Mga Pakiana Tikang ha mga Magbarasa

May kalabotan han pagkadisidido ni Jehova ha pagpasaylo han mga sala pinaagi han halad lukat, kay ano nga kinahanglanon para han mga Kristiano nga magsumat ha mga tigurang ha kongregasyon?

Sugad han makikita ha kahimtang ni David ngan Batseba, ginpasaylo ni Jehova an sala ni David, bisan kon seryoso adto, tungod han totoo nga pagbasol ni David. Han nakiistorya hi propeta Natan ha iya, hi David tangkod nga nagsumat: “Nakasala ako patok kan Jehova.”—2 Samuel 12:13.

Kondi, diri la kinakarawat ni Jehova an sinsero nga pagsumat han nakasala ngan ginpapasaylo kondi naghihimo liwat hiya hin mahigugmaon nga mga tagana basi mabuligan an nakasala nga mag-uswag ngadto ha espirituwal nga pagkatambal. Ha kahimtang ni David, an bulig iginhatag pinaagi kan propeta Natan. Yana nga panahon, ha Kristiano nga kongregasyon, mayada hamtong ha espirituwal nga kalalakin-an, o mga tigurang. Hi disipulo Jakobo nagsaysay: “Masakit ba an iba ha iyo? Tawagon niya an mga ansiano han singbahan, ngan mag-ampo hira tungod ha iya, nga paghirogan hiya hin lana ha ngaran han Ginoo: Ngan an pag-ampo han pagtoo makakaluwas ha masakit, ngan an Ginoo magbabanhaw ha iya; ngan kon makasala hiya, pagpapasayloon hiya.”—Jakobo 5:14, 15.

An eksperyensyado nga mga tigurang daku an mahihimo ha pagpara han kasakit han kasingkasing nga inaabat han nagbabasol nga salaan. Nangangalimbasog  hira nga subaron hi Jehova ha ira mga pakig-upod ha nakasala. Diri nira karuyag nga magin madarahog, bisan kon angayan an seryoso nga disiplina. Lugod, mapinairon nga gintatagad nira an mga panginahanglan han indibiduwal hito nga panahon. Mapailubon nga nangangalimbasog hira ha pagpahiuyon han panhunahuna han nakasala pinaagi han paggamit han Pulong han Dios. (Galasia 6:1) Bisan kon an usa nga tawo diri boluntaryo nga nagsusumat han iya sala, mahimo pa gihapon hiya mapagios nga magbasol kon ginkakaistorya han mga tigurang, sugad kan David han ginkaistorya ni Natan. Salit an suporta han mga tigurang nakakahimo han nakasala nga malikyan an peligro han pag-utro han sala ngan an seryoso nga mga resulta han pagin permanente nga parabuhat hin sala.—Hebreo 10:26-31.

Sigurado nga diri masayon an pagsumat ha iba hin mga buhat nga ikakaawod han usa ngan mangaro hin kapasayloan. Nagkikinahanglan ito hin karig-on ha sulod. Kondi, hunahunaa anay an mapipilian. Usa nga lalaki nga napakyas ha pagsumat han iya seryoso nga sala ha mga tigurang ha kongregasyon nagsiring: “Inabat ko an permanente nga kasakit ha akon kasingkasing. Gindugangan ko an akon mga pangalimbasog ha pagwali nga buruhaton, kondi nagpabilin an pag-abat hin pagkasalaan.” Inabat niya nga igo na an pagsumat ha Dios pinaagi han pag-ampo, kondi matin-aw nga diri, tungod kay naeksperyensyahan niya an mga pagbati nga pariho han kan Hadi David. (Salmo 51:8, 11) Mas maopay gud an pagkarawat han mahigugmaon nga bulig nga igintatagana ni Jehova pinaagi han mga tigurang!