Mahimo Makarawat Mo an mga Bendisyon han Ginhadian

AN Kristiano nga hi apostol Pablo maabtik ha pipira nga mga yinaknan nga kaylap nga ginamit ha iya panahon. Nakarawat niya an katugbang han edukasyon ha unibersidad yana nga panahon. Napahimulosan niya an ngatanan nga mga bentaha ngan mga katungod han usa ka tuminungnong ha Roma. (Buhat 21:37-40; 22:3, 28) Ini nga mga karig-onan nakahimo unta ha iya nga magin bahandianon ngan bantogan. Kondi, hiya nagsiring: “Kon ano nga mga bagay an akon ganansya hadto, ini akon gin-isip nga karag tungod kan Kristo . . . ngan gin-isip ko hira nga mga sighot, basi nga makarawat ko [hi] Kristo.” (Filipos 3:7, 8) Kay ano nga hi Pablo nagpahayag hito?

Kilala hadto sugad nga Saulo han Tarso ngan sugad nga parapakaraot hadton “aada hini nga Dalan,” hi Pablo nagin tumuroo katapos tagan hin bisyon han binanhaw ngan ginhimaya nga hi Jesus. (Buhat 9:1-19) Para kan Pablo, ini nga eksperyensya ha dalan tipakadto ha Damasko nagpamatuod gud nga hi Jesus amo an iginsaad nga Mesias, o Kristo, an tiarabot nga magmarando han iginsaad nga Ginhadian. Daku liwat an ginbag-o hito ha kinabuhi ni Pablo, sugad han iginpakita han iya marig-on nga mga pulong ha igbaw. Ha iba nga mga pulong, tungod kay sinsero ngan tangkod an kasingkasing, hi Pablo nagbasol.—Galasia 1:13-16.

Ha Biblia, an berbo nga pulong nga “pagbasol” agsob nga iginhuhubad tikang ha Griego nga pulong nga  literal nga nangangahulogan nga “katapos-mahibaro,” nga kabaliktaran han “antes-mahibaro.” Salit, an pagbasol nag-uupod hin pagbag-o han hunahuna, paggios, o katuyoan han usa, an pagdumiri han nahiaraan nga mga paagi han usa sugad nga diri-maopay. (Buhat 3:19; Pahayag 2:5) Ha kahimtang ni Pablo, waray niya tuguti nga iton importante nga hitabo ha dalan tipakadto ha Damasko magpabilin sugad hin usa la nga emosyonal o espirituwal nga eksperyensya. Para ha iya usa ito nga paghibaro han kamatuoran nga kawang an iya pagkinabuhi hadto, ha pagkaignorante kan Kristo. Nahunahuna liwat niya, nga basi makapahimulos han iya bag-o nga kahibaro mahitungod kan Kristo, kinahanglan tadungon niya an iya pagkinabuhi.—Roma 2:4; Efeso 4:24.

An Pagbag-o nga Nagdara hin mga Bendisyon

Ha naglabay, an daku nga bahin han kahibaro ni Pablo ha Dios nagtikang ha sekta han mga Pariseo, nga usa hiya nga membro. An ira mga gintotoohan nag-upod hin daku nga bahin han pilosopiya ngan tradisyon han tawo. Tungod han mga pagpasulabi han relihiyon, an kadasig ngan mga pangalimbasog ni Pablo sayop nga gingiyahan. Bisan kon naghunahuna hiya nga nag-aalagad hiya ha Dios, ha pagkamatuod hiya nakikig-away kontra ha iya.—Filipos 3:5, 6.

Katapos kumarawat hin husto nga kahibaro mahitungod kan Kristo ngan ha iya bahin ha katuyoan han Dios, hinbaroan ni Pablo nga naatubang hiya hin pagpili: Sadang ba hiya magpabilin nga Pariseo ngan magpadayon ha pagpahimulos hin katungdanan ngan dungog, o sadang ba hiya magbag-o han paagi han iya pagkinabuhi ngan magtikang ha pagbuhat han ginkinahanglan basi makarawat an pag-uyon han Dios? Makalilipay, hi Pablo husto nga nagpili, tungod kay hiya nagsiring: “Diri ako naaawod han Maopay nga Sumat; Kay ini amo an gahum han Dios ngadto ha kaluwasan ha ngatanan nga natoo; ha mga Judio anay, ngan ha mga Gresyahanon man.” (Roma 1:16) Hi Pablo nagin madasigon nga magwarali han maopay nga sumat mahitungod kan Kristo ngan han Ginhadian.

Paglabay hin damu nga tuig, hi Pablo nagsiring ha iya mga igkasi-Kristiano: “Waray ako pag-isip ha akon kalugaringon nga nakaptan ko na adto: kondi usa nga bagay nga akon ginbuhat, nga kinalimtan ko an mga bagay nga tinalikdan, ngan dinadakop ko an mga bagay ha atubangan. Nagpapadayon ako ngadto ha kataposan tungod ha balos han hitaas nga pagtawag han Dios kan Kristo Jesus.” (Filipos 3:13, 14) Hi Pablo nagpahimulos tikang ha maopay nga sumat tungod kay disidido hiya pagbaya han naggigiya ha iya pahirayo ha Dios ngan bug-os-kasingkasing hiya nga nagbuhat hin mga tumong nga uyon ha katuyoan han Dios.

Ano an Imo Bubuhaton?

Bangin bag-o pa la nga hinbatian mo an maopay nga sumat han Ginhadian. Makaruruyag ba ha imo an paglaom nga mabuhi ha waray kataposan ha hingpit nga paraiso? Natural la ito, tungod kay kita ngatanan mayada natural nga hingyap nga mabuhi ngan magpahimulos han kinabuhi ha kamurayawan ngan seguridad. An Biblia nasiring nga iginbutang han Dios an “kadayonan” ha aton kasingkasing. (Eklesiastes 3:11) Salit natural para ha aton nga maghingyap han panahon nga an mga tawo mahimo mabuhi ha waray kataposan ha kamurayawan ngan ha kalipayan. Ngan ito an igintatanyag han maopay nga sumat han Ginhadian.

Kondi, basi magin totoo ito nga paglaom, kinahanglan usisahon mo ngan hibaroan kon mahitungod ha ano ito nga maopay nga sumat. Hi apostol Pablo nagsagda: ‘Pamatud-i ha imo kalugaringon kon ano an maopay ngan kinakarawat ngan hingpit nga kaburut-on han Dios.’ (Roma 12:2) Salit, pariho kan Pablo, katapos mo magkaada kahibaro ngan pagsabot, kinahanglan mo magpili.

Ha luyo nga bahin, bangin mayada ka na mga gintotoohan mahitungod han imo tidaraon. Hinumdumi nga hi Saulo mayada na kalugaringon nga mga ideya mahitungod han kaburut-on han Dios antes hiya magin hi apostol Pablo. Kondi imbes nga maglaom hin milagroso nga kapahayagan tikang ha Dios, kay ano nga diri kitaon an kahimtang ha makatadunganon nga paagi? Pakianhi an imo kalugaringon: ‘Maaram gud ba ako han kaburut-on han Dios para ha katawohan ngan ha tuna? Ano nga ebidensya an akon maihahatag basi mapamatud-an an akon mga gintotoohan? Mapapamatud-an ba nga husto an akon ebidensya kon usisahon uyon ha kahayag han Pulong han Dios, an Biblia?’ Waray mawawara ha imo kon usisahon an imo relihiyoso nga mga gintotoohan hini nga paagi. Ha pagkamatuod, sadang maruyag ka ha pagbuhat hito tungod kay an Biblia nagsasagda ha  aton: “Proybahi niyo an ngatanan nga mga butang; tipigi niyo an mga maopay.” (1 Tesalonika 5:21) Aw, diri ba an pag-uyon han Dios amo an importante ha ngatanan?—Juan 17:3; 1 Timoteo 2:3, 4.

An mga lider han relihiyon bangin magsaad ha aton hin waray-kataposan nga tidaraon. Kondi kon ito nga saad waray igbasar ha mga katutdoan han Biblia, diri ito makakabulig ha aton ha pagkarawat han mga bendisyon han Ginhadian han Dios. Ha iya bantogan nga Sermon ha Bukid, hi Jesus marig-on nga nagpahamangno: “Diri an tagsa nga nagsisiring ha akon: Ginoo, Ginoo, makakasulod ha ginhadian han langit; kondi an nagbubuhat han kaburut-on han akon Amay, nga aadto ha langit.”—Mateo 7:21.

Tigamni an pagpabug-at ni Jesus ha pagbuhat han kaburut-on han iya Amay sugad nga kinahanglanon ha pagkarawat han mga bendisyon han Ginhadian han Dios. Ha iba nga mga pulong, an pagin diosnon ha dagway diri nangangahulogan han pag-uyon han Dios. Ha pagkamatuod, hi Jesus padayon nga nagsiring: “Damu an masiring ha akon hadto nga adlaw: Ginoo, Ginoo, waray ba igtagna namon ha imo ngaran, ngan tungod han imo ngaran nagpapagowa kami han mga yawa, ngan tungod ha imo ngaran nagbubuhat kami hin damu nga mga katingalahan? Ngan niyan akon igsasaysay ha ira: Ako waray gud kilala ha iyo; iwas kamo ha akon, mga magburuhat han karat-an.” (Mateo 7:22, 23) Matin-aw, importante an aton pagsiguro nga hinsasabtan naton hin husto kon ano gud an maopay nga sumat han Ginhadian ngan magbuhat uyon hito.—Mateo 7:24, 25.

Makakarawat an Bulig

Sulod hin sobra 100 ka tuig na, an mga Saksi ni Jehova nagwawali han maopay nga sumat han Ginhadian han Dios. Pinaagi han inimprinta nga barasahon ngan pagwali, binubuligan nira an mga tawo ha bug-os nga tuna nga magkaada husto nga kahibaro kon ano an Ginhadian, kon ano nga mga bendisyon an pagdadad-on hito, ngan kon ano an kinahanglan buhaton han usa basi makarawat ito nga mga bendisyon.

Gindadasig ka namon nga gumios uyon ha mensahe nga iginwawali han mga Saksi ni Jehova. Pinaagi han pagkarawat ngan paggios uyon ha maopay nga sumat, mahimo ka kumarawat han makaruruyag nga mga bendisyon diri la yana kondi ha tidaraon liwat kon magmando na an Ginhadian han Dios ha bug-os nga tuna.—1 Timoteo 4:8.

Gios na yana, tungod kay an mga bendisyon han Ginhadian han Dios hirani na!

[Mga Retrato ha pahina 7]

Pinaagi han inimprinta nga barasahon ngan han pagpasamwak, an mga Saksi ni Jehova nagwawali han maopay nga sumat han Ginhadian han Dios