Magin Marig-on Ngan Bug-os an Pagtoo

Nalamposan han Maisugon nga mga Magtiripig han Integridad an Pagtimaraot han Nazi

“ANAK ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga [nagtatamay] ha akon.” (Proberbios 27:11) Inin kinasingkasing nga hangyo nagpapakita nga an intelihente nga mga linarang han Dios mahimo maglipay han kasingkasing ni Jehova tungod kay hira matinumanon ngan maunungon ha iya. (Sepania 3:17) Kondi, hi Satanas, an manunulay, determinado ha pagbungkag han integridad hadton nag-aalagad kan Jehova.—Job 1:10, 11.

Labi na han magtikang na an ika-20 ka siglo han iginhulog hiya tikang ha langit nganhi ha tuna, iginpapakita na ni Satanas an daku nga kasina ha katawohan ni Jehova. (Pahayag 12:10, 12) Kondi, an totoo nga mga Kristiano nagin ‘marig-on ngan bug-os an pagtoo’ ngan nagtitipig han ira integridad ngadto ha Dios. (Kolosas 4:12) Aton paghisgotan hin madaliay an usa han pinakabantogan nga susbaranan han sugad nga pagtipig hin integridad—iton kanan mga Saksi ni Jehova ha Alemanya antes ngan durante han Girra ha Kalibotan II.

An Madasigon nga Buruhaton Nagtutugway Ngadto ha mga Pagsari han Integridad

Ha dekada han 1920 ngan temprano ha dekada han 1930, an Bibelforscher, sugad han pagkilala ha mga Saksi ni Jehova hadto ha Alemanya, nanaltag hin damu nga literatura ha Biblia. Ha butnga han 1919 ngan 1933, nakapahamutang hira ha aberids hin walo nga libro, mga bokleta, o mga magasin ha tagsa nga pamilya ha Alemanya.

Hito nga panahon, an Alemanya mayada usa han gidadakui nga grupo han dinihogan nga mga sumurunod ni Kristo. Ha pagkamatuod, ha 83,941 nga nakigbahin ha Panihapon han Ginoo ha bug-os nga kalibotan han 1933, haros 30 porsyento an naukoy ha Alemanya. Waray pag-iha, inin Aleman nga mga Saksi nakaeksperyensya hin makuri nga mga pagsari han integridad. (Pahayag 12:17; 14:12) An pagpaiwas tikang ha mga trabaho, mga pag-atake ha kabalayan, ngan mga pagpaiwas tikang ha eskwelahan nagtikagrabe ngadto ha mga pagkastigo, mga pag-aresto, ngan kaprisohan. (Retrato 1) Salit, ha mga tuig antes han Girra ha Kalibotan II, an mga Saksi ni Jehova nagkukompuwesto hin 5 ngadto ha 10 porsyento han ngatanan nga ginpriso ha mga kampo nga prisohan.

Kon Kay Ano nga Gintimaraot han mga Nazi an mga Saksi

Kondi, kay ano nga naaghat han mga Saksi ni Jehova an kasina han Nazi nga gobyerno? Ha iya libro nga Hitler—1889-1936: Hubris, an propesor han kasaysayan nga hi Ian Kershaw nakaobserba nga an mga Saksi nagin puntirya han pagtimaraot tungod kay nagdumiri hira “ha pagsunod han ngatanan nga ginkikinahanglan han Nazi nga gobyerno.”

An libro nga Betrayal—German Churches and the Holocaust, nga an pagpublikar gindumara han propesor han kasaysayan nga hi Robert P. Ericksen ngan han propesor han pag-aram ha mga Judio nga  hi Susannah Heschel, nagsaysay nga an mga Saksi “nagdumiri nga makigbahin ha kamadarahog o ha paggamit han puwersa militar. . . . Natoo an mga Saksi ha pagkaneutral ha politika, nga nangangahulogan nga diri hira mabutos kan Hitler o masaludo kan Hitler.” Ini, nagdugang ito nga libro, nag-aghat han kasina han mga Nazi ngan iginbutang an mga Saksi ha kahimtang nga diin madadaot hira tungod kay an “Sosyalismo han Nasud diri magbabalewaray han sugad nga pagdumiri.”

Bug-os-Kalibotan nga Protesta Ngan Duro nga Pag-atake

Pinaagi han espesyal nga mensahero, han Pebrero 9, 1934, hi Joseph F. Rutherford, an nagdudumara han buruhaton hito nga panahon, nagpadara kan Hitler hin surat han pagprotesta ha pagbaton ha pagdiri han Nazi. (Retrato 2) Han Oktubre 7, 1934, an surat ni Rutherford ginsundan hin mga 20,000 nga surat ngan mga telegrama ha pagprotesta nga iginpadara ngadto kan Hitler han mga Saksi ni Jehova ha 50 nga nasud, upod na an Alemanya.

Ginios an mga Nazi pinaagi han pagdugang han ira pagtimaraot. Han Abril 1, 1935, igindiri an mga Saksi ha bug-os nga nasud. Ngan han Agosto 28, 1936, gintikangan han Gestapo an duro nga pag-atake kontra ha ira. Kondi, an mga Saksi “nagpadayon ha panaltag hin mga pampleta ngan ha pagtipig han ira pagtoo,” siring han Betrayal—German Churches and the Holocaust.

Mahimo unta hibaroan han Gestapo an ira buruhaton kondi urusahon nga waray nira hibaroi ito, pananglitan, han Disyembre 12, 1936, mga 3,500 nga Saksi an nanaltag hin napuplo ka yukot nga kopya han inimprinta nga resolusyon mahitungod han pagmaltrato nga ira gin-antos. Mahitungod hini nga kampanya, An Barantayan nagreport: “Daku ito nga kadaogan ngan duro nga kasakit ha kaaway, ha diri maisaysay nga kalipay han matinumanon nga mga magburuhat.”—Roma 9:17.

Napakyas an Pagtimaraot!

Nagpadayon an pamiling han Nazi ha mga Saksi ni Jehova. Han 1939, unom ka yukot ha ira an napriso na, ngan yinukot an gindara ngadto ha mga kampo konsentrasyon. (Retrato 3) Ano an kahimtang ha kataposan han Girra ha Kalibotan II? Namatay na an mga 2,000 priso nga Saksi, sobra 250 an ginpatay. Kondi, nagsurat hira Propesor Ericksen ngan Heschel, “kadam-an han mga Saksi ni Jehova an nagpabilin ha ira pagtoo ha atubangan han kakurian.” Sugad nga resulta, han nabungkag an pagmando ni Hitler, sobra usa ka yukot nga Saksi an ginawas nga madaugon ha mga prisohan.—Retrato 4; Buhat 5:38, 39; Roma 8:35-37.

Ano an nagpakusog ha katawohan ni Jehova basi makailob han pagtimaraot? An nakatalwas ha kampo nga prisohan nga hi Adolphe Arnold nagsaysay: “Bisan kon aada ka ha pinakamasurub-on nga kahimtang, nakikita ka ni Jehova, maaram hiya han imo inaabat, ngan tatagan ka niya han imo ginkikinahanglan nga kusog basi malamposan an kahimtang ngan magpabilin nga matinumanon. Diri halipot an iya kamot.”

Naaplikar gud an mga pulong ni propeta Sepania hadton matinumanon nga mga Kristiano! Hiya nagsiring: “Hi Jehova nga imo Dios aada ha butnga nimo, usa nga kusgan nga magluluwas; hiya magmamasadya dida ha imo ha kahimongaya.” (Sepania 3:17) Hinaot subaron han ngatanan nga mga magsiringba han totoo nga Dios yana nga panahon an pagtoo hadton maunungon nga mga Saksi nga nagtipig han integridad ha atubangan han pagtimaraot han Nazi ngan lipayon liwat an kasingkasing ni Jehova.—Filipos 1:12-14.

[Ginkuhaan han ha pahina 8]

Państwowe Muzeum Oświȩcim-Brzezinka, ha pagtugot han USHMM Photo Archives