Sumat han mga Parasamwak han Ginhadian

India—An “Pagkaurosa ha Butnga han Pagkaibaiba”

“PAGKAUROSA ha butnga han Pagkaibaiba” amo an popular nga eslogan nga nagsasaysay han pagkaurosa ha nasud han India. Diri masayon madangat an pagkaurosa hinin daku nga nasud nga may daku nga pagkaibaiba ha kultura, yinaknan, relihiyon, gintikangan nga mga tribo, pamado, ngan pagkaon. Kondi, an sugad nga pagkaurosa makikita ha opisina han administrasyon han mga Saksi ni Jehova ha India, bisan kon an mga boluntaryo nga nag-uukoy ngan nagtatrabaho didto nagtikang ha damu nga estado ngan mga teritoryo han unyon ngan nagyayakan hin damu magkalainlain nga yinaknan.

• Kilalahon naton hi Rajrani—usa nga batan-on nga babaye tikang ha Punjab, ha durho nga bahin ha norte-weste han India. Han naeskwela pa hi Rajrani, usa han iya mga kaklase an nagtikang mag-aram ha Biblia kaupod han mga Saksi ni Jehova. Inin batan-on nga babaye nangalimbasog nga maaghat an interes ni Rajrani ha Biblia. Tungod kay limitado an Ingles han kaklase ngan waray pa An Barantayan ha Punjabi nga yinaknan hito nga panahon, ginhangyo liwat niya hi Rajrani nga ihubad an sulod han magasin para ha iya. An nabasa ni Rajrani ha An Barantayan nagtikang makaimpluwensya gud ha iya nga bisan pa han pagkontra han iya mga ginikanan, nag-uswag hiya tubtob nga idedikar an iya kinabuhi ngadto kan Jehova nga Dios. Nag-aalagad yana ha Bethel ha India, an iya trabaho pariho gud hiton nakaabri han iya mga panlantaw ha kamatuoran. Naghuhubad hiya han Kristiano nga mga publikasyon ha Punjabi nga yinaknan!

• Tagda liwat hi Bijoe, nga nagtikang ha iba nga bahin han India—ha sur-weste nga estado han Kerala. Ginpaiwas hi Bijoe ha high school tungod ha pagin neutral durante han nasyonalistiko nga mga seremonya. Katapos han maiha nga kaso ha korte nga natapos pinaagi han makatirigamnan nga kadaogan para ha putli nga pagsingba, binalik pag-eskwela hi Bijoe. a Nagpadayon liwat hiya ha kolehiyo. Kondi, nabaraka an iya konsensya tungod han imoral nga palibot didto, salit inundang hiya ha iya siyahan nga semestre. Yana paglabay hin napulo ka tuig ha Bethel, inaabat niya nga mas nakapahimulos hiya tikang ha pagin membro han nagkakaibaiba kondi nagkakaurosa nga pamilya han Bethel kay han napahimulosan unta niya ha pagpadayon ha hiruhitaas nga edukasyon.

• Hi Norma ngan hi Lily pariho sobra 70 anyos an pangidaron ngan mga balo ha damu na nga katuigan. An tagsa ha ira inabot na ha sobra 40 ka tuig ha bug-os-panahon nga pag-alagad. Hi Lily nagtatrabaho ha opisina han sanga hin mga 20 ka tuig sugad nga parahubad han Tamil nga yinaknan. Hi Norma sinulod ha Bethel 13 ka tuig na an naglabay han namatay an iya bana. Gawas ha pagin maopay nga mga susbaranan ha pagin maduruto ngan sinsero nga mga magtatrabaho, nakakabulig hira han pagkaurosa han bug-os nga pamilya han Bethel. Naruruyag hira ha pag-abiabi han mga bisita, ngan nalilipay hira pakig-upod han batan-on nga mga membro han pamilya, nakikigbahin han kalipay han hilawig nga katuigan han Kristiano nga pagkinabuhi. Ngan nabalos an mga batan-on pinaagi ha pagdapit kan Norma ngan Lily ha ira mga kuwarto para hin asosasyon ngan pagbulig ha ira kon kinahanglan. Maopay gud nga susbaranan!

Tungod kay nalamposan an mga diri-pagsinabtanay nga nagriresulta hin kasamok ngan kawaray-pagkaurosa ha damu nga mga lugar, ini nga mga boluntaryo malipayon nga urosa nga nagtatrabaho ha pagserbi ha iba sugad nga mga membro han nagkakaurosa nga pamilya han Bethel ha India.—Salmo 133:1.

[Footnote]

[Ginkuhaan han Retrato ha pahina 8]

Background: Mountain High Maps® Copyright © 1997 Digital Wisdom, Inc.