Relihiyon ba an Magdadara hin Kamurayawan ha Kalibotan?

TIKANG han Agosto 28 tubtob han Agosto 31, 2000, sobra 500 nga representante tikang ha 73 nga nasud an nagkatirok ha New York City. Nagkatirok hira ha Nagkakaurosa nga mga Nasud para ha “An Milenyo nga Komperensya han Relihiyoso Ngan Espirituwal nga mga Lider Para han Kamurayawan ha Kalibotan.” An mga lider—nga damu an nakasul-ot hin mga turban, kolor-saffron nga mga panapton, mga tabon ha ulo nga barahibo, o hilaba itom nga mga sutana—nagrepresentar han damu nga relihiyon. Kaupod hini an Baha’i, Budhismo, Hinduismo, Islam, Jainismo, Judaismo, Shinto, Sikhismo, Taoismo, Zoroastrianismo, ngan mga relihiyon han Kakristianohan.

An mga delegado nagkatirok ha Nagkakaurosa nga mga Nasud para han siyahan duha ka adlaw han upat ka adlaw nga komperensya. Kondi, an komperensya diri inorganisa o gastos han Nagkakaurosa nga mga Nasud kondi han magkalainlain nga mga organisasyon. Kondi, an UN ngan an relihiyoso nga mga lider naghisgot han bili han urosa nga pagbuhat basi mawara an kakablas, rasismo, mga problema ha palibot, girra, ngan mga armas ha pagbungkag han damu nga tawo.

An mga delegado nagpirma hin usa nga dokumento nga may ulohan nga “Kauyonan Para han Bug-os-Kalibotan nga Kamurayawan.” Samtang kinikilala nga an kamadarahog ngan girra “usahay ginbubuhat ha ngaran han relihiyon,” an dokumento nagdeklara nga an mga nagpirma “masuporta ha Nagkakaurosa nga mga Nasud . . . ha pangalimbasog ha pagkaada hin kamurayawan.” Kondi, waray espisipiko nga mga ginkauyonan nga nagpapakita kon paonan-o ini bubuhaton.

Ha ikaduha ka adlaw, gintapos ni Bawa Jain, sekretaryo-heneral han komperensya, an iya siyahan nga pahayag pinaagi han pagsaysay nga mga pipira ka tuig ha naglabay naobserbahan niya an usa nga ginuhit ha Nagkakaurosa nga mga Nasud. Ipinapakita han ginuhit an usa ka lalaki nga hiruhitaas ha United Nations Secretariat nga tinukod. Nagtutuktok hiya ha tinukod nga sugad hin usa ka purtahan ito. Ha ubos han ginuhit amo an mga pulong: “Prinsipe han Kamurayawan.” Hi Mr. Jain nagsiring: “Han makita ko [an ginuhit] nakaapekto gud ito ha akon. Nagpakiana ako ha magkalainlain nga mga tawo kon ano an kahulogan [hito]. Yana mayada na ako han baton. An pagtirok niyo ngatanan dinhi, an espirituwal ngan relihiyoso nga mga lider ha kalibotan, nagpapakita ha akon nga [ini] an prinsipe han kamurayawan nga nagtutuktok ha purtahan han Nagkakaurosa nga mga Nasud.”

An Biblia nagpapahayag hin naiiba nga panhunahuna. Ipinapakita hito nga hi Jesu-Kristo an Prinsipe han Kamurayawan. Hiya an magdadara han kamurayawan ha bug-os nga kalibotan, diri pinaagi han mga pangalimbasog han mga lider ha politika o relihiyon hini nga kalibotan, kondi pinaagi han Ginhadian han Dios. Ini nga Ginhadian—an langitnon nga gobyerno han Dios—an malampuson nga maghihiusa han masinugtanon nga katawohan ngan maghihimo han kaburut-on han Dios nga matuman dinhi ha tuna.—Isaias 9:6; Mateo 6:9, 10.