, 10-26) Ipinakita han sugad nga mga asoy han kasaysayan nga hi Jehova nga Dios matinumanon ngan masasarigan. An iya “mga sagdon”—an ngatanan nga butang nga iya gintutuyo—natutuman. An husto nga kahibaro nga iginhatag han Dios nagparig-on kan Isaias nga magpadayon ha paglakat ha kalamrag. Salit, maopay nga susbaranan hiya para ha aton. Kon pag-adman naton hin maopay an sinurat nga Pulong han Dios ngan iaplikar ito ha aton kinabuhi, kita liwat magpapabilin ha kalamrag.—Salmo 119:105; 2 Korinto 4:6.
Ginbungkag an Usa nga Bungto
14. Ano an igintagna mahitungod han usa nga bungto, ngan posible nga, ano ito nga bungto?
14 Usa nga ehemplo han sagdon han Dios amo an ha Isaias 25:2, nga aton mababasa: “Imo ginhimo an usa nga bungto nga tambak, an usa nga bungto nga pinarig-onan nga guba, an palasyo han mga dumuruong nga diri mabungto; ini diri na gud matutukod.” Ano ini nga bungto? Posible nga matagnaon nga gin-uunabi ni Isaias an Babilonya. Oo, inabot an panahon nga an Babilonya nagin tambak na la nga mga bato.
15. Ano an “daku nga bungto” nga naeksister yana, ngan ano an mahitatabo hito?
15 An bungto ba nga gin-unabi ni Isaias mayada kapariho yana? Oo. An libro han Pahayag nag-uunabi han “daku nga bungto, nga naghahadi ha ngatanan nga mga kahadian ha tuna.” (Pahayag 17:18) Iton daku nga bungto tinatawag nga ‘Babilonya nga Daku,’ an imperyo han palso nga relihiyon ha kalibotan. (Pahayag 17:5) Yana, an importante nga bahin han Babilonya nga Daku amo an Kakristianohan, nga an mga klero hito nangunguna ha pagkontra ha pagwali han Ginhadian han katawohan ni Jehova. (Mateo 24:14) Kondi, pariho han kadaan nga Babilonya, an Babilonya nga Daku hirani na bungkagon, diri na gud matutukod utro.
16, 17. Paonan-o an mga kaaway ni Jehova naghihimaya ha iya ha kadaan ngan ha moderno nga mga panahon?
16 Ano pa an igintagna ni Isaias mahitungod han “bungto nga pinarig-onan”? Hi Isaias nasiring kan Jehova: “An katawohan nga kusgan maghihimaya ha imo; usa nga bungto han makalilisang nga mga nasud mahahadlok ha imo.” (Isaias 25:3) Paonan-o maghihimaya kan Jehova inin kaaway nga bungto, ‘an bungto han madarahog nga mga nasud’? Bueno, hinumdumi an nahitabo ha pinakagamhanan nga hadi han Babilonya, hi Nabukodonosor. Katapos han makuri nga eksperyensya nga nagpapakita han iya kaluyahan, napiritan hiya ha pagkilala han pagkadaku ni Jehova ngan han Iya makusog-ha-ngatanan nga gahum. (Daniel 4:34, 35) Kon ipinapakita ni Jehova an iya gahum, bisan an iya mga kaaway napipiritan ha pagkilala, bisan kon nag-aalang, han iya gamhanan nga mga buhat.
17 Napiritan ba an Babilonya nga Daku ha pagkilala han gamhanan nga mga buhat ni Jehova? Oo. Durante han siyahan nga girra ha kalibotan, an dinihogan nga mga surugoon ni Jehova nagwali ilarom han kagol-anan. Han 1918 nahingada hira ha espirituwal nga pagkabihag han ginpriso an nangunguna nga mga opisyal han Watch Tower Society. Haros napaundang an organisado nga pagwali. Ngan, han 1919, iginbalik hira ni Jehova ngan ginpakusog utro hira pinaagi han iya espiritu, nga katapos hito nagtikang hira ha pagtuman han sugo nga igwali an maopay nga sumat ha bug-os inuukyan nga tuna. (Markos 13:10) Ini ngatanan igintagna ha libro han Pahayag, sugad man an epekto hito ha ira mga kaaway. Hira “nagkahadlok, ngan naghimaya ha Dios han langit.” (Pahayag 11:3, 7, 11-13) Diri nga nakombirte hira ngatanan, kondi napiritan hira nga kilalahon an gamhanan nga buhat ni Jehova hini nga okasyon, sugad la han igintagna ni Isaias.
“Panalipdanan han mga Kablas”
18, 19. (a) Kay ano nga napapakyas an mga kaaway ha pagbungkag han integridad han katawohan ni Jehova? (b) Paonan-o ‘an kanta han mga madarahog’ pagpapahibub-on?
18 Ha pagbirik yana han iya atensyon ha maloloy-on nga mga pakig-upod ni Jehova hadton naglalakat ha kalamrag, hi Isaias nasiring kan Jehova: “Ikaw nagin panalipdanan han mga kablas, usa nga panalipdanan han runos ha iya kaguol, usa nga arayupan tikang ha bagyo, usa nga sirongan tikang ha kapaso, kon an alipuros han mga magpakalilisang sugad hin bagyo patok ha kuta. Sugad han kanan kapaso pagpahilom dida ha mamara nga lugar imo pagpapahilumon an aringasa han mga dumuruong; sugad han kapaso nga naiban tungod han dampog, an kanta han magpakalilisang pagpapahibub-on.”—Isaias 25:4, 5.
19 Tikang han 1919, ginbubuhat han mga madarahog an ngatanan ha pagbungkag han integridad han totoo nga mga magsiringba, kondi napakyas hira. Kay ano? Tungod kay hi Jehova an panalipdanan ngan an arayupan han iya katawohan. Naghahatag hiya hin katalwasan tikang ha nakakasunog nga kapaso han pagtimaraot ngan natindog sugad hin marig-on nga kuta kontra han bagyo han pagkontra. Kita nga naglalakat ha kalamrag han Dios may pagsarig nga naglalaom han panahon kon ‘an kanta han mga madarahog pagpapahibub-on.’ Oo, ginhuhulat gud naton an adlaw nga waray na an mga kaaway ni Jehova.
20, 21. Ano nga piyesta an igintatagana ni Jehova, ngan ano an mahiuupod hito nga piyesta ha bag-o nga kalibotan?
20 Hi Jehova nagbubuhat hin labaw pa han pagpanalipod ha iya mga surugoon. Nagtatagana hiya ha ira sugad nga ira mahigugmaon nga Amay. Katapos pagawson an iya katawohan tikang ha Babilonya nga Daku han 1919, naghimo hiya ha ira hin piyesta han kadaogan, usa ka hura nga suplay han espirituwal nga pagkaon. Igintagna ini ha Isaias 25:6, nga aton mababasa: “Dida hini nga bukid hihimoon ni Jehova han mga kasundalohan ngada ha ngatanan nga mga katawohan an usa nga piyesta han magtambok nga mga butang, an piyesta han mga alaksiw ha mga lagod, han magtambok nga mga butang nga puno hin utok, han mga alaksiw nga pinatin-aw hin maopay ha bawbaw han lagod.” Benindisyonan gud kita ha pagkaon dida hito nga piyesta! (Mateo 4:4) ‘An lamesa ni Jehova’ tinuod nga puno han magopay nga mga karaunon. (1 Korinto 10:21) Pinaagi han ‘matinumanon ngan maaramon nga uripon,’ gintatagan kita han ngatanan nga butang nga ginkikinahanglan naton ha espirituwal.
21 Ngan mayada labaw pa hinin igintagana han Dios nga piyesta. An espirituwal nga piyesta nga aton pinahihimulsan yana nagpapahinumdom ha aton han kahuraan han pisikal nga pagkaon nga makakarawat ha iginsaad han Dios nga bag-o nga kalibotan. Hito nga panahon, an “piyesta han magtambok nga mga butang” mag-uupod han kahuraan han pisikal nga pagkaon. Waray na magugutom ha pisikal o ha espirituwal. Daw ano nga katalwasan ito para hadton hinigugma nga magtinumanon nga nag-aantos yana tungod han igintagna nga ‘kakulang hin pagkaon’ nga bahin han “tigaman” han presensya ni Jesus! (Mateo 24:3, 7) Para ha ira, an mga pulong han salmista nakakaliaw gud. Hiya nagsiring: “Magkakaada kahuraan hin lugas ha tuna ha bawbaw han mga bukid; An mga bunga hito mauuy-og.”—Salmo 72:16.
22, 23. (a) Ano nga “biraybiray,” o “tabon,” an kukuhaon, ngan paonan-o? (b) Paonan-o kukuhaon ‘an pasipara ha katawohan ni Jehova’?
22 Pamati yana ha mas urusahon nga saad. Iginpapariho an sala ngan kamatayon ha “biraybiray,” o ha “tabon,” hi Isaias nasiring: “Gugunawon [ni Jehova] dida hini nga bukid an nawong han tabon nga nagtatabon han ngatanan nga katawohan, ngan an biraybiray nga ginbitad ha igbaw han ngatanan nga nasud.” (Isaias 25:7) Hunahunaa la! Mawawara na an sala ngan kamatayon, nga nagtatabon han katawohan sugad hin taklap nga nakakapakuri han pagginhawa. Ginhahandom gud naton an adlaw nga an mga kapulsanan han halad lukat ni Jesus bug-os nga ipadapat na ha masinugtanon ngan matinumanon nga katawohan!—Pahayag 21:3, 4.
23 Mahitungod hiton mahimayaon nga panahon, an inspirado nga propeta nagpapasarig ha aton: “Linamoy [han Dios] ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong; ngan an pakaalo ha iya katawohan iya kukuhaon tikang ha bug-os nga tuna; kay hi Jehova nagyakan hini.” (Isaias 25:8) Waray na mamamatay tungod han natural nga mga hinungdan o magtatangis tungod han kamatay han usa nga hinigugma. Benindisyonan gud nga pagbag-o! Dugang pa, diri na mababatian ha bisan diin ha tuna an pasipara ngan buwa nga propaganda nga maiha na nga gin-iilob han Dios ngan han iya mga surugoon. Kay ano? Tungod kay kukuhaon ni Jehova an surok hito—an amay han buwa, hi Satanas nga Yawa, upod an ngatanan han binhi ni Satanas.—Juan 8:44.
24. Paonan-o adton naglalakat ha kalamrag nabaton ha gamhanan nga mga buhat ni Jehova para ha ira?
24 Ha pamalandong han sugad nga mga pagpakita han gahum ni Jehova, adton naglalakat ha kalamrag napapagios ha pagsinggit: “Kitaa, amo ini an aton Dios; naghulat kita ha iya, ngan iya kita luluwason; amo ini hi Jehova; naghulat kita ha iya, magmamalipay kita ngan magkakalipay ha iya kaluwasan.” (Isaias 25:9) Diri na maiha, an matadong nga katawohan magkakaada han ngatanan nga hinungdan ha pagrayhak. An kasisidman bug-os nga mawawara, ngan an kalamrag ni Jehova masanag ha mga matinumanon ha bug-os nga kadayonan. Mayada ba iba nga paglaom nga mas mahimayaon? Waray gud!
Maisasaysay Mo Ba?
• Kay ano nga importante yana nga maglakat ha kalamrag?
• Kay ano nga gindayaw ni Isaias an ngaran ni Jehova?
• Kay ano nga an mga kaaway diri gud makakabungkag han integridad han katawohan han Dios?
• Ano nga hura nga mga bendisyon an naghuhulat hadton naglalakat ha kalamrag?
[Mga Pakiana]
[Retrato ha pahina 13]
Iginhalad han mga umurukoy ha Juda an kabataan ngadto kan Molek
[Mga Retrato ha pahina 15]
An kahibaro ha gamhanan nga mga buhat ni Jehova nagpagios kan Isaias nga dayawon an ngaran ni Jehova
[Retrato ha pahina 16]
An kalamrag ni Jehova masanag ha mga magtadong ha kadayonan