Mahimo Ka Maglampos Anoman an Imo Gintikangan

HI Nicholas mayada rebelyoso nga kinaiya tikang han iya pagkabata. a Inabot an panahon, an iya personal nga problema nagtugway ha iya ha pag-abuso ha droga ngan duro nga pag-ininom. Hi Nicholas nagsasaysay: “An akon amay alkoholiko, ngan ginpaantos gud niya an akon manghod nga babaye ngan ako.”

Tikang ha ngatanan nga mga anggulo, an mga ginikanan ni Malinda gintatahod nga parasingba nga mga membro han ira komunidad. Kondi nahidadabi gud liwat hira ha usa nga kulto. “An iba han ira mga binuhatan ha kulto nakadaot ha akon ngan nakabungkag han akon panlantaw sugad nga bata,” nasusubo nga nagsaysay hi Malinda, nga sobra 30 na an pangidaron yana. Hiya nagdugang: “An pag-abat hin kawaray-paglaom ngan an pagbati han kawaray-pulos nga naipasilsil ha akon nakakaapekto ha akon tikang han panahon nga akon nahinunumduman.”

Hin-o an makakagnigar nga an panahon han pagkabata han damu nadaot han pagkamadarahog, pag-abuso, pagpasibaya han ginikanan, ngan iba pa negatibo nga mga hinungdan? An mga samad han diri-malipayon nga panahon han pagkabata mahimo magin hilarom. Kondi an sugad ba nga mga kasakit sadang makadaot ha kadayonan han posibilidad ha pagkarawat han usa han kamatuoran han Pulong han Dios ngan han pakabiling hin daku nga kalipay? Bisan pa han ira gintikangan, mahimo ba maglampos hi Nicholas ngan hi Malinda sugad nga mga tawo nga may integridad? Tagda siyahan an ehemplo ni Hadi Josia han Juda.

An Kasuratanhon nga Ehemplo

Hi Josia nagmando ha Juda ha sulod hin 31 ka tuig han ikapito ka siglo A.K.P. (659-629 A.K.P.) Ha panahon han pagtikang pagmando ni Josia, katapos patayon an iya amay, maraot hinduro an kahimtang ha Juda. An Juda ngan Jerusalem puno hin mga magsiringba kan Baal ngan hadton nanunumpa ha ngaran han nangunguna nga Amonitanhon nga dios, hi Malkam. An mga prinsipe han Juda sugad hin “nangunguwang nga mga leon,” ngan an mga hukom pariho hin “mga lobo ha kagab-ihon,” siring ni Sepania, an propeta han Dios hito nga panahon. Sugad nga resulta, kaylap an kamadarahog ngan an panlimbong ha nasud. Damu an nasiring ha ira kasingkasing: “Hi Jehova diri magbubuhat hin maopay, diri man hiya magbubuhat hin maraot.”—Sepania 1:3–2:3; 3:1-5.

Ano nga klase hin magmarando hi Josia? An naghan-ay han kronolohiya han Biblia nga hi Esra nagsurat: “[Hi Josia] nagbuhat hadton matadong ha mga mata ni Jehova, ngan naglakat ha mga dalan ni David nga iya amay, ngan waray simang ha too nga kamot o ha wala.” (2 Kronikas 34:1, 2) Matin-aw, hi Josia naglampos ha pagbuhat han husto ha paniplatan han Dios. Kondi ano an kahimtang han iya pamilya?

Pagbansay o Abusado nga Pagkabata?

Han matawo hi Josia han 667 A.K.P., an iya amay, hi Amon, 16 anyos pa la an pangidaron, ngan an iya apoy-nga-lalaki nga hi Manases nagmamando ha Juda. Hi Manases usa han girarauti nga mga hadi nga nagmando ha Juda. Tungod kay nagtukod hin mga altar para kan Baal, “hiya nagbuhat hin daku nga karaotan ha paniplatan ni Jehova.” Iya ginsunog an pipira han iya mga anak nga lalaki, nagbuhat hin mahika, nanagna, nagbuhat hin espiritismo, ngan nag-ula hin dugo han damu inosente nga mga tawo. Gindara liwat ni Manases ngadto ha balay ni Jehova an inukit nga ladawan han sagrado nga poste nga iya ginhimo. Iya gindani an Juda ngan Jerusalem nga “[magbuhat] hin labi pa hin kamaraot kay han ginbuhat han mga nasud nga kan Jehova gingunaw ha atubangan han mga anak ni Israel.”—2 Kronikas 33:1-9.

Maraot gud hi Manases salit ginpahinabo ni Jehova nga dad-on hiya nga nakakadena ngadto ha Babilonya, usa han hadianon nga mga siyudad han magmarando han Asirya. Samtang bihag hi Manases hiya nagbasol, nagpaubos han iya kalugaringon, ngan nakimalooy han pagpasaylo ni Jehova.  Pinamatian han Dios an iya hangyo ngan iginbalik hiya ha pagkahadi ha Jerusalem. Salit gintikangan ni Manases an mga pagbag-o ngan nagkaada maopay nga mga resulta.—2 Kronikas 33:10-17.

Ano an epekto han karaotan ni Manases ngan han iya pagbasol ha iya anak nga hi Amon? Hiya nagin maraot hinduro. Han nagbasol hi Manases ngan nangalimbasog ha paglimpyo han kahugaw ha nasud nga iya mismo gintikangan, waray sumuporta hi Amon. Han mapanunod an trono ha edad nga 22, hi Amon “nagbuhat hadton maraot ha paniplatan ni Jehova, sugad han ginbuhat ni Manases nga iya amay.” Imbes nga magpaubos ha atubangan ni Jehova, “an amo ngahaw nga Amon nagtalapas ha labi ngan labi pa gud.” (2 Kronikas 33:21-23) Hi Josia sais anyos pa la an pangidaron han nagin hadi hi Amon ha Juda. Sigurado nga maraot gud an eksperyensya ha pagkabata ni Josia!

Natapos an maraot nga pagmando ni Amon katapos hin duha ka tuig han nagsarabot an iya mga surugoon kontra ha iya ngan ginpatay hiya. Bisan pa, ginpatay han mga tawo han nasud an mga nagsarabot kontra kan Amon ngan ginhimo nga hadi an iya anak nga lalaki, hi Josia.—2 Kronikas 33:24, 25.

Bisan pa han nakakadaot nga mga kahimtang temprano han iya pagkabata, hi Josia padayon nga nagbuhat han maopay ha paniplatan ni Jehova. Malampuson gud an iya pagmando nga an Biblia nasiring: “Waray hadi nga nahiuna ha iya nga sugad ha iya, nga dinapig kan Jehova ha bug-os niya nga kasingkasing, ngan ha bug-os niya nga kalag, ngan ha bug-os niya nga kusog, sumala han ngatanan nga balaud ni Moises; ngan waray ha katapos niya binmangon nga bisan hin-o nga pariho ha iya.”—2 Hadi 23:19-25.

Makapadasig gud nga susbaranan hi Josia para hadton nag-antos hin maraot nga pagkabata! Ano an aton hibabaroan tikang ha iya susbaranan? Ano an nakabulig kan Josia nga pilion an husto nga pagkinabuhi ngan magpabilin dida hito?

Pangalimbasog nga Makilala hi Jehova

An positibo nga impluwensya nga nagpabilin durante han temprano nga katuigan han kinabuhi ni Josia amo an iya mabinasulon nga apoy,  hi Manases. Waray magsiring an Biblia kon mationan-o kaiha an pagkaupod han duha, ngan kon pira an edad ni Josia han nagbag-o hi Manases han iya mga paagi. Tungod kay duok an Judio nga mga pamilya, bangin nangalimbasog hi Manases nga talwason an iya apo tikang ha nakakadaot nga mga impluwensya nga nakapalibot ha iya pinaagi han pagpasilsil ha kasingkasing han iya apo han pagtahod ha totoo nga Dios, hi Jehova, ngan ha iya pulong. An mga liso han kamatuoran nga igintanom ni Manases ha kasingkasing ni Josia, bangin upod han iba positibo nga mga impluwensya, ha kataposan nagbunga. Ha iya ikawalo nga tuig han pagmando ha Juda, an 15-anyos an pangidaron nga hi Josia nangalimbasog ha paghibaro ngan pagbuhat han kaburut-on ni Jehova.—2 Kronikas 34:1-3.

An iba nga tawo nahibabaro la han espirituwal nga mga butang ha panahon han ira pagkabata tungod han hirayo nga paryente, usa nga kakilala, o usa nga amyaw. Kondi, kon napapatubo, an mga liso nga igintanom mahimo magbunga hin maopay ha urhi. Hi Malinda, nga gin-unabi ha tinikangan, mayada buotan lagas nga amyaw nga regular nga nagdadara hin Barantayan ngan Awake! nga mga magasin ha iya balay. Ha paghinumdom ha iya nga may pagbati, hiya siniring: “An akon nahinumduman gud mahitungod han akon amyaw amo an diri niya pagsaurog hin mga piyesta. Importante ini ha akon tungod kay an Halloween ngan an pipira han iba nga mga piyesta amo an mga okasyon para han rituwal nga mga buruhaton ha kulto han akon mga ginikanan.” Paglabay hin usa ka dekada, han gindapit hi Malinda han usa nga sangkay nga tumambong ha Kristiano nga katirok ha Kingdom Hall han mga Saksi ni Jehova, nahinumduman niya ini nga amyaw ngan ginkarawat dayon an pagdapit. Nakabulig ito ha iya ha pamiling han kamatuoran.

Magin Mapainubsanon haAtubangan han Dios

An pagmando ni Josia gintigamnan han daku nga mga pagbag-o ha relihiyon ha nasud han Juda. Katapos buhaton an unom-ka-tuig nga kampanya kontra ha idolatriya ngan paglimpyo ha nasud han Juda, hi Josia nagtikang ha pag-ayad han balay ni Jehova. Samtang nagpapadayon ito nga buruhaton, an Hitaas nga Saserdote nga hi Hilkia mayada nadiskobrehan nga birilhon hinduro! Nabilngan niya an orihinal nga kopya han “basahon han balaud ni Jehova.” Tungod kay ginsarigan ni Hilkia hinin makapainteres nga nadiskobrehan, hi Sapan an sekretaryo nagsumat ha hadi han nahitabo. Ito ba nga mga hitabo nakahimo han 25-anyos an pangidaron nga hi Josia nga maghambog?—2 Kronikas 34:3-18.

“Han pakabati han hadi han mga pulong han balaud,” nagsurat hi Esra, “iya gingisi an iya mga panapton.” Kinasingkasing ini nga kapahayagan han kasubo tungod kay hinsabtan niya nga diri ngatanan han mga balaud han Dios ginbuhat han ira mga kaapoy-apoyan. Usa gud nga pagpakita hin pagpaubos! Ha kadagmitan an hadi nagsugo hin grupo han lima ka tawo ha pagpakiana kan Jehova pinaagi kan propetesa Hulda. An grupo nagdara tipabalik han sumat nga sugad hini: ‘An kalamidad maabot sugad nga resulta han pagtalapas ha Balaud ni Jehova. Kondi tungod kay ikaw, Hadi Josia, nagpaubos han imo kalugaringon, dadad-on ka ha imo lubnganan ha kamurayawan ngan diri makita han kalamidad.’ (2 Kronikas 34:19-28) Nalipay hi Jehova ha paggios ni Josia.

Bisan pa han aton gintikangan, kita liwat mahimo magpaubos ha atubangan han totoo nga Dios, hi Jehova, ngan magpakita hin matinalahuron nga paggios ha iya ngan ha iya Pulong, an Biblia. Hi Nicholas, nga gin-unabi ha tinikangan, nagbuhat hini. Hiya nasiring: “Bisan kon puno hin problema an akon kinabuhi tungod han kagiyan ha droga ngan duro nga pag-ininom, mayada ako interes ha Biblia ngan naghingyap nga magkaada katuyoan ha kinabuhi. Inabot an panahon, nakaistorya ko an mga Saksi ni Jehova, ginbag-o an akon estilo-han-kinabuhi, ngan ginkarawat an kamatuoran.” Oo, mahimo kita magkaada matinalahuron nga paggios ha Dios ngan ha iya Pulong anoman an aton palibot.

Magpahimulos Tikang haKahikayan ni Jehova

Hi Josia mayada liwat hilarom nga pagtahod ha mga propeta ni Jehova. Diri la kay nagpakiana hiya kan propetesa Hulda kondi naimpluwensyahan gud hiya han iba nga mga propeta ha iya adlaw. Pananglitan, hi Jeremias ngan hi Sepania sagipo ha pagpahayag han mga panhimaraot tungod han idolatriya nga ginbuhat ha Juda. Nakaaghat gud kan Josia an pagpamati ha ira mensahe samtang nangalimbasog hiya ha iya kampanya kontra ha palso nga pagsingba!—Jeremias 1:1, 2; 3:6-10; Sepania 1:1-6.

 An “agaron,” hi Jesu-Kristo, an nagpipili han nagkakaurosa nga grupo han iya dinihogan nga mga sumurunod—‘an matinumanon ngan maaramon nga uripon’—ha pagtagana han espirituwal nga pagkaon ha igo nga panahon. (Mateo 24:45-47) Pinaagi han basado ha Biblia nga mga publikasyon ngan han kahikayan han kongregasyon, an uripon nga klase nagdadani han atensyon ha mga kapulsanan han pagpamati ha sagdon han Biblia ngan nagtatanyag hin praktikal nga mga suhestyon mahitungod han pag-aplikar hito ha aton adlaw-adlaw nga pagkinabuhi. Angayan gud nga gamiton naton an kahikayan ni Jehova ha pagbulig ha aton nga malamposan an bisan ano han nakagamot na nga diri-maopay nga mga batasan! Tikang ha pagkabata, hi Nicholas mayada duro nga kangalas ha awtoridad. Bisan han nahibaro na hiya han kamatuoran han Pulong han Dios, ini nga kaluyahan nagpugong ha iya nga mas bug-os nga mag-alagad kan Jehova. An pagbag-o hini nga pamatasan diri masayon para ha iya. Kondi, inabot an panahon, naglampos hiya. Paonan-o? “Pinaagi han bulig han duha masinabuton nga tigurang,” nagsaysay hi Nicholas, “ginkarawat ko an akon problema ngan nagtikang pag-aplikar han ira mahigugmaon nga sagdon tikang ha Kasuratan.” Hiya nagdugang: “Bisan kon usahay nagawas an gutiay nga pagrebelde, napupugngan ko na yana an akon rebelyoso nga kinaiya.”

Hi Malinda liwat naghahangyo han sagdon han mga tigurang kon naghihimo hin importante nga mga desisyon ha iya kinabuhi. Ha iya paglampos ha pag-abat hin kawaray-paglaom ngan pagbati hin kawaray-pulos nga nagtikang han batan-on pa hiya, an iya gintatagad nga labi nga birilhon amo an magkalainlain nga mga artikulo ha An Barantayan ngan Awake! Hiya nasiring: “Usahay mayada usa la nga parapo o pipira nga mga pulong—gutiay la nga bahin—nga nakakabantad ha akon. Mga siyam na ka tuig an naglabay, akon gintikangan an pagtirok han sugad nga mga artikulo ha kuwaderno basi masayon ko ito magamit.” Yana, an iya tulo nga kuwaderno nagsusulod hin mga 400 nga artikulo!

Diri, diri kinahanglan magin permanente nga mga biktima an mga tawo han maraot nga kinabuhi han pamilya. Pinaagi han bulig ni Jehova mahimo hira maglampos ha espirituwal. Sugad la nga an maopay nga gintikangan diri naggagarantiya han integridad han usa ka tawo, an maraot nga pagkabata diri nagpupugong ha usa ka tawo ha pagin mahadlukon ha Dios.

Han madiskobrehan an libro han Balaud durante han pag-ayad han templo, hi Josia ‘naghimo hin pakigsaad ha atubangan ni Jehova ha pagsunod kan Jehova ngan ha padayon nga pagsugot ha iya ha bug-os niya nga kasingkasing ngan ha iya bug-os nga kalag.’ (2 Kronikas 34:31) Ngan waray hiya manluya ha iya desisyon tubtob hiya mamatay. Sugad man hi Malinda ngan hi Nicholas determinado ha pagpabilin nga maunungon kan Jehova nga Dios ngan maglampos sugad nga mga tawo nga may integridad. Hinaot ikaw liwat magin determinado ha pagpabilin nga duok ha Dios ngan mag-alagad ha iya nga maunungon. Makakasiguro ka hin kalamposan, tungod kay hi Jehova nagsasaad: “Diri ka mahadlok, kay ako upod ha imo; ayaw kahulop, kay ako an imo Dios; ako magpaparig-on ha imo; oo, ako mabulig ha imo; oo akon ka aagang-agangon pinaagi han too nga kamot han akon pagkamatadong.”—Isaias 41:10, 13.

[Footnote]

[Mga Retrato ha pahina 26]

Bisan pa ha pagkaada maraot nga pagkabata, nangalimbasog hi Josia nga makilala hi Jehova ngan naglampos ha iya kinabuhi

[Retrato ha pahina 28]

An mga tigurang makakabulig ha imo nga malamposan an nakagamot na nga kinaiya

[Retrato ha pahina 28]

“An Barantayan” ngan “Awake!” makakabulig ha imo nga matipigan an integridad