“Malipayon an Tawo nga Nakaagi han Kinaadman”

USA hiya nga parasiday, arkitekto, hadi. Mayada tinuig nga kita nga sobra 200 milyon ka dolyar, mas bahandianon hiya kay han bisan hin-o nga hadi ha tuna. Kilala liwat an lalaki tungod han iya kinaadman. Nalipay gud an nabisita nga rayna salit hiya nagsiring: “Kitaa, an katunga waray igsumat ha akon: an imo kinaadman ngan an imo kauswagan labaw han bantog nga akon nabati.” (1 Hadi 10:4-9) Ito an kahimtang ni hadi Salomon han kadaan nga Israel.

Hi Salomon mayada mga bahandi ngan kinaadman. Ngan nakahimo ito ha iya nga mas takos ha pagtirotimbang kon hain ha duha an totoo nga importante. Hiya nagsurat: “Malipayon an tawo nga nakaagi han kinaadman, ngan an tawo nga nakakuha han sarabotan. Kay an pakakuha hini maoroopay kay han pakakuha han salapi, ngan an pulos hini kay han pino nga bulawan. Hiya labi ka birilhon kay han mga rubi; Ngan waray han mga butang nga imo mauungara mahitatanding ha iya.”—Proberbios 3:13-15.

Kondi, diin mabibilngan an kinaadman? Kay ano nga mas birilhon ito kay han bahandi? Ano an nakakadani nga mga bahin hito? An ika-8 nga kapitulo han libro nga Proberbios ha Biblia, nga iginsurat ni Salomon, nabaton hini nga mga pakiana ha makaruruyag nga paagi. Didto an kinaadman iginpariho ha tawo, nga sugad hin nagyayakan ngan nagios. Ngan an kinaadman personal nga nagpapahayag han pagin makaruruyag sugad man han bili hito.

“Nagsinggit [Ito] hin Daku”

An kapitulo 8 han Proberbios nagtitikang hin retorikal nga pakiana: “Diri ba nagsasangpit an kinaadman, ngan an sarabotan nagpapagawas han iya tingog?” a Oo, an kinaadman ngan an sarabotan padayon nga nagsasangpit, kondi diri pariho ha imoral nga babaye nga nagtatago ha masirom nga mga lugar ngan naghuhuring hin nakakadani nga mga pulong ha mga talinga han nag-uusahan ngan waray-eksperyensya nga batan-on. (Proberbios 7:12) “Ha igbaw han higtaas nga mga lugar ha hirani han dalan, diin an mga agianan nagtatapo, hiya natindog; Ha tupad han mga ganghaan, didto ha pagsulod ngadto ha bungto, ha pagsulod didto ha mga ganghaan, hiya nagsinggit hin daku.” (Proberbios 8:1-3) An marig-on ngan makusog nga tingog han kinaadman nababatian hin daku ngan matin-aw ha publiko nga mga lugar—ha mga ganghaan, ha mga eskina, ha mga aragian tipasulod han siyudad. Masayon hibatian han mga tawo ito nga tingog ngan gumios.

Hin-o an makakagnigar nga an diosnon nga kinaadman nga nakarekord ha inspirado nga Pulong han Dios, an Biblia, magagamit han haros ngatanan ha kalibotan nga naruruyag magkaada hito? “Ha kasaysayan an Biblia amo an pinakakaylap nga binabasa nga libro,” siring han The World Book Encyclopedia. Ito nagdudugang: “Mas damu nga mga kopya han Biblia an iginpanaltag kay han bisan ano iba nga libro. An Biblia iginhubad liwat hin mas damu ka beses, ngan ha mas damu nga mga yinaknan, kay han bisan ano iba nga libro.” Tungod kay an bug-os nga Biblia o an mga bahin hito mababasa na ha sobra 2,100 dagku nga yinaknan ngan gudti nga mga pinulongan, sobra 90 porsyento han katawohan an makakagamit bisan la  han bahin han Pulong han Dios ha ira kalugaringon nga yinaknan.

Dayag nga iginpapahayag han mga Saksi ni Jehova an mensahe han Biblia ha bisan diin. Ha 235 nga nasud, aktibo hira nga nagwawali han maopay nga sumat han Ginhadian han Dios ngan nagtututdo ha mga tawo han mga kamatuoran nga aada ha Pulong han Dios. An ira basado-ha-Biblia nga mga magasin nga An Barantayan, nga iginpupublikar ha 140 nga yinaknan, ngan Awake!, nga iniimprinta ha 83 nga yinaknan, mayada sirkulasyon nga sobra 20 ka milyon an kadamu ha kada gowa hito. An kinaadman sigurado nga padayon nga nagsisinggit ha publiko nga mga lugar!

“An Akon Tingog Ngadto ha mga Anak nga Kalalakin-an han mga Tawo”

An iginpariho ha tawo nga kinaadman nagtitikang ha pagyakan, nasiring: “Ha iyo, O mga tawo, ako nagtatawag; Ngan an akon tingog ngadto ha mga anak nga kalalakin-an han mga tawo. O kamo nga mga tapang, sumabot han pag-alagam-agam; Ngan, kamo nga mga lurong, magin sugad hin may masinabuton nga kasingkasing.”—Proberbios 8:4, 5.

An panawagan han kinaadman para ha bug-os nga kalibotan. Gindadapit hito an ngatanan nga katawohan. Bisan an mga waray eksperyensya ginhahangyo nga magin listo, o makinaadmananon, ngan an mga lurong, magin masinabuton. Oo, an mga Saksi ni Jehova natoo nga an Biblia usa nga libro para ha ngatanan nga mga tawo ngan waray pagpasulabi nga nangangalimbasog nga dasigon an ngatanan nga ira nakakaistorya nga usisahon ito basi makita an mga pulong han kinaadman nga aada hito.

‘An Akon Ngalangala Nagyayakan hin Kamatuoran’

Ha pagpahayag han pagin makaruruyag hito, an kinaadman nagpapadayon: “Pamati, kay ako magyayakan hin mga butang nga hamili; Ngan an pagbungat han akon mga im-im magdadara hin matadong nga mga butang. Kay an akon baba maluwas hin kamatuoran; Ngan an karaotan amo an mangil-ad ha akon mga im-im. An ngatanan nga pulong han akon baba aada ha pagkamatadong; Waray baliko o paglaris dida hini.” Oo, an mga katutdoan han kinaadman maopay gud ngan husto, totoo ngan matadong. Waray panlimbong o baliko hito. “Hira ngatanan mahayag ha iya nga nasabot, ngan matadong ha ira nga namimiling hin hibaro.”—Proberbios 8:6-9.

Angayan gud nga an kinaadman naghahangyo: “Karawata an akon pagtutdo, ngan diri salapi; Ngan an hibaro nga labi kamaopay kay han pino nga bulawan.” Husto ini nga hangyo, “kay an kinaadman maoroopay kay han mga rubi; Ngan an ngatanan nga butang nga imo mauungara diri mahitatanding hini.” (Proberbios 8:10, 11) Kondi kay ano? Ano an nakakahimo han kinaadman nga mas birilhon kay han mga bahandi?

“An Akon Bunga Maoroopay kay han Bulawan”

An mga regalo nga iginhahatag han kinaadman ha namamati hito mas birilhon kay han bulawan, salapi, o mga korales. Ha pagsaysay kon ano ini nga mga regalo, an kinaadman nasiring: “Ako, an kinaadman, naghimo han pangalam-agam nga akon puroy-anan, ngan nakaagi han hibaro ngan han katakos hin pagtirotimbang. An kahadlok kan Jehova amo an kangalas han karaotan: Palabilabi, ngan pagpakahitaas, ngan an maraot nga dalan, ngan an malarison nga baba akon ikinangangalas.”—Proberbios 8:12, 13.

 An kinaadman naghahatag hin pagkaalisto ngan mga abilidad ha paghunahuna ha nagtatag-iya hito. An tawo nga mayada diosnon nga kinaadman nagdadayaw ngan nahahadlok liwat ha Dios, tungod kay “an kahadlok kan Jehova, amo an tinikangan han kinaadman.” (Proberbios 9:10) Salit, nangangalas hiya han kinangangalasan ni Jehova. Waray ha iya an pagpahitaas ha kalugaringon, garbo, imoral nga buhat, ngan maraot nga mga pulong. An iya kangalas ha maraot nagpapanalipod ha iya tikang ha hakugnon nga paggamit han awtoridad. Importante gud nga adton aada ha importante nga mga katungdanan ha Kristiano nga kongregasyon, sugad man an mga ulo han pamilya, mamiling han kinaadman!

“An kasaragdonan akon, ngan an maopay nga hibaro,” nagpapadayon an kinaadman. “Ako amo an sarabotan; ako mayada kakusog. Pinaagi ha akon an kahadian naghahadi, ngan an mga prinsipe nagsusugo hin kasubayan. Pinaagi ha akon an mga prinsipe naglalarang, ngan an mga noble, bisan an ngatanan nga hukom ha tuna.” (Proberbios 8:14-16) An mga bunga han kinaadman nag-uupod han hilarom nga kahibaro, pagsabot, ngan gahum—mga kalidad nga ginkikinahanglan gud han mga magmarando, hitaas nga mga opisyal, ngan mga dungganon. Importante an kinaadman ngada hadton mayada katungdanan ngan hadton nagsasagdon ha iba.

Masayon magkaada hin totoo nga kinaadman an ngatanan, kondi diri ngatanan nakakabiling hito. An iba nadiri o naglilikay hito, bisan kon aada la ito ha ira hirani. “Ako nahigugma ha ira nga nahigugma ha akon,” siring han kinaadman, “ngan adton mamiling ha akon ha maduruto makakaagi ha akon.” (Proberbios 8:17) Magkakaada kinaadman adton sinsero la nga namimiling hito.

An mga paagi han kinaadman husto ngan matadong. Nagbabalos ito ha mga namimiling hito. An kinaadman nasiring: “Bahandi ngan dungog hahani ha akon; Oo, bahandi nga marig-on ngan an pagkamatadong. An akon bunga maoroopay kay han bulawan, oo, kay han pino nga bulawan; Ngan an akon abot kay han pinili nga salapi. Ako naglalakat ha dalan han pagkamatadong, ha butnga han mga agianan han kasubayan; Nga ako makapanunod han manggad ha ira hadton nahigugma ha akon, ngan nga ako makagpuno han ira mga pirit-an.”—Proberbios 8:18-21.

Upod han maopay nga mga kalidad sugad han pagkamaaramon, abilidad ha paghunahuna, pagpaubos, hilarom nga kahibaro, praktikal nga kaaram, ngan pagsabot, an mga regalo han kinaadman nag-uupod han mga bahandi ngan dungog. An maaramon nga tawo mahimo magin bahandianon ha matadong nga paagi, ngan mag-uuswag hiya ha espirituwal. (3 Juan 2) An kinaadman nagpapasidungog liwat ha tawo. Dugang pa, natatagbaw hiya tikang ha iya mga nakakab-ot, ngan mayada hiya kamurayawan ha hunahuna ngan limpyo nga konsensya ha Dios. Oo, malipayon an tawo nga nakabiling hin kinaadman. An mga bunga han kinaadman sigurado nga mas maopay kay han puraw nga bulawan ngan hamili nga salapi.

Napapanahon gud ini nga sagdon para ha aton, tungod kay nagkikinabuhi kita ha materyalistiko nga kalibotan nga an pinabubug-atan amo an pagkaada bahandi ha anoman nga paagi ngan anoman an mahitabo! Hinaot diri gud kita mahingalimot han pagkaimportante han kinaadman o buhaton an diri-matadong nga mga paagi basi magin bahandianon. Diri gud naton isalikway an mga  tagana nga naghahatag hin kinaadman—an aton Kristiano nga mga katirok ngan an aton personal nga pag-aram ha Biblia ngan mga publikasyon nga igintatagana han ‘matinumanon ngan maaramon nga uripon’—basi la magin bahandianon.—Mateo 24:45-47.

“Ako Iginbutang Tikang ha Kadayonan”

An iginpariho ha tawo nga kinaadman nga aada ha ika-8 nga kapitulo han Proberbios diri la usa nga paagi ha pagsaysay han ginhunahuna la nga kalidad. Simboliko nga nag-uunabi liwat ito han pinakaimportante nga linarang ni Jehova. An kinaadman nagpapadayon ha pagsiring: “Hi Jehova nagtag-iya ha akon ha tinikangan han iya dalan, ha waray pa an iya mga buruhaton ha kadaan. Ako iginbutang tikang ha kadayonan, tikang ha tinikangan, han waray pa an tuna. Ginpahimugso ako han waray pa an mga kahiladman, han waray pa mga burabod nga hura hin tubig. Han waray pa an mga bukid mahimumutang, han waray pa an mga bungtod ako ginpahimugso; Samtang nga waray pa hiya maghihimo han tuna, o han mga uma, o han mga tinikangan han tapotapo han kalibotan.”—Proberbios 8:22-26.

Angayan gud an nauna nga paghulagway han iginpariho ha tawo nga kinaadman ha ginsisiring mahitungod han “Pulong” ha Kasuratan! “Ha tinikangan amo an Pulong,” nagsurat hi apostol Juan, “ngan an Pulong upod ha Dios, ngan an Pulong amo an Dios.” (Juan 1:1) An iginpariho ha tawo nga kinaadman simboliko nga nagrirepresentar ha Anak han Dios, hi Jesu-Kristo, ha iya antes-magin-tawo nga pag-eksister. b

Hi Jesu-Kristo amo “an siyahan nga natawo han ngatanan nga mga binuhat; Kay tungod ha iya ginbuhat an ngatanan nga mga buhat, aadto ha mga langit ngan hahani ha tuna, an mga bagay nga sadang makita ngan diri sadang makita.” (Kolosas 1:15, 16) “Han iya [ Jehova] pagtukod han mga langit, nakadto ako,” nagpapadayon an iginpariho ha tawo nga kinaadman, “han iya pagbutang hin kompas dida ha nawong han kahiladman, han iya pagparig-ona han kalangitan ha igbaw, han kahimo nga magkusog han mga burabod ha kahiladman, han iya paghatag han dagat han iya pag-ultan, nga an mga tubig diri magtalapas han iya sugo, han iya pagtigamni han mga patukuranan han tuna; Hadto dida ako ha iya hirani, sugad hin labaw nga magburuhat; Ngan ako an iya kalipay ha adlaw-adlaw, nga kanunay malipayon ha iya atubangan, malipayon dida ha iya tuna nga kapupoy-an; Ngan an akon kalipay aada ha mga anak han mga tawo.” (Proberbios 8:27-31) An Suhag ni Jehova nakadto ha sapit han iya Amay, aktibo nga nagtatrabaho kaupod niya—an waray-katupong nga Maglalarang han langit ngan han tuna. Han ginlarang ni Jehova nga Dios an siyahan nga tawo, binulig ha proyekto an Iya Anak sugad nga Maabtik nga Magburuhat. (Genesis 1:26) Diri urusahon nga an Anak han Dios interesado gud, nahigugma pa ngani, ha katawohan!

“[Malipayon] an Tawo nga Namamati ha Akon”

Sugad nga iginpariho ha tawo nga kinaadman, an Anak han Dios nasiring: “Yana, mga anak ko, pamati ha akon; Kay bulahan hira nga nagbabantay han akon mga dalan. Pamati han pagtutdo, ngan magmakinaadmananon, ngan ayaw ini riwaha. Bulahan an tawo nga namamati ha akon, nga nagbabantay ha adlaw-adlaw didto ha akon mga ganghaan, nga naghuhulat dida ha mga harigi han akon mga ganghaan. Kay kon hin-o an makaagi ha akon makakaagi hin kinabuhi, ngan makakakuha han pagpaid ni Jehova. Kondi hiya nga nakakasala patok ha akon nagdadaot han iya kalugaringon nga kalag: Ngatanan hira nga nangangalas ha akon nahigugma han kamatayon.”—Proberbios 8:32-36.

Hi Jesu-Kristo amo an representasyon mismo han kinaadman han Dios. “Ha iya aada natago an ngatanan nga mga bahandi han kinaadman ngan paghibaro.” (Kolosas 2:3) Salit, mamati kita hin maopay ha iya ngan sundon gud an iya mga paagi. (1 Pedro 2:21) An pagsalikway ha iya amo an pagbuhat hin karat-an ha aton kalag ngan paghigugma han kamatayon, tungod kay “ha bisan hin-o nga lain kan Kristo waray kaluwasan.” (Buhat 4:12) Oo, aton karawaton hi Jesus sugad nga an usa nga igintagana han Dios para ha aton kaluwasan. (Mateo 20:28; Juan 3:16) Hito nga paagi maieksperyensyahan naton an kalipay tikang ha ‘pakabiling han kinabuhi ngan pagkaada han pag-uyon ni Jehova.’

[Mga footnote]

[Mga Retrato ha pahina 26]

Importante an kinaadman ngada hadton mayada importante nga mga katungdanan

[Mga Retrato ha pahina 27]

Ayaw igbalewaray an mga tagana nga naghahatag hin kinaadman